Ke Aloha Aina, Volume VII, Number 19, 11 May 1901 — Page 7

KE ALOHA AINA

 

MOOLELO HOONI PUUWAI

NO

Kuu Aloha i na Pua, Kuu Ipo o na Launahele!

 

Ka Makaikiu Kupaianaha!

 

MOKUNA VI.

IMI AU I KO ALOHA I PARISA, AOLE LOAA-- HALA KA PUULENA AU I KE KAI.

            O ke aloha lululima ka panai hope mawaena o ka makaikiu a me ke kahuna pule, ma na kalokalo ana na ke Akua e hoopomaikai mai i ko ka makaikiu nei a huli hoi pololei no kona home i Enelani no ka hookuu ana iaia iho iloko o ka hoomaha a me ka haawi ana i na noonoo i ke ala e hiki ai iaia ke loaa o Silevia. He elua la o ka noho paa ana o na makaikiu nei ma kona home, alaila, puka ae la kana olelo hooholo, aia ua ui Silevia nei iloko o Ladana, a malalo o ka aahu hua iaia iho, a mamua iho o ke alo o ua makaikiu nei e waiko ae ana ke kii kaha o ke kulanakauhale kaulana o Ladana, wahi a ua makaikaikiu nei ma ka hope o kana olelo.

            O oe keia e Ladana, ka mea i olelo ia aole loa e napoo kou la, alaila, iloko auanei @ @@ malamalama o kou la e huli ai au i keia mau mea pohihi elua, ke kino o Ailika Lema a me ke kino o Silevia, a na ke Akua e kokua mai ia'u.

MOKUNA VII.

HANU KE KIU MA KA MEHEU.--KE KUPAIANAHA O NA KUPAIANAHA.

            O ka loaa ole ana o kekahi lono e pili ana i ko ka ui Silevia wahi i nalowale honua ai me kana kamaiki bebe, oia ka mea nana i hookaumaha a hooehaeha maoli mai i ka naauo ka makaikiu opio nei i hoopuka ae ai i keia mau olelo: Luji hewa ka imi ana o ke aloha ua hala koolau i ke one apilipili, aka, e hookolo aku ana au mahope o kou meheu a hiki i kou loaa ana:

            O keia na olelo a ua kanaka opio makaikiu ala, alaila, ku ae la ia maluna o kona mau kapuai a haai i ke aloha no kona luaui, a haalele aku la iaia (makuahine) a me ko laua home no ka hele ana i ka loa a me ka laula o Ladana, no ka hanu a hookolo ana mahope o ka meheu o mrs. Silevia Lema, ka lede opio hoi ana (Beleinehama) i haawi aku ai i kana olelo paa o ka hoohiki e kan ana oia mahope o Ailika Lema kana kane a hiki i ka wa ana e hoihoi hou mai ai imua o kona (Silevia) alo i ua kane a kanaka kumakaia nei a haalele wahine.

            Ae, e a mea heluhelu, eia ka makaikiu opio Beleinehama ko kanu nei ma ka meheu o Silevia a me kana bebe kamaiki i nalowale, aka, a hala ae ia nae na pule loihi eha, aole loa i hoopomaikai ia mai kana huakai.

            Iloko o ia nele a me ka luhi, aole i paupauaho a uiha ua makaikiu opio ala, ua maalo ae oia a maalo hou ae no eka a elima manawa iloko o keia kulanakauhale pookela o Ladana me ka manaolana e halawai mai aa oia me kana mea e huli nei eia nae he neo ka mea i loaa mai, a oia hoi ka ua makaikiu nei i kamailio ae ai.

            O ke kupaianaha keia o na kupaianaha a pau a'u i ike ai ma ka'u mau hihia i lawelawe ai a hooko, aole loa mai kinohi mai o ko'u hooko a lawelawe oihana makaikiu ana o keia wahi hihia ano ole, ua hoohaahaa maopopo mai nae hoi ia ia'u heaha la hoi, elike me kona kupaianaha no i ka hanau ia ana mai iloko o keia ai, pela no hoi auanei o kupaianaha ai kona mea imi pohihihi. O! Sua!! E hana aku ana au i na hana kupaianaha loa i kana a i lawelawe ole ia e ke akamai a me ka ike o ka oihana malama maluhia o Ladana nei. Nolaila, i mea e ike mai ai ko ke ao nei i ka'u mau hana kupaianaha eia mai ua hana ala.

            Alaila, i ka wa i hiki mai ai na olelo a ka makikiu i ka hope, wehe ae la ia mailoko ae o ka pakeke o kona kuka he umiumi kui loihi a me kekahi maka aniani nui, a me ia mau mea kai ae la ia maluna o kona mau helehelena, a ia minute koke no ua kahuli ae la ia mai ke kulana opio a i ke kanaka aoo o kanaha makahiki.

            Ma kona mau lima e paa ana oia he apana papa manoanoa me he buke ala ke ana, a mailoko mai o laila e puke mai ana mai na lehelehe mai o ua makaikiu kupaianaha nei na halelu a Davida e olelo ana penei:

Auwe! Aia hoi ka nani a me ka oluolu,

O ka noho lokahi ana o na hoahanau,

Like no ia me na hau o Heremona,

E iho mai ana mai na kuahiwi mai o Ziona.

            Mai keia mau halelu ae ua pahee aku la oia i na mele a Solomona e kahea ana i na Kerubima a me na Serabima, aole e hoala a hoonioni wake aku i ka hiamoe ana o kana mea i aloha ai. No ka mea, he aloha ia na'u i ka wehi o na pua, a he ipo hoi i ka launahele.

            Oiai, ka makaikiu hana kupaianaha o ka aka e paahana ana ma keia ano apana hana, aia na pipa alanui o Ladana ua hoopiha ia me na makaikai, e ake ana e ike a e lohe i na olelo a keia kanaka hupaianaha, a ua hoopiha ia ko lakou puuwai me ka hauoli no kana mau hana, ua haawi ia aku na lulu kokua ana no kona pomaikai, aka, aole oia (makaikiu) i lawe aku, o kana olelo wale no i pane mai ai: O keia ao a me kela ao, aohe maha ana no'e.

            Iloko o keia lehulehi a piha kanaka, aole loa he hookahi mea i i alawai mai me ka ike a ua makaikiu ala o ka uai Silevia nei i ka maalo ana ae maluna o kekahi kaa nane me kekahi lede hanohano o noho pu ana ma kona aoao, a nalo aku la no hoi me ka hikiwawe ma kela kihi alanui mao.

            Baigudenesi! O Silevia anei keia? Ke ole e whahee mai ka ike a ko'u mau maka ia'u oia maoli no kela, wahi a ua Beleinehama no iaia iho, alaila, huli awiwi ae la ia maluna o kona mau kapuai a hookolo ma ke alanui a kela kaai kapalulu aku la iloko o ka poahi.

            I ka makaikiu i kaawale a mamao loa aku ai mai ke aluka aku o na kanaka, ua wehe awiwi ae la ia i kona umiumi kui me kona maka aniani, aia hoi, i aminute a me ia sekona, o Heneri Beleinahama no ia ka mkaikiu opio kupaianaha, ua hoomau aku oia ma kona alahele imua, e hookolo ana hoi mahope o ka meheu o kela kaa, a hiki i na hora o ka liula i hoike mai ai, e hoi ke kini o lalo ua ahiahi, a laila, hoohuli ae la na kapuai o ua kiu nei no ka home, no ka mea, ua ikaika mai la na au ua ike aku la i na maka o ka luhi o na hooluhi.

            Ae, he ikaika na wawae, a he hauoli hoi na helehelena ka mea i loaa mai i ua makaikiu nei, a hoomakai ae la oia i na lani no kana mau kokua i haawi mai ai maluna ona, a ma ka olelo pokole ana ae, aia ua makaikiu Beleinehama opio nei e noho ana imua o ke alo o kona mama e kaao ana i ka moolelo o kana huakai a me kona ike ana ia Silevia, aka, koe aku nae ko laua halawai ana he alo a he alo.

            O na huaolelo mahalo o ka hoomaikai me na leo pule noi i ke Akua e haawai ia mai na hoopomaikai ana ia maluna o kana keiki, oia ka ua Beleinehama wahine ala i hookau mai ai maluna o kana opio, a ma ke kakahiaka o ka la apopo, aia oia ua haalele aku i ko laua home me kona mama aloha, a ke maalo hoi nei iloko o Ladana.

            Ma kela alanui mua no ana i hahai ai mahope o ka meheu o ke kaa ma ka la inehinei, ma ia alanui no oia i lawe hou ae ai ma keia kakahiaka, a hoomau i kona ala hanuu ke kiu ma ka meheu.

            O ke kupaianaha o na na kupainaha oia no ke kahuli anoe ana ae o ua makaikiu nei mai kona kulana opio a i ka hapanea o ka alua, he aahu kona e kahiko ana i hiki ke olelo ia me ka hoopaapaa ole he aahu ia i hele a me he ia aole loa ia i holoi kopa ia mai kona la i aahu a komo ia, a ma kona poo e kau ana he wahi papale biva i piha me ka puka makani, ma kona lima e paa ana ia he kookoo laauu alani, a ke nana aku i na makal@iu nei,

            Nani ia no ka n@ne,

            Ka maluki imua kulana @op@

            O keia alahele a ka makaikiu Beleinehama e kau koe nei, he alahele ia i maopopo ole me ka hiki ole e koho pololei aku aia i ka hale mea o Silevia kahi i noho ai, oiai ma kela a me keia aoao o kela ala nui, he lehulehu wale na @ale nani e ku ana me ko lakou kilakila iloko o ka hie a me ka ui. Nolaila, Ku iho la ua makaikiu nei a noonoo no kana mea e hana ai, a i ka hope lea hooholo iho la ia e ku kiai oia ma ia wahi a hiki i kon wa e ike aku ai ia Silevia ina oia e hele hou mai ana i ka holo kaa.

            He aneane e hookahi hora keia kali ana o ua makaikiu ala, aia hoi, ua hoopomaikai ia mai la kana mai kuko ana, no ka mea, ia sekona aia o Silevia a me kona kokoolua ua maaia ae la me ka hikiwawe a nalo aku la ma kekahi aoao o ke kihi alanui, ua hoao aku na makaikiu nei e alualu mahope o ke k@@ e lawe ala i ka ui Silevia a me kona kokoolua, aka, noonoo hou ae la ia he mea makehewa wale no ia, a he mau hana hupo hoi ia o ka hehena o ke alualu ana aku o kekahi kino kanaka mahope o kela kaa e puahia ala ka holo i ka lawe a niniu poahi na huila.

            Nolaila, hooholo hou iho la ua makakiu nei e aho no ia e kali pela, a malia o huli hoi hou mai na kaa ala ma ia wahi hookahi, alaila, ia wa oia e hahai aku ai a hiki i ka loaa ana iaia, a he mea oiaio, aole paha i piha ka hapalua hora, ua hoea hou mai la ua kaa nei a kaalo ae la ma ko Beleinehama aoao me ka puahi, me ka alaea a nana ole ia iho o keia wahi elemakule.

            Elike me ka puahi o ka lawe ana o ka huila kaa i ka mama holo imua o kona mau epaepa, pela no hoi ka eleu me ka mama o na wawae o Beleinehama i alualu aku ai, a i ko Silevia ma kaa no hoi a komo iloko o ka puka pa, ku ana no hoi ua Beleinehama nei mawaho, a me ke kali a hookaulua hou ole iho, aia ua makaikiu nei ua komo aku la no loko o ka pa a pii iuna o ka lanai a hookani i ka hele no ka hoike ana aku i ko ka hale poe aia he malihini mawaho.

            Emoole, e ku ana imua o ka makaikiu ka lede kauwa no ka hooko ana i ka hanohano o kela hele kahea a o ka huaolelo mua o ka hoolauna a na wahine kauwa nei i pane mai ai me ke oolea: Heaha kou makemake, a owai kau e ake nei e ike?

            O ka lede nona keia kii, oia ka'u i makemake ai, eia anei oia maloko nei o keia hale? wahi a ka makaikiu me ka hoike ana aku i ke kii o Silevia imua o ka lede kauwa:

                        Aole i pau.

           

            E malama ia ana he hoike kula sabati hui ma Hilo, ma ka mahina ae nei o Iune, a ua manao ia he 600 mau haumana kula sebati mai no apana like ole mal@ akoa ko @e ana malaila.