Ke Aloha Aina, Volume V, Number 34, 26 August 1899 — Page 5
| This text was transcribed by: | Aki Astrid Dinda |
| This work is dedicated to: | to Johanna and Julius |
KE ALOHA AINA
POAONO, AUGATE 26, 1899. 5
NA HAWAII MA KA HOIKEIKE O OMAHA
O ka nupepa Omaha World Herald o ka la 23 o Iulai, e olelo: Ua wehe ia ae ke kauhale Hawaii, mahope o ke kukulu pupuahuluia ana o kekahi hale nani a ua hoohalikeia me ke ano o ka halealiima Honolulu e huli ana ke alo i ka Midway, o ka hale keaka mahope mai, mao koke aku he lokowai, kahi a na Amerika e ike koke ai, ma keia mua iho i ke akamai au nana i hookaulana i na Hawaii.
O ka hale keaka, oiai, aole no i paa pono, ua lawa no nae ia no ka mahalo ia aku. Aia mahope aku o kahi i hookiekie ia e hoikeia ana he alanui o ke au kahiko o ke kulanakauhale o Honolulu maluna o kekahi paku, a ma na aoao o ka paku, ua pena ia he mau kumu niu a me kekahi mau laau ulu e ae.
Oiai, ua hoohauoli ia ka lehulehu me na hana a na Hawaii i komo pu ai ma ke kai huakai Venetian ma ka po Poalima, a o na poe i hoopiha aku i ka hale keaka o na kauhale ma ka ponei, ua hoohikilele ia lakou me ka nahenahe a me ka hoene o na mea kahi i panee ia mai imua o lakou. Na ka makani a me na kaula o na mea kani i huipu ia, i hookuu mai i kekahi leo i hiki ole ke hoakaka aku, aka, he hookahi wale no nae mea e hiki ke olelo ia ae he nani.
Ua komo pu mai he mau hula i ike wale ia no ma na paemoku iwaena o ka Pakipike, a aole hoi he hookahi o lakou i hoonele ia me ka haawiia ana o na leo hauoli. Ua oleloia ae e lilo ana i na kauhale Hawaii ka hanohano o ka Midway.
---
AIA KE AU LA I NA ALE HANUPANUPA.
Maluna o ka mokuahi Alameda o ke aumoe o ka po Poalima nei, i haalele iho ai o Rev. S. L. Desha a me Rev. J. Kauhane i ke kulanakauhale nei, a au aku la i ke kai ma ke alahele e hoea aku ai i Kapalakiko, a malaila aku hoi laua e kau aku ai maluna o ke kaaahi no Besetona ka pahu hopu o ka laua huakai e hele nei. A malaila e hui aku ai laua me ko laua mau mua i hala e aku, oia hoi, o Rev. Timoteo a me Rev. Ezera. O ka makou e upu ae nei e hahai ia ka lakou huakai me na pomaikai he nui.
---
Ma ka la 4 o Sepatemaba ae nei, e kuai kudala ia aku ai ka hoolimalima o ka apana aina o ka Moiwahine Kapiolani e waiho nei ma ke kihi o na alanui Puowaina a me Moiwahine, no ka loihi o iwakalua makahiki.
---
ONENE KAUA MA TRANSVAAL
AIA O BERITANIA KE HOOUNA LA I NA KOA.
Ke Liuliu la na Boers no ka Halawai ana mei me Lakou.
Nu Ioka, Aug, 13. He lono telegarapa kai loaa mai nei i ke Times mai Ladana mai, e olelo ana: O na manao kaua eia ia ke pii ikaika mau ae nei. O na pualikoa e haalele nei ua haawi ia aku na leo huro o ka hauoli, a i ka wa o na pualikoa kuikawa e komo ai ma kahi hoolulu, elike me na koa kuikawa o Amerika Huipuia, ua makaikai ia aku ko lakou haalele ana iho e kekahi heluna kanaka nui.
O ka hoonua ia ana o na koa ma luna o na moku, eia ia ke hoomau ia nei, a o ka manao o ka hapanui e hoea mai ana he kaua. O na kana ka a pau i hookuuia no ka manawa ua kahea hou ia aku lakou, a eia ke hoao ia nei na koa o home e hoolako ma na ano a pau. O ka hoohikilele ana ma na po oia na kauoha i haawi ia aku ma Aldershout, a ma kahi o 30,000 koa e hoala ia ana ma na hora i maopopo ole, a maki aku la no elua hora no ka huli pono ana i ko lakou kulana nawaliwali.
Aia na koa ke ake la no ka halawai hou ana me na Boers. O ka inoa hope aia oia ke hoomakaukau pu la, a aole hoi he la i nele me ka hoolaha ole ana o na nupepa no ka hoouna ia ana mai he mau lako kaua mei Geremania mai.
HE 55,000 KOA NO TRANSVAAL.
Ladana, Aug, 14. O ke Times ma keia kakahiaka maloko o kekahi manao kuikawa e pili ana i ke kulana ma Transvaal, ua olelo ae oia:
Ina e hoea io mai ana ke kaua, ma ka pakui ana aku i na 12,000 koa e hoouna ia ana mai Inia aku, e hoouna ia aku ana he 30,000 koa mai Enelani aku, he hoomahuahua ana aku ia i ka heluna ikaika o Beritania a hiki i ke 55,000 koa ma Transvaal.
KE LIULIU LA, @
Johannesburg, Aug. 13. O ke aupuni Transvaal, ua hoike ia mai nei, ua hoolala aku la ia me ka Hui Kaaahi Netherlands South African no ka hoakoakoa ana ika wa pokole ina e makemake ia. He nui na lako ai a me na lako kaua i hoakoakoa ia ma Pretoria. Ua loaa pu ae he mau hoike ua hoopukaia ae la he kauoha no ka hoakoakoa ana mai i na puali pukaa.
---
PAKELE MAI LILO PIO I NA KIPI.
He lono kai loaa mai no ka pakele mahunehune ana o ka moku lawekoa Centennial mai ka lilo ana i pio na na poe Pilipine, ua ili oia ma na kapakai o Pilipine, a i ka ike ana o kona kapena aohe alahele e ae e pakele ai, o ke kiola wale no i na ukana iloko o ke kai. Ua hoomaka koke lakou e hoolei i na ukana no lakou ka waiwaiio o $13,000, a i ka wa o ka moku i hemo ai, ua ike ia aku le he 1000 poe kipi i lako me na mea kaua e ku ana ma kahakai me ka makaukau no ka holo ana mai e hoopoino i ka moku. Laki no.
---
Ua hoohui ia ae ma ka kerita o ka mare o Albert McGurn me Miss Tillie Copland e Rev. H. H. Pareka ma ka po La Pule nei ma kahi o Kauka Huddy.
---
KE HANA MAU LA KE KAUA
AIA NA KIPI KE HOOMAU LA I KA HAKAKA.
Poino Like na Aoao Elua Maluna o na Kahua Kaua.
Manila, Aug. 14. Ua lele kaua mai na kipi i keia la ma San Luis, ma ka Rio Grande, kokoke i Calumpit, he pakaua i kiai ia e elua puali o ka regimana 22. He hookahi Amerika i make, he kakiana, a me elua koa i hoea ia.
Ma ka la inehinei, ua hana ia aku ia hana like ma Gringua, ma kahi he eha mile ma ka hema aku o Malolo, he wahi pakaua e kiai ana i ke alahao.
Oiai ka regimana 17, ma ke kaua o ka Poalua nei e hookokoke aku ana i Calulut, ua ike aku na koa he puali o kanalima Pilipine mawaho mai o ke taona me ka hae keokeo. O kekahi poe iloko o na aahu keokeo e kau ana na lima iluna e hoike mai ana aohe a lakou mau lako kaua. Ua nee aku o Kapena Hart me kekahi puali, a ma kahi he 200 ia mai lakou mai, ua hopu aku la na Pilipine i na pu a ki mai la. Ua haule koke iho na Amerika no lalo o ka mauu me ka hoea ole ia a ki aku la. Ua pau aku na Pilipine i ka holo.
Manila, Aug, 13. He puali kaua lio no lakou ka huina o 250 kanaka e alakai ia ana e Kapena Parker, oiai, lakou e hakilo ana i ka aina ma kahi kokoke i San Mateo ma ka hikina aku o Manila i keia mau la, ua halawai aku la lakou me 300 Pilipine, a ua ki koke mai hoi lakou maluna o na Amerika. Ua palai koke aku na Amerika me ka ohai ana aku mahope o lakou, ua emi hope aku lakou no ke taona o San Mateo, aka, ua hoomau aku nae na Amerika i ke kaua ana a hiki i ka lilo pio ana o ke taona. He elua koa kaua lio i make a me umikumamaha i hoea ia, o ka poino o na enemi he iwakalua-kumamalima i make.
---
KA MOKU KOA SENATOA.
Ua hoea mai la ma ka po Poalua nei ka moku lawekoa Senatoa me 700 koa no Manila. Ua haalele aku oia ma ka la 15 iho nei ia Kapalakiko, a hoea mai la ianei iloko o ehiku la holo.
Ua lohe ia mai nei maluna ona mamua ae o kona haalele ana aku nei ia Kapalakiko, ua loaa mai la he kauoha i na moku lawekoa a pau mai ia Kenerala Otis mai, no ka holo pololei ana mai Kapalakiko aku a hiki i Nakasaki no ka hoopiha nanahu ana malaila, i hiki ai hoi ia lakou ke noho ma Manila me ka hoopiha nanahu ole, oiai, aole he hiki pono o ka hoopiha nanahu ana malalo o Manila i keia wa o ka ino e pahola ala malaila. Nolaila, ma ia kauoha ua hooko aku la ka moku lawekoa Morgan City, ua haalele aku la oia ia Kapalakiko me ka kipa ole mai ianei. O na mokuahi lawekoa liilii i hiki ole ke lawa ma ka nanahu a hiki i Nagasaki ke hoea mai ana ianei.
---
Eia ke nui mai nei na aihue kaa baikikala i keia mau po, a ua nui na hoopii i waiho ia aku i ka halewai no ka hopu ana i na poe nana e lawelawe nei i keia hana kohole.
---
PACIFIC IMPORT COMPANY.
PROGRESS BLOCK. ALANUI PAPU.
---
HE KUAI KUIKAWA NUI NO KEIA PULE WALE NO.
---
Ua loaa mai nei ia makou he heluna nui o na
HALII MOE
Eia ke kuai ia aku nei ma ke kumukuai makepono no e like me ia i loaa mai ai ia makou. O ka makou Halii $1.50, oia kekahi o na waiwai nani i kuai oleia ma keia kulanakauhale.
---
AAHU HOLOI O NA LEDE
O na ano like ole, make kumukuai haahaa loa. He nui na naui e ae e hoikeikeia ana ma keia keena.
---
He Kuai Kuikawa o na
OGANADI
Ma ka 10 keneta o ka i-a.
---
I keia pule e hoikeikeia ana na
PIQUES.
I hounoa pololeia mei Farani, Enelani a me Geremania.
---
Eia makou ke kuai nei i na
Victoria Lawns, Lilina Inia a me na Lilina Lawns.
Nolaila, mai poina i ko kipa mai, a e ike nou iho i ke kumukuai haahaa loa.
---
He heluna nui o na
Lole Auau o na Kane me na Wahine.
---
Ua loaa mai ia makou he heluna nui o na Ribine o na Waihooluu like ole.
Pacific Import Co.
---