Ke Aloha Aina, Volume VI, Number 38, 22 September 1900 — KE KUOKOA A ME DEMOKARATA. [ARTICLE]

KE KUOKOA A ME DEMOKARATA.

He hookahi no a laua kumuhana, a ke kuhihewa nei paha na Demokarata he kumuhana okoa ae ka ka Aoao Kuokoa, a pela ke Kuokoa i ka Aoao Demokarata. Aka, o ka oiaio maoli, o ke kahua no a ke Demokarata oia no ka ka lahui i kapa iho ai he "Aoao Kuoko," oia hoi he aupuni no ka lehulehu a ma o ka lehulehu 'la. He nui na olelo i oleloia e hoole aku ana kahi i kekahi, aka he hookahi no kahua o neia mau aoao elua. Nolaila, heaha ka mea e mahae ai ka lahui e pehiaku ai kahi i kahi, eia wale no ke alahele e lanakila ai ka aoao o ka lahui, oia ka lokahi like o keia mau aoao a elua a hoohui like ia laua i hookahi, oia auanei ke alahele e holopono ai na hana maikai a pau no ka pono o ka lehulehu, a e loaa ai ke Aupuni Maikai i kukulu ia e ka lahui ma o ka lahui la. Nolaila, o ka Aoao Kuokoa he mea pono no hoi ke kapa ia lakou he "Aoao Kuokoa Demokarata," a i ole i "Demokarata Kuokoa" paha. Pehea hoi ia, hewa ia la. Aka, o ka oi loa aku no o ka nani, o ka hoohui ae no ia laua i "hookahi wai o ka like," i paumi ia aku ai ka ikaika o ka lahui nawaliwali imua o ko lakou mau enemi nana i hoao e ulupa a e umi a puaa maoli no i ka lahui Hawaii.