Ke Aloha Aina, Volume VII, Number 13, 30 March 1901 — Page 6
| This text was transcribed by: | Francene H Aarona |
| This work is dedicated to: | To our family who instill Christian values as well as our Hawaiian heritage. |
KE ALOHA AINA
6 KE ALOHA AINA, POAONO, MARAKI 30, 1901.
KANAKOLU MOKUKAUA HOU O BERITANIA.
---
Ladana, Mar 13. O ka nui o ka lilo o ka oihana kana moana o Beritania no ke kukulu ana i mau mokukaua hou nona no ka makahiki 1901 - 1902 he £ 30.807,800. Ua hoomahuahua pu ia ae hoi me na ka aka no kea mau moku a hiki i ka 3,854.
Maloko o ka papa kuhikuhi o ke kapiliia ana o keia mau moku, na hookaawale ia hoi malaila he ekolu mokukaua hakaka, eono mokukaua palekila holo mama, elua mokukaua holo mama oka papa ekolu, umi moku topido, elua mokukaua liilii a me elima moku luu. Ua hoomaka ia ke kapili ia ana o kekahi mau moku i ka 1900 aku nei, a ua manao ia ma keia makahiki e hoolana ia ai lakou a pau.
E hana ia aku ana he ae like me na hui mokuahi a pau e paa ia no ko lakou mau mokuahi a pau i ka wa a ka aha kaua moana e kahea ai a e hoolilo ia hoi lakou i mokukaua kokua holo mama i ka wa o kekahi kaua e pono ae ae, Pii mau no ko Beritnia ikaika kaua moana.
---
KA HOOILINA MOI O BERITANIA NO NA PANALAAU.
---
Ladana, Mar. 15. Ma keia auina la i haalele iho ai ka Duke a me ka Duke Wahine o Cornwall a me York ma ka laua huakai kaahele i ka poepoe honua. Ua ukali aku la ka Moi Edward e ka Moiwahine Alexandria me kekahi mau alii e ae ia laua no Portsmouth, a malaila e kau aku ai laua maluna o ka mokuahi Ophir ma ka la apopo.
Portsmouth, Mar. 16. Iloko o ka ua a me ke anu he puulu nui no nae o na oe makaikai i hoea mai la i anei mai na taona like ole mai no ka makemake ana e ike i ke Duke a me ke Duke Wahine o York i ko laua haalele ana iho ma ka laua huakai no na Panalaau o Beritania Nui.
Ua hooluhiehu ia ke awa me na hae a me na hoohiwahiwa e ae. O ka Misiona a ka hooilina moi e hele nei i kona mau panalaau he hanaia i hooulu ia e ka Moiwahine Vitoria i kona mau la hope e noho alii ana, a ua lokahi hoi ka ohana alii i ka hooko ana aku ia manao.
I ka haalele ana iho o na alii opio e kiai ia ana laua e na mokukaua o Beritania ma ko laua alahele a hiki i Auseteralia. E ukali aku ana na mokukaua o ke kowa ia laua mai Portsmouth a hiki i Gibaraleta, mailaila aku e kaa ana laua malalo o ka malama ana a kekahi mahele o na mokukaua Beritania e kiai ana i ke kai Waenahonua a hiki i Malata, a malaila e loaa hou ai kekahi mahele mokukaua Beritania a na lakou e kiai i na alii a hiki i Port Said. Na eono mau moku topido e kiai ia laua ma ke ala wai o Suez, a he elua mau mokukaua e kali mai ana ia laua ma ka nuku o ke kai Ula no ka nana ana i ko laua komo ana aku ia kai me ka maalahi. Malaila e loaa mai ai laua i na mokukaua Beritania o Inia Hikina a na lakou e lawe a hiki i New Guinea, malaila e loaa mai ai laua i na mokukaua Beritania o Auseteralia a na lakou e lawe aku ia laua no Sidane. O na hoonohonoho ana no ka laua huakai huli hoi ma ke alahele o Vanekoua a hoea i Canada aole loa ia i maopopo i keia wa.
---
PUHILI AUANEI PAHA O BERITANIA IA RUSIA.
---
Pekina, Mar. 15. O ka hoopaapaa i upu i mawaena o na pualikoa o Rusia ame Beritania Nui ma Tientsin na hoea mai ia, a ua manaoia he wa wale no no ka hookahe koko ehiki mai ana. Ua lawe ae la o Rusia me ka ikaika i ka mana o ka palena kaaahi a na Beritania e hana ana, a i keia manawa aia malalo o ke kiai ana a na koa.
O Konela MacDonald e hoomalu ana ia Tientsin, ua noi hou au la oia i na a'o ana a Kenerala Barrow. A oiai, o Kenerala Barrow oia ke Alihikaua Nui elua o na pualikoa Beritania ua hiki ole iaia ke hanahou aku, o ili na koikoi maluna ona i ka wa i kaawale aku ai kona mua, Kenerala Gaselee, aka, ua launa aku nae oia me Kuhina Bertania Sir Ernest Satow. O ka hopena oia mau kuka ana aole ia i lohe ia.
Ua hoomaopopoia maanei o Kenerala Magash e hoomalu ana i na pualikoa Rusia ma Tientsin, ua hooko aku ia e like me na a'o ana a M. de Giers, ke Kuhina Rusia, ma ka lawe ana ae i ka palena. I ka wa a na Beritania i hoomaka ai i ke kukulu ana i ka palena, ua waiho au la ke Kuhina Rusia i na kue ana ia Konela MacDonald no Rusia ia wahi. Ua lawe ia aku keia mea imua o Kenerala Barrow, a o ka pane i loaa mai ia Konela MacDonald e hooko aku oia i ka hana ina me ka pualikoa e hiki ai. O na Rusia i ko lakou wa e kali ana i na kauoha mai Pekina, ue eli iho la lakou i na auwaha ma ke teritori e hoopaapaa ia nei. A o Konela MacDonald hoi me kekahi puali o ka regimana Hongkong aia ma kahi e hoopaapaa ia la me ka makaukau no ka hakaka, a i kokua ia e elua puali o ka Madras Pioneers malalo o ke alakai ana a Mekia Johnson.
Ua hauoli na Rusia. O ke kumu o ko lakou kue ana i keia hoomoe ia ana o keia palena mamuli no ia o ko lakou hopohopo o hoopoino ia ke alahao a lakou e hana aku ana. Aia na aoao a elua ke kali la i ke kauoha a ko laua mau aupuni.
---
HOOUNA PUPUAHULU HOU NA KOA.
---
Wasinetona, Mar. 15. O na luna aupuni o ke Keena Kaua a me ke keena hoolako aia lakou iloko o ka piha hana me na pualikoa hou e hoouna pupuahulu ia nei no Pilipine. O ke kumu o keia hoouna awiwi ia o na koa mamuli no ia o ka makemake ole ia e emi iho ke kulana ikaika kaua 60,000 kanaka o Kenerala MarArthur ma Pilipine i ka wa e hoihoi ia mai ai na koa kuikawa he 20,000. I wahi e mau ai kela huina kanaka oia no ka hoouna hou ana aku i 20,000. I wahi e mau ai kela huina kanaka oia no ka hoouna hou ana aku i 20,000 kanaka mamua o ka la 1 o Iulai.
O na moku mua e haalele iho ana ia Kapalakiko nei no ka hoopiha ana i keia huina koa oia ka Indiana, Meade a me Panesalevania, e lawe ana i na bataliona o ka regimana 10, regimana kaualio 5 a me kekahi mau bataliona hou e ae. O na moku lawekoa e haalele iho ana mahope o lakou a me ka nui o na kanaka e lawe ai penei no ia :
Moku lawekoa Buford ma ka la 25 o Maraki e lawe ana he 61 alii me 1,000 kanaka ; Hancock, Aperila 1, 54 alii me 1,060 kanaka ; Kilpatrick, Aperila 5, 61 alii a me 1000 kanaka ; Warren, Aperila 12, 42 alii me 1,242 kanaka ; Logan, Aperila 15, 80 alii me 1,648.
---
NA KAUPU HEHI ALE HOU O KA MOANA PAKIPIKA.
---
Newport News, Mar. 17. O ka mokuahi hou Corea ka mokuahi nui loa i kapili ia ma keia aoao o ka poepoe honua e hoolana ia ana ia ma keia Poaono aku. O ke Corea a me kona hoahanau, ke Siberia, ua kapili ia laua no ka hui mokuahi Pakipika Mail, a e hooholo ia ana mawaena o Kapalakiko a me Hongkong, me ke kipa ana ma Honolulu, Iokohama a me Nagasaki. He like loa ka nanaina o kei mau moku, a o ka aelike i hana ia no ko laua kapili ia ana he $ 4,000,000, a na ia mea i hapai ae ia laua i mau moku pii loa me ka nui hoi ma keia aoao o ka poepoe honua. Me ka mama holo o 20 nota o ka hora, e lilo ana o ke Corea ka moku holo o ka Pakipika a hiki i ka hoea ana aku o kona kokoolua, a ia wa e oaa ai i ka Pakipika Mail he elua mau moku i hiki ke lawe he heluna ohua nui me ka ukana, a he mau moku nani loa hoi e hoohemo mai ana mai Kapalakiko mai.
E ukali ana ka mokuahi Siberia i ke Corea maloko o hookahi mahina, a i ka wa e hookomo la ai ko laua eneginia mahu me ka pau pu o na hemahema, me he mea la e haalele like iho ana no laua no ka moana Pakipika.
O ka holo o ke Corea i makemake ia he 18 nota i ka hora, aka, ua manao ia e hoopiha ia aku ana no kona holo a hiki i ka 20 nota. O kona nui penei no ia: Loihi, 572 kapuai 4 iniha ; laula, 60 kapuai ; hohonu ; 40 kapuai ; kapuai wai, 27 ; kaumaha, 18,600 tona.
HOOLAHA KUAI A ME HOOPAA A KA MEA MORAKI.
---
Ke hoolahaia aku nei ma keia no ka hooko ana aku i ka mana o ka hoolilo ana i kekahi moraki i hana ia ma ka la 14 o Ianuari, 1899, e C. H. Patzig o Honolulu, Mokupuni o Oahu, Teritori o Hawaii, mea moraki, ia John Radin o Honolulu, i olelo ia, mea paa moraki, a i hoopaa ia ma ke Keena Kope ma Honolulu, ma ka Buke Aupuni 187, ma na aoao 263 a ka 264, he manao ko ka mea paa moraki e paa i ua moraki la no ka hahaki ia ana o ka aelike, oia hoi, ka uku ole ia ana o ke kumupaa a me ka uku panee i kona manawa i olelo ia.
Ke hoolaha pu ia aku nei, o na waiwai i paa maloko o ua moraki la i olelo ia, e hoolilo ia aku ana no ia ma ke kuai kudala ia ana ma ke keena kudala o James F. Morgan, ma alanui Moiwahine, Honolulu, ma ka Poaono, Maraki 30, 1901, ma ka hora 12 awakea. O na waiwai i hoakaka ia maloko o ka moraki i olelo ia, oia keia :---
Oia no kela apana aina a pau e waiho la ma ke kihi o ke alanui Metcalf a me ke alanui Beckwith, kokoke ma Punahou, i olelo ia ma Honolulu, e hoakaka ia ana, penei :
E hoomaka ana ma ke kihi, a i ole, ka hui ana o ka aoao komohana o ke alanui Metcalf me ka aoao hema o ke alanui Beckwith, a e holo ana :
1. Hema 75 ° 40 ' Komohana, Hookai Haneri ame Iwakaluakumamahiki ( 127 ) kapuai, ma keia alanui Metcalf i oleloia ae nei.
2. Akau 54 ° 50 ' Komohana ma ka laina e kaulike ana a hoea i alanui Beckwith, ma ke Komohana Kanahiku ( 70 ) kapuai ma ka aina o A. Marques.
3. Ma ka laina e kupono ana i keia i hoike hope ia ae la maluna, ma ka palena o kekahi apana aina o Sacinto de Monte. Hookahi Haneri ( 100 ) kapuai a holo iuka a hui me kona pili ana me ke alanui Beckwith i olelo ia ae nei.
4. Ma ke alanui Beckwith i olelo ia ae nei Hema 54 ° 50 ' Hikina Hookahi Haneri a me Kanalima ( 150 ) kapuai ma ka Hikina, a holo i kai a hoea i kahi i hoomaka ai, maloko olaila, he Ili o 11,000 kapuai kuea, aoi aku a emi mai paha, he hapa hoi ia o ka Aina i hoike ia maloko o ka Palapala Sila Nui 1945 a i hoolilo ia aku ia C. H. Patzig ma ka Palapala Kuai a John Rudin i olelo ia, ma ka la 14 o Ianuari, 1899, i kope ia maloko o ke Keena Kope, Oahu, maloko o ka Buke 189, Aoao 204.
Pela me na waiwai a pau maluna o keia mau wahi i hoakakaia. ( Kakauia ) JOHN RADIN, Mea Paa Moraki.
Kuike ma ke Dala Gula Amerika. No hoolilo palapala kuai ma ka aoao no ia o ka mea kuai.
No na mea i koe e ninau ia Stanley & Holmes, na loio o ka mea paa moraki.
Hanaia ma Honolulu, Maraki 7, 1901. mar 8.