Ke Aloha Aina, Volume V, Number 12, 25 March 1899 — Page 4

KE ALOHA AINA

POAONO, MARAKI 25, 1899.

 

Ke-Aloha-Aina

Hookumuia no ka

Pomaikai o ka Lehulehu, a he.  Nupepa na ka Lahui Hawaii.

 

EDWARD L. LIKE,

Lunahooponopono.

EMMA A. NAWAHI

Puuku o KE ALOHA AINA.

HONOLULU. . . .MAR. 25, 1899

 

KE ALII AIMOKU.

            Aohe he mau lono i loaa mai ia makou e pili ana no ko ke Alii Aimoku noho ana ma Amerika, aka, aia no nae iloko o ko makou houpo na manaolana no kona palekana ma na ano a pau.  A oiai hoi, eia kakou ke u nei me ka walohia no ka Lei o Hawaii, a i ka wa e hoea aku ai na hoike imua o Kona alo, ua pauaho mai la iaia ka luhi a lakou, ka mea hoi nona ka pono ana e na’i wahine la imua o ko Amerika ma na hooponopono kanawai, e kulu iho auanei kona mau waimaka me ka ehaeha, a e haehae ia auanei kona puuwai me ka paumako no ka mea,

Ua hala aku la ka Puulena i Hilo.  Ua imi aku la no ia Papalanahi.

            O ke aloha a me ka walania, oia na kui nana e houhou iho i Kona puuwai Alii, oiai Oia ma ka aina malihini, aka, o ke Akua Kahikolu ka puuhonua o ko ke kanaka ola ana, a Nona wale no ka mana e hiki ai ke hoomama mai i ko kakou mau kaumaha Walohia Wale.

- - - - -

UA NALO KA LEI O HAWAII

            He oiaio, ua kuu a ua hoopale mai la ia kakou ka Lei o Hawaii, ka pua hookahi hoi i manaoia, nana e hoowehiwehi iho ke kalaunu o kona mau makua alii e na’i nei i pono nona, aka, he okoa nae ka manao o ka Mea Nana i hana, oiai; ua hoopokole koke mai la oia i kona mau la, iloko o kona wa i koho mua ole ia, a i haupu ole ia hoi, ua hoea mai la, a nalo aku la iloko o ka wa pokole me ke aloha nui ia e na mea a pau.

            Ua kupono loa keia inoa i lawe ia ae a hoohiluhilu ia iho la e kekahi poe wahine naau makee alii oiaio, maluna o ko lakou mau papale, mahope iho o kona pauaho ana mai i keia ola ana.  He lei oia na lakou, a he lei hoi na k@k@a ka lahui i makee i ke kulana o ko kakou mau alii hanau o ka aina.  He lei daimana oia no ke kalaunu, a he lei gu’a hoi no na hana ma na Ahahui Manawalea.  O kona nalo ana, me ka hiki ole ke hoi hoa m@, oia ka kakou e a nei me ka walehia, me ka ninau ana, ihea hou aku e loaa ai ona lei na keia lahui o hau oli ai.

            He mea maopopo ole ia ia kakou, oiai aole me kakou ka ike i na haawina kamahao e hoea mai ana, aka, o ka kakou wale no oia ke noi hou ana aku i keia hoohiwahiwa no ko kakou kulana aupuni, a e haawi ia mai hoi i pani ma ka makalua alii i hoohakahaka ia iho la.  O ko makou manao keia e upu nei, ina he mea ia e hooko ia ai.

- - - - -

KE IKE NEI O AMERIKA I KA HEWA O KA LIMA NUI.

            Eia ke aupuni o Amerika Hui, puia ke hoomaopopo nei i ka nui o na poino i loaa iaia ma o kona lawe lima nui ana ae nei malalo o ka ikaika kaua i na mokupuni i hoopilikia ole aku iaia mai kinohi mai, e like Pilipine, Poto Rico, a pela aku.  No ka mea eia keia mau lahui ke ala mai nei a kue aku i na Amerika, a ua nui na ola makamae i hoi aku no lalo o ka honua, mamuli o keia mau hana anunu a Amerika.

            A no wai ke kumu i hoea mai ai keia mau hookahe weliweli ana?  No ka Peresidena no ia a me kona mau Ahaolelo.  Ua hoomaopopo na Peresidena mua i lawe ae i ke kulana hooponopono o Amerika Huipuia, he hana hoopilikia wale no i ke aupuni ka hoao ana e lawe ae i na wahi mawaho aku o kona palena, no ka mea, e hoea mai ana no he poino nui i kona wa e hana ai pela.

            Aka aole nae i hoolohe aku o Makinile i na olelo ao a kona mau mua, ua hookomo aku la no oia i kona lahui iloko o ka enaena o na hoouka kaua hahana ana me na Sepania, a lanakila iho la maluna o kona hoa paio mahope o ka lilo ana aku o kekahi mau ola a me ka lu wale ana he mau miliona dala me kona olelo pu ana e hookuu ana oia i na paemoku e noho pio ana malaio o na hookaumaha ana a Sepania.

            Aole oia i hooko i kana mea i hoopuka ai i kinohi, aka, ua lawe mai la oia i ua mokupuni la malalo o kana hoomalu ana me ke kulike ole me ka makemake o ka lahuikanaka nona ia mau moku puni, a pela e ulu mai nei na hakaka ana ma ia mau wahi mawaena o na Amerika a me na kamaaina.

            Maloko o na nupepa o na aina e, ua ike iho makou, aia na kanaka o Poto Rico ke liuliu la na lele kue ana mai ia Amerika no ka hookuu ana aku i ko lakou aupuni i aupuni kuokoa, a he nui ko lakou inaina i na Amerika me ka pepehi malu ani i na koa Amerika.  Aia ke aupuni o Amerika Huipui ke noonoo la no ka hooun@ hou ana aku i mau koa ma ka hoomalu ana ia wahi.  A pela no hoi ma Pilipine, aia na kanaka ke kupaa la mahope o ke aloha i ka aina a hiki i ka lanakila ana.  A oia ka makou e pu ana ae nei, eia o Amerika ke ike nei i ka hopena poino o kana mau hana lima nui.  A he hookahi hana pono iaia, oia ka hoihoi hou ana mai i ke kuokoa o na paemoku ana i kailiku aku ai.

- - - - -

AOHE MEA I NOONOO IA NO HAWAII.

            Ma ka la 4 o Maraki iho nei i hookuu ai ka ahaolelo kanalimakumamalima o Amerika Huipuia me ka uuku loa o na mea i hana e keia ahaolelo.  Mai ka noho ana a ka aha a hiki i kona pau ana aku la, aole he wahi mea i noonoo ia no Hawaii nei.  Nolaila, aia no ka ninau o Hawaii ke waiho la imua o ka ahaolelo me ka maopopo ole o kona kulana aupuni.

            A no ia kumu ke noi aku nei no makou i ka lahui aloha aina e hoomau i ko kakou manaolana ana e hoea mai ana no he la a ka Mea Kiekie Loa e hoihoi hou mai i na pono o ka lahui nawaliwali i pakaha wale ia aku.

- - - - -

KUE O PERESIDENA MAKI NILE IA LUNAHOOMALU REED.

            Ua ike iho makou maloko o ka nupepa Kahea o ka ia 11 iho nei e hoike ana i kekahi mokuahana i ulu ae mawaena o Peresidena Makinile a me ka Lunahoomalu Reed, no kona koho hou ia aku i lunahoomalu no ka Hale.  Ua oleloia ae, ua hoike maoli ae no o Reed i kona hoihoi ole no ka Peresidena Makinile no kekahi wa loihi.

            Me ka olelo pu ae o ua nupepa la, he kue ioa o Reed i ka hoohui ia ana o na Paemoku o Hawaii, a ka aha hoi i kokua loa ai, aole he manawa ona i kokua ai i na kumuhana e pili ana no Cuba mai kinohi mai, me ke kue loa aku i ka lawe ia ana mai o na mokupuni Pilipine a me Porto Rico, he kue pu oia i ke kukulu ana i ka oihana koa, a mamuli o kana mau kue ana i haule pahu ai ke alawai o Nicaragua a me ka uwea moana o ka Pakipika mai ka hooholoia ana.

            Ua hoomaopopo ia aole he hana hiki i ka aha ke hana ina e kue ana o Reed, a mamuli oia kumu i ake nui loa ia ai e hookaawale aku iaia mai ke kulaua ana e paa nei.  Ua olelo ia ae, oia kekahi o ua kanaka kalaiaiua nui a naauao loa o ka aoao Rekubalika e ola nei, a ke noonoo wale ia la o na lunamakaainana e kue ikaika la iaia e hoi hou aku ana no lakou e kokua ia Reed ma keia mua iho.

            Aole e lilo i na kanaka o ka hikina keia kulana a Reed e paa nei, aka, e hoaoia aku ana nae ka onou ana i kanaka komohana ke lawe ae ia kulana, a e hoomau ana no oia i ke kue ana i ka aha, aka, he manao io ko ka Peresidena Makinile, e hamau no o Reed i ka wa e hoemi ia ai o kona kulana.

- - - - -

OIA MAU NO KA OOLOKU O KO KE AO.

            I kela a me keia wa a na mokuahi mai na aina e mai, ua lawe pu ia mai me na hoike e pili ana i ke kulana o na aupuni nui a ikaika o ka honua, e ake ana kekahi e loaa ona pono oi ae mawaho aku o na palena a kona mana i hoomalu ai, elike me Amerika e hoolaula nei iaia ma na Paemoku o Hawaii a me Pilipine, pela no hoi o Italia e ake nei e hoomahuahua aku i kona mana iloko o na palena aina o Kina, kahi hoi nona na aumeume ana o kahi mau mana nui o ke ao nei, a pela makou e puana ae nei, ke pii mau ae nei na ao hakumakuma o ke kaua ma na wahi a pau o ka honua.  Aka, aole no nae ia ooloku ana o na mana ikaika, he mea ia e hoopau ia ai na kokoia manaopaa iloko o keia lahui aloha.

- - - - -

KA LOIO KUHINA HOU.

            Ua lilo ae la ia Lunakanawai H. E. Kupa ka noho Loio Kuhina i hoohakahaka ia ma o ka haalele ana o W. O. Kamika.  Ma ka Poakahi nei i hoohiki ia ai oia imua o ka Lunakanawai Kiekie Alapaki Kauka ma ka wa i wehe ia ai o ka aha hookolokolo.  Ua kamailio aku o W. O. Kamika he mau olelo pokole e hoike aku ana ua haalele oia i kana oihana i paa ai no kekahi mau makakiki loihi me ka hoolauna pu aku hoi i kona pani Lunakanawai Kupa imua o na aha la.  Ma keia lilo ana ae la o Kupa i Loio Kuhina, ua hakahaka iho la ka noho o ke Kuhina o ko na Aina e.

- - - - -

KA MOKU LAWE HOLOHOLONA O AMERIKA.

            Ua hoea mai nei ma ke kakahiaka Poakahi ka mokuahi lawe holoholona Conemaugh ho eiwa ia mai Kapalakiko mai, ma kona alahele no Manila.  E lawe ana oia he 300 hoki no ka oihana kaua o Amerika Huipuia malaio o Manila.  He 36 mau koa malaio o ka hoomalu ana a Kapena E. Butler i hoea pu mai la.  E hoolele ia mai ana a@ holoholona no ka hooholoholo @i ana mauka nei o ka aina mamua o ko lakou lawe loa ia ana aku no Manila.  He nui na hoki i make ma k@ moana.  E ku ana ke Conemaugh @, no hookahi pule mau@ua o @ holo ana aku.

- - - - -

HOAKEA IA KE ALANUI PUPULE.

            Eia ke hoomaka ia nei ka hoakea ana i ke Alanui Pupule mai ke Alanui Moi aku.  O ke akea o ke alanui i makemakeia ma kahi no ia o 30 kapuai, he 18 kapuai ka nui ae mamua o ke alanui mua iho nei.  O ka loihi o keia wahine hana hou ia aku ana no aneane hapalua mile no ia.  Ua hookaawale ia no hoi he $5000 no ka hana hou ana i keia alanui e ke aupuni mamua aku nei.

- - - - -

NA MOKUKOA E HOEA MAI ANA.

            Ua loaa mai nei na lono maluna o ka mokuahi Conemaugh aia ke hoomaemaeia la na mokuahi Zealandia a me Puebla me ka puahi nui no ka hoouna hou ana aku ma ka laua huakai lawekoa no Manila.  Aole laua e makaukau ana maloko o elua pule.

- - - - -

KA MOKUKAUA WHEELING.

            Ma ka Poaha nei i hoea mai ai ka mokukaua Wheeling he 12 la holo mai Vanekoua mai.  Ma ka mahina aku nei o Ianuari, ua hoouna ia aku oia no ke kiai ana i na kai lawaia o ka moana Atika, aka, i kona hoi ana mai nei i Vanekoua, ua loaa aku la iaia he kauoha pupuahulu no ka holo koke ana aku i Manila.

            Ua hoea mua mai no ka Wheeling i anei he makahiki a oi i hala ae nei, mamua o ke poha ana ae nei o ke kaua mawaena o Amerika a me Sepania.  E hoopiha ana oia he 200 tona nanahu maanei, a me he mea la, ma ka la apopo e holo loa aku ai oia no Manila.

- - - - -

UA HULI HOI MAI NEI.

            Ua huli hoi mai nei ma ke awakea Sabati nei ka moku kolo o ke aupuni Amerika Iroquois mahope o kona kaawale ana aku nei no kekahi mau la mai ke awa aku nei o Kou.  Ua haalele iho oia ia Honolulu nei ma ka hora 11 o ke kakahiaka Poalua aku nei a mahope o kona halawai ana me ka ino ma ke kowa o Alanuihaha, ua hoea aku la oia i Hilo, ma ka hora 1:30 o ka auina la Poakolu he 26 hora mai Honolulu aku nei me Agena Sewall a me Mekia Laugfitt maluna ona.

            Mahope o kona ku ana malaila no elua la, na haalele aku la oia ia Hilo ma ka hora 9 o ka po Poalimia me ka hoohala ia ana o kekahi mau hora ma ka hoomaamaa kipu ana ma ka moana.  Ua kipa ae oia ma Maalaea a me Lahaina mamua o kona huli hoi loa ana mai nei n@ Honolulu nei.

            He puali hoola hou o na ilikeokeo ke haiolelo mau nei ma na huina alanui i kela a me keia po.