Ke Aloha Aina, Volume VI, Number 50, 15 December 1900 — Page 6

KE ALOHA AINA

 

6   KE ALOHA AINA,  POAONO,  DEKEMABA  15, 1900.

 

   (MAI KA AOAO 5 MAI.)

 

Kanikau aloha keia ia oe,

E M aa Emalie Kalihiwa,

Auwe kuu luhi kuu lei,

Lei hemo ole i na kau a kau,

Akahi ka hoi kau e hemo ai,

Ua wehe i ka pili hooka-o ia loko,

Haalele i ka pili me ou pokii,

E noho hoomanao aku ia oe,

Aloha kahi wai o Wailele,

Oia wahi a kaua e pili ai,

Pili aku kaua i ke ao me ka po,

Pili hoomaha ole i na wa a pau,

Ua hele oe me kuu ike ole,

I kou hanu hope loa aole au,

Auwe, auwe kuu aloha ia oe.

Kuma kona walohia keia,

Nou e Emalie Kailihiwa,

Kuu luhi o ka wa keiki ole,

O oe ka lei o kuu wa kamalii,

E haalele mai ana ka oe ia'u,

E noho u aku me ke kaumaha,

Kaumaha luuluu au i ko aloha,

Me ukana nui na'u e hana nei,

Hahana mai nei ko aloha ia'u,

Me he wai mapuna la i kuu kino,

E huahuai nei ia oko,

E hooniua nei i kuu manao,

Noho aku kaua o ka malu manako.

Ko mea haule ole i na wa a pau,

Pau ole no hoi ko'u minamina,

E haalele mai ana ka oe ia'u,

E noho hookahi me ou pokii

Auwe, auwe kuu aloha pau ole ia ea.

Aloha au o ka malu hale o Aipaakai,

Ia wahi a kaua e noho ai,

Hoolono i ke kani o na manu,

Kuu kaikamahine o ka lau paina,

Me ka lau o ka nia holu i ka @kani,

Aloha ia wahi a kaua e pili ai,

Huli aku nana ia Mokuoloe,

Aloha ia kai a kaua e hele ai,

Aloha Auwaiwahine puu hoomaha o ka lehulehu,

Aloha o Luluku ia uka a kaua e pili ai,

E alo ai i ke anu me ke koekoe,

Auwe, auwe kuu aloha ia oe,

Aloha ka luakini laahia o ke Akua,

Ia wahi a kaua e pili mau ai,

Aloha Olomona me Ahihi,

Hikiu mai nei oe nalo na maka,

Aloha ka leo hone o ka bale,

I ka hea mai e nane kaua,

E imi i na pono o ka uhane,

Aloha ka ia o Heeia,

E hiki aku ai i Kaihuaha,

Nani i ka nani o Waikane,

Aloha ia wahi a kakou e pili ai,

Auwe, auwe kuu aloha ia oe.

  MRS. EMALIE ATIONA.

   (Aole i pau)

 

HE KAAO KAILI PUUWAI

-: NO KA :-

UI MINEWA

-: A ME NA :-

Kaikunane Eiwa

 

I Hooliloia i mau Manu Nene Ahia a i ole na keiki i Hoehaehaia

 

Kakauia no KE ALOHA AINA,

 Na keia mau leo huro o ua mau kanaka ukulii nei i hoopuiwa aku i ka moi opio a me kana aloha Minewa e hiolani ana iluna o ko laua pela nolunolu o Hulei, a me ka hikilele nui ala koke ae la ua Duro nei mai kona wahi moe ae a kahea aku la i na koa kiai me ka leo pihoihoi i ka i ana aku.

 Nohea keia mau leo huro e wawalo hele nei o ke kulu aumoe: He enemi anei?  He enemi anei?

 E ko makou haku moi aole e hiki ia makou ke hoike aku imua o kou hanohano i kahi a keia mau kino kanaka i hele mai ai, aka, o ka makou nae e ike nei ua hoopuni ia ke kakela alii nei e keia mau kiho kanaka liilii.  Aole pu hoi e hiki ia, makou ke hoike aku he enemi a i ole he hoaloha paha no kakou mamuli o ka aaki paa loa o ka pouli.

 I ka hooki ana iho o ka leo o na kiai, eia no ka wa i lalau koke aku aku ai ua moi opio nei i kana pahikaua a paa ae la ma kona lima a me ka leo wiwo ole haawi koke aku la oia i kana kauoha i na koa kiai e hele koke aku lakou e hai i na koa k@ai a pau o ke kakela e ku aku lakou me ka hopo ole e kue aku i na enimi a pau e hoao ana e komo mai iloko o ke kakela alii me ka puana hope ana aku.

 E paio aku e o'u mau kanaka me ka wiwo ole i ko kakou mau enemi,a o ko oukou haule pio ana o ko kakou pio like ana no ia   Nolaila, o ko kakou ola a me ko kakou make aia no ia iloko o ko oukou poholima.  A owau hoi o kakou e noho ae au e kiai i ko kakou haku wahine mai ke kaili ia ana aku e na enemi.

 Ae, ae, e ko makou haku opio, o kou makemake wale no ka makou e hooko ai.

 A i ke kuu ana iho o ka leo o ua mau kiai nei, oia no ko lakou wa i nalo hikiwawe aku ai malalo o ka hooko kauoha.  A he mea oiaio, iloko o na sekona pokole ua makaukau ae la ka hale kakela no ka malama ana i kekahi hoouka kaua weliweli.

 I keia wa no i komo mai ai ka luahine kilikilo me ka ike ole o na kiai, oiai, ua uhi iho la kona mana kupua maluna ona, a komo aku ia oia me ka laelae; a me ke alo o kona haku opio e noho ana iloko o ke pihoihoi i pane aku ai oia me ka lepo olu waiahe.

 E kuu haku opio e hoopau ae i kou mau manao pihoihoi, no ka mea, owau no keia o kau kauwa wahine, ke kilokilo Ronio, a o kela puulu kanaka e hoopuni nai i ka halealii, aole lakou he enemi nou e ke alii, aka, he mau makaainana makee alii lakou i hele mai nei e ike ia oe.

 He oiaio anei, wahi a ka leo@ ninau o ua moi opio nei i poha ae ai, e oe no keia e Ronio, kau hoaloha maikai?

 Ae, owau no keia, wahi a Ronio, a kaawale aku la ka mana kupua e uhi ana maluna ona, a ahuwale ae la kona helehelena imua o ka moi opio.  A ia wa no me ka hakalia ole i lele mai ai ua Duro nei a apo mai la i ka lima o kona hoaloha aoo me ka pane ana mai.

 E huikala mai ia'u no ka'u mau hana kue i manao kuhihewa aku nei@ ia oukou he mau enemi.  Iloko pu hoi oia wa i huli ae ai oia a haawi hou aku la i kana kauoha i kona mau kiai e hoihoi aku i ka lakou mau pahikaua maloko o ko lakou mau wa-hi, no ka mea, aole keia he mau enemi, aka he mau makaainana lakou no ke alii.

 A ma keia wa pu hoi i huli ae a@ ua Duro nei, a ninau aku ia me ka @eo hauoli.

 E kuu hoaloha maikai, ua hooko ia anei ka mea a'u i Kauoha aku nei ia @e?

 Ae, wahi a ke@ kilokilo i hooho aku ai, eia ua moku la ua paa na mea a pau, a i hakalia wale no i kau kauoha hope.  A o ka poe nana i hooko aku i kou makemake oia no keia mau kanaka ukulii e hoopuni nei i kou halealii.

 Alaila, ua aie nui au i keia mau kanaka, a he mea kupono hoi po'u ka hele ana aku e ike ia lakou.

 A ma keia wahi i ku ae ai ua Moi Opio nei, i ukali ia e kana aloha ka ui Minewa a hele aku ia no waho o ka lanai.  A ia wa pu hoi malalo o ka mana kupua i loaa i ke kilokilo ua hoolele ae la oia he popo ahi i ka lawa nana i hoahuwale aku i na kualono a pau a me na kanaka ukulii e uhipaa ana i ke kahua kahi a ke kakela e ku ana.

 A i ko lakou ike ana mai i na alii opio e ku aku ana iluna o ka lanai, oia no ko lakou wa i moe iho ai ilalo, a i ka pau ana o ko lakou hoomaikai ana i ko lakou akua no ke kiai ana i ko lakou mau haku opio.  Ua ku koke ae la lakou iluna a haawi mai la i na leo huro puha hauoli no na opua e ku aku ana imua o ko lakou alo.

 A ia wa pu no hoi i poha aku ai ka leo o ka moi opio i ka i ana aku,

 E o'u mau makaainana ukulii a'u e ike aku nei he mea hauoli no'u ka halawai pu ana me oukou, oiai aole au i ike mua he lahuikanaka hou ae no kekahi o'u e ola nei ma keia ilihonua.  A no ko'u piha aie no ka oukou hana nui i lawelawe mai nei ola hoi, ke kukulu ana mai nei i kela moku a'u i makemake ai. Nolaila, mai keia la aku e noho pu ana oukou me a'u a na ka make e@ hookaawale ia kakou.

 A i ka kuu ana iho o ka leo o ua opio, oia no ka wa i aluka mai ai na leo o na kanaka i ka hooho ana mai.

 Aole, aole oe i aie ko mau makaainana nei, aka, o makou ke noho aie nei@ nou, no ka mea, akahi no a loaa ia makou he noho lanakila ma o kau kauoha e noho pu me oe.  Me oe makou no ka wa mau loa.

 I ka wa i pau ai o keia hoolauna o ke kuluaumoe, oia no ka wa ai@ hoi aku ai na mea a pau e hooluolu no ke koena oia po.

 I ke o ana mai o na kukuna malamala o ke kakahiaka, oia no ka wa i ala ae ai na hoahanau eiwa a liuliu ae la hoi i ka lakou huakai no ka home.  Kahi a ko lakou makuahine kolea e ai hookano mai la i ka loaa a ko lakou makuakane.  No ka hookau ana aku i kekahi hoopai kupono no kana mau hana lapuwale i hookau mai ai maluna o lakou.  A he mau minute hoi ia o na waimaka e hoohanini ia ana mawaena o na kaikunane a me ko lakou wahi kaikuahine hookahi.

 A i ka mao iki ana ae oia no ka wa i kani mai ai ka bele no ka hele ana aku o na mea a pau maluna o ka papaaina.

 

LILO NA OLA.

 

Kapalakiko, Nov. 30.  Ua hoopiha ia ae o Kapalakiko me kekahi hiona manaonao i ike oleia kona lua, i ka wa o ke kaupoku aniani o ka Hui Hana Aniani Pakipika, i hiolo ai a iawe pu aku la he 125 kanaka a me na keiki opio no ka honua.

 Ua akoakoa aku keia puulu kanaka malaila no ka makaikai ana i ka hookuku peku popo mawaena o na kula nui Kaleponi a me Stanford o keia hale hana aniani e ku mai ana oia ma kekahi aoao mai o ke kahua kinipopo.  O na kanaka makua a me na keiki i hiki ole ke komo aku i ke kahua peku popo, ua pii aku lakou iluna o ke kaupoku@ o keia hale, no ka mea, he nanaina molale ke kahua peku popo ke ike ia aku mailuna aku o ia wahi.

 Malalo pona o keia mau kaupoku na kapuahi hoohee aniani, a ua hoa ia hoi keia mau kapuahi, no ka liuliu ana, no ka hoomaka ana aku o ka hana ma ka Poakahi ae, no lakou ka enaena i hiki aku i ke 500 degere, ka wela pina hoi o ua mau kapuahi nei i makemake ia.

 A maluna o ia mau kapuahi enaena i haule aku ai he hapanui o keia mau kanaka, a mamuli o ka ikaloa o ka wela loa ua a koke ia ko lakou mau aahu i ka wa i pa aku ai i ke kapuahi.  Ua haaawi kokeia na kokua i na poe poino, a ua ikeia he 16 i make a he 94 i hoehaia.

 

NELE I NA LIMAHANA.

 

 Ma ka hoea ana mai nei a Lunanui McLennen o Laupahoehoe, Hawaii, ua hoike mai la oia i ka pilikia loa oia mahiko me ka limahana ole.  No ka mea, i ka wai lilo ae nei o Hawaii nei i teritori no Amerika Huipuia, ua hoomaka iho la na Iapana e haalele i ka hana ana ma na mahiko, a aole hoi he kanawai e kaohi aku ana ia lakou mai ka hooko ana i keia manao.

 He nui o keia poe limahana i hoi mai ma Honolulu nei a ma na wahi e ae, a o na poe i koe na hoolaha lakou i kekahi manawa ma ka piliwaiwai me ka noho wale ana ma ka hale, a he hapawale no o ka mahina e hoohalaia ana e lakou maloko o na mahiko.

 O ko makou manao iho he mau hoopai ana no keia a ke Akua i n@ poe puni waiwai nei, kekahi poe hoi i hooikaika e hoohui ia kakou me Amerika Huipuia i wahi e oi loa ae ai ko lakou waiwai.  Aka, ke ike nui mai nei nae i ka pilikia.

 

 He keaka no ko ka Ofiuma i keia po.