Ke Aloha Aina, Volume VII, Number 14, 6 April 1901 — Page 7

KE ALOHA AINA

POAONO, APERILA 6, 1901

 

HE KAAO HAWAII

NO

HAINAKOLO

--

Ka Ui Nohea o Waipio.  Ke Kai kamahine Nana i Wawahi i na Pani Paa o Kuaihelani a Haule Kona Kapu Ihiihi.

--

            A nou e Lonokaiolohia i kamahaku, ua loaa ia oe na ike elua mai ka nau mai, a me ko wahi aupuni uuku ola na iwi e malama i keia mau mea me ka maluhia no ka wa mau loa aole kaua e like me keia, na ka nuu e hoike ia kaua no ia mea.

            A nou e Luukiaikaihiihikapu, ua loaa he kulana kiekie maluna ou a he mea hoi no’u e hauoli loa ai no kou hoopili loa maluna o ka hoailona akea, ke alanui maemae ka noho ana, nolaila, na keia hoailona e hoike ana i ko kaua hoi ana.

            A no kuu akua i kamahaku aohe mea hahai ma kona hope, no ka mea, he akua kumu, he makaku he nuu, kolaila, ua poina kona noonoo no Luukia mai kona kaawale ana a hiki mai i keia wa a’u e olelo nei ia oukou aohe e hiki ia’u ke hele e ike iaia, a pela oukou, o kela mana kumu i make ai o Kane ma oia kona puuhonua.

            O oukou ua loaa ko oukou kahua nui akea e hoomoe ai, a no’u iho aole loa.  Ua pau na aupuni mai ka papaku a ka lewa ia oukou, nolaila, e imi ana au i wahi no’u e noho ai no ka wa mau loa, a ma ka mana i loaa ia oukou e hui ai kakou no keia hoomaha ana o kakou no na luhi, na inea me ka paupauaho ole ma keia nana nui weliweli i ikeia.

            Ua pane o Luukia imua o kona akua, ua pau na hana, ua maemae ua maluhia, aia ma ka mana kumu o Leimakani aohe mea hookahi e hiki ke launa me ia, o keia ninau wale no imua o kou kiekie, aole anei e hiki ia’u ke hui e noho elike me mamua o ko maua noho ana?

            Pane mai o Keaniniulaokalani ia Luukia, aole e hiki ia oe ke ike ia Leimakani, ua hoole ka hoailona ia oe, ua ikemaka oe ma ia mea, no ka mea, ua ike oe i na hoike a ka hoailona ia oe, oia hoi, ka ehu kakahiaka ia Lonokaiolohia, o ka ehu awakea a me ke ehu ahiahi ia oe haule o Leimakani ia oe, nolaila, hoi keia i kona mau aupuni no ka wa mau loa, ua poina kona hoomanao ana ia oe no ia kumu, ua olelo oia iloko iho ona me kona mana kumu mai a Kane ma mai o na au, puni hui o ka lewa oia kau kane, nolaila, aole e hiki ia oe ke hele ila ila, oia no na hoike a ka hoailona ia oe. 

            Ua pane mai o Lonokaiolohia imua o kona makuahine, au oiaio na olelo a ke akua nui o kaua, ua keho oe i na aupuni hui o ka lewa, ua haule o Leimakani a lanakila oe, nolaila, e hoopau i kou manao no ia mea, o ko’u manao oiaio, e hilinai oe iluna o ka hoailona mailaila mai kou pono, alaila, hui oe me Leimakani a i ole e noho oe me ka maemae a na ia pono e hoohui ia olua, oia no hoike mai ka nuu mai.

            Ua hiki kakou i ka hopena o na hana no ka onipaa ana o na mahele i haawi ia e Keaniniuiaokalani no ka wa mau loa.

            Akahi.  Ia Kuahailo no ka wa mau loa mai ka nuu mai.

            Alua.  No Hainakolo i ka nuu no ka wa mau loa, aole oia e ike ana i nei mea he kane, no ka mea, ua hoike ka mana o ka nuu iaia no ka wa mau loa.

            No ka mana akua a me ka nuu a Kamahaku, ua lilo ka oihana kiekie ia Leimakani, a ma ia kulana ua nele kona noonoo i ka wahine a me na mea e ae.

            No Lonokaiolohia, ua like kona kulana me kona makuakane ma na ano a pau, aka, ma o kana wahine la ua paa loa ia ma o ko laua akua @ioto.

            A no ka moiwahine o ka papaku ua paa no iaia kona kuleana aupuni a me kona lahui aohe mea e ae.

            A no Luukiaikaihiihikapu ka mana nui, ka mana hiki ole ke kulai ia e na mana e a.  Ua poina loa kou noonoo nui no kau kane elike me mamua.

            A na keia mau mahele i loaa ia oukou, loaa ka mana piha me ke keakea ole ia ia oukou.

            Mai lo aku o ka papaku a maluna aku o ka lewa, oia kuu wahi e noho mana ai me kuu keakea ole ia mai no kuu hoomaha ana aole na ulia o ka poino maluna o oukou a me a’u he maikai a maluhia.

            Pane mai o Kuahailo, ua maikai keia mau hoonoho ana, a ke akua nui o kakou no na oihana i loaa ia kakou.  O ka wa hea la ka wa e hui hou ai kakou.

            O ka pane i loaa mai, aia i ka nuu e hui ai kakou.

            Ua hiki mai la kakou i ka hopena o ka moolelo o Hainakolo, nolaila, elua no mahele i maopopo ma keia moolelo.

            Akahi.  O ka haule ana o ka nani o Kuaihelani iaia, o kona haule ana i na hoopai weliweli a Kane ma me kana keiki iloko o ke kai a pakele ma ka apua, elike me na hoike ma keia moolelo nona.  A pela no hoi ma ka aina, haalele i ke keiki i ka mea aloha lilo ke kino i ka ulaia oia ka hoopai hope a Kane ma loaa ke keiki ia Kaholoholokai a me Kaholoholouka lilo i hanai na laua ma ke kaueha a Luukia e hanai a nui a e lilo ua keiki ala i muki paka a paa ipukuha elike me na olelo a Luukia.

            Alua.  O ka loaa ana o na pomaikai iaia a me kana keiki ma keia hoomanawanui a me Luukia a me kana keiki, aole he mea o lakou i hoonele ia ma keia mea.

            Ua ike ia ma keia papa hoonohonoho a Keaniniulaokalani no na mea e pili ana ia Hainakolo, aole oia e ike hou ana i ke kane no ka wa mau loa, a pela o Luukia no Leimakani, ua nele oe no ka wa mau loa, no ka mea, aole i poina kana mau hana no Lonokaiolohia a me kana mau hana mamua aku.  Nolaila, ma na oihana pili akua, ua hoopaa ia lak u ma na ano a pau.

            A no Leimakani a me Lonokaiolohia ina e noho like mai ia no lakou he keikuaana a me na piku elua.

            A me keia kulana oia i hooi ai i ka nana o kana keiki a me kan@ moopuna, ua like lakou ma na ano a pau a ma keia kulana ua ano e ka noonoo o Lonokaiolohia no ka moiwahine, a ua pane mai oia imua o Keaniniulaokalani, aohe oluolu o ka hoohalike ana mai me kona.

            Pane ka leo iaia, aohe nani hou ae maluna o laua ua paa elike me a’u.

--

HOEA KA HOOILINA ALII O ENELANI I MALTA.

--

            Malta, Mar. 25.  O ka mokuahi Ophir e lawe ana i ke Duke a me ke Duke Wahine o Cornwall a me York ma ko laua ala hele kaapuni honua, ua hoea mai la i keia keia awa i keia kakahiaka.  O na moukaua maloko o ke awa ua hoowehiwehi ia lakou me na hae a me na kanaka maluna o ua kia a me ka oneki.  O ka hoea ana mai o ka Ophir ua hoike mua ia mai ia i ka wa o ka Ophir he 18 mile ka mamao ma o na kipu aloha i haawi ia aku e na mokukana topido i holo aku no ka halawai ana me ia.  A i ka wa o ka moku e hookomo mai ana i ke awa ua haawi ia aku la na kukai pu aloha ana nona mai St. Angelo, na kiekiena, na papu a me na mokukaua aku.

            Mahope o ka hoea ana aku o na luna aupuni ua lele mai la ka Duke a me ke Duke Wahine a holo aku la no Ports Reale a mailaila aku no ka halealii.  Ua hoohiwahiwa ia na alanui me na hae a me na kahakahana o na waihooluu like ole me ka hoopiha pu ia hoi o na alanui me na kanaka e haawi ana i na leo huro no na alii opio.  Mai ka uwapo a ka halealii ua kukulu ia na pi’o ihoohiluhilu ia me na pua.  A o na alanui hoi a na moi i hele aku ai ua laina ia me na koa a me na luina o na mokukaua.

--

I keia La Pule ka pule Pakoa.

KUAHAUA ILINA KUPAPAU O KALAEPOHAKU

--

            Ke hai ia aku nei ka lohe i na mea a pau, he kuleana kanu kupapau ko lakou ma ka ilina o Kalaepohaku, Honolulu.  Ua makemake ia oukou e akoakoa ae ma ua ilina kunapau ala ke hiki aku ma ka Poakolu, Aperila 3, 1901, ma ka hora 9 a.m. oia ia, a e lawe pu ae me na mea hana no ka hoomaemae a oki ana hoi i na laau Mikinolia e ulu ana maloko o ua ilina aia.  A ma ia la no hoi e hoike mai ai kela a me keia i ka o kana kupapau e waiho la ma ua ilina aia, oiai, ua inoa hookohu pono ia mai au e ka Agena o ka Papa Ola o Honolulu nei i Luna Nui nana e malama i ua ilina la, aia a loaa aku ka palapala ae mai a’u aku alaila, ae mai ka Papa Ola e kanu ia ke kino kupapau ma ka Ilina Kupapau o Kalaepohaku, Honolulu.  Nolaila, o ka poe e hoolohe a hooko ole elike me keia hoolaha, e hoopau loa ia aku ana kona kuleana e kane i kana kupapau ma ka Ilina Kupapau o Kalaepohaku, Honolulu.

            E mana keia hoolaha ana mai keia hoolaha ana mai keia ia aku no ka wa mau loa.

            Owau no me ka oiaio.

                                    JOSHUA KEAU.

            Luna Nui Malama Ilina Kupapau o Kalaepohaku, Honolulu.

 

W. & M. Ltd.

 

Kuai Hoemi Nui No Ka La Pakoa.

 

 

            Eia makou ke malama nei he kuai hoemi nui o ko makou mau Waiwai like ole o na ano a pau.  He uuku ko makou halekuai ma ka nana ana, aka, ua piha nae me na waiwai like ole

Na Hainaka

            E loaa no na Hainake nani mai ka 5 keneta, 10 keneta, 25 keneta a ka $1.75 o ka mea hookahi.

Na Lei A-1

            O na waihooluu a pau me na paikini hou loa a kohu popo ai na ke ka hiko ana i ka La Pakoa.  Mai ke 25 keneta, 75 kenet, $1.50, $2.00, $3.00.

Na Mikilima Nani

            He nui a lehulehu wa e na Mikilima Sihka mai ke 45 keneta, 75 keneta, $1.00, $1.25 a me $1.50.

Na Kahi O Nani

            Eia me makou he heluna nui o na Kahi O nani o na lauoho, mai ka 15 keneta a pii aku.  E hele koke mai o pau e @urei keia mau waiwai.

WHITNEY & MARSH,

I KAUPALENAIA.

1045 Alanui Papu