Ke Aloha Aina, Volume V, Number 26, 1 July 1899 — Page 6

KE ALOHA AINA, POAONO, IULAI 1, 1899.

 

EGAN DRY GOODS COMPANY.

ALANUI PAPU.

-----

UA LOAA MAI LA IA MAKOU HE NA RIBINE KAHAKAHA DRESDON, UHIMAKA O NA WAI HOOLUU LIKE OLE, HE LEHULEHU WALE O NA LOLE AAHU KANE.

-----

E LOAA PU NO NA LOLE KANIKAU.

            Eia makou ke kuai hoemi loa nei i na waiwai o ko makou halekuai me ka nana ole i na poho, nolaila, e kipa mai mai hopohopo, a e ike ia no penei kekahi mau kumu kuai:

-----

EGAN DRY GOODS CO.

HONOLULU. ALANUI PAPU.

 

HE MOOLELO WALOHIA

NO

ALANADELA

-----

Ka Wahine Hoopahaohao o ka Aahu Keokeo.

A I OLE

Ka Loea Hookani Pila Hapa o ke Kulu Aumoe.

-----

            A no kekahi mau minute pokole wale no keia hele ana aku o Bonita me kana pio a me kona kanaka ka kaikahi, aia hoi, ua hoea io aku la lakou ma ke kae o ua pali nihinihi la i uhi paa ia e na lau nahele uliuli.

            A i ka ike ana ae o ua Bonita la, o kahi kupono loa keia e hooko aku ai i ka makemake o kona haku oia koke no kona wa i kaohi mai ai i kona lio, a ku iho la me ka poha pu ana aku hoi o kona leo kauoha i ka pane ana aku.

            E o'u mau kanaka hoolohe, e wehe koke ae i na kaula i hoopaa ia ai o ka kakou pio maluna o ka hokua o ka lio a waiho iho la iaia iluna ka lepo, no ka mea, ua hoea mai la kakou i kahi kupono e kanu ole ia ai o ka kakou pio.

            Elike me ka makemake o ko lakou alihikaua, pela na powa i hooko aku ai, a mahope o ko lakou kaohi ana i ka holo o ko lakou mau lio, oia no ko lakou wa i lele aku ai mailuna aku o ko lakou mau lio, a wehe koke ae la i na kaula i hoopaa ia ai o ka kaua Alanadela.

            A iloko o na minute pokole ua hemo ae la ia, a ia wa no i pee hope mai ai ka leo o ua Bonita la penei:

            E o'u mau kanaka e wehe ae i ka uhi i huna ia ai na helehelena o ka kakou pio, aole wale oia, aka, e wehe ae i ka popo welu i hoopaa ia ai kona waha, no ka mea, ua makemake au e kukai kamailio me ia mamua o ko kakou kau ana aku i kekahi hoopai weliweli loa maluna ona.

            I ke kuu ana iho o ka leo kauoha o Bonita, oia no ka wa o kona mau kanaka i lalau aku ai a wehe ae ia ka uhimaka e paa ana maluna o Alanadela me ka wehe pu ia ae hoi o ka popo welu e paa ana ma kona waha.

            I ke kaawale ana aku o ka uhi i huna ia ai ka helehelena o ka kaua Alanadela mailuna aku ona, oia no ka wa i hoohikilele ia ae ai o Bonita i ka ike ana aku i na helehelena ui o kana pio e lawe ana.

            A me ka hookaulua ole iho lohe koke ia aku la ka leo o ua alihikaua nui la i ka pane ana aku, me ka leo kakana i ka i ana aku.

            E ka makou pio ano, ua kokoke mai kou hopena o keia ola ana, no laila, he manao anei kou mamua o ko makou olokaa ana aku ia oe ilalo o keia awaawa kuhohonu?

            A i ka hookuu ana iho o ka leo o ua Bonita nei, ua ikeia aku la na waimaka e hiolo mai ana mai na lihilihi maka mai o ka kaua Alanadela, a no kekahi wa loihi hoi kona noho hamau ana me ka ekemu ole a me na maka i piha i ka ehaeha e kaulona pono ana maluna o Bonita.

            I ka aui hope ana ae o kekahi mau sekona, oia no ka wa i ike ia aku ai na lehelehe o ka kaua aloha i ka owaka ana ae me ka malie, a me ka leo hoi i piha me ka ehaeha puana ae la oia me ka nahenaha.

            E ke alakai o na powa, he hookahi wale no o'u manao e nu nei iloko o kuu puuwai, oia hoi, e hoopakele ae oe i ko'u ola mai keia lua kupapau, a mai hopohopo hoi no'u, no ka mea, aole loa au e huli hoi aku ana no ke alo o kou haku, aka, maloko o keia mau ululaau e kuewa aku ai, a na ka lokomaikai o na lani e hoopakele mai ia'u. A o ke kane a maua ua hiki no ia me ia, a na'u no hoi e hele hookahi.

            Ma keia wahi i hooki iho ai ka wahine opio i kona leo, a ike ia aku la ke poo i ke kulou ana iho no kekahi manawa pokole wale no, ua aea koke ae la oia iluna me ka luliluli ana ae a pane mai la.

            E kuu pio he hana hiki ole ia'u ke hooko aku, oia hoi ka hoopakele ana ae i kou ola, oiai, ua haawiia mai ia'u na kauoha ikaika, aohe mana ma keia ilihonua nana e hoopakele ae ia oe. Nolaila, e ka wahine opio, aole loa au e ae aku ana i kou manao. E hoike hope mai oia wale no anei kou manao?

            I ka hookuu ana iho o ua Bonita nei i kona leo, oia no ka wa i lohe ia aku ai ka leo kumakena o ke kaumaha e oili mai ana na lehelehe mai o ka ui Alanadela, me ka hoohanini pu mai hoi i na poiwai o ka ehaeha mai kona mau lihilihi mai.

            A i keia wa no hoi i lohe hou ia aku ai ka leo kauoha o ua Bonita la i ka pane ana aku i kona mau kanaka, nana hoi i hoopuanuanu aku i ka puuwai o ka kaua Alanadela aloha, i ka i ana aku:

            Ano, e o'u mau kanaka hoolohe, e uhi hou aku i na helehelena ui o ka kakou pio me ko kahakahana welu, i ole ai hoi oia e ike i ka weliweli o kona luakupapau. E wiki, a mai hoohakalia hou aku, oiai, ke nee awiwi nei na hora o ka la imua.

            He mea oiaio, olike me ka makemake o ka Alihikaua nui Bonita, pela kona mau kanaka i hooko aku ai. A me ka emoole, ua nalohia hou aku la hoi na helehelena o ka wahine opio mahope o ke kahakahana welu ulaula.

            Ma keia wahi i loheia aku ai ka leo kanaenae hope loa o Alanadela i ka pane ana aku me ka walohia nui, nana hoi i hoopiha i ka puuwai o Bonita me ke aloha, aka, ua hiki ole nae iaia ke kue aku i ke kaukau ana aku me ka leo nawaliwali. E Bonita, ka pukaua nui o ka'u alii kane i hilinai kuhihawa ai, aole loa oia e hana koomaewaewa mai ana maluna o'u elike me ka loihi o na la o ko maua ola ana maluna o koia ilihonua. Ka hoaloha hoi i alo hookahi me ia malalo o na hoopa ana a kana kane.

            A no ia ike kumaka ana ia mau haawina ehaeha, ua kukuni paa iho ke aloha iloko o kuu puuwai ma kona aoao au i na wa a paa a na kumake wale no e mawehe ae i ko maua pili paa ana. Aka, ke ike maopopo nei au i keia la, ua huli mai la no oia a hoomainoino ia'u.

            Ano, i keia wa mamua ae o ko oukou onou hou ana mai i ka popo welu o ka ehaeha iloko o kuu waha e lawe aku i kuu aloha nona a me ke kane a maua, me ka hoike hope aku hoi, ua huikala aku au i kona mau manao lokoino a pau i hana mai ai maluna o'u. I keia sekona, e hooko aku i ka leo kauoha o ko oukou haku, ua makaukau au no ka halawai ana aku me ka make.

 

            Ua hoohui ia ae ma ka berita laahia o ka mare o Mr. Jos. Humeku me Miss Lizzie A. Carter maloko o ka luakini Katolika, ma ka ahiahi Poaono nei, a ua malamaia ae he anaina ke no na paa mare mauka o Kunawai, mahope o ko laua hipuu ia ana me ka pahola pu ia mai nei he papaaina i piha me na kohi kelekele a ka Puukolu.

 

NA WAIWAI NANI ME NA PAIKINI HOU LOA.

            Ua loaa mai nei ia'u ma kela pule aku nei he heluna nui o na Waiwai ma Europa pololei mai. I wae ponoi ia e ko'u mau Agena ma Ladana. A i loaa mai hoi ia lakou ma ke kumukuai emi loa o na makeke malaila.

-----

O KA HOPENA:

            Ua hiki ia'u ke kuai hoemi loa aku keia mau Waiwai ma ke kumukuai haahaa loa, nana e hoohikilele ina kanaka, a e waiho koke no lakou i ka hookomo i na dala ILOKO O NA MAHELE KOPAA.

-----

            He nui loa e hiki ai ke loaa i na mea a pau, a e hoolako ai hoi i ko lakou mau hemahema, no ka waiho malie ana a hiki i ka wa i makemake ia, no ka mea, o na waiwai elike me keia aole e loaa hou ana no keia kumukuai, a i ko lakou wa e pau ai, aole e hiki ke hoopiha hou ia mai.

-----

PAPALE, HOOWEHEWEHEIA A HOOWEHIWEHI OLE IA.

            O na ano like ole, me na waihooluu like ole, a i ko lakou wa e hoohalike ai me he wai anuenue ahiehie.

-----

L.B. KERR.

Honolulu, Alanui Moiwahine.