Ke Aloha Aina, Volume IV, Number 23, 4 June 1898 — Page 1
| This text was transcribed by: | Kaui Sai-dudoit |
| This work is dedicated to: | Kamehameha Paiea |
KE ALOHA AINA.
UA MAU KE EA O KA AINA I KA PONO.
HOOKUMUIA I MEI 20, 1895.
BUKE IV. HONOLULU, POAONO, IUNE 4, 1898. HELU 23
KA NUPEPA KE ALOHA AINA.
--------
E hoopuka mau ia aku ana mai ka Poakahi a ka Ooalima o na pule a pau o kela a me keia mahina.
Ka Uku Pepa he 20 keneta o ka pule. No ke kope hookahi, he 5 keneta.
E loaa no ka pepa mai ke Keena aku o KE ALOHA AINA a mai ka lima aku o na Luna Lawe Pepa.
E pai ia no na Olelo Hoolaha, na Kanikau a me na Mele Inoa, me ke Dala Kuike. Aole nupepa ma ka owili pakahi e hoonua ia ke ole e hookaa mua ia ka uku pepa
E hoouna pololei mai i na Nuhou na Kumumanao, na Olelo Hoolaha, na Kanikau a me na Mele Inoa i ka Lunahooponopono o keia Pepa.
Aole loa e hoopuka ia a hoolaha ia kekahi manao ma na kolamu o keia Pepa, malalo o kekahi inoa kapakapa ke ole e hooike mai i ka Lunahooponopono i kona inoa ponoi.
Ka Nupepa Puka Pule
Ke Aloha Aina.
Hookahi makahiki $2.00
Eono mahina $1.00
Ekolu mahina .50
Hookahi mahina .20
EMMA A. NAWAHI.
Puuku o
Ke - Aloha - Aina.
EDWARD L. LIKE.
Lunahooponopono a Hope Puuku
S.P. KANOA.
Hope Lunahooponopono.
O na kauoha Nupepa me na hookaa Dala, e hoona pololei mai i ka Puuku ma Honolulu.
-------------
Nuhou Kuwaho.
------------
AOLE E HIKI KE KOMO AKU ILOKO O CUBA.
Tampa, Mei 16. O Kenerala Shafter, ka mea e pani ana ma kahi o Kenerala Wade i kona wa e kaawlae aku ai, ua olelo ae oia i keia auina la i kona wa e kamakamailio ana. Eia makou iloko o ka oihana e hele ana no Cuba, aka, aole nae makou e haalele iho ia Tampa a hiki i ka wa o na moku Sepania e hoopoino ia ai, a i ole e weluwelu liilii ai ahiki ole hoi ke haawi mai i na hoopoino ana. O ko makou nee ana, e nana ia aku ana ia ma ke ano o ko lakou hana ana.
KIPOKAIA O SANTIAGO DE CUBA.
Nu Ioka, Mei 18. Ua hoopuka ae ka nupepa La he nupepa kuikawa me keia mau lono malalo iho; He ekolu mau mokukaua Amerika i kipoka aku i ke Kakela o Moro ma Santiago de Cuba i keia la. He wahi poino uuku wale no kai hana ia. Aole i loaa mai na lono oiaio no keia hoouka kaua ana.
UA MAKAUKAU O HAVANA NO KEKAHI HOOUKA KAUA LOIHI.
Kulanakauhale o Mekiko, Mei 14. O na Sepania e noho nei, ua hoopuka ae la lakou i kekahi nuhou i lawe ia mai nei e ka Lafayette i Vera Cruz. Ua hoomakaukau ae o Kenerala Blanco no ke kaua i upu ia e hoea mai ana ma o na aumokukaua a me na pualikoa o Amerika Huipuia. Ua hoolako ia ke kulanakauhale a me na papu me na lako ai no ekolu a i ole eha mahina. Ua manaoia aole e hiki i na Amerika ke noho loihi iho i ka wa wela a me ka wa ua.
Ua hoopuni ia o Havana me na auwaha no kanakolu mile. O ka nui o na pualikoa maloko o ka pakaua he 70,000, a he heluna no e like me ia, aia iloko o ka aina kahi i hakaka ai me na poe kipi.
Aole he poe i maopopo ma Havana i na poino o Sepania ma Manila, koe wale no na luna aupuni kiekie Sepania, a o ka lono i manaoia, ua haulepio na Amerika. Ua hookapu ia na nuhou e lawe hele ia ana o kela a me keia ano e Blanco. Ua manaoia maloko o Havana e poino ana na pualikoa Amerika, a e loihi ana hoi keia kaua no hookahi makahiki.
Aia no na poe o Havana ke noho la me na manao hauoli, a o na hale keaka hoi, aia lakou ke hoikeike la i na kii hoohenehene o Amerika.
HE HOOUKA KAUA HAHANA.
Wasinetona, Mei 14. Ua loaa mai nei i ke Keena Kaua Moana, he lono kuikawa mai ia Komodoa Remey mai ma Ki Komohana e hai mai ana i na hoike no kekahi hoouka kana hahana i malama ia ma Cienfugos, ma kela Poakolu aku nei. Ua hoike mai e like me ka Kapena McCall o ka mokukaua Amerika Marblehead i hoike aku ai iaia, he hookahi koa marina i make o ka Marblehead nona ka inoa o Herman Reagan, a he lehulehu na poe i hoeha ia. He lehulehu no na poino i loaa i na Sepania, o ke kumu o keia hakaka i ulu mai ai mamuli no ia e ka hoao ana o na Amerika e oki i na uwea telegarapa maloko o ke awa, a ua hooko ia no hoi ko lakou makemake.
HOPOHOPOIA KE OLA O NA MISIONARI.
Vitoria, B.C., Mei 18. O na nuhou a na ohua a ka mokuahi Aorangi i lawe mai nei, mai Caroline mai. Ua olelo ae lakou he nui na misionari Amerika ma na mokupuni o Carolina, kekahi hoi o na paemoku a Sepania e hoomalu nei. Oiai no i ka wa o ka maluhia e hoike mai ana no na poe Sepania e noho ana malaila i ko lakou manao lili i na Amerika, a i ka wa e hoea aku ai o keia mau lono kaua ilaila, he mea kanalua ole e luku ia ana na misionari, a e hoohiolo ia ana hoi na luakini. Ua noi ia aku na misioanri e haalele iho ia laila maluna o ka mokuahi Archer e holo ana no Auseteralia mamua nae o ke poha ana ae nei o ke kaua, aka, ua manao no nae lakou na hiki no ia lakou ke hoomalu me na poe i hoolilo ia lakou i Karistiano, a hoomau aku no hoi i ka lakou hana.
PIHA INAINA I KA HAE SEPANIA.
Seattle, Mei 18. He puulu o umikumamaha hope makai nui kai haalele iho ia nei no kahi taona lua nanahu o Issaquah, he umikumamalima mile ka mamao mai anei aku. No ke kue ana aku i na hanaino e hana ia ana maluna o W.L. Newton, ka luna nui o na maina o Gilman.
Ua huki ia ae he hae Sepania maluna o ka halekuai o ka hui, a ua ahewaia o Newton no keia hana ana. Ua kauoha ia aku oia e na komite o na lua maina e haalele iho i ke taona. Ua olelo ae oia i keia la, aole oia e haalele iho ana i ke taona. Ua olelo ae oia i keia la, aole oia e haalele iho ana i ke taona a na ka make e hookaawale aku iaia. Ua piha ia na kanaka me ka inaina, a me he mea la e hooko aku ana no lakou i ko lakou huhu makawelawela loa ia Newton i keia po.
O ka hoea ana aku o na makaike kumu i puka koke ole ae ai o ka hakaka ana, aka, ke pii mau ae la nae ko lakou inaina a hiki i keia aumoe, aole i kualilii mai na manao pioo.
HE EHA WALE NO SEPANIA I MAKE.
Viena, Mei 13. O na mea hou i loaa mai nei, oia no ka oili ana ae la he haunaele mawaena o na koa a me na makaainana mawaho aku o Milan. O na lono i hoike ia mai Luino mai, ua oi loaa ae muao ka mea i hoike mua ia ai. O ka Duke a me ke Duke wahine o Saxe Meiningon, ua pakele mahunehune mai ko laua ola mai na lima mai o ka poe hoohaunaele a aia ke waiho mokaki la na poe i make ma Pisa, mahope o ke kipu ia ana e na makai.
He 3,000 poe i komo pu aku ma ka haunaele o Leghorn. ua hamo ia aku na puka o na halepule me ka aila, me ka manao ana e puhi aku ia lakou i ke ahi, aka, ua kue ia nae ia manao o lakou. Ua olelo ia ae, ua manao ke aupuni he 100,000 koa mai na apana mai o Milan, no ka malama i ka maluhia.
UA MANAO IA E ULU MAI ANA HE HAKAKA.
Pointe-a-Pitre (Gruadalupe), ma Haiti ae, Mei 14. He hakaka mawaena o Farani a me Beritania e manao ia nei e puka ae ana. Ua kauoha aku na luna aupuni i na pualikoa e hoolulu nei ma Basse Terre e nee koko aku me ka hakalia ole no Martinique me ka lakou mau pu a me na poka a pau.
AOLE E HIKI KE HOOLELE IA NA KOA.
Nu Ioka, Mei 11. He lono telegarapa kai hoea mai nei i keia pepa mai Havana mai e olelo ana he mokukana Amerika kai lele kaua aku maluna o Cienfuegos i keia kakahiaka, a hoao mai la no elua manawa e hoolele mai i na koa a me na lakou kaua, aka, ua hoauhee ia aku lakou. A oiai, nae ua hoeha ia he 14 Sepania iloko o ewalu hora o keia hakaka ana. Ua hoopoino mai na Amerika i ka hoohui telegarapa, a ua hoohui pu mai hoi ua lono la he lehulehu wale o na Amerika i hoopoino ia.
E HOEA MAI ANA KA MOKUKAUA, MONTEREY.
Wasinetona, Mei 21. Ua hoolaha ae ke Keena Kaua i keia mau huaolelo: O ka mokukaua Amerika Monterey, ua kauohaia aku ia oia e holo aku no ka hoopuipui ana aku i na aumokukaua Amerika ma Manila. E haalele koke iho ana oia mahope koke iho o ke Kaletona.
----------------------
KA LA 11 O IUNE.
----------------------
Ma ke kakahiaka Poaono e hiki mai ana, Iune 11, e malamaia ana he mau lealea 1 eihei lio mawaho o Kapiolani Paka, ma ka hora 9 ponoi e hoomaka ai na lealea. He umikumamakahi ka nui o na heihei e malamaia ana, aka, aole nae he mau lealea kaa hehiwawae kekahi i hookomo ia maloko o ka papa kuhikuhi. E paa ana na hale aupuni a me na hale oihana no ka hoomanaoia la.
-----------
Ua haawi ae na poe hoolaha nupepa namu o ke kulanakauhale nei, he paina no na poe kakau nupepa o Amerika i hoea mai nei maluna o ka mokukaua Kaletona ma ko lakou alahele e holo loa ana no lalo o Manila, mawaho o San Souci i haawiia ai keia paina.