Ke Aloha Aina, Volume IV, Number 1, 1 January 1898 — E AI PAKIKO, HE WA NELE KEIA. [ARTICLE]

E AI PAKIKO, HE WA NELE KEIA.

Eia ko kakou mau la hauoli, ua kokoke loa imua o ko kakou mau maka, a nolaila, ua manao makou e hoonaauao mau aku i na makamaka heluhelu, a me na poe mawaho ae o lakou, mau uhaai i na wahi mea i loaa i ko kakou lima, oiai, ua maopopo no ia kakou ke kulana e ku nei iloko o ka aina i keia la, he hune a me ka nele, a o ka hana pono wale no ia kakou. oia ka noonoo pono ana i na mea e hoolilo ai no keia mau la nui a kamahao o ka aina. A oiai hoi, mamuli o ko makou kuluma i na makahiki i hala ae nei, o na hoolilo ana, ua oi hewahewa aku ia mamua o ka mea kupono i kekahi ohana hune a nele ke kaana ia. E lilo ana no paha keia mau olelo a'o makou e kauleo mua aku nei, i mea hoehaeha i ka manao o ko makou mau makamaka heluhelu, aka, e hoomanao iho na makamaka aole no hai ka makou a'o ana aku, aka, no ka poe no o ko makou lahui e noho ana iloko o ka nele, no lakou no ka makou e a'o aku nei. O ke kumu nui no hoi i ulu mai ai o keia manao ia makou, oia no ka ike mau ia o kekahi poe e hoolilo kuahewahewa ana i na wahi kenikeni no na mea ona wale no, e laa ka waina, ke gini, ka okolehao a me ka bia suaipa, a me he mea la, o ka oi loa aku no paha ia, a ua hiki no ke hooiaio ia, aia iluna o laila ke akenui o kahi poe, i manao ole ae, he hopena ko ia hana e hoea mai ana. Nolaila, e ai me ka pakiko, aia no he hopena pomaikai ko ia poe, a oia ka makou e hoike aku la, o ka lohe ke ola, a o ke kuli no ka meke.