Ke Aloha Aina, Volume V, Number 30, 29 July 1899 — Page 5

KE ALOHA AINA

 

KE ALOHA AINA POAONO, IULAI 29, 1899.    5

 

ka aie a me ka poho holookoa o na lala i komo iloko o na mau Ahahui nei i kukulu ia ai.

            Ua lehulehu na huaolelo i panai ia mai maluna o ka poe nana e kukulu ae ana i kekahi hui, ua makana koke ia mai no lakou me na huaolelo awaawa, e hiki ole ai i ka hana ke hele imua, a na komo koke ae la hoi na huaolelo hooiloilo me ka papahi ana mai i ka poe e hana,  “e poho ana oukou, ua pau ke dala ia mea ma i ka ai ia, oia no ke dala a mea e kuai ana i ka lole no ka wahine ana me na keiki,” ua komo pono aku keia mau huaolelo iloko o na pepeiao o na lala o ua mau Ahahui la, a ia wa no, ua ike ia aku la ka loli ano e ana ae o na manao hilinai i kinohi a iloko o na manao lili pi@@kino, a o ka hopena aku, oia ka ulu mau ana o ka mokuahana iwaena o na Luna Nui o ka hui a me kona mau lala.

            E olelo ia mai ana paha makou no ko makou lawe ana mai a kamailio akea aku i keia kumuhana imua o ke akea; aole ia no ko makou manao ana e hoino wale aku ia mau hoa kanaka i komo aku iloko o ka poai o na hana o ka noho ana, a me ka manao ana e imi i pono e hookuonoono ai i ka noho ana ohana, a pili laula ho i no ka pono o ka lehulehu.

            Ua hakilo nui makou i na wa a pau a kekahi poe e hoala ai i kekahi hui, aia no iloko o kekahi poe o lakou @a manao ino eleele o ke apuka kahi i noho ai, ma o na Luna Nui la o ka Ahahui, ua hoomaka lakou e hoopalupalu i ka noonoo o na lala o ka Ahahui a iloko hoi o ka ulumahiehie o ke ohohia a me ka hilinai pihaia, iloko o na la kinohi. o kona nee ana iloko o ka Kolomua o ka hoohana ia ana, aia hoi, ua komo mai la ka mu a me popo e poino holookoa ai na mea a pau, a e hiki ole ai hoi ke kinai ia, a hiki i kona walawala pahu ana iloko a ka aie kaa ole.

            Aole keia he mau olelo haku wale iho na ko makou noonoo, aka, he mea na ko makou mau onohi maka i ike a i kamaaina ai ma keia a me keia wahi i kukulu ia ai o na hui malalo o ka hookele ponoi ana a na Hawaii i ko lakou mau hui i manaolana ia aku ai he puuhonua ia no ka noho ana aku, ina hoi i pono a i pomaikai na hoohana i ana.  Aole i kaawale loa aku ia mau ano hui mai ko makou mau lihilihi maka aku, aka, iloko ponoi no o ke kulanakauhale i na la i hala aku la, a pela no hoi i keia mau la e noe nei, oia ano hookahi no o ka uhai loloa ia o ka pilikia a me ka hopohopo mau ia no ka poino o ka lakou dala malalo oia ano hana.

            O ke kumu nui i ulu maoli mai ai no o keia pilikia iloko o ko kakou mau Ahahui, oia no ka like ole o na manao o na Luna Nui a me ko lakou mau lala, a i ka wa e malama ia ai o kekahi nalawai, mamuli o ke kahea ana a na poo o ka Ahahui, ua hooulu koke ia mai la na hoopaapaa ana no ke kulike ole o na hoohana ia ana elike me ka makemake o na lala, a na keia like ole o ka lokahi, i hooulu mai i ka mokuahana a o ka hopena, ua pau a helelei aku la ke ku ana oia hui a mau ahahui paha, malalo o keia ano like hookahi, ka mea hiki ole ke hoolohi ia ia mau ano iloko o ka puuwai o na mea a pau, e paa ana malalo o ka noho ana lala no na Ahahui i hookumu ia malalo o ka manao ana e loaa ana he pomaikai iwaena o na mea a pau.

            Ua hala ia mau la, a he wa hou hoi keia, nolaila, he mea pono ia kakou ke hoopau i na manao hoopohala o ka hilinai ole, a e hoao kakou e kukulu i ka kakou mau hana malalo o ka hookanaka makua, a e wae hoi kela a me keia Ahahui i na kanaka hoopono, a i ikeia hoi he poe kupono lakou e malama a e paa i ke dala a ka lehulehu iloko o ka lakou mau lima, mamua o ka haawi ana aku na hai e malama, a he poe hoi na ka lehulehu i hilinai ole ai, aole lakou e hana ana i ko ka lehulehu mau pono.

            Maluna o ka mokuahi Gaelic i hoea mai nei ia nei ma ke kakahiaka Sabati nei, i huli hoi mai ai o Mrs. Hana Cook, o Waimea, Kauai, mai Iokohama mai, mahope o kekahi huakai pokole no ia aina kaulana.  He nui na mea ana i ike ai malaila, me ka hoea pu aku i Tokio a ike i ka halealii kahi o ka Emepera o Iapana e noho ana.

 

PACIFIC IMPORT COMPANY.

 

PROGRESS BLOCK.  ALANUI PAPU

 

HE KUAI KUIKAWA NUI NO KEIA PULE WALE NO.

 

Ua loaa mai nei ia makou he heluna nui o na.

 

HALII MOE

 

Eia ke kuai ia aku nei ma ke kumukuai makepono @@ e like me ia i loaa mai ai ia makou.  O ka makou Halii  $1.50, oia kekahi o na waiwai nani i kuai oleia ma keia kulanakauhale.

 

AAHU HOLOIONA LEDE

 

O na ano like ole, ma ke kumukuai haahaa loa.  He nui na nani e ae e hoikeikeia aoa ma keia keena.

 

Ue Kuai Kuikawa o na

OGANADI

            Ma ka 10 keneta o ka i-a

I keia pule e hoikeikeia ana ua

            PIQUES

I nounoa polole ia mai Farani, Euelani a me Geremania.

 

Eia makou ke kuai nei i @a

Vitoria Lawns, Lilina Inia @

me na Lilina Lawns.

Nolaila mai poina i ke kipa mai, a e ike nou iho i ke kumukuai haahaa loa.

 

He heluna nei o na

Lole Auau o na Kane me na Wahine.

 

Ua loaa mai ia makou he heluna nui o na Ribine o na Waihooluu like ole.

 

Pacific Import Co.

 

NAWAI E UKU I NA HOOLILO

 

HOOLE O AMERIKA HUIPUIA I KA UKU ANA INA BILA AIE.

 

Maopopo Ole ke Aupuni Hawaii i Kana Mea e Hana Aku ai.

 

            E hoomanaoia, he eono mahina i hala ae nei, he heluna nui o na pake i paa ia i ko lakou wa i hoea mai ai ianei mai Hongkong no ke kali ana i ka huli akahe’e ia ana o ko lakou mau palapala ae a me na hoike mai Wasinetona mai.  He mau haneri i hoole ia ko lakou hoolele ia ana, ua hoopii aku lakou i ke Kuhina Waiwai, me ka hoopii loa aku i Wasinetona ma o A. G. M. Robikana la i hoouna ia aku no ia kumuhana.  He lehulehu wale o na pake i paa ia ma ka pa hoomalu no ke kali ana i ka hopena o ka noonoo ia ana o ka lakou koi nona hoi ka loihi o ka manawa i paa ia ai o kekahi poe he ekolu mahina.  O keia poe pake, ua haawi ia aku he poe @iai kuikawa i ko lakou wa e noho ana me ko lakou hanai pu ia aku e like me ka ai e loaa ana i na @mahana.  Aka, ua hoea mai la nae he ninau kupilikii, owai la ka mea nana e uku ana i na bila aie?

            Ma kahi mua, o na hui mokuahi ke kuleana i ka uku ana i na bila aie i ka wa e hoomalu ia ana, a ua uku lakou me ka ninau ole. I ka wa i pau ai na la hoomalu, ua hoike aku na hui mokuahi i ke aupuni aole o lakou kuleana i koe no ka uku hou ana i na hoolilo o na limahana e paa ia ana. Oiai, aole he makemake o Mr. McVeigh, ka mea nana e malama ana i keia poe, e ike aku ia lakou e pololi ana, nolaila ua hui aku la oia me Mr. Reynolds o ka Papa Ola, me ka haawi pu aku i ke kauoha no ka hoolako ana i keia poe.

            I ka wa i hookuu ia ai o keia poe mai ka paa ia ana malaila, ua hoouna ia aku la na bila aie a pau i Wasinetona, me ka huipu ia aku o ka uku o na kiai a me na i lo no ka malama ana ia lakou.  Ma kela moku hope aku nei i loaa mai ai ka pane maanei mai Washinetona mai, e olelo ana, e ili na koikoi maluna o Amerika Huipuia, ka uku ana a me ka malama ia ana o na kiai, aka, aole loa nae ona wahi kuleana no ka uku ana i na bila aie no ka malama ia ana o na limahana i ko lakou wa e kali ana i ka lakou hoopii, oia hoi, mai ka ae ia ana e lele iuka o ka aina.

            Ma keia hoole ana mai la a Amerika Huipuia i ka uku aua, ua ulu ae la he ninau ano nui, owai ke auamo ana i ke koikoi o ka uku ana i keia mau aie, aka, ua hoomaopopo ia no nae o ka Papa Ola ka mea e haawe ana i keia mau haawina koikoi, oiai, na kona agena i hoopuka i na kauoha, aka, o ko lakou uku ana he mea maopopo oleia Aole he dala maloko o ka waihona o ka papa e hiki ai ke uku, a o ka haawina dala i hookaawale ia no keia elua makahiki, ua kokoke loa ia e pau.

            Eia na bila aie ke waiho nei no ekolu mahina me ka uku ole ia, a o na poe kalepa ka poe i hoopoino ia.  Ua hoomaopopo ia o ka nui o na hoolilo ma kahi no ia o $2,100, a o na lilo nui ikeia no ka raiki, bipi a me ka i’a.  Nolaila, ua maopopo ole i ke aupuni kana mea e hana aku ai.

 

            Ua hopu@a ma ka La Pule nei i Keoki Hapakela, no ke kuai waiona me ka laikini ole.

 

KA PII MAU AE LA KO LAKOU KULANA MAKAUKAU.

 

            San Fernando, Pilipine.---Eia makou ke houluulu nei iloko o na hale ohe o na kamaaina e ku @Iaina nei ma ke alanui mawawna o San Fernando a me Bacalose, eia na koa Kansas ke kali nei no ke kikina ua, a makou hoi e hoponopo nei, ua kokoke loa mai ia.  Nui ka lepo poho a’u i ike pono ai a me ke kulana pohopoho a ka aina mahope o ka ua ana, ua lawa au me ka hiki ole ke hoike aku i ke kulana kaua aka, he manaolana nae ko’u he hana e pulu mau ai ka paa ana i na wahi i lilo mai ia makou.

            Ma na hiohiona a pau e ikeia aku nei no na kipi, eia ke pii mau ae nei ko lakou kulana ikaika a me ka makaukau kaua i keia a me keia la, a o na poe i komo i ke kaua mai kona hoomaka ana, eia lakou ke hoomaopopo nei, ua oi ae ka makaukau o na Pilipine i keia wa no ka hakaka mamua o na manawa i hala aku la.

            He manaolana ko’u e loaa ana no ka maluhia mamua o ka haalele ana iho o na koa kuikawa no ka home, aka, no ka hoea ana mai nae o ka wa e pau ai ka hana, he mea maopopo ole ia ke hoike aku, koe wale no malia he mau loli ana o na poe kii, aka, ke olelo nei nae na koa ma kahi o 100,000 kanaka lawa no ka hoomalu ana.

 

HE MAKANA IA BERGER.

 

            Oiai ka bana e paani ana ma kahi a ka moku haukipila Relief e ku ana, ma ka Poakahi nei, no ka pomaikai o na koa ma’i a me na koa i hoeha ia, ua haawi makana ia mai la o Berger, ke alakai o ka bana aupuni Hawaii me kekahi ohe nani loa i loaa maluna o ke kahua kana o Caloocan.  O ka lutanela i loaa ai na ohe la, oia ponoi no ka mea nana i haawi mai ia Berger, a na hoopihaia oia me ka hauoli no keia makana i loaa iaia.