Ke Aloha Aina, Volume VI, Number 23, 9 June 1900 — Page 6

KE ALOHA AINA

6  POAONO, IUNE 9, 1900

------------------

KA LA IKE ALII NUI

--------

Poakahi, Iune 11, 1900,

Hora 11 Kakahiaka.

--------

            Hawaii ponoi nana i kou Alii,

            Na pua kou muli na pokii.

            E ala, e ku, e holo e ike i ka Lani Alii a Hawaii, ka hope loa keia nou e Hawaii e ike ai i ka la 11 o Iune, ka la hoi i hoolaa ia no Kamehameha ka Na'i Aupuni, a komo aku kakou i ka aahu hou a Amerika i haawi mai nei, pau ka la 11 o Iune, ka la hoomanao nou e ka lahui.

            Nolaila, ke kono ia aku nei ka lahui, kane, wahine, keiki, e hele ae e ike i ka Lahui Alii a Hawaii, ka Moiwahine Liliuokalani, ma Wakinekona Hale, ke hiki aku i ka Poakahi, Iune 11, 1900, hora 11 o ke kakahiaka, hele ka ai, ka ia, ka mea e loaa ana no kou la hope loa o ka hoomana Aloha Alii, o ka mea i nele hele mai, e hoike ae ka lahui i kona aloha Alii oiaio.

                        Ma ke Kauoha

                                    JAS K. KAULIA,

            Peresidena Nui o ka Lahui Aloha Aina

---------------------------

PU-A KA UWAHI I KA AOAO KUOKOA!!

--------

WELO KIHEI A KEAELOA!!!

--------

            E moe ka-oo i ka Halawai Makaainana Nui i keia ahiahi Poaono hora 7 p.m. Iune 9 1900.

            Hele kane, hele ka wahine, hele ka makua, hele keiki, oiai, o ko oukou pono nui ia.

            Aohe hewa ke piha ka hale a hu mawaho.

---------------------------

HE KANOA AWA KUPANAHA

--------

            Ua lawe ia mai nei e Jim Davis, ke kupakako o ka mokuahi Upolu, he kanoa awa pohaku, a ma kona aoao e kau ana he kii akua. Ua koho wale ia ae he 150 ka nui o kona mau makahiki. Ua loaa aku keia kanoa awa iloko o ka lepo ma Halikiki, Kona, Hawaii, he mau kapuai malalo iho o ka ili honua. Ua loaa aku oia i ka wa e mahiai ia ana ia wahi no ke kanu ana aku i ke kope, a ua hoike ae hoi kekahi poe he kahua hale no ia i ka wa kahiko. He nui na poe i olelo ae, he kakaikahi loa na kanoa i kalai ia ma loko mai o ka pohaku, a o ka laau no hoi ka hapanui a hiki i keia wa e ikeia nei. E hoihoi ia aku ana keia kanoa iloko o ka Hale Hoikeike Bihope, aia nae a ae ka mea nona ia waiwai.

---------------------------

            E lawe nui i KE ALOHA AINA i ike mau i na nuhou like ole.

------------------

NA POE NOHO NEI MA KAHI HOOMALU.
----------

            Ma ka halawai ana a ka Aha Hooko o ke Aupuni, ua lawe hou ia mai ke kumuhana e pili ana i ka hookaawale ana aku i na poe e noho nei ma kahi hoomalu o Kalihi. Mahope o ko lakou noonoo akahele ana, ua hooholo ae lakou e hookuu ia na poe e noho nei malaila e noho hou no ekolu mahina, a maloko oia wa pa hoi e ini ai na poe e noho nei malaila i mau home no lakou mawaho nei. I ka wa e pau ai keia manawa i haawi ia aku ai ia lakou, e pau ana lakou i ke kipaku ia me ka hoolohe hou ole ia o na hoi no ka hoomau ana malaila. O ka nui o na poe e noho nei malaila i keia wa, aia no ia ma kahi o 400.

-------------

Nuhou Kuloko.

-----

            He halawai makaainana nui ke malamaia ana i keia ahiahi Poaono iho, a na makemake la kakou a pau e naue aku malaila.

            Mai poina e ka lahui Hawaii i ka halawai makaainana e malama ia ana ma ke kahua paikau koa mauka iho o ka Pa Alii me Haimoeipo.

            Ua hala aku la na elele a ka aoao Repubalika i koho iho nei,no ka halawai elele nui a ka Repubalika e malamaia ana ma Piledelapia i ekia mahina maluna o ka mokuahi Kina.

            Ua hoao ae he wahine haole e lawe i kona ola ma ka alana i ka laau make, he wahine lawelawe oia n ka haukipila Vitoria, a eia ke malama pono ia nei oia.

            O na poe no a pane e makemake ana e hele e ike i ke Alii, ua hamama mau na ipuka o Wakinekona no kela a me keia i na wa a pau a lakou e makemake ai e kipa aku. Ua noa no ia kakou Hawaii ponoi, oiai na kakou ke Alii.

            Ua kauoha aku la o Kauka Garvin o ka Papa Ola i na poe e noho nei ma kekahi hale hoolimalima e ku nei ma ke alanui Moi, kokoke i ke alanui Liliha, e haalele iho ia wahi, mamuli ka o ke kupono ole i ke ola kino.

            Ma ka Warimu i loaa mai ai na lono aia no ka maʻi bubonika ke pahola la ma Sidane, Auseteralia, me ka hoomaha ole, a he averika o ekolu maʻi ka la. Ma kahi o 110 maʻi e waiho ana ma ka haukipila i ka wa a ka mokuahi i haalele aku ai la awa.

-------------

Kauka I. Katsuki.
--------

            Keena hana a me kahi noho, alanui Vinia, mawaena o ke alanui Nuuanu a me Muliwai.

            Na Hora Hana: 9 a ka 11 a.m., 7 a ka 8 p.m.

-------------

HE MAU HANA APUKA.
--------

            Ua loaa mai ia makou he hoike mai ko makou hoaloha mai G.W. Ahoi, no ka hoao ana o Geo. Allen, e apuka he $50 mai iaia kau ma ka hana ana he bila banako o Bihopa ma kona inoa, ua hooponopono ia keia hihia mawaho me ka hele ole aku imua o ke kanawai, aka, mahope iho nae ua hana apuka hou iho la oia i kekahi haole kuonoono o keia kulanakauhale, nolaila, e na poe Hawaii ilihune, e akahele i ka launa ana me ia ma na mea pili oihana o hoopoino ia auanei oukou e keia kanaka opio.

----------

KA LA POULI.
-------

            Ladana, Mei 29. U ahoopuka ae ka nupepa Standard i keia mau hoike malalo iho Algiers mai:

            O ka pouli an ao ka la ua ike nui ia ia e na Europa mamua o na wahi e ae maloko o keia keneturia. O na kanaka i ka wa i pouli loa ai o ka la, ua uwa ae lakou me na leo nui, a i ka wa i huli hoi hou mai ai o ka malamalama, ua uwa hou ae lakou me ka weliweli nui, i lohe mua ole ia iwaena o na Europa.

            Algiers, Mei 28. O ka pouli ana o ka ia, ua ikeia ia maanei iloko o ke kulana maikai. He kalae na paia lani me ke kau wahi ao ole. He nui na poe kilo lani i hoea mai i anei mai Enelani, Farani, Geremania, Italia, a me Switzerland. I ka wa o ka pouli i hoomaka mai ai, ua nalowale aku la ke omaomao o ke kai a ano hauliuli iho la, o na kumulaau me na nanaina nani, na loli ae la ko lakou kulana. A i ka wa i uhipaa iho ai ka pouli, na ikeia aku la ka hoku Mercary e kau ana ma kahi he elua degere mai ka la aku. He nui na kii i pai ia aku.

            Wasinetona, Mei 28. O na hoike i loaa mai la i ke Keena Kilo mai kona mau agena mai na wahi like ole mai o na Mokuaina Hema, ua holopana na hana i lawelawe ia e lakou mamuli o ke kau wahi ao ole ia ana o ka la i ka wa o ka pouli i hoomaka ai a hiki i ka malamalama hou ana.

------------------

OLELO HOOLAHA.
-------

            Owau o ka mea nona ka inoa malalo iho, ke hoike aku nei au i ke akea i na Luna Haawi Palapala Mare ma na Luna Mare, ke hoikeia aku nei ka lohe ia lakou, aole e haawi kekahi Luna Haawi Palapala Mare a me Luna Mare paha e noho ana ma Honolulu, a ma na wahi e ae o keia Paeaina i kuu kaikamahine oia o Kanoe Kaiu, me kuu ae ana aku, oiai, ua hana ia keia hana me ka holo like ole o na aoao elua.

                                    MRS. NOA KAIU.

            Laie, Koolauloa, Iune 7, 1900.

-------------

HE MOOLELO WALOHIA
---:NO:---

ALANADELA
-----

Ka Wahine Hoopahaohao o ka Aahu Keokeo.
------

--- A I OLE---

Ka Loea Hookani Pila Hapa o ke Kulu Aumoe.
------------

            Me keia mau dala i manawalea la mai ai iaʻu e ke kapena, ua hoea aku la ko makou moku i Italia a noho iho la ma kekahi hotele a ia wa ua puka ae la he maʻi luku ahulau weliweli malaila, e ulupa ana i ka lahui me ka ikaika.

            Ua haawi ae ke aupuni he kuahana i na kauka lapaau a pau e waiho aku i ko lakou mau ihoa no ka ae ana e komo pu aku e lapaau i na poe e hoopoino ia ai a e ka maʻi, aka, he kakaikahi wale no o lakou i waiho aku i ko lakou mau inoa, a o ka lehulehu hoi o na kauka, ua pau aku lakou i ka mahuka no kahi e loaa ai ia lakou o ka maha.

            Me keia poe kakaikahi i waiho pu aku ai au i koʻu inoa a apono koke ia mai la ke e aupuni, ua komo aku makou iwaena o na poe maʻi a haawi aku la i na lapaau ikaika ana, ia lakou.

            He hapa nui o ko makou heluna i lilo aku he luahi na keia maʻi luku a koe uuku loa iho la makou, aka, aole nae makou i kuemi hope a hiki i ka haalele ana mai o ka maʻi i ke aupuni o Italia.

            Na keia mau hana i hoolilo aku ia makou i uea punahele i ke aupuni o Italia, a haawi ia mai la ia makou ka oihana lapaau maloko o na puali aupuni, mai ia manawa mai a hiki i keia la koʻu noho ana ma keia oihana lapaau au e ike mai la, a o ka hopena no hoi keia o koʻu moolelo.

            A maanei i lalau aku ai o Walata i ka lima o kona hoaloha me ka helelei ana iho o kona waimaka no ke aloha i kona makua o na la apao, a pane aku la.

            Ua hoopiha ia kuu puuwai i ke aloha kou e kuu Robata, no na haawina kaumaha au i auamo ai, mai na hana lokoino mai a kuonoono kuahine, aka, he hookahi wale no hana paoo i koe, ma ko kaua hoi ana aku i Sekotia aloha a hookau i kekahi hoopai kupono no kona mau hana lokoino i hookau mai ai maluna o kaua.

            Ae, no e Walati, oia ka hana hoi na pono e hooko aku ai, aka, auhea auanei ko kaua makaukau e hooko aku ai.

-------------

            E hoea aku ana ka hana ma ke kahua heihei lio o Kapiolani Paka i ka la apopo, na ka hoonanea ana i na poe makaikai e loaa ai ana mawaho o laila.