Ke Aloha Aina, Volume VI, Number 34, 25 August 1900 — KE KULANA O KA AOAO DEMOKARATA. [ARTICLE]

KE KULANA O KA AOAO DEMOKARATA.

Lunahooponopono o KE ALOHA AINA, Aloha oe: E oluolu mai oe e hookomo iho i keia mau manao iloko o ke kolamu o kau nupepa, i ike mai ai na hoa Aloha Aina i ke kulana o ka aoao Demokalata e ku nei a me na ao pili aupuni ana a ia aoao kalaiaina. Ka ninau mua e ninau ia mai nei owai ka poe Kemokalaka? Ka lua, heaha ka lakou mau hana e huli aku ai ka lahui malalo o

ka lakou alakai ana. O ka aoao Kalaiaina Kemokalaka, oia no ka aoao o Kalivilana ka mea i hooikaika e hoihoi ia mai ka nohoalii o Hawaii nei, a i hoohaule ia mamuli o ka lawa ole o na poe Demokalaka iloko o ka Hale Ahaolelo o Amerika a oi hoi ka poe Repubalika, ka poe nana i aihue ke Kuokoa o Hawaii O ka poe Kemokalaka ka poe kue i ka Hoohui Aia a kue i ka hapuku wale ana i pono o na kanaka. O ka aoao Kemokalaka, oia no ka aoao o ka poe

ilihune, a oia no ka mea kaupaona like i ka pono maluna o na Makaainana me ka nana ole i ke kulana ilihune a waiwai paha o ke kanaka. Ka lua o na ninau oia hoi, "he aha ka lakou mau hana e huli aku ai ka lahui malalo o ka lakou alakai ana." O keia aoao Kemokalaka, ka aoao nana i haawi mai i ka pono Koho Balota i ke Kau Ahaolelo i hala, i nana ole i na olelo hailiili a i lawe ole hoi i na Kala Kipe a W. O. Smith ma, ka aoao Repubalika e ku nei i keia manawa. O keia aoao Kemokalaka no ka aoao nana e hoopomaikai mai ana ia kakou e na kanaka Hawaii, oiai he aoao kue loa ia i na hana kaulike ole elike me ka keia poe e hana mai nei ia kakou i keia mau la e hoohaiki nei hoi i ko kakou pono e na kanaka Hawaii, i loli ole ae hoi mai ka lakou mau hana o na makahiki Ehiku (7), i hala ae. No keia mau kumu ua huli pau mai na haole Aloha Aina a me kekahi hapa o na kanaka ma ka aoao Kemokalaka no ka manao ana o ka aoao ia i loaa ka ikeia mai, a i loaa hoi ka ikaika kupono i kokua ia mai e na hoa Kemokalaka o ka Hale Ahaolelo o Amerika, e paio aku ai i keia poe Enemi, Mikanele, ko kakou mau enemi i na makahiki Ehiku i hala ae, a o ko kakou mau enemi i keia mau la. He oiaio paha, ua haule io mai no kekahi poe o keia Auna ake Hoohui Aina me ka aoao Demo-

karata, aole nae ia he kumu e poino ai ka lahui mamuli o ko lakou komo ana mai ma keia aoao, oiai, he mau kauna wale no lakou, aole no hoi e lohe ia ana ko lakou mau leo. O ka leo o na haole Aloha Aina a me na kanaka Aloha Aina ke lohe ia ana, no ka mea, o lakou ka hapanui e komo aku nei ma keia aoao Kalaiaina. Elike me ka nui o ke komo ana mai o na kanaka iloko o keia aoao, pela no e houuku loa ia aku ai ka Mana o keia mau kauna i komo mai ma ka aoao Kemokalaka. Owau iho no JOHN H. WISE. Honolulu, Aug. 21, 1900.