Ke Aloha Aina, Volume VI, Number 17, 28 April 1900 — LIHAUPUAIKAWAI. [ARTICLE]

LIHAUPUAIKAWAI.

Hanohano Lihaupuaikawai, A he Home Kuikahi na ke aloha, Kilakila na hana ke ike aku, I pono kaulike me ka lehulehu E kupu ae a liko pua a mohala, I kakela nani me ka Ihikapu Kihapai nani ku kilakila, A kaulana hoi me ka Hiehie Aia ilaila kuu lei nani, Ka Ui Akala he Maunaloa, O kuu lei hoi ua kaulana Ohaoha i ke alo o ke Koolau, Makamaka Laniloa no Kahikina, A he milimili hoi na ka Hinihini, Haina ka inoa o ke kakela Lihaupuaikawai Kuikahi Eo mai oe ka wahine ui, Ka Ui Akala he Maunaloa. Hakuia e, I. M. H. Kahinihini, Kapalama, Honolulu, Apr. 26, 1900 Wehiwehi Lihaupuaikawai, Hoolauna Kuikahi e hiipoi nei, Onaona na pua a o ia home, A na manu a e hoohie nei, I na kilihau ua kewai, Kilipohe i ka pua Vapinia, Hea mai Lihaupuaikawai, E naue a e ike i ka mea hou, Hoolauna Kuikahi hoi e ke home, Lawa pono na ono a ka makemake, Ilaila hoi au i ike iho ai, O Makaniekeoe Kaoilelani, Nana i pulumi pau na manu. Noho ana i ka hale hookuikahi, Akahi a ike make i ka nani, Iwipolena maka onaona. Oia manu leo lea o ka uka. Hooheno ana me ka pua lehua. Auhea oukou e ka nui manu, Hoi mai i ka home hookuikahi, Kui lima pu mai hoi kakou, Ma na hana pono e hauoli ai, Hui mai Kumukahi me Haehae, Na kaeaea o kalahiki, Hiki mai e ka lono piha hauoli, Ua holopono hoi na kumuhana, E ola kuu kama kuu milimili, Lihaupuaikawai he inoa. Hakuia e Mrs. Hailaka Laie, Koolauloa, Oahu Hoopukaia e Mrs. I. Mary Harper