Ke Aloha Aina, Volume VI, Number 36, 8 September 1900 — Page 4

KE ALOHA AINA

4          KE ALOHA AINA, POAONO, SEPATEMABA 8, 1900.

 

Ke Aloha Aina

Hookumuia no ka

Pomaikai o ka Lehulehu, a he Nupepa na ka Lahui Hawaii.

EDWARD L. LIKE.

Lunahooponopono.

HOGAN E. KALUNA,

Luna Hoopuka

ALEX NAWAHI,

Luna Hoohana.

EMMA A. NAWAHI

Puuku o KE ALOHA AINA.

 

PUKA LA ME PUKA PULE.

E hoopukaia ana i na la a pau koe ka

(La rule) e ka Papa Pai ke

Aloha Aina. Ma Alanui Moi

 

AUHAU PUKA LA.

Hookahi makahiki (uku mua)… .$9.00

Ekolu mahina (uku mua)……….   2.25

Hookahi mahina (uku mua)…….    .80

 

AUHAU PUKA PULE.

Hookaai makahiki………….. $2.00

Eono mahina…………….  1.00

 

HONOLULU…SEPT. 8, 1900

         E ALA e na Hawaii, e hele e hoopaa i ko oukou mau inoa i ka papa nana i loaa ia oukou ka mana koho balota, a mai hoopaleleha, no ka mea, o ko kakou nui oia ko kakou ikaika.

         AOLE he hewa o ka paa mua o ko kakou mau inoa iloko o ka Buke a ka Papa Nana, a mai hoohakalia o haule i ka hope waa, o ka hoopaa mua i ka inoa oia ka hana naauao.

         Ke hamama nei ka Papa Nana ke ao a me ka po, no na poe e makemake ana e loaa ka mana koho, ma ke Keena Loio mua iho nei o J. A. Makuna (Magoon).

         EIA na Repubalika ke hoao nei e hookomo aku i na kanaka Hawaii iloko o ka lakou mau upiki ana, a oia ka makou e pa leo aku nei mai puni aku.

         MA ke ahiahi Poaono nei, ua hele ae na kaa basa malalo o ka hoolimalima ana a ka aoao Repubalika, e ohi hapuku i na kanaka Hawaii e hele ana maluna o na alanui a lawe ia aku la no na wahi koho elele o ia aoao, no ka lealea holo kaa o kekahi poe i hiki aku ai ma keia mau wahi koho elele a ka Repubalika.

 

KA LA HANAU O KALANI AIMOKU.

         O ka La Pule iho la, Sept. 2, oia ka la i hoea aku ai na makahiki o ko kakou makuahine Alii Moiwahine Liliuokalani i aloha nui ia i ke 62. Ua hoea aku he kaoo kanaka nui e ika iaia me kahi puolo o ke aloha ma ko la kou lima, e hoike moakaka aku ana ia Kalani he oia mau no ka pumehana o ko lakou aloha nona. He makalapua a ulumahiehie ke ola o Kalani, a ua apo mai oia i na poe a pau i kipa aku e ika iaia me ke ohohia nui.

         Ua hoea pu ae ka hana aupuni malaila no ka haawi ana aku he mau leo puhi ohe no ka hanohano o Kona la hanau, Mahope o ka pau ana o ka ike alii, na holo hoomaha aku la o Kalani Aimoku no ka hana ana i na ea oluolu o ka ehukai o Kahala. O ka makou e kalokalo ae nei. E ola! E ola o Liliuokalani i ke Akua.

 

PAKUI KA HOHONO O KE SUAIPA.

         Ma ka Poalima nei, ua hoomaka aku la o makaikiu David Kaapa e komo kauhale ma na wahi i hoomaopopo ia malaila ka snaipa e hana ia nei ma Kakaako, Honuakaha a me Kukuluaeo, a na loaa aku la iaia ma kahi he 505 galani suaipa, a ua pau aku i ka ninini ia.

         Ma Kakaako he ewalu poe hana suaipa i loaa aku, a he 245 galani suaipa i ninini ia.

         Ma Honuakaha he eha poe hana suaipa i pau i ka ninini ia na pahu suaipa no lakou ka heluna he 180 galani.

         Ma Kukuluaeo he elua mau mea i hopu ia a he 80 galani suaipa i loaa aku malaila.

         E alawa ae i ka makou hoolaha uwati nalowale e puka aku la.

         Ua huli hoi mai la o Etele J. K. Kaulia o ka Aoao Kuokoa a me Elele J. H. Wise o ka Aoao Demokarata, ma ke Kinau o ka Poaono nei mai Hawaii mai.

 

KUAI KUIKAWA. KUAI KUIKAWA.

         No ka hookaawale ana i rumi no ka makou mau waiwai e hoea mai ana i keia mahina ae mai ka Hikina i wae pono ia Mr. Spitzer. Nolaila, eia makou ke malama nei he

KUAI HOOPAU NUI

me ka uaua ole i ka nui o na poho. O ka makou mau waiwai e loaa ana ma ke kumukuai i lohe mua ole ia ma keia mau paemoku.

         O ka makou mau lole aahu he oi loa ae kona emi i kona wahi e ae, a pela i kaulana ai KA HUB, ke kikowaena o kahi hoolako aahu maloko o keia mau mau mokupuni. O na aahu paikini hou aia ia me makou, a ua hiki hoi ia makou ke Hoaahu aku i na poe a pau. E hoihoi ia no ka oukou mau dala ina aole i kulike me ko oukou makemake.

         O ka makou wale no e kono aku nei e komo mai mai a e hoopahaohaoia no oe i keia mau kumukuai. E hoihoi ia no kau dala in a aole i kulike me kou makemake.

THE HUB CLOTHING HOUSE.

Honolulu, H. I. Alanai Hotele kokoke i ke Alanui Papu, Paha Leta 65

 

KE KAHUA O KA AOAO DEMOKARATA.

         O ke kahua a ka poe Demokarata e ku nei i keia la, oia no ke kahua a na Aloha Aina me na Kalaiaina i ku ai no na makahiki ehiku i hala ae nei.

         He oiaio ua lilo aku ke kuokoa o ko kakou aina mamuli o na lima pakaha o na Mikanele, ka poe i hoomanao ole i na hana maikai a na Alii, oiai lakou i pae olulo mai ai i na kapakai o Hawaii nei. Aka, ua loaa mai nae ia kakou ka mea e hoopau ia ai ia mana pakaha o laaoa mamuli o ka loaa ana ia kakou o ka mana koho balota.

         Ke ku nui na Demokarata a kue aku i na hana anunu a kaulike ole a ka poe waiwai e kokua ia mai nei e ka poe Repubalika.

         Ke ku nei na Demokarata a kue aku i na hana hoowahawaha a ka poe Repubalika e hana nei i na kanaka Hawaii.

         Ke poina nei anei na kanaka i na hana a ka poe Repubalika i na la i hala ae. Aole anei o ka rula a ka poe Repubalika i malama ai oia no ke kipaku ana aku i na kanaka Hawaii mai na oihana aupuni ae, a hookomo mai i na haole ma ia mau oihana me ka nana ole ae i kau mau hana maikai e ke kanaka Hawaii? Aole anei ka poe Repubalika ke hana nei no ia mau hana i keia mau la? Eia no kakou ke nana aku nei me na maka e kaakaa ana, aka, ke hailuku ia mai nei no me na pohaku o ka lokoino.

         Aole keia mau hana kumakaia mai na Mikanele wale mai no, aka, eia no me kekahi poe e ae i hoopomaikai nui ia e na Alii i na la i hala ae, ka poe hoi i hapai ia ae mai na poopoo punahelu mai a hookau ia ae e na naau aloha o na Alii ma na oihana kiekie i hoike mai ai hoi ia kakou i na kanaka Hawaii i ke aloha makaainana o ua mau Alii ala. Ua ukuia aku anei na Alii no ia mau pono a lakou i hana ai no keia poe i hapai ia mai, mai na poopoo mai? Ae, ua uku ia mai no aka nae, aole elike me ka lakou i paakui aku ai, ua kumakaia ia mai lakou, na Alii, a na kumaka ia pu ia mai kakou na hoakanaka.    E hahai aku ana anei kakou mahope o keia poe Mikanele e kapa nei ia lakou iho he poe Repubalika? Ke manao nei au aole kakou e hahai aku ana mahope oia mau meheu, oiai, eia iloko o ko kakou mau lima i keia mau la ka mana o huki kaokoa ae ai kakou a kue aku ia lakou me ko kakou ikaika a pau. Ua hooikaika lakou e hooneleia mai kakou na kanaka Hawaii, aka, ua aloha mai na Lani ia kakou, a ua hoohoka ia ia mau manao pakaha o lakou. Aole loa na kanaka Hawaii e hahai aku ana ia mau alakai ana a ka poe Aihue Aina a poe hoaikola hoi i na kanaka Hawaii.

         Eia kakou ke nee nei me ke au o ka manawa, a e pono kakou na kanaka Hawaii a pau e nana aku imua me ka manao ana aole i loaa ia kakou ka lanakila i keia manawa aia wale no a hoohaule ia ka mana o na Mikanele.

         Me keia mana koho balota i loaa mai ia kakou, ua loaa ia kakou ua pu a me na poka e hakaka ai a loaa ia kakou ka lanakila. Elike me ka hana a kela alii kaulana o Pelesia i a'o ai i ka manu olelo e olelo mai i na kakahiaka a pau mahope iho o kona noauhee ia ana e na Helena oia hoi, e "Hoomanao i na Helene," pela kakou e na kanaka Hawaii e ao ai i ka kakou mau keiki e "Hoomanaoia Hawaii a me na hana paukaha a na Mikanele.

         Owai ka poe Repubalika o Hawaii nei, aole anei oia no ka poe mikanele i pakui ia aku me na kanaka i kumakaia ia kakou Hawaii? Mai puni i na hana apuhi a na kao i komo i ka aahu o na hipa.

                   JOHN H. WISE.

 

HAUNAELE NUI MA AKRON.

         Akron, O., Aug. 23. O ka hopena i ike ia o ka haunaele o ka haunaele o ka ponei i ike ia he elua kanaka i maka, he elua hou e make aku ana, a me umikumamaono i loohia me na palapu, a ma kahi hoi o $1,000,000 i pulumi ia aku e ke ahi.

         O ka hale aupuni, ua hoopoino ia, o ka Hale Columbia e pili pu ana na lilo i puu lehu, a me na hale liilii e ku kokoke ana.

         O keia mau hoopoino ana ua lawelawe ia e na poe hoohaunaele i lawe ae i ka mana o ke kulanakauhale mai ke po nei mai a hiki i keia wanaao, e huli ana hoi i ka negero nana i hoopoino i kekahi kaikamahine opio o eono makahiki.

         O ka nui o na poe hoohaunaele ua olelo ia aole i emi malalo iho o 1,500. Eia na koa ke kiai nei f@ na alanui. Ua maluhia ke kulanakauhale.

         Ma ka auina la inehinei, ua ulu ae la he mau ohumu ana a i hooko ia i ka wa i hoea mai ai o ka po. Ua hoao ua luna aupuni o loaa ka maluhia, aka, ua hoakoakoa ae la nae he puulu nui o na kanaka ma ka hale paahao o Louis Peck, ka paele i hopu ia ai no ka wahi puupaa, a lohe ia aku la na leo hooho e li i ka negero.