Ke Aloha Aina, Volume V, Number 15, 15 April 1899 — Page 8

KE ALOHA AINA

POAONO, APERILA 15, 1899.

 

HE MOOLELO WALOHIA

——:NO KA:——

Iloko o ka Hanohano

--:A ME:--

TOME BAKALA

Ka Ilihune.

[ Hoohenoia no KE ALOHA AINA:]

A pela iho la i paa loa ai keia inoa maluna o kou makua hookama nei a hiki i ka wa e paa pio ai kela moi puuwai lokoino o Irelani, ka mea nana i hoomainoino i kuu mau makua aloha.

E hauoli no au, ina e hiki ana ia oe ke lele kaua aku maluna o kuu enemi a hoopio iaia, e wehe no au i keia inoa mai a'u ae, ke holopono kau mau mea a pau e hana ai.

O keia iho la ke kumu nui o ko'u paa ana i keia oihana, me kuu manao, o ka pahu hopu iho la ia e hoopau ia ai ka'u hana.

A ina io eia iloko o kou uhane e kuu keiki hookama, na manao koa o ka wiwo ole e hooko pono ana i keia mau olelo a'u i hoike aku la e haawi aku no au ia oe i na kakua ana he nui, a hiki i ka hooko piha ia ana o na mea a pau a'u i make make ai.

O keia ka mea oiaio, a o ke Akua  ma ka lani hoike oiaio no ka'u mau olelo a pau i hiki ai hoi ia oe ke manaoio mai he pololei ka'u mau mea e hoiku aku nei imua ou, eiike me kou makemake ninau, no kumu nui o ko'u lawe ana ae a paa i keia hana iloko o ko'u lima.

I ka wa i pau ae ai o na kamailio ana a ke ahi powa, oia koke no ka wa i pane aku ai o kahi Tome me keia mau olelo e hoopiha ia ai kona makua hookama me na manao o ka hauoli.

Ke ike a ke lohe pono nei au i ke kumu nui o kou lilo ana he ahi powa, aole hoi mamuli o kou ma kemake ma@li iho, e hana a e hehi pu hoi i ka ihiihi o na kanawai o Wale nei.

Ua hookonokono ia oe mamuli o ka pepehi ia ana o kou mau makua, a na ia mea i hooulu ae i na manao koa iloko o kou puuwai, e lawe i na keehina o ka hookau ana aku i ka hoopai maluna o kou enemi, ka mea hoi a'u e hoike aku la ia oe, e hooko aku ana au i kou makemake iloko o na la pokole wale no ma keia mua aku.

E haawi mai ia'u i ka huina o 500 kanaka i lawa pono me na lako kaua, a e hoomaka koke no ko makou haalele ana iho i ko kakou home nei ma ke kakahiaka o ka la apopo.

E hooko ia aku ana kou makema ke iloko o ka wa pokole, oiai, o ko'u iini nui, oia ka holopono o kau mau hana a pau.

O keia no hoi ka wa i hookuu ae ai o ka laua aha kuka, a hoi aku la ua wahi Tome nei e hooluolu iaia iho no ia koena po.

I ka wehe ana mai o ke alaula o ke ao o kekahi la ae, aia hoi, ua hele aku la ke aliipowa no ka wae ana i ka huina o 500 kanaka makaukau ana i ike ai, he poe laeula wale no lakou no loko o na ululaau o ua mau Hilana la.

I ka makaukau pono ana o keia poe, me ka lakou mau mea kaua, ua hoike aku la oia imua o lakou, ua makemakeia lakou no ka hele ana aku malalo o na alakai ana a kana keiki hookama, no ka hele ana aku e kau i ka hoopai o ka make maluna o kona mau enemi.

I kela wa i olowalu like mai ai ko lakou mau leo hooho. E ola mau loa ke alii o na ululaau oWale, a o kona makemake oia ka makou e hooko aku ai.

I ke kaui ana o ka hora 7 o ua kahiaka la, aia hoi, ua hoohikilele kokeia ae la ko lakou mau pepeiao, mamuli o k@ lohe ana aku i ka leo pohapoha o ke kapuai o kekahi ho e holo mai ana me ka ikaika nui.

Aole nae i liuliu iho ko lakou hoo lono ana iho i keia, aia hoi, ua hoea mai la kahi Tome maluna o kona lio i hele a auau i ka hou, mamuli o kona kuupau ana mai i ka holo me ka hikiwawe.

A i kona kaalo pono ana iho mamua o ke alo o na koa powa e ku nei me ka makaukau no ka hooko ana aku i ka leo kauoha o ko lakou haku.

Ua lele koke iho la oia ilalo a hele pololei aku la a ma kahi a kona makuakane hooama e ku ana a me kona wahi luai ponoi, kukuli iho la ilalo, ma ke ano e hoike aku ana, ua makaukau oia no ka hooko ana i ke kauoha i pa wa a pau.

Huli ae la ke alu powa a pane mai la imua o Tome me keia mau olelo hoolana penei:

E kuu keiki aloha eia na kanaka au i nonoi mai ai @a'u, no ka lawe ana aku ia lakou imua o ke alo o na enemi no ka hooko ana i kou makemake, i holoi a ae keia ino amewaewa e kau nei maluna o'u, ma ke ano he alii powa no loko o keia mau ululaau.

Ke ike la oe i keia poe kanaka i wae ia mailoko mai o ko lakou mau hoa kanaka i paa malalo o ka mana o keia oihana a'u i hoohiki ai o ka make ka pahu hopu a hoopau ia ai o kela inoa maluna o'u.

Aka, mamuli o kau noi, e hoao au e hoopau ia mea mai a'u aku, pela a@ i ae aku ai ia oe, ina e holopono ana kau hana ma keia huakai hele no ka hooko ana i ko'u @@i, maluna o ka mea nana i pepehi hoomainoino i ko'u mau makua aloha.

I ka wa i hoopau ae ai o ke alii powa i kana kamilio ana, oia koke no ka wa i kunou aku ai o ke poo o kahi Tome, me kona hoola pu aku, o kona makemake a pau, oia kana e hooko ai.

I keia wa koke no i haawiia ae ai na kukai aloha ana mawaena o lakou pakahia a oia no hoi ka wa i haalele iho ai lakou i ko lakou home kuahiwi no ke alahele e hoea aku ai i ke kulanakauhale o Dubelina, kahi hoi a ka moi o Irelani e noho ana iloko o kona palaka, me kona manao ole, e hiki aku ana imua ona, hemea nana e hoohiolo i kona nohoali ana.

Hemau la loihi ko lakou hele ana maloko o na ululaau na kahawai lehulehu, na kula panoa wai ole, a me na waoakua one, oiai hoi na holoholona hihiu e maalo ae ana mamua o ko lakou mau alo.

Aka, oia mau inea a pau, ua lilo ia i mea ole i ko lakou mau manao, oiai, aia no ka palena a hoea i ka pahu hopu i kauoha ia ai, alaila, oia ka wa e haawi ai lakou i wa hoomaha no ko lakou mau holoholona.

I ko lakou hoea ana aku maluna o na kiekiena, e ike pono ia aku ai ke kulanakauhale alii o Dubelina e nenee mai ana ilalo o kekahi kahua palahalaha, me he moa uakea la ke aiai.

Oia no ka wa i huli ae ai o ko lakou pailata a kamaiho mai la me keia mau olelo imua o ko lakou alakai opio a me kona mau hoahele i ka puana ana mai:

 

HE EONO I HOOPII IA NO KA PEPEHI KANAKA.

Ma ka hora 1:30 o ka auina la Poaha nei, i hoopuka ae ai o Ilamuku Baraunu i na palapala hoopii o na Iapana he 23 e paa nei ma Kawa, ma kela haunaeie i malama ia ai ma Kahuku, he mau pule i hala ae nei. Oia hoi, he eono i hoopii ia no ka pepehi kanaka a me 17 no ka hoohaunaele. O lakou hoi na poe i manaoia na lakou i pepehi a make loa na pake maloko oia haunaele.

Iloko ae nei o ka mahina o Mei e hoolohe ia ai ko lakou hihia imua o ka aha kaapuni. He hookahi haneri hoike i manao ia e laweia mai ana no keia hihia, a o kekahi no hoi ia o na hihia ano nui e lawelawe ia maloko o ke kau kiure.

 

 

 

MAHUKA HE IWAKALUA LUINA O KA PUEBLA.

O ka hora 9 o ke kakahiaka Poaha nei ka manawa o ka mokuahi Puebla i manao ia ai no ka holo ana aku no Manila, aka, aole nae oia i haalele iho ia manawa a hiki i ka hora 12 o ke awakea. O ke kumu o keia hakalia loa ana, mamuli no ia o ka mahuka ana he iwakalua mau kanaka o ke keena eneginia. Ua ohi koke ia ho mau pake no ka hoopiha ana ma ko lakou hakahaka a holo aku la oia no Manila.

 

KA MOKU LAWEKOA CHARLES NELSON.

Ma ka hora 11 o ka Poaono nei i hoea mai ai ka mokuahi lawekoa Charles Nelson. ua haalele aku oia ia Kapalakiko ma ka hora 5:30 o ka la 30 iho nei o Maraki, me ka halawai ana me ka ino ma ka moana. E lawe ana oia he 18 mau koa o ka puali pukaa Eono, 40 koa lawelawe no ka haukipila a me elua koa haawi hoailona malalo o ka hoomalu ana a Lutanela El@a Alfred Aloe o ka puali Umikumamawalu, Kauka Wythe, Kakiana Kalb a me kekahi poe e ae. He 900 tona ukana ana e lawe pu nei no Manila.

 

Ua hoea mai nei mai Nu Kakela mai ka mokupea Honolulu ma ke ahiahi Poaha nei, a ua hoike mai kona kapena i ka ka haule ana o kekeahi luina mai luna aku o ka moku, a nalowale loa, i ka wa a ka moku e lulu ino ana.

Ua waiho aku la o Chas. I. Helm he koi poho o $25,000 ia F. B. McStocker a me T. W. Hobron ma ka Poaha nei, mamuli o ka paa ia ana o kona palapala ae holo maluna o ka mokuahi Rio Janeiro. O Paulo Numana a me Keoki Davis kona mau lo@o.

Ua huli hoi aku la no Yokosuga, Iapana, ka mokukaua Iapana Chitose, ma ka hora 9 o ke kakahiaka Poaha nei. He kahu hoolulu kaua moana Yokosuga, a malaila e hoolakoia ai oia me na lako kaua. Mamua o kona holo loa ana aku no Iapana, ua holoholo ae oia mawaho o ke awa.

Ma ka hoike a ke Kapena o ka mokuahi Maki, ua ike moakaka aku lakou i kela popo ahi i ikeia ma Honolulu nei, mahope iho o ka hora 6 o ke ahiahi Poakolu i ko la kou wa e hoohemo mai ana mailoko mai o Kapaa, oia hoi, he ulaula, melemele, omaomao a me @ka holu na wai hooluu i ikeia aku e lakou. Ua koho wale ia ae he hoku lele keia i ikeia ai.

 

HOOLAHA AKEA.

I KA POE NO LAKOU NA HALE Laau e ku nei ma Hanawi, Puumoi, ka Aina Konohiki, kuleana o Kahale (k) a me Paaoao (w), i lilo mai ia Kalua, a e ona ia e a'u i keia wa.

Ke kauohaia nei, e kii koke ae a hookaawale aku iloko o eono malama mai keia la aku a i ole e lawe ia no e a'u no na poho e like me ke kanawai. Ua hooapuia ke kii kuleana ole ana i na Niu.

JOSEPH MAIKAALOA KAUHI, O@a Aina. Hanawi, Hilo, Apr, 6, 1899.  @@

 

JAMES K. KAULIA.

Loio a Kokua ma ke Kanawai.

He mea Hoaie Dala ma ka Moraki no na Waiwaipaa, a he mea kuai aku a kuai mai i na Waiwaipaa. Ua hiki no i ka poe mea aina ke waiho aku ma kona lima i ko lakou mau aina no ke kuai aku, a i ole, o ka poe makemake aina i mau home no lakou, ua hiki no ke hoolawala i na manawa a pau e makemake ai.

KEENA LOIO @@@ loaa no ma ke keena o Kale Kalekona, ma Waikiki iho o ko keena o Keo Kaaka, kekoke i ka Banako o Bihopa, ma Alanui Kalepa. jan 21.  tf.

 

 

HE LOEA HANA I NA MAKA.

O ka loaa pono ana o na Maka Aniani kupono no na poe i nawaliwali ka ike ana, oia ka mea nana e hoihoi hou mai ka ike e like me kinohi a'u hoi e hooiaio nei oia no ke alahele e loaa hou ai ia oe ka ike.

O na mea au e ike powehiwehi ana ma kahi kaawale loa e ike moakaka aku ana oe maloko o keia Maka Aniani.

O keia mau Maka Aniani wale no ka mea nana e haawi ia oe i na kokua ana. Aole he uku o ka nana ana i ka maka.

S. E. Lucas. Kanaka Hana Maka Parisa. HALEPOHAKU LOVE, ALANUI PAPU.

(Ma ka hale maluna.)

apr. 4-3m div & wkly.

 

HOOLAHA HOOKAPU!!!

Ke papa ia aku nei na ano Lahui a pau, aole e komo wale maloko o ko makou mau Loko i a e waiho nei ma Mokauea, Kalihikai, Honolulu, Oahu. O ka mea a mau mea, e kue ana i ko makou pono, e hoopii no makou ma ke kanawai o ka aina. LOK HOP & CO. Honolulu, Maraki, 27, 1899.

 

T. McCANTS STEWARTS.

LOIO MA KE KANAWAI.

KEENA HANA: UA NEE AKU ko T. McCants Stewarts Keena Loio ma ka Halepohaku Model Block, Alanui Papu, ma Ewa o ka Luakini Katolika.

 

L. C. ABLES.

MEA KUAI AKU A KUAI MAI.

He mea Hoaie Dala ma ka Moraki i na Waiwaipaa.

Eai pu me ia o Makanoe C. Amana, he Hawaii i ike nui ia , a i noho maloko o ke keena auhau no eono makahiki. Ua makaukau oia e haawi aku i na kokua i na poe a pau e makemake ana e kuai aku a kua mai paha i ko lakou mau aina. A ua makemake hoi e hoaie aku i na waiwai hihia ole. E kipa mai.

KEENA HANA: Ma ke Alanui Papu ma Ewa o ka Hale Banako o Irwin ma. feb 27- @m dly.

 

BOROKO,

$10,000           MA KA           $10,000

Waiwaipaa

Ua makaukau e Hoaie aku ma ka Moraki i ka poe a pa@ he mau Waiwaipaa hihia ole ko lakou.

Ua makaukau e huli maloko o na Buke Aupuni, i na Aina pohihihi ma na ano a pau a me ka hooponopono ana i na Aina e paala nei me ke kuleana ole.

Ua makaukau e hana i na Palapala Kuai, na Palapala Hoolimalima, na Palapala Moraki a me na Palapala o kela a me keia ano i ku i ke kanawai.

E ohi ia no na Ale o kela a me keia ano ke waiho ia ma@@. E hookoia no na kauoha me ka eleu.

Ke kona ku nei i @a makamaka a pau e kipa mai ma @o maua Keena Hana, ma ka Hale ma Ewa o ka Hale, pule o Kaumakapili. Alanui Beritania JOHN PRENDERGAST, (Kapamawaho.) WILLIAM MOSSMAN. (Mokimana) Honolulu, Mei 24, 1898. td dl wk

 

 

BAIKIKALA HOU "BEBEE"

—NO KE—

$30.00.

Kaa Kane a me Wahine

—MA KA—

Honolulu Cyclery o BAILEY.

HELU @31. ALANUI MOI.

Na Milwaukee Puncture Proof Tires, i ole e hiki i ua kui Kiawe ke komo iloko o lakou.

Hoomaemae ana i na Kaa Baikikala poino a pau.

He heluna nui o na lako hoomaemae maloko ona i loaa ole ma na Paemoku Hawaii.

Apr 10-1yr.