Ke Aloha Aina, Volume VI, Number 26, 30 June 1900 — Page 1

KE ALOHA AINA

BUKE VI       HONOLULU, POAONO, IUNE 30, 1900   HELU 26

 

KOKOKE I KAHI O KE KAUA

 

NA PAKE A ME NA MANA NUI E AE O KA HONUA NEI

He 100,000 koa Pake e Kiai la i na pa Pohaku o Pekina — O Taku Kahi e Lele Kaua mua ia aku ana.

Ladana, Iune 16. O ke kulana ma Kina e like me ke ike ana a ka mea kakau o ka Daily Express ma ke telegarapa ana mai ma ke ahiahi o nehinei penei no ia.

He kaua keia i huna ia. O na lala o na keena kanikela o na aina e maloko o Pekina, he mau pio lakou, a i hoohakalia wale ia no hoi na Pake i ka lele kaua ana aku maluna o lakou mamuli o ka hopohopo no na koa kiai o ke keena kanikela.

I kei wa aole he hiki i na kuhina ke kukai aku me na alakai o na kolamu hoopakele, e hoomoana la mawaena o Pekina a me Tientsin. He 100,000 koa Imperiala e kiai la i na pa pohaku o Pekina. O na puka pa ua hoolakoia lakou me na pu ano hou. O Kenerala Tung malolo o ka hooko kauoha mai ka Emepera Wahine, e olelo ana, aole he pualikoa o na aina e, e komo hou i loko oia kulanakauhale.

Ma ka Poakahi nei ua hoouna aku na kuhina he koi ia Tsung @ yamen e weheia na puka pa a i ole pela e komo mai no na koa malalo o ka mana ikaika. A no keia koi aole he pane i haawi ia. O ka elua no o na palapala, aole i pane ia mai. Ua hoike mai nei o Sir Claude McDonald, ua hiki no i na keena kanikela ke paa no lakou iho, koe wale no ka lele aluka ia ana mai.

Ma na alanui o Pekina, wahi a ka mea kakau o ka Daily Express, ua hoike ia mai ua piha me na poe hoohaunaele kue i na kanaka e, ke ake la hoi e hoopoino i na keena kanikela, a e pepehi hoi i na kuhina. Ua hoomaopopo ia maanei, ua kupono ole i na pualikoa ke lele kaua mai maluna o na pualikoa Pake nui hewahewa e hoakoakoa la me na puka pa, maloko oia heluna na koa Imeperiala mai Shan-Han Kwan mai.

Mai Tientsin mai, ua hoikeia mai la o na mokukaua o na aina e maloko o ke awa e lele kaua aku ana lakou maluna o na papu, a e kipoka aku hoi ina ia he mea kupono.

Kapaliko, Iune 15. Ua hoopuka ae ka nupepa Examiner i keia mau hoike mai Tientsin mai.

Tientsin, Iune 15, hora 3 p.m. Ua lawe ae la na Pake i ka mana o Tientsin. O no luna aupuni kamaaina o ke kulanakauhale, ua pau i ke puhi ia i ke ahi. O kahi noho o na kanaka e e hoomoana la, he manaolana ko lakou no kekahi lele kaua ia ana mai.

He kanaha mau mokukaua e lele kaua ana maluna o na papu o Taku i keia po. O na pualikoa e maki la no Pekina malalo o Admarala Seymour, aia lakou iloko o ka nele i ka ai a me ka wai, o ke alahao mahope o lakou ua pau i ka hoopoino ia. He manaolana ko lakou no ka halawai ana me kekahi kue ikaika ia ana ma ia po.

Eia na aupuni ke hopohopo nei no ka lukuia o na kanaka e a me na poe Paka Karistiano me Pekina.

Ladana, Iune 15. Eia ke aupuni o Beritania ke noonoo nei ina he mea hiki ka hoouna ana aku i kekahi pualikoa i Kina mai Aferika Hema aku. Ua kuka pili aupuni ia ae ua hiki no ia Haku Robata ke haawi mai i hookahi a iole elua puali me na moku lawekoa ma na wai o Aferika Hema no ka lawe ana aku ia lakou no Kina. O ke alihikaua e holo pu aku ana ma keala huakai, o Kenerala Sir William Nicholson.

 

He nui a lehulehu na poe i holo makaikai aku iluna o ka mokukaua Farani Protet, ma ka La Pule nei.

 

AIA KE UHAI LA

 

NA PUALI KAUA LIO MA KA MEHEU O NA BOA.

Lawe Pio ia o Klerksdorp e Kenerala Hunter — Hoopii ia ko Baden-Powell Kulana.

Ladana, Iune 15, hora 4 a.m. O na hoike a Haku Robata, ua hai mai la aia ma ka hikina aku o Pretoria kahi i lawelawe ia ia o ka hana, kahi a na Boa i lawe ae ai i ko lakou kulana hou ma ka Poalua nei. O na lono no na hakaka hou, eia ke upuia nei e ke Keena Kaua, aka, aole nae he mea i hoea mai.

Ua halawai na koa o Kenerala Rundle me kekahi puali Boa, a ua malama ia he hakaka liilii. Ua hoike ia ma e nee aku ana o Kenerala Bula no ka huipu ana me Kenerala Methuen, no ka lele kaua ana aku maluna o Peresidena Steyn me kona mau koa mawaena o 7,000 a i ole 8,000. He hapa o ka puali o Botha e noho la ma Paadrekop, he 15 mile komohana akau o Volkrust. O na Boa aole no ia i kaawale loa aku mai Volkrust aku, a ua ki hoomau mai lakou.

O Mekia Kenerala Baden-Powell, ua hoopii ia ae la kona kulana i Lutanela Kenerala.

Ladana, Iune 15, hora 11:05 a.m. Ua hoopuka ae la ke Keena Kaua i keia mau hoike mai a Haku Robata mai.

Pretoria, Iune 14, hora 10:40 p.m. Ua haawi pio ia mai la o Klerksdorm, ma ka la 9 o Iune i kekahi puali i hoouna ia aku e Kenerala Hunter. Ua hoike mai la o Kitchener ua lele kaua ia mai la kekahi kaaahi ma ke kakahiaka ma ka akau o ka muliwai Rhenoster. Ua hoouna ia he puali kokua, a na lakou i kipaku i ka enemi mamua o ka nui loa ana o na poino. He hookahi kanaka i make me 11 i hoeha ia, a he elua oia heluna he mau alii.

Ladana, Iune 15, hora 6:15 p.m. Ua loaa hou mai la keia mau hoike mai i ke Keena Kaua.

Pretoria, Iune 15. Elike me ka‘u i telegarapa aku ai ma ka la i nehinei mai kekahi o ko makou wahi kiai aku, he 15 mile ma kahikina o Pretoria, ua haalele iho na Boa i ko lakou kulana ma ka po o ka la 9 o Iune. Ua oi loa aku ko lakou manao ma ka hoopuipui ana i ko lakou mau aoao, me ka hoomaopopo ole i ko lakou kulana waena, a i ka wa i maopopo ai, ua kauoha aku la au ia Ian Hamilto no ka lele kaua ana aku. Ua nee aku la oia no ka puu Diamana me ka puali Suffolks, Derbyshires a me ka City Imperiala, i kokua ia e ke Guards Brigade.

He nanaina ku i ka nani, ka nana aku i ko makou mau kanaka e nee ana imua me ka hopo ole maluna o na kahua kupilikii malalo o na kipu hahana ia mai.

O ko makou lawe pio ana ae ia Diamond Hill, i hookomo aku i na noonoo i na Boa ua hoopuni ia lakou, a paa akula lakou i ka emihope. Ua ahai aku na koa kaua lio ia lakou me ka la inehinei. Ua hoeha ia o Ian Hamilton ma ka poohiwi, a ke hauoli nei ae i ka hoike aku, ua hiki no iaia ke hoomau aku i ka hana. O ko makou poino aia no ia malalo iho o ka 100.

 

NA PAELE NO HAWAII NEI.

 

Maluna o ka moku lawekoa Thomas i loaa mai ai na lono, oia hoi, ma ka hoike a ka Nupepa Record o Kikako, aia na paele @ kulanakauhale ke hoolala la no ka holo ana mai i Hawaii nei, e hookahua paa iho ma keia mau paemoku. A ina e holopono ana keia mau hoolala ana e hoea mai ana kekahi poe o lakou ma keia mua iho. E piha paele ana kakou ina io he oiaio keia mau hoike.

 

E alawa ae i ka hoolaha a LB K@rr & Co. e puka aku nei.