Ke Aloha Aina, Volume VI, Number 16, 21 April 1900 — AOLE IA I LILO I MEA NA MAKOU E HAUOLI AI. [ARTICLE]

AOLE IA I LILO I MEA NA MAKOU E HAUOLI AI.

O ka holo ana mai la o ka Bila Aupuni Teritori o Hawaii nei, aole ia i lilo i mea na makou e hauoli ai a haawi ae i na kahoahoa ana no keia ano aupuni hou a Amerika i haawi mai la, aka, ua like ia me ke kui e houhou ana i ko makou mau puuwai, ua lilo hoi i mea hoehaeha maoli no i ka maaao o na poe a pau e hiipoi ana i ke aloha o ka aina iloko lilo o ka mole o ko lakou puuwai, me ka puana ana ae i keia mau huaolelo moakaka: Aloha no hoi kahi a ke Akua i haawi mai ai i ko kakou mau kupuna mai ka po mai, i wahi no keia lahui kanaka Hawaii e noho ai. Aloha ka aina aloha ka luhi a na'lii h me na kupuna i eha ai ka ili i ka ihe laumeki no ka na'i ana i ka aina i wahi no na mamo a me na pua a keia lahui kanaka e noho ai. Eia ka e lilo ana ka nani o Hawaii i mea ole, lilo ka maluhia i mea hehi ku wale ia iho e na kolea kau-ahua o Kahiki. Eia la, ua Ikaboka, ua hala ka nani mai ka lseraela aku.