Ke Aloha Aina, Volume III, Number 37, 11 September 1897 — WELA KA HAO I NA ALAKAI O KA LAHUI. [ARTICLE]

WELA KA HAO I NA ALAKAI O KA LAHUI.

O ka akoakea ana ae o ke anaina o na makaainana Hawaii, ma ka halawal makaainana i kahea ia e na nupepa, a me na palapala liilii hoolaha, ma ke Kuea o ka Paalii, ua oi aku la mamua o ka huina o ka poe kupono i ke koho balota o ke aupuni Repubalika o Hawaii, e hoike mai ana hoi i ko ka lahui kupaa mau, naueue ole, a ouni ole hoi mamuli o na olelo haanui a keia poe, he pomaikai ke loaa mai ana ia kakou, mamuli o ka hoohui ia ana aku o na Paemoku o Hawail malalo o Amerika Huipuia, ke kumu hoi i ala mai ai o na manao kue o ka lahui Hawaii mai kinohi a hiki i keia la. Ua hoopihaia ke kahua akea e like me ka makemake o na palapala hoolaha, i hele aku iwaena o ko ke kulanakauhale nei mau kupa, a me he mea la, ua kipa pu mai no me kekahi poe mai na kuaaina mai, a o ka makou wale no e hauoli nei, oia ko makou ikemaka ana aku iloko o na helehelena o na kane, na wahine a me na keiki, i

ka ulumahiehie mau o na manao aloha aina iloko o ko lakou mau puuwai, me he mea la, e hoike okoa mai ana no i ko lakou aina hanau, ko lakou one oiwi mai ka po mai a me ke kuokoa mau loa o na Paemoku o Hawaii aloha.