Ke Aloha Aina, Volume II, Number 47, 21 November 1896 — KE KUAHAUA KOHO PERESIDENA NUI. [ARTICLE]

KE KUAHAUA KOHO PERESIDENA NUI.

Kakauia no "KE ALOHA AINA.") O ke Kuahaua Koho Peresidena Nui i kahea ia mai nei e ke Kakauolelo Nui o ka Ahahui Aloha Aina o ko Hawaii Paeaina, oia kekahi o na hana mua loa ano nui, a na poe aloha aina oiaio a pau loa, mai Hawaii a Niihau, e ala mai ai me na manao ulumahiehie o ke aloha aina onipaa mau, ke aloha lahui, aloha Alii, a aloha hoi i na pono o ko kakou noho'na lahui Kuokoa, i ae lokomaikai ia mai e na aupuni mana nui o ka honua nei, no lakou ka heluna kanaka pakahi ma na miliona, a oia pono oi kelakela i loaa ia kakou malalo o ka hoomalu a me na hookele ana a ko kakou mau Alii (Moi) mai a Kauikeaouli mai, (Kamehameha III) a hiki ia Liliuokalani, ka Moiwahine i hoomaewaewa ia e na mamo mikanele Kalawina mai Amerika mai; oia pono nae ka kakou e kakali nei me ka hoomanawanui, no aneane e piha na makahiki eha. A mamuli hoi o ka make ana o ko kakou Alakai, a Peresidena Nui hoi o ka Ahahui Aloha Aina o ko Hawaii Paeaina i aloha nui loa ia, ua hakahaka ia kulana Kiekie a Hanohano hoi i hookumu a hookahuaia maluna o na manao lokahi, no ke aloha i ka aina, ka lahui, a pela aku. Nolaila, ua hiki iho la kakou i kahi a kakou e ala like mai ai me na manao makee oiaio, a hooko mai i ka hana i kaheaia no ka lahui Hawaii, no ka poe a pau e kaohi nei iloko o ko lakou mau puuwai, i ke aloha i kakia paaia no ka aina hanau. A oiai paha, ua koho ia mai la na Elele o na Ahahui Aloha Aina Lala a puni na mokupuni, no ka hooko ana aku i kela kahea, no ka akoakoa ana aku ma Honolulu, e koho i Peresidena Nui hou, ma kahi o ka

Hon. Joseph Nawahi, ko Hawaii kanaka i aloha nui loa ia malalo iho o ka Lanl. Ae! He oiaio keia!! Aole he mea kei a pau wale ae. A owai auanei ka ka Lahui Hawaii aloha aina oiaio ma o na Elele la, e koho ai no keia kulana i hakahaka iho la? He ninau ano nui keia, a he mea pono ke akakele loa na Ahahui Aloha Aina a pau, i ka wae ana i ka Moho, a pela e ao aku ai i na Elele a lakou. He mau inoa ka na nupepa Lei Momi me Ke Aloha Aina i hoomaikeike aku nei imua o ka lahui, no ka wae ia mai, a mailoko ae oia mau inoa, e wae iho ai kela a me keia Ahahui Aloha Aina, a hooholo iho i ka mea oi o ke kupono; alaila, ao aku i ka lakou mau Elele, oia ka Moho e koho ai ma kela la 28 o Nov. nei, 1896. No ia mea, ke waiho aku nei au i ka'u mau wahi hoomaikeike uuku, no ka mea kupono e kohoia i Moho Peresidena Nui no ka Ahahui Aloha Aina o ko Hawaii Paeaina. 1. I kanaka a wahine paha, ua hiki ke olelo me ka maopopo ma ka olelo haole, a he hiki ke heluhelu a unuhi mai, i na manao, mai ka olelo haole mai a i ka olelo Hawaii me ka pololei. 2. I kanaka a wahine paha, aia iloko o kona puuwai ke| aloha oiaio i kona Lahui, kona Moiwahine, kona Aina hanau, a me na pono o ka noho Kuokoa mau ana o ke aupuni o na Paemoku nani o Hawaii, a me ka Hae Karaunu o ka Noho Alii o Hawaii nei. 3. I kanaka a wahine paha, aole loa e hiki ke kuai ia me na oihana aupuni Repubalika o kela me keia ano, aole hoi o ka hanohano a me ka lilelile o ka waiwai aihue, a pela aku. 4. I kanaka a wahine paha, ua aloha ia e ka lahui Hawaii, a ua aloha mai hoi oia i kona Lahui me ka uhane a pau. O keia ka mea oi aku. Nolaila, e wae pono mai e na Hui Aloha Aina a kauoha mai i na Elele a oukou, me ke ao pono mai, aole e pupuahulu i ke koho ana; aka, e akahele malie me ka nahenahe, a na ka Haku o ka Lani me ka honua nei, e alakai ia kakou iloko o ke kuikahi, ma ke alanui o ke Aloha Aina oiaio. E paulele a hilinai aku i ko ke Akua lokomaikai a me Kona aloha wale mai; pela e loaa ai ia kakou ka lanakila hauoli, iloko o keia hana nui a kakou. Me ke aloha no. KANILEHUA. Hilo Bay, Nov. 14, 1896.

O Libornia a me |ohn Brown na hoa i koe aku la o ka Pauli Puhiohe Lahui i Amenka. Ua make hikiwawe o Daniela o Awaawa, mamuli o ka inu nui ana a oi aku mamua o ka mea kupono.