Ke Aloha Aina, Volume VI, Number 38, 22 September 1900 — MAI KALI. [ARTICLE]

MAI KALI.

(Kakauia e J. E. Bush.) "Ehia la ka loihi o oukou e ku ae iwaena o elau amanao." Nalii XVIII-21 He olelo keia na Elekai, ke kaula o ke Akua i na kanaka, i ko lakou manawa i hoakoakoa ia ai e Ahaba ke'lii. Ua noho pilikia ka aina mamuli o ka nele ua ole, a mahope o kekahi mau makahiki ekolu hoouna ia ke kaula, e hoopau i ka piliaiku o ka noho ana o na makaainana. O ke kumu o keia pilikia, mamuli no ia o ka lolelua o ka naau o ka lahui, ua lilo ko lakou naau mahope o ke akua Baala, nolaila, i puka mai ai ka olelo a'o a ke kaula mai ku iwaena o elua manao. Pela hoi makou e puana aku nei i ka lahui Hawaii, mai lolelua ka manao, a mai ku iwaena o na mea elua. O ko kakou ma- nawa keia e koho ai, e wae ai i kulaua a koho i ka mea pololei i pono ai ka noho ana o keia mua aku. He wae ana keia, a he koho ana no ka pono o keia noho ana aku no na mea a pau. Ko kakou aho hope keia. Ko ke Akua lokomaikai keia ia kakou na Hawaii, kona aloha keia e pa- . hola nei imua o kanaka Hawaii, a ina kakou e wae a hana i ka mea kupono, alaila e like me ka olelo a ke Kaula, ina ka Haku oiaio maoli ke Akua, alaila e hahai iaia, e hana i kona makemake, a o kona makemake i na wa a pau, oia no e hana ia ka pono eia imua o kakou Hawaii he elua mau kumuhana e pili ana i ka pono a me ka pomaikai o ko kakou noho ana. Aia keia mau kumuhana maloko o ka lima o kekahi poe kaula kalaiaina, o elua aoao iloko o ka aina. He Repubalika kekahi a he Demokarata kekahi. Owai la o keia mau mahele elua ka kakou e koho ai, a e hui pu ai? He ninau nui keia, he ninau i pili i ke kanana maikai ana o kela a me keia a koho me ka naauao. Aole hoi e koho me ka hoopilimeaai, aka, e koho me ke kanaka makua, a mai puni i ka nui o na Kaula a Baala a i ka hookahi o ke Kaula o ka pono, no ka mea, aia ke Akua ma kona aoao, wahi a ke Alii o ka pono, i olelo ai, o ka mea e ku me a'u aole oia e nele ana. Ua maopopo i na mea e pau ke ano o ka wae a me ke ano o ke ano o ke koho ana. Ina ua ike kakou he pono ka Aoao Repubalika i hana ai i ka Lahui Hawaii alaila, o ko kakou aoao ia, a ina hoi aole he maikai o kana mau hana, alaila, e kapae loa ka- kou ia aoao, @ like anei kakou me ke kanaka i aloha ai i kekahi moo i loaa aku iaia e waiho na

eele make anu ana maloko o kona kihapai, a i kona hoopumehana ana a ola hou keia moo, ua nahu ae la ka moo i ka mea i aloha kuhihewa iaia. Owai o oukou e na Hawaii, kai poina koke i na hana limia kakauha a ka Aoao Repubalika i hana ai ia oukou? Owai kai huli a nanahu ia oe e Hawaii ahonui, puuwai hamama, aole anei o ka Aoao Repubalika no? Mai kuhihewa oukou, na ka Aoao Demokarata ia mau hana, a mai puni oukou i na olelo waipahe e puapuai mai nei, e i ana, na ka Aoao Repubalika i manawalea mai nei ia kakou me ka pono koho balota o keia la, aole, aole, na ka Aoao Demokarata i hooikaika he okoa loa ka hooikaika a ka Aoao Repubalika. E wae oukou me ka hoopono. Mai punihei ka lahui i na mali leo a na paalalo e oloio aku la iwaena o oukou. Ua komo ke pahaohao ma ka aoao hana hewa, ke oni e nei na io o na kakoo a me na paahana oia aoao, ka poe i noho makaewaewa i ka leo a me ka pono o ka lehulehu, i hele a uahuha i ka ai nuu i ka pono hawahawa he kaihi pono, he aihue aina. Nui a kahaha keia poe, a he hiki wale no lakou ke koho ia aku. Ua hiki mai ko lakou hopena, ke maikai ka oukou mau hana. Mai haakei kakaou, a mai hookiekie, aka, e kanaka makua kakou, a e hana i ka pono a ku i ka lanakila. E like me ka olelo kaulana a Mr. Thomas Kalaka o Waihee i puana ai ma kana haiolelo ma Wailuku i kela pule aku nei, aole hiki i ke kanaka ke ku kahela na wawae maluna o elua lio i like ole ko laua ano. Wahi ana e koho ma ka Aoao Demokarta, ka aoao i hoao e hoihoi mai i ko kakou pono i lawe ia e ka Aoao Repubalika, ka aoao e kakoo a e noho makaukau mai la no ma Amerika Huipuia e kokua ia kakou Hawaii.