Ke Aloha Aina, Volume III, Number 48, 27 November 1897 — Page 7

KE ALOHA AINA

 

KE ALOHA AINA, POAONO, NOVEMABA 27, 1897.

 

 

KA LA HOALOHALOHA O KA

POE AMERIKA.

 

 O keia ka la mua loa o ko ka Peresidena McKinley hoau ana iluna o ka noho ana Poo a mana nui hoi iluna o ka lahuikanaka holookoa o Amesika Huipuia, a malalo hoi o kona mana, ua kuahaua ae la oia, e malamaia ka la 25 o Novemaba, oia hoi keia la Poaha, i la hoalohaloha i ka lokomaikai o ke Akua, ma na wahi a pau a na Amerika i noho ai a puni ka honua.

 Ua hooko io ia kela olelo kuahaua akea, a ua ike ia aku na kilepalepa hae o na moku, a me ko na Kanikela e welo haaheo mai ana i ke aheahe lau makani. Ua paniku ia ae hoi na hale aupuni, a ma ka hora 10 hoi i malamaia ae ai he mau anaina haipule; a ma ka hora 12 ponoi i paniku ae ai na hale hana, no ka malama hapa ana i ke koena o na hana o ka la.

 

 

UA HALA O KAHALEWAI.

 

 Ma ka Poakolu nei i pauaho mai ai o Mekia J. H. Kahalewai i keia noho kino ana, a kuu aku la ke aho no ka manawa hope loa ma kona wahi noho ma Apua, me ka haupu mua ole ia, ua kokoke mai kona hopena. He kanaka nui oia imua o ke alo o ka Moi Kalakaua, malalo o ke kulana he Mekia no na pualikoa o na koa kumau o ke aupuni. Mahope mai, ua noho wale no oia, me ka hele ana e hooikaika nona iho ma na hana e pono ai ka noho ana. He wahine a me na keiki a ka wahine, na moopuna lehulehu ke noho u aku nei mahope nona. He aihue ka make no na kanaka a pau maluna o ka honua.

 

 

 Mawaho o Makiki ka hookuu peku popo i keia auina la mawaena o Punahou a me ke Taona.

 

 Aia ke kanawai koa ke hoomalu la maluna o ke kulanakauhale o Rio Janeiro mamuli o ka hoao ia ana e powa i ke ola o ka Peresidena o Berazila.

 

 Aia ma kahi o L. B. Kerr, kekahi ano lole nona ka inoa Kaiulani Lawn, eia oia ke kuai hoopau nei i kona mau waiwai mamua o ka hiki ana mai o ke Karisimaka i wahi e loaa ai he kowa no na waiwai hou. E hele ae malaila.

 

 E hoomanao i ka Paina luau nui e wehe ia aku ana ma ka la 11 o Dekemaba ae nei, a e hoomaopopo e hoi i na wahi mea e loaa ana i keia mau la no ke kokua ana mai ia hana nui no ka pomaikai o na Elele a ka lahui.

 

 

Nuhou Kuwaho.

 

 Ma ke ku ana mai nei a ka mokuahi Coptic mai Kapalakiko mai, i loaa mai ai ia makou na nuhou like ole, a no ka pomaikai o ko makou poe heluhelu ke hoopuka nei makou penei:

 

KE KOI POHO A IAPANA MALUNA O

HAWAII.

 Victoria, B. C., Nov. 16. He $200,000 ma ke gula, ke koi poho a Iapana maluna o Hawaii, ma ke ano no ke pani ana aku i kona mau hoolilo e pili ana no kela kumuhana limahana. Ua komo ma keia koi ka lilo o na limahana i ae ole ia ko lakou komo ana aku, me na poho o na hui nana lakou i hoouna, a me ka lilo o ka hoouna ia ana i mokukaua ma Honolulu. Ua olelo ae na nupepa Iapana, he koi poho oluolu loa keia.

 

PIHOLO KEKAHI MOKUKAUA O IAPANA.

 Victoria, B. C., Nov. 16. Ua ili ka mokukaua Iapana Euso, ma kekahi puu pohaku e kokoke ana i Nagahama, mahope o ka hookui ana me kekahi moku okoa aku i ka wa e paikau ana, a ua piholo ma ka la 29 o kela mahina aku nei. O keia ka moku hao mua loa o Iapana. Ua kapiliia oia ma ka makahiki 1877, he 3777 tona kona kaumaha, e lawe ana he 12 pu nunui. Aole he mau ola i make, a ua manao ia, ua hiki no oia ke hoolana hou ia me ka nui ole o ka hana.

 

PUHEE NA PAKE I NA GEREMANIA.

 Nu Ioka, Nov. 17. He lono telegarapa kai hoea mai i ka nupepa La mai Sanahai, Kina mai, e olelo ana: O Adimarala Diederichs, e noho alakai ana no na mokukaua ma na kai o Asia, ma ka hiki ana aku ma ke kaikuono o Kiaochora, ma na kapakai o Shantung, ma ke kauoha ia ana paha e huli pono no ka pepehiia ana o kekahi mau kanaka Geremania, ua loaa aku la ia lakou he ekolu papu i piha pono me na pake. Ua hoohuli aku la oia i na pukuniahi o kona mokukaua no kahi a na papu e ku ana, a hoouna aku la hoi i ke alihikaua nui o na Pake e haalele koke iho ia wahi maloko o ekolu hora, a mahope iho hoolele aku la oia he 600 koa me eono pukuniahi. I ka wa i ike ai o na Pake he manao io hana ko na Geremania ua pau aku la i ke auhee no hope o na puu, a iloko o ka manawa pokole ua lawe pio ae la na Geremania i ke kahua o na Pake a ua hukiia ka hae Geremania maluna o na pahu hae iloko o na kipu aloha ana a na mokukaua.

 

HOEA KA HAKAKA MA NA WAHI KOKOKE

I HAVANA.

Havana , Nov. 16. He lono kai hoea mai i ka nupepa La, e olelo ana, mai ka hoea ana mai o Generala Blanco a hiki i keia wa, aole he la i hoonele ia me ka hakaka ole ana, ma kahi kokoke loa i ke kapitala, he oi loa aku ka maka’u ole o na Cuba i keia wa i ko ka wa ia Weyler.

 

 

HE MOOLELO WALOHIA.

 

-:NO:-

 

ALANADELA

 

Ka Wahine Hoopahaoha o ka

Aahu Keokeo

 

- A I OLE -

 

Ka Loea Hookani Pila o ke

Kulu Aumoe.

 

 Ia wa koke no ana i hoomaopopo ai, aole keia he mau kapuai lio okoa aku no kekahi mau mea okoa, aka, no kona mau enemi no ia. Ia manawa no oia i kuupau aku ai i ka holo o kona lio, a iloko o na minute pokole wale no, ua hiki iaia ke ike aku i kona mau enemi e ahai la ka pupuhi mamua.

  Hoomau aku la oia i ka holo o kona lio no ka wa hope loa, a aia no hoi oia ke hookokoke mau aku la mahope o na hololio e holo la mamua ona.

 A hala hou ae la he mau minute, ua pili aku la ka lio o ka wahine me ka uhi maka-eleele mahope o Rodufa ma, a i ka wa a na hololio e ahai la mamua i mahui mua ole ae ai eia ko lakou make ua kokoke ua hapai ae la ua wahine nei i kana pahikaua, a uhau iho la i kekahi o na kauwa Rodufa, a i ka wa i haule iho ai o ka pahi maluna o kona poo me ka ikaika nui, oia no ka wa i mahae ia ae ai o kona pauku kino i elua apana, a haule aku la hoi oia iluna o ka honua me ka lele loa ana ae o kona hanu hope loa.

 Aole i hookaulua iho ua wahine nei malaila, aka, hoomau aku la no oia i ka uhai ana mahope o na kanaka elua i koe iho, oia hoi, o Rodufa a me kana kauwa.

 Ma keia wahi, ua emi liilii mai la ka ikaika o ka lio a ka wahine e kau ana, kani ae la kona pukaihu, a i ka wa a ua wahine nei i mahui mua ole ae ai o ka hopena ia o kona lio e maalo ai ma ia mau kuahiwi malihini ia laua ua naka haalulu ae la oia a pahu aku la iluna o ka lepo a no loko o na sekona pokole wale no, ua lele loa ae la kona hanu, ua hoomaopopo iho la no oia, ua make kona lio mamuli o ka loaa ole he wa hoomaha iaia, me ka naau kaumaha kulou iho la ke poo o ua wahine la a helelei iho la kona mau waimaka no ke aloha i kona lio.

 Maanei e haalele iho kaua i ka wahine me ka uhi maka eleele e kaumaha ana no kona lio, a e nana aku hoi kaua ia Rodufa me kana kauwa e lawe la i ka kaua Alanadela no ke alahele i maopopo ole ia kakou.

 I ka ike ana mai o Rodufa i ka hina ana o ka lio o ka mea ana i makau ai ilalo o ka honua, akahi no oia a ike ia aku he mau helehelena hauoli ke pahola ana maluna ona i kona wa i hoomaopopo ae ai, ua palekana laua mai ka inaina o ka wahine ana i weliweli loa ai, a ia wa no hoi i lohe ia aku ai kona leo aka henehene e wawalo hele ana iloko o ka pouli.

 Aole oia i kaohi mai i ka holo o kona lio, aka, ua hoomau aku la no oia me kana wahi kauwa hookahi i koe, e hii ana hoi i ka kaua Alanadela, he mile a oi keia hoomau ana aku o lakou, a i ko lakou hiki ana ma kahi hihipea o na laau, akahi no oia a kaohi mai i ka holo o kona lio.

 Lele aku la ua Rodufa nei no lalo o ka honua, me ka ukali pu ia aku e kana kauwa, a me ka leo i piha me ka hauoli, no ka loaa ana iaia he palekana mai ka wahine malihini mai, ua pane aku la oia i kona hoa penei:

 E kuu kauwa hookahi i pakele mahunehune mai nei mai ka inaina mai o kela wahine ikaika lua ole, ano, ua palekana kaua a me @ @ ua pio mai kona inaina mai, nolaila, e ho-a ae i puu ahi maanei no ka olala ana aku i ko’u mau lima a me na wawae i hele a maeele i ke anu.

 Ae, wahi a kana kauwa, a ia wa no hoi i hele aku ai oia e hooko elike me ke kauoha a kona haku, a iloko o ka manawa pokole, ua pii ae la ka wena ula o ke ahi iloko o ua ulunahele la.

 I ka a pono ana ae o ke ahi, ua nee mai la oia no kahi o ke ahi a hoopumehana iho la hoi i kona kino i hele a maeele i ke anu, no Alanadela hoi, aia no ke pupue pu la i ke anu, aka, aole nae e hiki iaia ke hoike mai i kona mau poino ia Rodufa, no ka mea, ua maopopo no iaia, he mau hana hoomaewaewa ke hana ia mai ana nona, ina e hoike aku ana oia i kona mau popilikia.

 A i keia wa no hoi, i ike ia aku ai ua Rodufa nei e kulou ana kona poo ilalo me he mea la, aia he hana nui ke lauwili la iloko o kona kino, a hala ae la he manawa loihi o keia kulou ana, aea ae la kona poo iluna a me ka leo o ka mea i piha i ka inaina, pane mai la oia penei:

 E lawe mai i kela wahine lapuwale imua o’u, a e lawe pu mai hoi me ka paa lole a’u i kauoha aku ai ia oukou e lawe mai, no ka mea, i keia po, e hoolilo aku ana au i keia wahine i kane, i wahi hoi e na iki ai o ko’u inaina, no ka mea, mamuli au ona i hoauwana ia mai ai iloko o keia ululaau malihini, a haalele aku la hoi i ko’u mau waiwai mahope no ka hoolilo ia ana i moepuu na ka inaina o ko’u mau enemi.

 I ka hooki ana ae o Rodufa i kana kamailio ana, aia hoi, iloko no oia manao pokole ua ike ia aku la ua kauwa nei, e hapai mai ana ia Alanadela a mamua o ke alo o Rodufa hookuu iho la iaia ilalo.

 He ku i ke aloha na nanaina ehaeha e hekau ana maluna o Alanadela me na owili lauoho e luhe ana ma kona mau kipoohiwi, a o na waimaka hoi o ke kaumaha e hiolo ana ma kona mau papalina, aka, oia mau hiohiona ku i ka walohia a pau, he mea ole wale no ia i ka manao o Rodufa.

 Me na maka i piha me na kuakoko o ka inaina, alawa mai la oia maluna o ka oiwi kino nani o Alanadela a me ka leo o ka mea i noho uhane aloha ole ia, pane mai la oia me ka leo makona, penei: E ka wahine nana i hoauwana mai ia’u iloko o keia waonahele mehameha kanaka ole, i keia po e oki aku ana au i kela mau owili lauoho e kuuwelu la ma kou mau kipoohiwi, e hoaahu aku ana hoi ia oe me ka aahu o na kane, a e hoolilo aku ana hoi au ia oe i keikikane i mea hoi e hoomaalili iki ia iho ai o kou inaina maluna, aka, e hoomanao nae aole i pau iho la ka’u mau hoomaewaewa ana ia oe.

 Ma keia wa i loheia aku ai ka leo uwe o Alanadela i piha me ke kaumaha e noi ana ia Rodufa e hookoe ia kona mau owili lauoho, a ua lawa kona hoomaewaewa ia ana ma ka hookomoia ana i ka aahu kane, a he ku maoli i ke aloha kona mau hiohiona ma ka ike aku.

 

 

HE WAHINE I HOOPOINOIA.

 

 He wahine i hoehaeha ia me ka ma’i iloko o na aa. --- Aole e hiki i kona waha ke oni. --- Ua hiki ole i na kauka ke hoola iaia.

 

(Mai ka nupepa Watchman mai o Columbia, La.)

 

 O Mrs. Charles Fielding o Columbia, Louisiana, he wahine oia na kekahi loio kuonoono o ia kulanakauhale. Ua lohe he mea huli mea hou i ka hoola ia ana o Mrs. Fielding, mai kekahi ma’i i loohia i kona mau aa o ka puuwai a me ka aoao ma ke ano pahaohao, a ua manaoia he nuhou maikai keia no ka nupepa nolaila, ua kipa aku la oia e ike ia Mrs. Fielding. Ua hoike mai la oia i kona moolelo penei: He luahi au na ka ma’i iloko o kuu puuwai a me kuu iwi aoao, no kekahi mau mahina loihi. No umi makahiki i hala ae nei, ko’u ike mua ana i ka eha o lalawe ana i kuu poo a me kuu iwi aoao, no ka nui o ko’u ehaeha, ua hiki ke loheia ko’u leo uwe no kekahi wahi mamao. He mopine wale no ka laau nana i hooluolu mai ia’u. He hoea mau keia eha ia’u, a no elua a ekolu la e hoehaeha ai ia’u.

 Aole e hiki ia’u ke hele, a i kekahi wa hoi, ua hiki ole i ko’u waha ke hamama. He lehulehu wale na kauka i hele mai imua o’u, aka, aole nae he hookahi o lakou i haawi mai i wahi pono no’u. Ua kokoke e pau loa ko’u manaolana, i ko’u wa i heluhelu iho ai i ka hoike a Mrs. Sally Fays o Rouston, La., no ka mea e pili ana i ka Hua’le Akala a Dr. Williams, a ia wa au i hooholo iho ai no ka hoao ana. Aole i pau ka pahu mua, ua emi iho la ka eha, a i ka pau ana o hapa kakini pahu, ua oluolu loa au. Ua maopopo loa ia’u na hua’le i hoopomaikai mai ia’u, a e hoike aku hoi pela maloko o ka nupepa.

 O ka laau a Dr. Williams, ua hana maikai mai oia ia’u, mamua o na laau e ae a’u i hoao ai.

 O ka Hua’le Akala a Dr. Williams ua haawi mai oia i ola hou, me ka hoomaemae ana i ke koko, me ka hoihoi hou ana mai i ka ikaika. O na ma’i o na wahine a pau, ua hiki ke hoola ia. O ka ma’i o na kane, mamuli o ka loaa ana he manawa kupono ole e hiki ke hoomaha, ua hoolaia. O ka laau a Dr. Williams ma ka mole ia e hookui ai, me ka haawi ana mai i na ola kino maikai. O na ma’i lolo, kikala haneenee, rumatika, alaala, puupuuliilii, a pela aku, ua hiki loa i keia hua’le ke hoolo ia. O na helehelena haikea o na wahine a me na kane, ua hiki loa ke hoola ia.

 Kuai ia e na poe kuai laau a pau.