Ke Aloha Aina, Volume IV, Number 35, 27 August 1898 — Page 3

KE ALOHA AINA

POAONO, AUGATE 27, 1898

 

O KAULIA ME KA HOOHIKI.

 

Ua hiki kino aku makou imua o Mr. J. K. Kaulia, a ninau aku iaia no kona hoohiki io ana, aole paha.  Ua pane mai oia ae, he pule mahope mai o ke kakala ia ana o ke Aupuni Panalaau o Hawaii i kaili lima nui ia e Amerika, oia ka wa o ko’u lawe ana i ka hoohiki malalo o na kumu lehulehu, a kupono a’u i noonoo nui ai.

Ka makou aku, heaha ia mau kumu i na he pono ia ke hoike ia mai?

Pane, ae, eia ia mau kumu,  1—He hihia ka’u imua o ka Aha Kaapuni o keia kau o Augate, a oiai, ma ke kakahiaka e noho ai ua hihia la, ua ninau ia mai au e ka Lunakanawai, i na ua lawe au i ka hoohiki, ua pane aku au, aole, ia wa ua keakaka mai la ka aha i kona manao.  I na aole oe e lawe ana i ka hoohiki, alaila, ua haalele mai oe i kau oihana ma ke ano loio, no ka mea, he aupuni hou keia, aole he aupuni Hawaii, aka, he Aupuni Panalaau keia o Hawaii nei no Amerika, a ma ia ano e lawe oe i ka hoohiki ana ma kau oihana, pela wale no e loaa ai ia oe na pono a pau au e lawelawe ai i kau oihana, ma ke ano loio, ua pane aku au, e hoopanee iki i hapalua hora a’u e noonoo ai, a hoike hou mai au i ka aha i ko’u manao.

Mahope iho oia manawa ua hele aku au e ninau i kekahi o na Lunakanawai Kiekie i na paha o ko’u hoohiki ole ana, he mea ia e lawe ia aku ai kau oihana loio mai a’u aku, na pane aku o Mr. Kaulia, ae no au i ka hoohiki ma ke ano nae he hoohiki oihana aole o ka hoohiki e hoolaha ia nei e lilo i kupa Amerika, oiai aole kakou i Amerika ma ke kino i keia la, aka, he Amerika wale no ma ke kahea ia ana.

Ia wa na ae ia mai la ke noi a Mr. Kaulia, a kahea ia aku la o Lunakanawai Kanale, e nana i hoohiki ia Mr. Kaulia me keia mau olelo i ao ia aku iaia:

“Ke hoohiki nei ma ka inoa o ke Akua Mana Loa, e lawelawe oe i kau oihana loio elike me na kanawai o Amerika Huipuia a me na kanawai o ka Panalaau o Hawaii i lilo ia Amerika, pela ke Akua e kokua mai ai ia oe.”

Me keia hoohiki i lawe ai o Mr. Kaulia a kakau iho la i kona inoa penei:

Jas. K. Kaulia—Loio.

A pela i loaa ai iaia he mana e lawelawe aku i kana oihana loio imua o ka aha.

No makou iho, ua ninau makou ia Mr. Kaulia i na ua hiki kino aku ka Lunahooponopono o ka Loea imua ona, a ninau aku iaia, ua pane mai o Mr. Kaulia, aole o Kamaliikane ka Lunahooponopono o ka Loea i hui pu me a’u, aka, o Poka Kamaki kela wahi Pi-Gi nana i hookele i ka nupepa a Emaluka i hea ia ma ka inoa Ke Au Hou, e noke ana i ka hoino ia Liliuokalani a e kuamuamu ana i ke Alii, oia kahi alopeka i hiki imua o’u e nioau ai, a me he la naua no na manao ma ka Loea e hailuku mai nei ia’u, me ka na@a ole iho i ka pula iloko o kona maka.

“Aole o Kaulia i lawe i ka hoohiki, aole e hoihoi hou ia o Liliuokalani i Moi no Hawaii, aole no hoi i hoohiki aole e hoihoi hou ia ke Aupuni Moi o Hawaii.”

 

O keia ae la na olelo paae a Kaulia i hoike mai ai ia makou, a na ka lehulehu no hoi e kaaua pono iho i ka io o kana mau olelo, ua hewa paha oia, a i ole, ua pono no paha, elike me na hauwawa olelo o keia mau la.

 

 

AOLE  HE  MAKEMAKE  IA  O  DAIMANA HILA I PAPU KAUA.

 

Ua olelo ae o Mekia Langfitt, o na Eneginia o Amerika Huipuia i hoea mai nei ianei no ke kukulu papu kaua ana, o kona manao maoli, aole e lawe ia ana o Daimana Hila, no ke kukulu ana i papu kaua no ke pale ana aku ia Honolulu.  O ke kumu mamuli no ia o kona kaawale loa mai ke kulanakauhale mai, a ua hiki hoi i na mokukaua ke komo mai ma ka aoao komohana a hoopoino i ke kulanakauhale mamua o ka hiki ana i na pukuniahi o Daimana Hila ke haawi mai i na kokua ana.  Ua manao ia e waiho ia i mau pukuniahi kakaikahi maluha ona no ke kiai ana ia aoao, aka, o kahi maoli nae e ku paa ai o ka papu kaua, aole ia i maepopo a hiki paha i ka noho hou ana o ka ahaolelo Amerika no ka noonoo ana i na kumuhana pili ia Hawaii nei.

 

KA  HOOPII  KOI  POHO  A  HINGLEY.

 

O ka hoopii koi poho a Hingley ia A. Ferrnandez i hoea mai ia i ka hopena ma ka Poakolu nei imua o Lunakanawai Stanley.  E haawi ana hoi i ka pono ma ka aoao o ka ma hoopii he $175 no kana koi.  O keia mau dala i hooholo ia e ka aha, ua lawa ia no ka uku ana aku i kona mau lilo no ka poino ulia i halawai iho la me ke koena uuku loa i kona waihona, a o kana hoopii koi poho he $2500.  Aole i apono ka mea nana ka hoopii, a pela pu hoi me ka mea i hoopii ia, nolaila, ua noi hou aku la laua no ka hookolokolo hou ia ana.

O keia no ka hihia koi poho a makou i hoike mua aku ai, mamuli o ka halawai ana o Hingley me kekahi ulia poino mai ka lio mai a ke keiki opio a A. Fernandez e kau ana.

 

KA  HUI  WAAPA  HEALANI.

 

Ua hala aku no ka Iahamauleo o Ewa, na keiki hoehoe waapa o ka Hui Healani.  Ua hala mua aku na waapa maluna o ke Alahao Oahu i ka auina ia o ka Poakolu nei, a i ke ahiahi ana iho i hoi aku ai na poe hoe waapa no ka hoomaamaa ana, no ka hoea mai o ko lakou kiaina hana.

Eia ko lakou noho ana ma kahi o Mr. Pamlee, a na ke kaaahi o kakahiaka nui e hoihoi mai ia lakou no Honolulu nei, no ka lakou mau hana ponoi.  O ka la 24 o keia mahina ae, ola ka la e malamaia ai na heihei waapa, he la maka kanaka ia o ke Kulanakauhale Momi, a aole hoi e nele ka pikokoi ia e ka pohai oia ano hana.

 

NA  KOMISINA  MA  MAUI.

 

Ma ke ku ana mai a ka mokuahi Kauai, ma ka auina la o ka Poakolu nei, i loaa mai ai ka lohe maluna ona, ua hoea aku ka mokuahi Kalaudina ma Lahaina me na Komisina, a mahope o kona ku ana malaila no kekahi manawa pokole wale no, ua lawe aku la oia i ua Komisina no Kahului.  Malaila i noho loihi ku ai ka moku no ka hookuu ana aku i na Komisina e kipa aku ma Wailuku, Spreckelsville a me Paia.  He maikai ko lakou mau ola a pau.

 

KA  HALEKULA  HOU  O  KAPALAMA.

 

No kekahi mau manawa i hala ae nei ke noi ana aku o na poe e noho nei mauka o Kapalama i ka Papa Hoonaauao e kukulu ia i halekula mauka oia wahi no ka hoonaauao ana i na poe opio e noho nei malaila, a hiki mai la i kela mau la akahi no a hooloheia aku ka lakou mau noi.  Ua waiho aku ua Komisina o ka Papa Hoonaauao imua o C. B. Ripley a me Dickey e kaha ia ke kii o ka halekula hou i manaoia no Kapalama.

O ka loihi o keia hale he 124 kapuai, a o ka laula he 60 kapuai.  He elua hale ke kiekie, a o ka nui o na rumi he 12.  O ke kahua o keia halekula i manaoia ai ma @ahi no ia o ka Halekula Hoopololei o Keoneula, a e hoonee ia aku ana hoi ia kula ma kekahi wahi okoa aku.

E huli pono mai ana ke alo o keia hale i ke Alanui Moi, a o ka nui o na haumana i manaoia no ka hoopiha ana iaia e hiki aku ana ia i ka 400.  A ina e paa ana keia halekula, oia aku ana kekahi o na halekula nani loa maloko nei o keia mokupuni ma keia mua aku.

 

EIA  HOU  NO  NEI  HANA  HOONUI  LILO.

 

Ma ka nana a me ke kilohi ana i ua hana a na Luna Nui o ke Keena Uluhae, i noho hooponopono ia o James Marsden i hala aku nei i na aina e, a e hooponoponoia nei hoi e Wray Taylor i keia wa:  mamua he ake loa ia o Mauna Tantalus i wahi hoolulu no ka ana e iho mai ai mai ka lumi mai.  I ka ulu ana o ka laau a nui, ua, hooipo io mai, la ka ua iluna oia wahi; oia nae ka ua i makemake ia niue kua, a e @ki aku hoi i ua mau laau la i lilo ai ke dala o ka lehulehu i mea waiwai ole.

He mea pono loa i ka mea malama laau o ke aupuni, e hele maoli oia e hana, ma ka okioki ana i ka laau kuku lanatana, aole hoi o ka hoonui lilo wale no elike me ia e manaoia nei e hoolimalima aku i poe nana e ooki keia mau laau punahele a ke aupuni, a ke hoomaopopo maoli ia ka manao, he hana akole i ka waihona o ka lehulehu, he hoike oiaio hoi no ka lapuwale o ka poe nana e hana nei ia mau mea.

 

KOKOKE  KA  HOPENA  O  NA  KOA  KUMAU.

 

Ua hooholoia ma ka Poalua nei, ma keia Poakolu ae, Augate 31, e hoomauia aku ai na pualikoa kumau E a-me F e noho kiai nei ma ka Hale Mana Hooko.  O ke kauoha ua hoopuka ia ae e Kuhina Kupa.

Ma ia la i hoike ia ae la, e pau ai ke kiai ana o na koa i na puka a me ka halekoa no loko o ke kino o ka hale.  A ina he manao komo hou ko keia mau puali, iloko o ka oihana koa, alaila ma ke ano kokua.

O keia hoopau ana ae la o ke aupuni i keia mau koa kumao, ua hoonele mai ia i kekahi mau ohana, aka aole nae e hiki la lakou ke pale aku, o ka hopena iho la no ia o ke ake ana i ka hoohui aina.

He lehulehu na koa i oleloia ae e komo hou aku ana i mau koa kumau no Amerika Huipuia, o ka mea apiki nae, aole e loaa ana ia lakou na olekaa mahuahua elike me na la o ke aupuni Repubalika i hala aku la.

Ua kukuluia keia mau puali i ka 1893, mahope iho o ka hookahuli aupuni, a mahope o ka hala ana aku la o na makahiki he elima a oi o ko laua ai loaa ana no ka Repubalika Hawaii, ua hoea mai la laua i ko laua hopena.

He aha pualikoa kuikawa e noonoo ia nei, e komo aku ana i mau puali kumau a hiki i ka wa e hoi mai ai o na pualikoa Amerika i hala aku ia no Manila ke pani ana ma ia wahi.

 

O kekahi o na lono a ka mokuahi Dorika i lawe mai nei, ei ae maluu@ o ka mo@upea S. N. Castle, he 12 ohana ilikeokeo no lakou ka huina o na poe a pau he 30, ke holo mai nei no Honolulu nei, no ka hana ana.

Nuhou  Kuwaho.

 

KE  KAUOHA  I  KA AUMOKUKAUA  BERITANIA.

 

Ladana, Aug. 11.  he lono kai loaa mai nei mai Gibarileta mai i keia la e olelo ana:  O ka haalelo ana iho o na mokukaua Beritania anei i keia la, ua hoololi ia ae la ia, a ua loaa mai nei ke kauoha no ka noho ana ma Gibarileta a hiki i ka wa e loaa hou ma@ ke kauoha.  Aole he maopopo o ke kumu o kela hoololi ia, aka, malia no ke kulana kopikipikio no ia ma ka Hikina Loa.

 

KE  KIPOKA  IA LA  O  MATZNELL.

 

Wasinetona, Aug. 12.  Ua loaa mai nei he lono ia Kenerala Corbin ma ka po nei aia na mokukaua Aamerika ke kipoka la ia Matznell i kela awakea.  Ina aole e loaa aku ana na mea hoa i na mokukaua, ua olelo o Kenerala Corbin, e hoomauia aku ana no ke kaua ma ka la apopo.  E hoao ia aku ana ka lawe hikiwa e ana aku i ka lono i na mokukaua no ka hoopau ana i ke kaua.

 

O  WHITELAW  REID  KE  PANI  ANA  MA  KA@  O  DAY.

 

Nu Ioka, Aug. 11.  Ua hoikeia Whitelaw Reid ke pani aku ana loa kahi o Day, ina oia e haalele n@ aua i ke kulana Kuhina Aina.

 

KAHI  HOAHU  NANAHU  O  AMERIKA  MA  SAMOA.

 

Wasinetona, Aug. 13.  Ua haalelo aku na eneginia ia Wasinetona no Kapelakiko no ka hana i aelike, no ke kukula ana i wahi hoahu nanahu no na mokukaua ma ke awa o Pago Pago, Samoa.  Ua manao ke Keena Kaua Moana e haawi aku i kekahi poe ma Kaleponi maloko o hookahi pale a e holo aku i moku no ka hoomaka ana i ka hana maloko o elua pule.  O na poe kapili o noi ia aku ana ka lakou mau hoolala ana, a ina e ikeia aku ana ka holopono, alaila, o ka wa ia e nee mua aku ai o ka hana.

 

HALAWAI  ME  KA  ULIA  POINO

 

Vitoria , B. C. Aug. 11, Ma ka hoea ana mai o ka mokuahi Victoria ma ke ahiahi nei, mahope o kekahi huakai hikiwawe iloko o ka ino, ua lawe mai la oia i kekahi nuhou kaumaha i ike ia ma ke awa o Iokohama kahi hoi i make ai he elua mau lede o ka Papa Misionari Ameirka, Miss Simmons a me Miss Ailen.  O keia mau lede he mau hoaloha ko laua e hoi mai ana no keia aoao o ka Pakipika maluna o ka mokuahi Emeperesa o Iapana, ua holo aku laua maluna o kekahi waapa o ka Hui Mokuahi Canadiana no ka ike ana ia lakou.  Mahope o na aloha houe ana ua huli ae la ua waapa la me ka manao e hoi aku no uka o ka aina, a ia wa no hoi e hookomo mai ana he waapa pake me ka holomama nui no loko o ke awa, i keia manawa no i hookui mai ai oia me ka waapa.  Ua hookoi aku ka laau ihu o ka waapa pake ma ka opu o Miss Simmons a make iho ia oia ia manawa koke no.  O kona hoahele Miss Allen, ua hookui aku kona poohiwi a me ke poo i ka ihu o ka waapa, a ua kukonukonu hoi kona mau palapu.  Mahope hoi o kona waiho ana iloko o ke koena oia la, ua make iho la oia maloko o ka @  kapila o Iokohama ma ka la 30 o Iulai, he mau hora mamua o ka haalele ana aku o Victoria ia laila.