Ke Aloha Aina, Volume VI, Number 26, 30 June 1900 — Untitled [ARTICLE]

Nui na lohe i lawe ia mai ma ko makou keena, e na poe i ike maka i ka ona o ka Peresidena Nui o ka Ahahui Aloha Aina J. K. Kaulia ma Waialua. Keu no hoi ka hilahila ole a me ka hoohaahaa maoli no i ke kulana ana e paa nei. He mea no keia na makou i ao aku i kahi mau manawa, eia nae, aole i hoole @ ia mai. Me he mea la, e [ku?]okoa iho ana no penei: O! Heaha hoi ka oukou. Owai hoi oukou? Oiai, he mea nui au ma luna ae o na mea a pau a puni ka paeaina, aohe mana nui nana e kiloi ae ia'u mai keia kulana kiekie a'u e paa nei, pela paha. Ma ko makou ano he wahaolelo no ka lehulehu, e hoike ana i na mea a pau, nolaila, ke hoike nei i keia mau mea i hanaia e ia imua o ka lehulehu me kona minamina ole i kona kulana. A i mea e ike ia mai ai e ka lehulehu, aole makou i makemake e hoopilimeaai a e kapulu wale i na hana ino i hana ia, ina he mea e hoohilahila ia ai ka lahui ma ona la. He oiaio ka olelo, he kuli ka make, a he lohe ke ola. O ka mea pepeiao lohe la, e hoolohe mai. O ka leo o ka lahui, o ka leo no ia o ke Akua. He mea hilahila ka hele ana imua o ka lehulehu i mea hoike aku i na hana maikai a hoikeike pu aku no i na hana ino i ka wa hookahi a i mea nema ia mai, a lilo like na mea maikai i mea ino mamuli o ka lapuwale o na hana e hana ia ana. O ka oi loa no o ka pono, o Honolulu no ia noho iho kahi kupono no ia mau hana ino a pau. E na Peresidena a me na Lunahoomalu a me na lala o na Ahahui Kalaiaina a me Aloha Aina o ka mokupuni o Oahu nei, ke @[hoikeia?] aku nei ka lohe ia oukou eia mai o J. M. Poepoe, J. L. Kaulukou a me Kale Aki, a me kekahi poe e ae ke hele aku la imua o oukou, oiai, he Aoao Repubalika ko lakou e nana malie mai no i kauhale, a mai hele ae i ko lakou mau anaina halawai e hoohaunaele ai oukou o ka oi aku no nae ka noho malie loa mau kauhale.

Ua hoikeia mai la aole he mana o na poe mawaho ae o na makaainana Amerika a me Hawaii e paa i na oihana aupuni o ke Teritori o Hawaii nei ma keia mua aku, a he nui na poe paa oihana e noho mai nei he mau makaainana no na Aina E.