Ke Aloha Aina, Volume V, Number 20, 20 May 1899 — Page 3

KE ALOHA AINA

 

KE ALOHA AINA POAONO, MEI 20, 1899   3

 

KIPU ILUNA O KE AUSTRALIA

 

HOOPIOO IA NA OHUA MALUNA ONA.

 

He Elua mau mea i Hoehaia.

 

            Ua malama ia ae he kipu weliweli maluna o ka mokuahi Auseteralia ma ka auina la Poalua nei i ka wa o ka moku i hiki ai ma kahi kokoke i ka boe bele. O ka hopena oia hakaka ana, oia no ka hoeha ia ana o kekahi haole nona ka inoa o Gillespie, a o ka mea nana i hana keia puuwai eleele, eia oia ke paa nei maloko o ka halewai me kekahi palapu ma kona poo, a penei hoi ka moolelo e pili ana no keia kipu.

            I ka wa i hoea aku o ka moku ahi Auseteralia ma waho o ka boe bele, a i ka wa a na ohua e hoonanea ana i ke kilohi ana ia iuka nei o ka aina, ua hoohikilele ia ae lakou i ka lohe ana aku i kekahi mau leo poha pu i ke kani wikiwiki ana mai no elima manawa mai ka oneki mai o lalo. A i keia mau sekona no, ua hoopioo ia ae lakou a holo ae la ma o a maanei.

            Mahope koke iho o ke kani ana o ka pu, ua holo koke aku la o Chester Doyle a me Seeley, ke kuene nui, no kahi o ke kipu e malama ia ana, a ike aku la ia Geo. Wade, ke poo kuke o ka mokuahi Auseteralia, e ki ana ia Gillespie, he kuene, e waiho ana maluna o ka oneki.

            O na ohua e noho kokoke ana ma ua wahi la, ua holo aku lakou me ka pihoihoi nui no ka oneki oluna. I keia manawa no i iho aku ai o Evans no kahi o ka hakaka i malama ia ai, aka, ua hooweliweli koke ia mai la oia e Wade, e ki ia no oia i ka pu i ka wa e hookokoke aku ai ma kana wahi e ku ana.

            I ka ike ana o Evans he mea makehewa nona ka hoao ana aku e hopu i ka limakoko, oiai, ua hemahema oia me ka pu ole, nolaila, ua holo koke aku la oia e hui me ke kapena no ka haawi ana mai i pu iaia. Ua hoike koke aku la ke kapena e hele aku i ka malama moku ekahi, a nana hoi i haawi mai kekahi pu raifela i piha i ka poka.

            Me ka hookulua ole iho, ua iho aku la Evens, Doyle, a me Law@ess, ka malama moku ekahi. I ka manawa i ike mai ai o Wade i na makai e iho aku ana, oia koke no kona wa i hapai ae ai i kana pu panapana a ki mai la no elua manawa, me ka hoohakalia pu ole iho no hoi ua hapai koke ae la o Evans i ka pu raifela a i ke kaulona pono ana, oia koke no kona wa i pa@ mai ai i ke kanaka, he poha ana, ua ike ia aku la na Wade nei i ka haule pahu ana aku no luna o ka papahele. A ia wa i hoi aku ai na makai a hoike aku la i ke kapena ua make ka limakoko, aka, ua hoea koke mai la nae ka wiliki nui a hoike mai la, aole oia i make, aka, ua maule wale no.

            Ua hoouna koke ia aku na kanaka no ka hoopaa ana i na lima a me na wawae o ka lawehala i ka hao.

            A mahope iho oia manawa i hookau ia mai ai na mea i hoeha ia maluna o ka waapa pailata a hoihoi ia la no uka nei o ka aina, a i ka pae ana mai iuka nei o ka aina. Ua hoouna koke ia aku ka mea i hoeha ia no ka haukapila, a o ka lawehala hoi no ka halewai.

            O ke kumu i ulu mai ai o keia hakaka weliweli, aole he maopopo loa, aka, ua olelo ia ae nae, e hoopaapaa ana o Wade me Sidane, he limahana no luna no o ka moku, a i ka ike ana o Gillespie ua hele aku la oia me ka hoao ana e hoopau ae i keia hoopaapaa ana, aka, ua hooi loa ia ae la ko Wade piha inaina a kipu iho la iaia. Ke manao wale ia nei, aole e ola ana o Gillespie, ina e make ana oia e kau ia aku ana ka hewa pepehi kanaka maluna o Wade.

           

MAKE O GILLESPIE.

 

            Mahope koke iho o ka hora 2 o ka auina la Poaolu nei i haalele mai ai i keia ola ana o William Gillespie, ke kuene nui o ka mokuahi Auseteralia, i ki ia ai e Wade, ka paele kuke nui oia moku no, ma ke ahiahi Poalua, maloko o ka haukipila. Ua hoao ia ka hoopakele ana i kona ola e Kauka Day, aka, ua ikaika loa nae ka lima o ka make i ke kikoo ana mai i kona hanu a lawe aku la.

            He elua wahi o ka poka o ka pu panapana a Wade i kapoo aku ai iloko o kona kino. He hookahi ma ka uha a he hookahi hoi ma ka opu na keia poka hoi ma ka opu i hoonawaliwali loa iaia a hiki i kona make ana.

            I keia wa i make iho la o Gillespie, ua hookau ia aku la ka hewa pepehi kanaka ma ke degere ekahi maluna o Wade, oiai oia e noho la maloko o kona rumi paahao me ka maopopo ole ua make kona hoaloha ana i ki ai me kana pu panapana.

            E hoopanee ia aku ana ka hoolohe ia ana o kona hihia a hiki i ka wa e hoi hou mai ai o ka mokuahi Auseteralie, oiai, aia maluna ona na poe i ike i ka lawelawe ia ana o keia hana weliweli.

 

            Aole no i loaa ke kino make o ka haole koa i piholo ai mawaho aku o ka hale ipukukui a hiki i keia wa.

 

KE KULANA MA PILIPINE.

 

HOOUKA HOU IA HE KAUA HAHANA.

 

Loaa aku o San Fernando ua Puhi ia i ke Ahi.

 

            Manila, Mei 5. I keia kakahiaka o Kenerala Hale me elua bataliona o ka regimaua Iowa me kekahi pu Hotchkiss kai nee mua aku no San Fernando, ua lele kaua aku kona mau kanaka ma ka akau o ke taona. A ua au aku na Amerika no elua manawa ma kekahi mau muliwai papau mamua o ka hoea ana aku i ke taona. He uuku wale no na poe o ka pa kaua i haalele ia iho mahope no ke kiai ana i keia wahi, a ua pau aku hoi ka puali holookoa o ka enemi i ka emi hope aku no ka akau ma ka la inehinei. Me ke kali ole iho, ua nee aku na Amerika no kahi o na enemi a lawe ae la i ko lakou kulana. Ua uhai aku lakou no kekahi mile mawaho aku o ke taona. I ka hoi hou ana mai o na pualikoa ua loaa iho la ka luakini, kahi hoolulu kaaahi a me kekahi mau hale ua puhi ia i ke ahi.

            He pio Sepania i haalele ia mahope, i ka wa o na enemi e holo ana kai hoike mai nei, ua hoeha ia o Kenerala Antonio Luna, ke alakai o na kipi ma ka hakaka o ka la inehinei, ma San Tomas. Ua pakui pu mai no hoi oia ua hoonawaliwali ia na Pilipine.

 

KA HOIKE A OTIS.

 

            Manila, Mei 5. Aukukana Kenerala, Wasinetona. O keia malalo iho na poino ma San Tomas, ma ka la inehinei:

            He hookahi aliikoa, Lutanela McTaggart, o ka regimana Kansas a me eha koa i make; ekolu aliikoa a me iwakalua-kumamalua koa i hoehaia. Mawaena o na poe i hoehaia o Kenerala Funston.

            Ua hoike mai nei o Lawton, ua hopu pio ia eia he 150,000 eke raiki a me 265 tona kopaa ma Baluag. Na waiwai i hopu ia ma Malolo he $1,500,000. Ua hopuia na waiwai raiki a me kulina ma kekahi wahi e ae o na enemi. Ua hoopoino ia ae ma ka la inehinei e ke ahi ke taona o San Tomas, a ma ke ahiahi nei ua puhi ae lakou i ke kulanakauhale o San Fernando.

 

HALAWAI KA PEKINA ME KA ELIHU THOMPSON.

 

            Ua loaa mai nei na lono maluna o ka Amerika Maru, no ka halawai ana o ka mokuahi Pekina me ka moku poino Elihu Thompson, ma kahi he ekolu haneri mile mai Kapalakiko mai, a nana i hoolako me ona     mau pea hou nona, a hiki i ka wa e loaa aku ai na kokua nona.

            Ua hoouna ia aku ka moku kolo Relief no ka huli ana iaia ma ka la 5 iho nei o keia mahina.

 

HE AHIAHI ANO NUI.

 

            E malama ia ana ma ka hora 6 o ke ahiahi Poaono e hiki mai ana ma ka pa luakini o Malieokamalu he mau lealea no ka ahaaina a ka Uhane Hemolele. O na hoomakaukau ana no ia po e hookokoke mai nei, eia ia ke nee mua nei me ke kukulu pu ia he lanai no ke kalaunu e waiho ai a me ke kuahu hoi e ku ai.

            Ma keia manawa i hoike ia ae la e malama ia ana he kai huakai maloko o ka pa luakini malalo o ke alakai ana a ka bana o ke kula o Sana Lui, a oia ka wa e lawe ia mai ai o ke kalaunu a me na hae mailoko mai o ka luakini no kahi o ka lanai i kukulu ia e na makua oia hoomana iloko o ka aahu eleele. Iwaenakonu o keia lanai e ku ai ke kuahu me ka uhipu ia me na pua me kekahi pakaukau i hoomakaukau ia no ka ahaaina, a mamua o keia kuahu e waiho ai na poe puuwai aloha i na makana e like me ke dala, lole, na hua ai, a pela aku, no ke kokua ana i na poe pilikia.

            Ma kekahi papa'i hale maloko no o ka pa luakini e kuai ia ai kekahi mau mea hana lima.

            I ka hora 1 o ka auina la Sabati e haawi ia ana he paina i kekahi mau Hawaii a me na Pukuku nele no lakou ka nui he 12, me ka hoonanea pu ana a ka bana Pukuku, a mahope oia manawa e hoihoi hou ia ai ke kalaunu a me na hae no loko o ka lanakila.

            E hoomalamalama ia ana oloko o ka pa luakini me 300 kukui uwila o na wai hooluu like ole ma na po Poaono a me Sabati.

 

UA HOIKE AE, E EMI ANA KA WAIWAI O KE KOPAA.

 

            Mamua o ka haalele ana iho o Kenerala Eagan ia Honolulu nei, a holo aku la no Hilo ma ke Kinau o ka Poalua nei, no ka hui ana me kana keiki e noho la malaila, ua olelo ae oia, o ke kanu ko, e lilo aku ana ia i mea waiwai ole ma keia mau paemoku, oiai, ua hiki ia Porto Rico a me Cuba ke hoolawa i kekahi hapa o ka poepoe honua me ke kulana limahana e hiki ole ai ia Hawaii ke uhai aku. Maloko o ekolu makahiki mai keia wa aku e emi no ke kopaa a hiki i ka 2 keneta o ka paona.

            Ua olelo pu ae hoi oia, o ke kope kekahi waiwai holomua ma keia mua aku, oiai, ke nui mau nei ka nui o ke kope e hoopuka ia nei, a ke nui mai nei hoi ke koi ia oia mau waiwai. He mau apana aina mahi kope ko kana keiki ma Ola@, aka, ua hoopiha ia nae oia me ka inaina i ke lohe ana mai, ua hoopau aku la oia i keia manao mua a e hoolilo aku ana oia i keia mau apana aina me ke kanuko ana.

 

            I ka hora 2 o ka aina la Sabati iho e malama ia ai ka halawai a ka Hui Kaa Buss o Kalihi, a ua makemake ia na lala a pau e akoakoa aku ma ia halawai.

 

E HOOPUKA IA AKU ANA ME KE AKAHELE.

 

            Ua haawia ae la o Loio Kuhina Kupa, ka Peresidena o ka Papa Ola he mau a'o ana i ka Agena o ka Papa Ola, e akahele loa kana haawi ana i na palapala ae kanu ma keia mua aku i na poe i loaa ole na palapala hoike i ke kumu o kona make ana mai kekahi kauka i loaa ka laikini. O ka mea e hoea aku ana me ka palapala hoike ole e hoouna ia aku no oia i ka Ilamuku. Ua a'o pu ia aku hoi ka ilamuku, o na poe i loaa ole na palapala hoike, he hana pono nana ke komo koke ana aku a noii pono i ke kumu i make ai mamua o ka ae ia ana aku e kanu.

            Ma keia e ikeia ai he hana paakiki loa ke kanu ana i na poe make ma keia mua aku, mamua o na makahiki i kaahope aku la, aka, ua ulu mai keia manao i ke aupuni i wahi e maopopo pono ai ke kumu i make ai, no ka mea, ua ike ia he lehulehu wale na poe i make me ka lapaau ole ia i na manawa i hala ae nei.

 

HOPU IA NO KA WAWAHI UKANA.

 

            He elua mau kalaiawa kaa ukana i hopuia e MaCauley a me Scanlon o ka hale dute no ka wawahi pahu ukana. O kahi i hopuia ai o keia mau kanaka ma ka uwapo Maila Pakipika. Ua loaa aku laua me na omole i piha me ka waiona, i hoomaopopo ia, ua laweia mai ia e laua mailoko mai o kekahi pahu ukana i wawahi ia. O laua a me na omole rama ua lawe ia mai i ka halewai, a malaila i ahewa ia ai laua no ka aihue.

 

NA LETA A KA PERESIDENA O FARANI.

 

            Ua olelo wale ia ao o ka nui o na leta a ka Peresidena o Farani e loaa nei i kela a me keia la ma kahi no ia o 700, a penei ka hoonohonoho ia ana o na leta me na manao like ole.

            Na leta noi oihana, 250; na palapala noi maluna o na kumuhana pili kalaiaina, 150; palapala noi mai na poe karaima mai, 100; na kue no na poe lawelawe oihana o ka lehulehu, 100; na leta pahenehene me ka hoohaahaa, 80; na leta hooweliweli e powa i ke ola, he 20.

 

            E malama ia ana he hookuka kinipopo mawaho o Makiki i keia Poaono mawaena o na Hui Kinipopo Kamehameha a me Batari K o ka Puali Pukaa Eono.

 

            Ua mawehe ae la ka pilina o ka Hui Keaka a Janet Waldorf, he ehiko lala oloko ona hui la i hooholo no ka hoopau loa ana aku i ka manao holo no Kina a me Aauseteralia.

 

            Ma Keauhou, Puna, ua loaa aku ke kino make o kekahi Iapana, a waiho ana ma ka lihi kai ia Chas. Stone. Ua loaa pu aku no kona mau aahu ma kekahi wahi kokoke no i kahi o ke kino e waiho ana. Ua manaoia ua piholo oia i kona wa o  @ ana.