Ke Aloha Aina, Volume III, Number 37, 11 September 1897 — HAWAII MA AMERIKA. Pau ole ka Epa o ka poe Hoohui Aina. KA BANA A NA LEDE. Elua Pule o Kalani ma Kapalakiko. [ARTICLE]

HAWAII MA AMERIKA.

Pau ole ka Epa o ka poe Hoohui Aina.

KA BANA A NA LEDE.

Elua Pule o Kalani ma Kapalakiko.

Ma ke ku ana mai nei o ka mokumahu Copatika ma ke awakea Poakolu nei, i loaa mai ai ia makou na nuhou hope loa mai Waslnetona mai, e like me ka makou leta i loaa mai, e hoopuka ia aku nei no ka pono o ko makou poe heluhelu a me ka lahui, penei iho ua leta la. Wasinetona, D. C. Augate 27, 1897. ***** Aloha oe: Ua loaa mai no kau leta hope loa mai nei, a ua hauoli nui no ka manao i ke kulana kupaa o ka lahui, he mea no hoi ia na ka poe i holo aku i Hawaii a ike i ke au nui a me ke au iki, o ke kulana o Oiwi ponoi o ka aina, a lakou e kaena nei, he lahui kupaa a hoolohe i ka leo a ko lakou mau Alii, a ua oi aku ko lakou makee nui i na Alii mamuli o ko lakou mau pono iho, he hoolohe wale aku no ka makou, aia no nae ilaila ka iini a loko, ua lilo no hoi ia mau olelo ku i ke aloha, i mea e hoomama ae ai i na la o keia noho ana i ka aina malihini. Pau ole no hoi ka epa o ka poe hoohui aina, ka noke no i ke apuhi, ke hoolaha nei na nupepa, e hooulu ana na Iapana i ka hoohaunaele, ua hele ka poe hoohui aina a kau ka weli ia lapana, ua manao lakou o ka paipai mau ia mau manao, he mea ia e hookoia ai ko lakou makemake, aka, he mau pepeiao ko ke aupuni o Amerika, a he mau maka no e ana, he maikai ka Papa Konane a ka lahui e waiho nei, i hakalia wale no ka hoonee o na puu iliili i ka hoea mai o ke Kau. He oia mau no ka poe koikoi e kipa mau mai nei e ike i ke Alii, ua kono ia mai ke lii a me Kona mau hoahele no ka hele ana aku e makaikai i ka Bana Puhiohe ana wahine (Lede) i Glen Echo, he wahine no

ko lakou alakai, he 24 ko lakou nui, he poe kaikamahine opiopio wale no, i keia Bana a'u i ike ai i kiia (tune) o ka pahu e like me ke ki ana i na pila vaiolina, he maoli ka nanaina a me ka lakou paani ana, aka, aole no e loaa aku na Kahuli o kuu aina hanau, he kane hoi lakou a he wahine hoi keia. E hele hoomaha aku ana ke Alii ma na Kaiaulu o keia aina nui, a kipa loa aku no Kapalakiko, Kaleponi, no elua pule a hoi hou mai, e haalele ana ia nei ma ka la 6 o Sepatemaba, a e hiki ana i Kaleponi i ka la 11, mamuli o na leo kono lehulehu. I ka hooki ana i keia mau lalani, e hoolauna aku i ka lahui, e mau ke kupaa a me ka lokahi. A na ke Akua e kokua ia kakou a pau. Me ke Aloha. * * * * *