Ke Aloha Aina, Volume VI, Number 9, 3 March 1900 — Page 4

KE ALOHA AINA

 

Hookumuia no ka

Pomaikai o ka Lehulehu, a he Nu

pepa na ka Lahui Hawaii

 

EDWARD L. LIKE

Lunahooponopono

JOSEPH K. LIKE

Luna Hoohana

HOGAN E. KALUNA,

Luna Hoopuka

EMMA NAWAHI

Puuku o KE ALOHA AINA

 

HONOLULU…MAR. 2, 1900

 

E HOOMAU I KE KUPAA NO KE ALO IA I KA AINA

(Helu 4)

 

            E hoomau i ke kupaa i keaha? Pane: "I ka hoole aku, aole loa e hoohui ia aku na Paeaina o Hawaii nei me Amerika Huipuia kela hoohui aina a Kakina ma i halihali ai i Amerika maluna o ka moku Kalaudina, i ka malama o Ianuari, 1893."

            2. E hoomau i ka hoole ana, aole he pololei o keia olelo hooholo hoohui aina a Nulana, no ka mea, he olelo hooholo pakaha maopopo loa ia o ke ano aihue hilahila ole, i hana ia a hooholo ia iloko o ka Ahaolelo o kekahi o na aupuni nui a naauao o ka honua nei, oia hoi, o Amerika Huiia.

            3. E hoomau i ka hoole ana aku, aole loa he kuleana o ke aupuni Amerika e hana mai ai i aupuni no kakou e ka lahui Hawaii, me he mea la, he lahui aupuni aole kakou mai mua mai, i kohu ai oia e hana mai i aupuni no kakou, elike me kana lauwili a e panaka kolohe mai nei.

            4. E hoomau kakou i ka hoole aku, aole kakou ka lahui Hawaii i mahalo iki i na han kolohe me na hana hoopiliki wale a ke aupuni Amerika ia kakou, oiai kakou ka lahui Hawaii, aole i hana hewa aku i ke aupuni Amerika.

            5. E hoomau kakou i ke koi ana, e hoihoi mai ke aupuni Amerika i ke aupuni kumu o Hawaii a me na pono a pau elike me ia i ka la a kona Kuhina kolohe i kokua ai i ka poe kipi iho mau keleawe hilahila ole, a ku hou me kona kilohana a pau, elike me ia mai mua mai.

            6. E hoomau kakou i ka hoole ana, aole o kakou makemake i ke aupuni kolikoli a lakou, i manao ai, oia ko kakou ano aupuni a lakou e haawi mai ai no kakou, Hele pela.

            7. E hoole aku kakou i na kanawai hooomalimali a lakou e hana mai nei, e pili ana i ke koho balota, a pela aku.  He hookamani a he hoomalimali maalea o ka nahesa ia ano han.  E kipaku aku lakou, elike me Iesu i kipaku aku ai ia Diabolo me ka olelo ana aku. "E hele pela oe e Satana." Mat 4:10.

            Pela kakou e hoole aku ai me ka ikaika ia mau hana maalea, a lakou e hana mai nei, oiai, ua naauao no ko kakou lahui, a e hiki no ia kakou ke hooponopono i ko kakou aupuni, a heaha ke kumu o ka waiho aku na lakou e hana mai ke ano o ke aupuni, na kanawai a me na luna aupuni? Hele pela.

            8. E hoomau kakou i ka olelo aku ia Amerika, ua hana hewa loa oe ia Hawaii lahui uuku, lahui palupalu a nawaliwali, a e holoi koke oe i kau karaima ekaeka i hana mai ai maluna o makou.

            9. E hoomau kakou i ka hoole ana, aole he kupono iki o ko Amerika lawe lima nui ana ae, e hoomalu kumu ole ia kakou, he pakaha a me ka powa ia ano hana, he hana i kohu ole loa e hna ia e ke aupuni o Amerika.  A oiai oia e noho hoomalu kohu ole ana ia Hawaii nei, puhi ia ke kino make o ke kanaka i ke ahi a puhi wale ia na hale a me na waiwai o ke kahi poe he nui wale, aole o kana mai ka pilikia i loaa i kona wa e noho hoomalu kohu ole ana, he poino hoi i ike ole ia mai mua mai ma keia aina a ka maluhia i kuakaha ai.

            Ma keia mau kumu a me na kumu aku i koe, e hoomau ai kakou i ke kupaa ana.

            A heaha ka mea nui nana e kono mai ia kakou, e hoomau i ke kupaa ana?  Eia, o ke aloha.  Ke aloha i ka aina, ka lahui, i ke aupuni kumu, i ka Hae Hawaii, i ka Moi, i ke Kuokoa a me na pono lahui o ka noho kuokoa ana i loaa mua mai, mai na aupuni nui o Beritania, Farani a me kahi mau aupuni nui e ae, a me ke aupuni Amerika no hoi, ke aupuni nui nana i hana ino loa ia kakou.

            O kela mea nui hookahi wale no, ka mea e hiki ai ia kakou ke hoomau i ke kupaa ana, a ina aole mea maikai loa iloko o kakou aole no e mau ke kupaa ana maluna o keia kahua a kakou e paio nei no ka pono o ko kakou aina makua, o Hawaii Ponoi.

            Ua pilipaa ke aloha o Ruta ia Naomi kona makuahonowai, aole i mawehe ia ae e na olelo uwehe a Naomi i pane mai ai me na waimaka aloha e hiolo ana, i ka i ana mai penei: "E hoi olua e a'u kaikamahine, no ka mea, ua oluomene (wahine) au, aole e loaa hou i mau huapala (kane) hou na olua."

 

(E nana ma ka aoao 6)

 

            He keaka no k o ka Ofiuma i keia po.

 

KE PUHI AHI MA HILO.

 

(Mai ka Elele Hawaii mai, Feb. 17)

            I ka auina la o neihei (Poalima) ua loaa mai la ka lono a puni ke kulanakauhale e puhi ahi ia ana ka halekuai o A.G. Serrao, a i ka makaukau aa o na mea a pau e kaupale ia ai ke ahi mai ka a ana aku maluna o kekahi mau hale e pili koke ana, ua hiki aku la ka manawa i ka hora 5, a o ka wa no ia i kuni ia ia aku ai o ke ahi, a hoomaka aku la e a elike me kona mana hoonee ke hoohana.  Ua ku no hoi na keiki kinaiahi me ka eleu me na iliwai no ke kaohi aa mai i ka maau hele ana aku mao o maanei, a pela no hoi me na paahao malalo o ka hoohana an a ka Makai Nui.  Ua kokua nui ia keia han mamuli o ke oaniani makani ole a hiki i k a palaha ana ilalo a lilo i puuleha ko ke ani inaina, ka weli i oleloia ua hiki ia ke hamu i na mea a pau koe ka wai.  Ua like ke ahi e a ana me he luai pela la ka hele a pua o ka poiuiu lewa, aohe ku maoli no i ka manaonao na hana a ke ahi.

            Ua hoopiha ia ke kahua pauahi e na poe makaikai e nana ana i ka hana a ke ahi, a me he la iloko o ka naau o na mea a pau aole loa kekahi i nele me na manao menemene o ke kaumaha no keia pilikia nui i ili hou aku maluna o ka ona nona ia waiwai i hoaloha hoi o ka lehulehu.  Ma hope iho o ka haule an o ka hale ilalo ua hoi kela a me keia no kauhale me na maao poina ole no keia mea hou ano nui i kahakaha ia iho la a paa iloko o ka moolelo o Hilo no ka wa mau a mau.  Mahalo i na keiki kinaiahi, na luna aupuni a me na poe i komo ae e kokua, mamuli o ke eleu a mikiala i ke kaohi ana i ka ikaika o ke ahi mai na holapu ana aku i kekahi mau hale

 

HOOLAHA KEENA HAAWI LAAU.

 

Honolulu Feb 14, 1900

            O ke Keena Haawi Laau o ke Aupuni ua hookalina ia oia ma ka Halekula o Pohukaina o kahi e komo mai ai ma ke ai nui Puowaina a me alanui Likelike, ua hamama ia i ka lehulehu mai ka hora 8:30 a.m. a ka hora 10 a.., a mai ka hora 1 p.m. a ka hora 2 p.m. o na la a pau, koe na La Pule me na la kulaia.

            CHAS WILCOX,

Kakauolelo o ka Papa Ola

 

NA LAKO GULA HOU LOA

            I hoea mai nei maluna o na mokuahi mai Kapalakiko mai.

            Ma ko'u Halekuai, malaila e hana ia ai na Pine, Komo, Kupee LIma, Uwati, a pela aku.

            H.B. Blarat.

Alanui papu, Helu 40

 

HE WEHE NUI OI KELAKELA

MA KAHI O

L.B. KERR.

ALANUI MOIWAHINE

KUAI HOEMI NUI!!!

MAU WAIWAI PAIKINI HOU

 

Lole Aahu Hou Maikai Loa

HE EMI KE KUMUKUAI

Papale Paikini Hou o na Lede

HE EMI KE KUMUKUAI

Mikilima o ke ano Hou Loa

HE MAKEPONO LOA

He Nui na Paku Lihilihi Hou

HE EMI KE KUMUKUAI

Mamalu Nunui a Liilii

HE EMI KE KUMUKUAI

Na Lipine a me Lihilihi Hou

he emi ke kumukuai

Pua a me na Hulu ano Hou

he emi ke kumukuai

Na Lole Piliili o na Wahine

he emi ke kumukuai

Na Uhi Pakaukau me Tawele Lima

he emi ke kumukuai

L.B. KERR

Honolulu, Alanui Moiwahine.