Ke Aloha Aina, Volume VI, Number 31, 4 August 1900 — Page 2

KE ALOHA AINA

 

Hookumaia no ka

Pomaikai o ka Lehulehu, a he Nu pepa no ka Lahui Hawaii.

 

EDWARD L. LIKE.

Lunahooponopono.

LOGAN E. KALUNA,

Luna Hoopuka

ALEX NAWAHI,

Luna Hoohana,

EMMA A. NAWAHI

Puuku o KE ALOHA AINA.

 

HONOLULU......AUG 4, 1900.

 

KA HALAWI A KA AOAO DEMOKARATA.

 

            Imua o kekahi anaina i akoakoa aku ma ka po Poakolu nei ma kahale paikau, i hoike mai ai na Elele a ka aoao Demokarata i na mea ano nui e pili ana i ka lakou huakai i holo aku nei no ka aha elele a ka aoao Demokarata i malama ia mai nei ma Kansas City.

            O John Wise, ka Elele mua i hoolauna ia mai e ka lunahoomala oia halawai, oia o J. McCarthy. Wahi a Wise: O ka makamua keia au e Loike aku nei maanei, he Demokarata au. He aoao Kuokoa au mamua o kou holo ana aku nei i Kansas City, aka, na hoi mai la nae au he Demokarata. Ua hoike mai oia i ke ohohia ia o ka lakou mau hana ma ia halawai nui, a wahi hou ana, oia wale no ka aoao e kakoo ana i na Hawaii, aka, i kona hoi ana mai nei nae ua lohe iho la oia he poe aoao lakou i na Hawaii. Aole o lakou hopohopo no ka aoao Repubalika, aka, he hookahi wale no a lakou aoao i hopohopo ai a na Hawaii e kakoo kaika nei oia ka Aoao Kuokoa.

            Mahope iho ona i ku mai ai ke Keikialii Kawananakoa a hoike mai la i ko lakou hookipa maikai ia ana ma Kansas City. Wahi ana, mamua o kou holo ana aku, aia au iluna o ka pa, a aole e hilahila ke hoike ae ia mea, aka, i kou hoi ana mai i na mokupuni nei he Demokarata oiaio, a e kupaa ana au he Demokarata.

            I ka pau ana, na ku mai o J. E. Bush, a haawi mai la i na olelo e kakoo ikaika ana i ka aoao Demokarata.

            A i ka pau ana o kana ua ku mai o McClanahan a me W. H. Cornwell, kekahi mau elele i holo pu aku no Kansas City, a kakoo ikaika mai la i ka aoao Demokarata, me ka hoike pu mai o W. J. Bryan ka moho a ke aoao Demokarata o keia kau koho Peresidena.

           

            Maluna o ka mokuahi Anseteraha i hoea mai ai o Lunakanawai Estee a eia oia ke noho nei ma ka Hotele Hawaii.

 

KUKULU HALE MALOKO O KA ILINA O KAWAIAHAO.

 

            Ma ka halawai ana a ka Papa Ola ma ka Poaha nei, ua laweia mai la kekahi kumuhana ano nui e noonoo, oia ka ae ana aku e kukulu ia kekahi hale hoahu ukaua maloko o ka ilina o Kawaihao ma kahi kokoke i ke kihi o na alanui Moiwahine a me Puowaina. Ua ae ia aku keia hale e ku malaila e ka Papa Kahu waiwai o ka Ilina. Aka, aole i loaa ka apono ia ana mai ka Papa Ola aku.

            Wahi a Kauka Pratt, i ka wa i waiho mai ai o ka mea nona keia hale hoahu ukana he noi no ka ae ia ana aku e kukulu hale maluna o keia kahua, ua hele aku la au e nana pono a ike iho la malalo pono o keia hale e ku ai he mau he kupapa ke waiho ana, a pela au i waiho ai na ka papa e noonoo.

            Ua kue mai o Kauka Emekona, me ka olelo mai mamua o ka ae ia ana aku o keia noi, e kauoha ia ke kakauolelo e huli aku ina paha aole he mau keehina e lawelawe ia ana no ka hue ana i na kino make malaila kahi o ka hale e ku ai.

            Mamuli oia kumu na waiho ia keia kumuhana a no kekahi wa hou aku e noonoo ia ai. Ma keia e ike ia ai ua oi aku ka makee o na kahu waiwai o keia ilina i ke dala mamua o ka waiho malie ana aku ia kahua no na poe make. A he mea oiaio, e pau ana na iwi o na poe make e waiho nei malaiia i ka hue ia i na aole he mau lawelawe ikaika e hana ia ana o ka Papa Ola. Nui ka lapuwale o keia mau hana.

           

HE KANAENAE ALOHA.

 

(Kakauia e Rev. S. K. Kamakaia.)

            I ou mau hoa uhaiaholo o na hana pono, kuu lo mai ke kupuna hookahi mai, ou mau kupuna, na makua ou, na kaikuaana, na kaikuahine a me ou mau pokii iloko o ka inea:

            Aloha oukou a pau:--

            He wahi leo aloha koa ia oukou a pau, oiai, na laui ke hoakaka mai nei i ka nani o ke Akua, oiai, hoi ka honua ke hai mai nei i kana mau hana io, ke hana nei ko ka lani mau makaainana i ka makemake o ko lakou Haku hookahi wale iho no, ke hana nei hoi ke ka honua mau makaainana i na makemake like ole o na haku heluhelu walke lakou. Ala hookahi Akua ma ka Lani, ala hoi he nui wale na Akua ma ka honua nei. O Iehova ola mau, ka ihiihi, ke anoano, ka hoanoano kapukapu o ke Akua, ka Makua, ke Keiki a me ka Uhane Hemolele, Amena.

            Oia ke Akua Mana Loa ho kahi wale iho no Nana i hana i ka lani a me ka honua, a me na mea a pau a me ke kanaka, ke holo nei na hoahanau o ka Hoomana Karistiano Naauao imua Ona, aole ileko o lakou na Akua liilii, aole he Kamohalii, Kumukahi, Palamoa iloko o kahi hoahanau o keia hoomana, aka, oia nae ke keia hoomana e makemake nei e komo aku iloko o oukou, a mamuli o kou lilo ana i hoahanau no ia Hoomaua; pela au i mauaolana ai e noi aloha aku i ko oukou oluolu e wehe hamama ae i ko oukou ipuka hale a e hookipa aku ia lakou a i kahi paha o lakou i kou keena pumehana e hele aku ana lakou, a o kahi paha o lakou e hoike maole aku ana no i ka oiaio o ka olelo a ke Akua, a o ka Baibala Hemolele hoi a kakou e kiola wale nei iloko o na lua liilii. Elike no me kela hopuna olelo maopopo, oia hoi, e hule nui oukou i ka palapala Hemolele, e manao oukou he ola mau loa ko oukou malaila.

            He oiaio loa kela mau hopuaa olelo, o ko ke kanaka hoomaopopo ole ka hewa, a no ka mea, o waho o ka alualu o ka Baibala kai ao ia mai ia kakou i na la i hala, aka, i kela wa a mai na Hai Euanelio aku o ka Hoomana Karistiano Naauao e ao ia aku ai oukou i ka io o ka Baibala oia hoi ke ki o ke ola a me kou uhane.

            O ka makemake o ko oukou wahi kauwa nei, o ka ike aku na naauao kuu lahui ma na hooponopono ana no koua mau pilikia iho, oia hoi, kona hoola ponoi ana iaia iho mai kona nawaliwali kino ae, a mai na enemi mai paha, oia mau mea nae a pau ka na Hai Euanelio o ka Hoomana Karistiano Naauao e ao aku ai i ko lakou mau hoahanau mai Hawaii a Kauai. E ao aku aha hoi ia lakou i ke ano o ka mihi ola e ola ai, ke ano o na hooponopono ana no kou mau pilikia a pau.

            Oiai, me kou ikemaka i na mea a pau imua o kou alo e manaoio ai oe, pela ka hana a keia poe Hai Euanelio e wehewehe aku ai imua ou me ka oiaio a ma ke inoa o Iesu wale iho no.

            E alakai aku ana ia oe i ke ola nui ma kela inoa hookahi wale iho o Iesu, he oiaio, ua lohe wale kakou a ua heluhelu paha i ka ke Akua olelo, o Iesu ka inoa e ola ai, aku, o ka pilikia nae, o ke alanui hele e loaa ai kela ola mai o Iesu mai, oia nae ka na hai euanelio o ka Hoomana Karistiano Naauao o hoike aku ai ia oukou e kuu io mai ke kupuna hookahi mai.

            E kanaenae aloha aku ana ia oe e Hawaii Kuauli, e na Honoapiilani, e Molokai nui a Hina, e Lanai a Kaululaau, e Kauai o Manokalanipo, a e Oahu o Kakuhihewa, he oiaio, eia no iloko o na ekalesia makua o kakou he poe ike i ka olelo a ke Akua, he mau Baibala e waiho ana iloko o na hale, a maluna paha o na pakaukau o ka rumi hookipa. E heluhelu ana paha i kela la i keia la, a i ka hiki ana mai o ka pilikia mai maluna o ua mea aa, he oiaio, ua heluhelu iki paha i ua olelo ala, a o ke ola ole o ka mai, kapae ka baibala ma kuoho, hoolonolono ka pepeiao o kahi kahuna pahiahiu ike lapa iu hoouna i kahi keiki e kii i ua kahuna ala me ua mohai, omole barani, ia ula moa lawa, puaa hiwa, me umi dala no ke kahua.

            Hana ke kahuna, kukulu ka hoailona ma ka apu awa, loaa ke kumu o ka mai he puulua, he hoounauna ia mai. Hoomaka ka hana a ke kahuna oi hana, oi noke, oi pule, a o ke ola ole, kapilipili ae la no ke ola ole no ka niu, no ke kulolo, a pela wale aku.

            Mamuli o keia puni wale ana o kakou i na kahuna pau loa kakou i ka make, a koe ke a, aloha no. Aka, no ia mau puni wale ana i na la i hala, pela nei kanaenae aloha e pahola aku nei imua o kuu lahui oiwi, mai Hawaii a Kauai, a oiai no hoi, e kala wale i hoike ia aku ai imua o oukou, ke alahele e ola ai ke kino a me ka uhane i na makahiki i kaahope aku la a maloko nei no o keia pepa, a ke manao nei kou uhane ke malama nei no paha kekahi poe ia mau ao ana oia mau la, a pomaikai no ka mea hoolohe a malama ana i na ao ana a ko kakou wahaolelo, ka nupepa Ke Aloha Aina. Nolaila, e lawenui i Ke Aloha Aina i ike mau i na manao waiwai nui e ola ai ke kino a me ka uhane.

 

O KONA MAKEMAKE KE HANA IA.

 

            Ma ka lokomaikai o ke Akua, me ka launa ana mai o Kona uhane aloha ma o ka Ilamuku nui la o ke aupuni, ua ae ia mai la ka Haiolelo Euaneli, a ka Puali o ke Aloha o ke Akua ma na huina alanui a pau o ke kulanakauhale nei, a ma ka Makeke Kuai Ia kekahi, i keia ahiahi Poaono, malalo o ke alanui ana a Rev. Saml Kamakea Kamakaia, me kona mau hoahanau iloko o Iesu Karisto. E na kamaaina maikai o Honolulu nei, e nana ae i ke Kaiki Elipe a ke Akua, ka mea nana e lawe aku na hale o ke ao nei, a e hooloho hoi i na mea e hai ia aku ana e na haiolelo o keia mau la, no ka mea, he mau la ino keia.

 

           E puhi ana ka hana maloko o ke Kapitala i kela La Palo iho, mamuli o ke kue o kekahi poe i ka loihi loa o kahi, e hele ai a hoolohe hana mawaho o Maki Ailana.