Ke Aloha Aina, Volume VII, Number 12, 23 March 1901 — Page 5

KE ALOHA AINA, POAONO, MARAKI 23, 1901.          5

 

HOLOPONO NA HANA O KA FEA.

            Ma ka Poaono nei i malama ia ai ka aha fea a me ka paina luau ma ka home hoohanau Kapiolani. Ua hoonani ia ke kahua o keia fea a me ka luau i malama ia ai me na lau nehelehele aala o ka uka waokele. Ua komo pu aku no ka lawelawe ana i na mea o holomua ai keia hana nui ka Moiwahine Liliuokalani a me ke Keikalii Kawananakoa a me kekahi poe maka hanohano e ae.

            Nui a lehulehu na poe i hoea aku malaila, no ka haupa ana i na kohi kelekele e waiho ana maluna o na pakaukau a no ke kuai ana hoi i na mea hanalima like ole e ahu ana malaila.

            Ua manao ia ua hoea aku na loaa o keia fea a me ka luau i ka $2,000, a oi. Ua hoea ae ka bana malaila i ka auina la e hoonanea ai i ke anaina a o ka hui himeni Kawaihau hoi ma ia po iho. O na loaa a pau ua lohe ia mai e waiho ia aku ana ia iloko o ka waihona o ka Home Hoohanau Kapiolani.

 

NO KA MAKAIKAI ANA I NA MA'I HOOHUOI

            Ua hoomaha awakea ae na hana o ka Hale Ahaolelo ma ke awakea Poalua nei no ka hookuu ana i na hoa a pau e hele aku e makaikai i ke ano o ka nana ia ana o na ma'i hoohuoi lepera o na kauka aupuni ma ka pa hoomalu o Kalihi. Mamua ae o ka hoopanee ana o ka Hale ua ulu ae no kekahi mau kue ana, mawaena oia poe o Emaluka. Ua olelo mai oia aohe wa no ka hoapaapa ana aku, no ka mea, he kanakolu wale no la i koe no lakou, a he nui hoi ka hana i koe, aka, mamuli nae o ka uuku loa ma ka aoao kue ua lanakila ole kona manao. Ua ukali aku la na hoa i na kauka aupuni no ka pa hoomalu o Kalihi.

 

HOEHA IA KA EMEPERA WILIAMA.

            Berlin, Mar. 2. Oiai ka Emepera Wiliama e holo ana maluna o kona kaa mai Rathsekeller aku no kahi hoolulu kaaahi ma ka la inehinei, ua nou ia mai la he apana hao e kekahi kanaka nona ka inoa o Dieterich Weiland no luna o ke kaa o ka moi. Ua hopu koke ia ke kanaka puuwai eleele.

            Ua olelo ia ae ua hoeha iki ia ka Emepera ma ka papalina, aka, ua hoomau aku no naa oia ma kana huakai me ka hoi hope ole aku.

 

            E loaa no he uku makana kupono i ka mea e hoihoi pololei mai ana i ke ie paa lima nalowale a makou e hoolaha aku nei i keia Keena.

 

HALE ONA LUNAMAKAAINANA

NA HANA O KA POAKAHI NEI.

            Aole no he mau mea ano nui i hana ia ma ka noho ana o ka Hale ua lawe mai la o Bekele he noi mai ia William Thomas mai o Hawaii, e hookomo ia he $100 maloko o ka bila haawina he aie no ka Papa Ola iaia no kekahi mau paiai i hoolako ai i ke kahua ma'i. Waiho ia i ke komite ola

            Na Paele i waiho mai he palapala noi mai na poe aku auhau o Iwilei e hookaawale ia i puu dala no ka hoomaemae ana i ke alanui Iwilei.

            Na Makainai i waiho mai he hoike no kekahi palapala noi mai Koolau mai, e noi mai ana i $25,000, no ka hana i' palekai, na uwapo a me alanui, a me $10,000, no kekahi mau hemahema e ae. Ua waiho ia ke noi ma ka pakaukau a hapai hou ia i ka wa e lawe ia mai ai ka bila kanawai e noonoo.

            Ua waiho hou mai o Makainai he hoike, aole i loaa na haina pololei mai a Kiaaina Dole mai no na ninau a ke komite e pili ana i ke Komisina Aina J. F. Brown. Na Gilfillan he olelo hooholo e hoike mai ke Kiaaina i na kumu ona i pane pololei ole mai ai i na ninau apono ia.

            Ua waiho mai o Puuiki he palapala noi na 25 inoa i $6,000 no ka hana i alanui aupuni mai Haena aku a Kalalau,

 

HALE O NA LUNAMAKAAINANA, POALUA.

            Ua lilo ka hapanui o ka manawa o ka Hale ma ka hooponopono ana i ka bila 1, ka bila haawina hoi no na hoolilo o na hale elua. Ua hoihoi hou ia mai keia bila e ke Senate no ka pololei ole o kekahi huaolelo i pela ia ai. A mahope o na hooponopono ana ua makaukau ua bila la no ka lawe ana aku imua o ke kiaaina e kekahi komite hui. Ma keia e ike ia ai eia no keia poe ke nana mua nei no lakou iho, a mahope ae ko ka lahui pono.

            Bila8, no ka hoomau ana i ka hoonaauao ia ana o na keiki ma ke kula a hiki i ka 21 makahiki a Puuiki, waihoia ma ke pakaukau.

            Bila 40, e pili ana i ka hoohana ia ana o na opio maloko o na hale inu rama, heluhelu ia a waiho ia i ke komite ola.

            Bila 41, e pili ana i ke kahea inoa ia o na alanui o Honolulu, heluhelu elua ia.

            Bile 42, no ke kau @@lu ana i na hale a me na pa hale ma Honolulu, waiho ia i ke komite aina aupuni.

(E nana ma ka aoao 6.)

 

W. & M. Ltd.

            O na kauoha a pau o $500 a pii aku mai na mokupuni mawaho aku nei e uku no makou i na auhau moku iha e hoouna ia mai ana ke kauoha me ke dala kuike.

BATISTIES, PERCALES ME DIMITI

            He mau lole aahu nani o na waihooluu like ole, i hoouna pololei ia mai na hale hana lole mai o Nu Enelani. No ka i a    15c ame 20c

TISSUES ME ZEPHYRS

            He mama a he nani, a he paa hoi ma ka aahu ana. No ka i a   30c, 35c, 40c, 45c

FRENCH COTTON FOULARDS

            Ua like loa ko lakou nanaina me ka silika i kupono no na holoku. No ka i a  @@c

NA LIHILIHI FARANI

            I hana maiau ia no ke kahiko ana i na lole nani loa, keokeo, eleele ame melemele o na paikini hou, No ka i a                        $5 ame $6

            E hoouna ia no na apanapana lole (samples) me ka uku ole ma ka hale leta i na poe e kauoha mai ana, no ka wae ana i kokua e ua ae i ko makou

KEENA HANA AAHU

            A malaila e hooko ia ai ko lakou makemake i na he iini ko lakou e hana ia i mau holoku no lakou maanei.

WHITNEY & MARSH,

I KAUPALENAIA.

1045 Alanui Papu.

 

KULANA PII MAU O HILO.

            Ma ka huli hoi ana mai nei a ka Lunahooponopono o keia pepa mahope o kona kaawale ana aku nei no kekahi mau la pokole i ka aina na kaulana Hilo, Hana kahi, no ka ike ana i ka hanu hope o kona kaikuahine Miss Emmeline Kaleionamoku Nawahi i hookuu mai la i keia ola ana ma ke one hanau. Ua nui na mea hou ana i hoike mai e pili ana no ka pii hikiwawe ana ae oia kulanakauhale iloko o na makahiki ana i kaawale mai ai mai ke one hanau mai.

            Oiai, o ka ehiku keia o na makahiki mai kona ike hope ana i kona one oiwi, wahi ana, ua like me he kulanakauhale okoa la kana i ike ai, a o na hale ana i ike a kamaaina hoi aole lakou ma kana wahi i ike mua ai, aka, o na hale elua a ekolu ke kiekie oia kana i ike aku ai e ku ana ma kahi oia mau pupuhale liilii ana i ike ai i na makahiki i kaahope ae nei.

            Aia na kukui uwila ke hoomalamalama la i na halekuai, a hale noho, a ma na alanui o na aina ua kaulana la ma kahi o na ipu kukui aila mahu ana i ike ai ia mau la i hala hope aku. He nani na alanui, a ke haulani la hoi na kaapio a me na kaa basa ma kona mau alanui, i oi hewahewa aku ka heluna o na kaa basa hoolimalima i ko Honolulu nei.

            He eha mau nupepa e hoopuka ia la malaila, he elua ma ka olelo Enelani, hookahi ma ka olelo Pokiki, a hookahi hoi ma ka olelo Hawaii e noho hookele ia ana e William Kino, nona ka inoa Ka Elele Hawaii, a no na maka maka la ka mahalo nui a ko makou Lunahooponopono opio no kona ohaoha ana mai iaia, oiai, na like no oia me he malihini i kona one hanau mahope o ke kaawale loihi ana no kekahi mau makahiki me ke kalokalo ae o ola loihi Ka Elele Hawaii, ko pookela hookahi o ka Ua Kanilehua.

            He oia mau ke kulana ikaika o na hana pili hoomaua malaila, aka, he ekalesia hou aku nei hoi kana i ike aku nei oia ka Hoomana o na La Hope. He nui ka holomua o keia hoomana a ua malama ia he hoike kula sabati nui iaia malaila.

            Aia ke holo la na kaaahi no uka o Olaa a no Puna paia ala i ka hala, a ma kahi o na aina oneanea o uka o Olaa i noho kanaka ole ia aia na kauhale nunui ke ku la me ka uhi pu ia oia aina e ke ko, a he manaoio kona iloko o na makahiki pokole wale no e like ana no ka Ua Kanilehua me ka Ua Kukalahale nei.

            Ua pau hoi ka pulu ana o na ohua i na hunakai i ko lakou wa e lawe ia ai mai ka moku aku no uka o ka aina ma na waapa, no ka mea, aia ke ku la he uwapo lewa i ke kai kahi a ka moku a pili aku ai a lele aku hoi na ohua me ka maalahi no uka o ka aina. He nui a lehulehu na mea ana i hoike mai ai ia makou, aka o na mea ano nui ae la nae keia ana i ike ole ai i kona wa i hiki hope aku ai i ka aina hanau he aneane ehiku makahiki ae nei i hala, he hoike oiaio hoi no ka pii maoli no o ko Hilo kulana iluna.

 

HOOLAHA.

            UA MAKEMAKE O MAUNAKEA e hoike eia oia ke manao nei e pakui mai i mahele waiwai paa iloko o kana oihana loio a e lawelawe aku ma na ano hooponopono ana a pau e pili ana i na aina. He manaoio kona e oi loa aku no ka hoopomaikai ia o ka lahui Hawaii he waiho mai ma kona mau lima i kekahi aina a lakou e manao ai e hoolilo, hoolimalima a moraki paha, a e hooko koke aku no hoi oia me ka eleu ia hana. O kona ike olelo Hawaii ame ka ike i na aina a me na moo-waiwai a hookuleana o na aina ma Hawaii nei kona mea i kupono loa ai no ka hooko ana aku ia ano hana no na Hawaii oiwi.

            KEENA OIHANA: Hale Kakalaika, Alanui Kalepa, ma kekahi huli mai o ka Hale Leta, Honolulu.           tf