Ke Aloha Aina, Volume VI, Number 19, 12 May 1900 — PAKELE MAI MAKE HE MAU HAOLE NO KEIA KULANAKAUHALE. Ma o ke Piholo Ana o ka Moku Kiakahi Mawaho Aku o ka Lae o Makapuu. [ARTICLE]

PAKELE MAI MAKE

HE MAU HAOLE NO KEIA KULANAKAUHALE.

Ma o ke Piholo Ana o ka Moku Kiakahi Mawaho Aku o ka Lae o Makapuu.

Ma ka La Pule nei i huli hoi mai ai he elua mau kanaka opio o keia kulanakauhale mai Kaneohe mai, mahope hoi o ko laua halawai ana me kekahi hiohiona weliweli loa a laua hoi i makemake ole ai e ike hou. O ka inoa o keia mau kanak opio oia o P. J. Hollander a me G. T. Turner, e noho ana mawae na o ka Lae o Makapuu a me ka Lae o Koko. E hoohala manawa ana hoi malaila ma ka lawaia ana. A ma ke kakahiaka Poaono nei ua liuliu ae la laua i ko laua wahi moku kiakahi, a hoi mai la no Honolulu nei, a penei ka hoike a Hollander: I ko laua hiki ana mawaho o ka moana he hapalua hora mahope o ko laua haalele ana aku i ka Lae o Makapuu, ua halawai iho la laua me kekahi makani ikaika mai ka hikina hema mai. Mahope o ko laua hoomaopopo ana i ke kulana popilikia o ka hoomau ana mai i ko laua alahele no Honolulu nei, ua hoohuli ae la laua i ko laua wahi moku no ka hoi hou ana aku iuka o ka aina. Aka, ia wa no nae ua komo nui mai la ke kai iloko o ka moku me ke poi ana me ka ikaika, a o na pea hoi o ua wahi moku nei ua pau ae la i ka nahaehae. Mahope o ka hoomau ana mai o ke kai i ke komo ana iloko o ko laua wahi halelana, ua piholo iho la oia, a waiho aoao iho la me kona kia iloko o ke kai. Ilo ko o keia manawa aia ua mau olulo nei iloko o ke kai e hoolana ana ia laua iho ma ka puliki ana aku i ka aoao o ka moku. O ka iini nui a me ka pule a ua mau kanaka opio nei oia ko laua lawe ia ana aku e na ale hanupanupa no uka o ka aina, aka, aole nae i hooko ia ko laua mau upu ana, a puhi aku la laua no waho o ka moana kai uli, kai hohonu. No elima hora o ko laua paialewa ia ana iluna a i lalo o na ale kawahawaha o ka moana, ua hoomaka mai la ko laua ikaika e haalele ia laua, a ua nui hoi na palapu i loaa ia laua ma ka hookuikui ia ana aku ma ka aoao o ka moku me ke komo pu mai o na hoomanao ana, he manawa wale no keia no laua e hoi aku ai no lalo o ka opu ana ole o ka moana. A i ko laua wa i hoomaopopo ai aohe he wahi manaolana i koe

no ko laua palekana, ua ike mai la laua i kekahi mokukuna e holo aku ana ma ko laua alahele mawaho o ka Lae o Koko. Ua hoomaka koke iho la laua e haawi aku i na hoailona ana i ka moku no ke kii ana mai e hoopakele ae ia laua mailoko ae o ko laua popilikia me kekahi kahakahana lole o ko laua aahu i hoopaa ia aku i kekahi hoe a me kahi ikaika e kamau ana iloko o laua ua kau ae la iluna no ke kahea ana aku i na kokua mai iaia mai, a he mea oiaio, ua ike io mai la ua moku nei a hookolo mai la no kahi a laua e lana ana a hoopakele ae la i na olulo aumoana iloko o ke kulana nawaliwali loa. O keia mokukuna oia no ka Lady e holo ana no Kaneohe, ua haawi mai ke kapena a me kona mau kanaka i na kokua ana ia laua, me ka hoaahu ana ia laua me na kapa mahana a me ka ai. Ua hoea aku ka moku i Kaneohe ma ka hora 6 o ke ahiahi Poaono, a hoaumoe iho la ua mau kanaka poino nei ma ka home o Mr. Mendunea [Mendonea]. I ke kakahiaka La Pule ae ua telepona mai la laua i kaa i ke kulanakauhale nei, a nana i hoihoi mai ia laua a hoea maalahi i Honolulu nei. Ua haalele ia aku ko laua wahi hale lana poino i ka moana, oiai, ua hiki ole i ka moku ke kolo mai iaia no ke taona nei. A ua hiki ole ia lau ake hoike mai i ko laua piho hauoli nui no ka palekana ana mai ka waha mai o ka lua kupapau. Ma ke kakahiaka Poakahi nei, ua loaa mai la he hoike mai kekahi Iapana lawelawe ia Ilamuku Baraunu no ka pae ana mai o kekahi wahi moku kiakahi ma kahi kokoke i kahi noho o ka Ilamuku. Aole he kino kanaka maluna ona, a o na hoike i loaa mai la no keia moku kupuaianaha i pae ae la mawaho o Waikiki, ua like loa ia me ka moku kiakahi a Hollander a me Turner i haalele ai i waho moana. Ina o ka moku poino io no keia, he kau a ke kupaianaha o kona ala ana mai, a huli hoi mai la no ka aina nei. Aka, malia no nae he moku okoa no keia. E hele aku ana na kanaka opio e nana ina paha o ko laua hale lana no keia. Ua hoea mai la ka moku haukipila [haukapila] Solace mai Amerika Huipuia mai me kekahi mau koa hou no Manila Ke wehe aloha aku nei ko makou papale imua o na poe kupaa i ke aloha aina, a ke kunou pu aku nei me ke kanaenae. "E ike @ @akou hoa kanaka."