Ke Aloha Aina, Volume VI, Number 22, 2 June 1900 — EIA KA MANA MA KA LIMA O KA POE ILIHUNE I KEIA. WA. [ARTICLE]

EIA KA MANA MA KA LIMA O KA POE ILIHUNE I KEIA WA.

E ka lahui aloha aina, ano i keia wa, ma na mea i hooholo ia e ka Ahaolelo nui o Amerika i keia Kau mai la, ua haawi ia mai a ua kaa ma ko ka poe ilihune aoao ka pono koho laula keakea oleia i na Lunamakaainana me na Senate me ke ana waiwai ole nana e kaupale aku i ke kanaka ilihune mai ka pahu balota aku o ke Senate. Ina e mau ana ko oukou kulana naauao a kupaa io maoli a hoomanawanui e like me ia i ikeia ma keia mau makahiki ehiku, me ka puni ole i na ahele elike me ia o na wa i hala. Alaila, he mea

kanalua ole ke olelo ae, na oukou e rula, a e kau kanawai na kapakai o Hawaii ma keia Kau Ahaolelo mua o ke Teritori Hawaii e hiki mai ana. (Ke manao nui oukou no keia mea.) O ka aoao kalaiaina a oukou ka hapanui o ka lahui e lokai ai me ke kupaa o ka manao ma ia aoao hookahi, aole no auanei e nele ka @ ia o ka lanakila o na hana maloko o ka Ahaolelo, ke loaa ka poe kupono io maoli i hiki ke hilinai ia, me ka puni ole i na hoowalewale ia mai me ke dala a me na mea e ae. Aka, e hana ana i na mea e pono ai a e holomua ai ka aina, e nana anan hoi i ka pono kaulike o ka mea waiwai a me ke kanaka ilihune. A e hana ole ana i na mea e hoohilahila ia ai ka inoa hanohano o ka apana nana oia i koho mai. Nolaila, he wa keia no oukou e hoonaauao loa ae ai e ka lahui, oiai keia mana i haawi ia mai iloko o ko oukou lima i keia wa. E hoike aku ana makou i ko makou manao ma keia mua aku, me ka hooikaika ana e ao aku, a e hoomalamalama aku i ka lahui i ka lakou mea pono e hana ai, oiai, makou he wahaolelo no ka lahui Aloha Aina.