Ke Aloha Aina, Volume VI, Number 45, 10 November 1900 — Page 5
| This text was transcribed by: | Hartwig Hermann |
| This work is dedicated to: | to all who made this project happened. MAHALO!!! |
KE ALOHA AINA
KE ALOHA AINA, POAONO, NOVEMABA 10, 1900 5
Nuhou Kuwaho.
---
OEHUEHU HOU KE KULANA MA AFERIKA HEMA.
Ladana, Oct. 27. O na hoike i loaa mai nei i ke keena kana, ua hopu pio ia aku la o Philippolis e na Boa, a ua lele kaua ia mai he 50 Beritania mawaena o Spríngfontein a me Philippolis. A he 7 wale no o lakou i pakele aku, Ua hoopoino ia ke alahao ma kahi kokoke i Norval Point. Ua hoike ia mai na kukulu ae ia o Peresidena Steyn i pau, i kahua poo aupuni ma Fouriesburg. Ua kipu ia aku na Beritania maloko o ka palena o Cape Colony.
HOOPOINO IA E KE OLAI.
Caracas, Oct. 30. Eia ke hoomau mau nei na hoonaeueu olai. He nui na hale i hoohioloia mai ka la inihinei mai. O ka Hale Aupuni a me ka Hotele Venezuela kekahi i hoopoinoia.
Ua hiolo ka puoa o ka luakini, a he lehulehu na poe i make. He umi mau kino make i loaa aku, a ua manaoia e nui aku ana na kino make e loaa hou ana, o na poe i hoeha ia maluna aku no ia o 100.
He nui ke pihoihoi e ike ia nei maanei. O na ohana waiwai ua holo aku lakou no loko o ka aina, a o na ohana ilihune ua hoomoana iho la lakou ma na kuea o ke kulanakauhale.
Ma Ma@nto he eha-hapalima o na hale i pau i ka poino, eha poe i make a me kanalima i hoehaia. Ma Caranero eono i make a me kanakolu i hoehaia. Ma Higuero elua make a me iwakalua i hoehaia.
NA POINO O NA AMERIKA.
Wasinetona, Oct. 30. Ma ka makahiki e pau ana i Iune 30, 1899, e like me ka hoike makahiki a ka Aukukana Kenerala o ke Keena Kaua, o na make ma Pilipine e huipu ana i na koa kumau a me na koa pualu he 1,442, maloko oia heluna he 49 alii, a me 1,393 kanaka. Ma ia hoike hookahi no, o na make mai Feberuari 4, 1899 a hiki i Iune 30, 1900 o na puali kumau a me na puali pualu, he 476 i make i ke kana; 161 i make mai na palapu i loaa mai na Pilipine mai, 1,061 make ma'i, 109 make piholo, 49 make ulia, make kaawe 40, make powaia 20, huina o na alii i make 72 alii, a o na kanaka 1,899. Ma ia wa pu no he 144 alii a me 2,076 kanaka e waiho ana iloko o na palapu. Nui no ka pilikia o na Amerika.
KA MOKU LAWEKOA MEADE.
Kapalakiko, Oct. 31. Ma ka po nei i hoea mai ai ka moku lawekoa Meade me ka piha kanaka. Mai Hongkong mai oia ma ko alahele o Nagasaki, a ua komo pia iloko o kekahi makani ino taifuna. Ua like oia me kekahi apana laau e paialewa ia ana e na ala kawahawaha o ka moana. A ua uhi pu ia kona oneki kiekie loa e na ale o ka moana, me ka hoopoino pu ia o kekahi waapa.
E lawe ana oia he 276 koa ma'i, 18 kino make, 5 koa pupule, 8 koa i make ma ka moana a me kekahi mau oe moku e ae.
NUI KE OHOHIA IA O BARAIANA.
Nu Ioka, Oct. 29. Ma ka po Poaono iho la ua lawe ae la o W J Baraina i na manao ohohia o ke kulanakauhale o Nu Ioka. I keia po ia Burukelina aole wale ia laita, aka, i ka aoao hikina kekahi o Nu Ioka a haiolelo aku la i kekahi heluna o 25,000 o na limahana a me na kanaka i akoakoa aku malaila no ka halewai ana malaria.
O ka hoohiwahiwa i malamaia me Burukelana, he nani a ua piha me ke ohohia nui ia e like me ka halawai i malama ia ma Nu Ioka i ka po Poaono, he 100,000 a o@ aku makaainana i huro ae no ka inoa o Baraiana. He eono wahi a Baraiana i malama ai i ka halawai ma Burukelana.
HOOPOINO IA O HOPE PERESIDENA ROOSEVELT E KONA MOKUAINA.
Elmir, Nu Ioka, Oct. 29. Ua hoea ae o Kiaaina Roosevelt ma ke kai huakai nui a na Repubalika i malama ia ma ka po nei, a ua halawai no oia me na ulia pakalaki e like me kana huakai haiolelo i hele mua ai. Ua haalele iho oia i ka Rathbun House mahope koke iho o ka hora 7, a maloko o kekahi kaa hamama i noho iho ai oia a kai aku la me 800 kanaka maluna o na lio a me 7,000 hele wawae me na kukui. Ua haawi ia aku na huaolelo pahenehene e na kane na wahine a me na kamalii nona, a o na leo huro hoi no Baraiana a me Stanchfield.
O ka hopena ua hoopuni ia ae la ke kaa o ke kiaaina Roosevelt e kekahi poe hoohaunaele a paki aku la i na mea eha, aka, aole nae he mea i like ua hoeha ia paha oia. Ua hoopiha ia o Roosevelt me ka inaina, aka, ua hiki ole nae iaia ke kue aku. Ua kaawale mai la ke kaa o ke kiaaina mai ka huakai mai ma o ka hoopuni ana a kekahi puali hoohaunaele. Ua malamaia kekahi haunaele nui ma na alanui, a mamuli o ka hoeha ana mai o na makai ko kumu i pau koke ai, he umi mau elele o loko o ka huakai i hoeha ia, a o ka hae me ke kii o Maki nil@ a me Roosevelt e hele pu ana iloko o ka huakai ua hoopoino ia e na poe hoohaunaele me lawe pu aku i ke koena i koe iho. Aole he mea i hopu ia e na makai.
---
He Kuai Hoemi Nui
O NA
GRENADINES, LAWNS, DIMITIES a me PERCALES
I keia wa 121/2cts o ka i-a.
Kumukuai mamua 25 a me 35 keneta o ka i-a. No la pokole wale no keia kuai hoemi mamuli o ka makemake ana e loaa ona kowa no na Waiwai Hou. E hele koke mai.
THE WHITE HOUSE.
420 - Alanui Papu - 420
---
THE HUP
KUAI HOEMI LOA!
---
Mamuli o ko makou makemake ana e loaa ona kowa no ka pakui ana aku i papahele hou, he hoike ana aku i ka lehulehu i ka holomua o ka makou mau lawelawe oihana, a ma o ka loaa ana o keia kowa hoopiha ia me na lole aahu, ua hiki la makou ke kaena, ua lako makou me na aahu e hiki ai ke hoolako aku i na mea a pau.
---
Eia makou ke kuai hoemi nei i na Paa Lole Huluhulu o na Kane i hanaia ma ka hikina, i papalua ko lakou waiwai io ma ke dala he nani mai ka .................................... $5.00 a pii aku
Na Palule Kane $1.50 ma a wahi e ae ................................................... .50c. a pii aku
Na Paleili maikai loa mai ke ................................................................. .35c. a pii aku
Na Paa Lole Khaki Kamalii e like me ko na koa ................................... .75c. a pii aku
Na Palule o na Keiki ............................................................................... .25c. a pii aku
Na Lole Wawae Pokole o na Keiki ......................................................... .25c. a pii aku
Na Papale o na Keiki ............................................................................... .25c. a pii aku
---
O na mea a pau a na Kane a me na Keiki i makemake ai e loaa no ma ko makou halekuai ma ke kumukuai haahaa loa. E hoolilo ko makou halekuai i kahua no oukou e kipa mau ai.
THE HUB CLOTHING.
Honolulu, Alanui Hotele kokoke i ke Alanui Papu.
---
PACIFIC IMPORT COMPANY.
INCORPORATED.
Alanui Papu. Ma o ae Luakini Katolika.
---
Pehea oe i ke Kuai Hoemi Nui o na KOLOKA!
Eia makou ke kuai hoemi nui nei i na Koloka Wahine Plush, Silika a me Lole.
O ka makou Koloka 3.00 me 4.00 e loaa no ka 1.75.
Na Palekoki ma ke 50 keneta.
Ua weheia 115 pahu i piha me na Lole Aahu me na lako Karisimaka, ua kono ia na mea a pau e kipa e ike i keia mau waiwai.
PACIFIC IMPORT CO.
Alanui Papu.