Ke Aloha Aina, Volume VI, Number 45, 10 November 1900 — HE KUMAKAIA NUI. [ARTICLE]

HE KUMAKAIA NUI.

He mea kupanaha loa no makou ka ike ana aku i kekahi o na alakai ikaika loa o ka Aoao Kuokoa Home Rula, e hoino makawelawela ana i na Aoao Demokarata a me Repubalika, oia hoi, o KEOKI MAKAMU, ua haalele mai la oia ia oukou e na Kuokoa Home Rula a huli a kakoo aku la mahope o ka Aoao Repubalika, ka aoao ana i hoopailua loa ai. Aole makou i hikilele i ka lohe ana aku i kona leo e kakoo ana i ka Aoao Repubalika, no ka mea, ua maopopo mua ia makou kona ano he kanaka oia e hana ana no ke dala, a aole hoi ona manao aloha aina oiaio iloko o kona puuwai. A ke hoonani ia nei makou i na Mana Lani no ko-

na hoike mua ana mai i ke kulana lokoino o keia hapahaole a na Hawaii e kuhihewa nei mamua o ka hoea ana mai o ka la koho balota, ka la hoi ou e ka kanaka Hawaii e koho ai i na kanaka nana e hana aku no kou pono maloko o ka hale kau kanawai. O ka wa i hoike maopopo mai ai o Keoki Makamu, he muhee oia, ma ka halawai ana no ia a na Repubalika ma kahi o Kale Aki. Iloko o ka uhi ana a ka wai hoonoenoe a ke Gini, ua ku mai la oia a kalahea mai la imua o ka lehulehu i akoakoa aku, e koho ia Sam Paka, a ua hoike pu mai la hoi oia o ke kumu o kona haalele ana i ke Kuokoa Home Rula, no ke kipe ia ana o Wilikoki he $15,000 e ka Aoao Demokarata. Ua hoea aku kekahi poe Kuokoa Home Rula ma kahi o ka Kale Aki, a noi aku la iaia e hoi mai i ka lakou halawai e malama ana mawaho mai, aka, ua hoole mai la nae oia, a ia wa i paki ia aku ai oia i kekahi noho. Ma kona home ma ka La Pule nei ua hoike mai la oia i kona manao haalele i ka Aoao Kuokoa Home Rula, a e kakoo ana oia i ka Aoao Re[p]ubalika. Iwaena o na haiolel o ka Aoao Repubal[i]ka o keia Keoki Makamu kekahi iloko o lakou.