Ke Aloha Aina, Volume VII, Number 17, 27 April 1901 — Page 6

KE ALOHA AINA

POAONO,  APERILA 27, 1901.

--------

Nuhou Kuwaho.

-------

NA LONO NO KA PAA PIO ANA O EENERALA FRENCH.

     Ladana, Apr. 15,  Ua olelo ia ae ua loaa mai nei he telegarapa malu ianei e hoike mai ana no ka hopu pio ia ana o Kenerala French me 500 koa Beritania e na Boa, oiai, lakou e paa ia ana e ka ohu maluna o na puu.  Aole he mau hooiaio i loaa mai no keia hoike.

     Aole i loaa mai keia mau hoike i ke Keena Kaua o ka hopu pio ia ana o Kenerala French, a ua manao ia aole he oiaio o keia mau hoike.

     HE HAKAKA WELIWELI.

     Kikako, Apr. 13.  Ma kekahi hakaka i malama ia mawaena o na papa a'o hou a me na poe kahiko o ke Kula A'o Kauka Northwestern ma kela Poaha aku nei, ua lalau aku la kekahi o na haumana i kekahi kino make e waiho ana iluna o ke pakaukau o ke kumu, a paki aku la maluna o na poe hakaka, a ua hoomauia ka pakiia ana o keia kino make iwaena o lakou a hiki i ka pau ana o ka hakaka.  He nui na poe i oili mai i komo pu i keia hakaka me na lole i weluwelu a me na palapu maluna o ko lakou mau kino.  O Peter Mathin ka mea malama hale ma kona hoao ana e hoopau i keia haunaele, ua haki kekahi o kona mau iwi aoao a ua manaoia e make ana oia.  E imi pono ia aku ana ke kumu o keia uluaoa i hiki mai ai.

HE WAHINE KA MEA NANA E RULA I KEKAHI TAONA.

     Wichita, Kas.  Apr. 14.  E haawi ia aku ana he manawa no Mrs. Carrie Nation e hoomalu ai i kekahi taona e like me kana i manao ai he pono.  O na luna aupuni o Medicine Lodge, Kansas, ua hoolala ae la lakou no ka haawi ana aku i ke taona ia Mrs. Nation , ka wahine kue loa i ka waiona, no hookahi pule ana e lawelawe ai i kana mau hana maluna o ke taona e hoomaka ana mai Mei 1 aku.  Ina e holopono e hoomauia kana hookele ana, a ina aole, e hoopau ia kana mau lawelawe hana ana a e kipakuia mai ke taona aku.;

     Ua hoopuka ae o Mrs. Nation i kana mau hoolala e holomua ai ke taona ma ke ala maikai.  O kana hana mua loa oia no ka hoopau loa ana i na hale inu rama, na keena kuai paka a me na wahi piliwaiwai.  E kipaku no au i na makai a pau.  A koho iho i meia me ekolu kanaka no ka aha kuka a e hoonoho ia lakou i kakauolelo kulanakauhale, puuku kulanakaahale me ka luna malama ola.  E malama no au i na alanui me ka maemae e hiki ai i na opio ke

paa@ me ka haule ole aku i na hoowalewale o na alanui.  E koi ikaika no au i na mea a pau e kokua i kekahi poe pilikia, a e hoopau hoi i ka noho hoopili wale ana o kekahi malalo o hai.  E kauoha no au i ka bana e paani ma na alanui i na po a pau, no ka hoohauoli ana i na kanaka mahope o ka hoomaha ana o ka lakou hana.  E hookau no au i na hoopai koikoi i na poe hoopunipuni, a ina he luna aupuni ke hana ana ia hana e kipaku ia no oia mai ke taona aku me ka hakalia ole.  E kauoha no au i na mea a pau e hoi e moe ahiahi.  O na luna nui o ke taona oia no na poe e ola ana ma ka hou o ko lakou mau lae.

     Kansas City, Mo. Apr. 15.  Ua hopu ia iho la o Mrs. Carrie Nation i keia po maloko o keia kulanakauhale no ke keakea i ke alanui, ua lawe ia aku oia no ka halewai ma ke kaa makai, a ua hookuu ia mai malalo o ka bona o $6, e hoolohe ia ana kona hihia i ka ia apopo.

--------

MAKE I KA POLOLI.

-------

      Los Angeles, Apr. 13.  Eia ke waiho nei maluna o na pakaukau o ka hale hana kupapau o keia kulanakauhale he elua mau Porto Rico, i make i ka pololi maluna o ke kaaahi i hoea mai la i Los Angeles, a malaila e hookau ia aku ai maluna o ka moku no na paemoku Hawaii.

     Ua manaoia e lawe pupuahulu aku i keia kaaahi i piha me na limahana maloko aku o ke kulanakauhale nei i ka wa o na poe o keia wahi e hiamoe ana, a hookau aku ia lakou maluna o ka Zealandia e kali mai ana ma Port Los Angeles, a i kona kamaaina puoho ana ae i ke kakahiaka aia na malihini ke au la i ke kai.

     He pule ae nei i hala o keia kaaahi e huki ana he 25 kaa, he 10 oia i hookaawale ia no na ka uka, ukana a me kuke, a o ke koena iho no na limahana Porto Rico he 950, i haalele aku ai oia ia Nu Olina.

     Ma ka hora 10 o ka po nei ua hoea mai la @e kaaahi a ku iho la mawaho o Los Angeles nei a malaila oia i kali ai a hiki i ke aumoe ana a komo mai la iloko o ke kulanakauhale.

     A i ka wa no a ke kaaahi e hoomaka ana i ke nee ana aku no Port Los Angeles na lele ae la ke aho o Angeles Manuel Ruiz, nona na makahiki he 9, a me Roman Caballers he 23 makahiki, ua lawe ia aku keia mau kino make no loko o ke kaa ukana.  Aka, aole nae i hoohakalia iho ua kaaahi la a hiki i ka hoea ana i ke kai. 

     Ua noi aku ka makuahine o ke keiki i make e ae ia mai oia e ike hope aku i na helehelena o kana mea aloha mamua o ko laua hookaawale  ia ana no ka wa mau loa, aka, ua hoole loa ia mai keia noi, oiai, aole he manawa no ka hoapaapa ana iho.  A i ka wa o ke Zealandia e hoohemo ana no ka moana kai lipolipo aia ka makuahine o Manuel Riuz, ke ku mai la maluna o ka oneki o ka moku me kona mau waimaka e hiolo ana, a o kona mau onohi maka hoi aia ia ke kau la maluna o ke kaa ukana kahi a ke kino puanuanu o kana keiki e waiho oni ole ana.

     Mahope o ke kaawale loa ana aku o ke Zealandia ua hoike ia hoike ia aku ka lohe ia Luna Koronero Holland no kaia mau kino make.  Ua waiho aku o Kauka J. E. Jennings i kana palapala hoike ia Luna Koronero Strubel i ke kumu o ka make ana o keia mau Porto Rico mamuli o ka nawaliwali o ko laua koko a me ka nui ole o ka mea i ai ai.   O ko Kauka Holland manao no nae he pololi ke kumu o ko laua make ana.  No ka mea i ka nana ia ana iho o ko laua mau kino wiwi, ua ahuwale na iwi aoao a i ahona i ka paa i ka ili.

 --------

HALE O NA LUNAMAKAAINANA.

--------

     Ma ka noho ana o ka Hale o na Lunamakaainana ma ka Poaono nei, na lawe ia mai la ka bila okana aina e heluhelu ekolu ia maloko oia hale.  Ua nui no na mea i kamailio ia no keia bila.

     O ka bila no ka hookaawale ana i haawina dala no ka hoouna i na mea hoikeike o na kula i ke kahua hoikeike o Buffalo, Nu Ioka, i wahi hoi e hoike aku ai he lahui naauao keia, ua apono ia ma ka heluhelu ekolu ana.

     Hapaiia ka noonoo ana i ka bila e pili ana i na kauka i laikini ia, no ka haawi ana i uku paa no lakou i ka wa ma'i ahulau o $100 o ka mahina.  Nui no na mea i kamailio ia maluna o keia bila.

     Bila 65, holo ma ka heluhelu ekolu ana.

     Ua lawe pu ia maloko o laila ka hoike ua kakauinoa mai la ke Kiaaina i ka bila 4, e pili ana i ke kuleana ole o kekahi mea okoa aku e kau i na hoohanohano (medala) o ka G.A.R., koe wale no na poe a ke aupuni o Amerika Huipuia i haawi maoli ai.

 --------

     Ma ka noho ana o ka Hale o na Lunamakaainana ma ka Poakahi nei, ua hapai ia mai la ka noonoo ana i ka bila 83 a ke Senate, e pili ana i ka auhau ia ana o tela lole.  Ua kue mai o Bekele i keia manao a me ke koho ana ua lilo ka hapanui ma ka aoap pepehi i keia bila.

     Na Aylette he olelo hooholo i $4,500 no ka hoomaemae ana i na aianui o Honolulu nei.

     Ua ku mai o Haaheo e noi i ka hoike a ke Komite Ma'i Lepera, oiai, loihi ka lohe ole ia aua o ka lakou hoike.  Pane mai o Bekele, ka Lunahoomalu o keia komite e loaa koke aku ana no ia.

     Maanei i lilo ai ka Hale i ka noonoo ana i ke koho ana i na Senatoa eha makahiki.

     Noho hou ka Hale i ka auina la.

     Na Penikalaka he noi no kahooloihi ana i ke alanui Pauahi mai ke alanui Papu aku a hiki i ke alanui Uniona.

     Nui mai o Ahulii e hoololi ia na pauku 917, 920 a me 922-925 o ke kanawai o 1897, e pili ana i ke o, a e hookapu ana hoi i ka Papa Ola i ka hana i mau rula a me na kanawai no ke o ana i naopio.

     Na Kumalae i hoao e hapai mai i ka bila 14, aka, mamuli nae o kekahi mau hoopaapaa ana ua waiho ia aku la ma ka Papa.

     Bila 111, e pili ana no ke kokua ana ia Antone Serrao i puhi ia ka waiwai i ke ahi e ka Papa Ola, waiho ia i ke komite.

     Bila 112, e pili ana i na kanawai i hookau ia aku maluna o na kaa i ka 1898 ua hoopau ia.

     Bila 114, e pili ana i ke koi a na poe i hoopaahao ia i ka 1895, waiho ia i ke komite.

     Bila 95, e kukulu ia ona kaa uwila ma Hilo, holo ma ka heluhelu elua ana.

     Bila 99 a me 100 e pili ana no na paahana a me ewalu hora hana, holo ma ka heluhelu elua ana.

     Ma ka noho ana o ka Hale ia po, o ka mea ano nui wale no i noonoo ia oia ka hoonoa ana i ka piliwaiwai, he nui ka poe i hoike ae i ko lakou mau manao like ole no keia bila, a ma ke koho ana he 15 kue a me 6 kakoo.

     O ka la hana 51 ia, o ke kulana o na hana oia la he 116 bila i lawe ia mai e noonoo a he 25 bila i lawe ia aku i ke Kiaaina.

--------

(E nana ma ka Aoao 8.)

--------

     Ua hoea mai la ka moku lawekoa Logan mai Kapalakiko mai me na koa hou no Manila.

---------

KUAHAUA ILINA KUPAPAU O KALAEPOHAKU.

---------

     E ike mai na mea a pau, he kuleana pakahi ko lakou ma ka Pa Ilina Kupapau o Kalaepohaku, Honolulu, Oahu.  Ke hoikeia aku nei ma ke akea, o ka olelo hoolaha a J. K. Maunakea i hoopuka ia ma ka Nupepa KE ALOHA AINA, o Aperila 20, 1901, no na mea pili ana i ka Pa Ilina Kupapau o Kalaepohaku.  Ke kue a ke hoole loa aku nei au, aole kuleana o J. K. Maunakea e noho i Luna no ua pa kupapau la.  Owau wale no ka mea kuleana i hookohu pono ia mai e ka Papa Ola, a ke mau nei ia mana o'u a hiki i keia la.

              Owau no me ka oiaio,

                          IOSUA KEAU,

Kunawai, Honolulu, Apr. 22, 1901.