Ke Aloha Aina, Volume VII, Number 20, 18 May 1901 — Page 8

KE ALOHA AINA

 

  8        @E   ALOHA  AINA,   POAONO,   MEI   18,  1901,

HE  KAAO  KAILI  PUUWAI

---:NO  KA:--

UI  MINEWA

---:A  ME  NA:---

Kaikunane  Eiwa

 

I Hooliloia i mau Manu Nene Ahiu

a i ole na keiki i Hoehaehaia

 

Kakau@a no KE ALOHA AINA>

 

  Aole i haupu ae ua mau kiai nei o ko lakou mau enemi no keia iloko o ka @ahu hunahuna, aka, ua wanaoio mai la no lakou o kekahi no keia o ko lakou mau alakai me kona ukali. A pii ae la ko lakou mau lima iluna o ko lakou mau lae me ka hoawi ana mai i na kunou aloha ana.

  Aole i hoonele aku ka moi aoo i kona aloha no na kiai, aka, me na helehelena hauoli e pahola ana maluna ona, ua pii ae la kona lima ma kona lae a hookuu iho la, e hoike aku ana ke panai aku nei au i ko'u aloha no oukou.

  O keia mau manao kuhihewa no o na kiai mua, pela no na kiai he lehulehu wale iloko aku ma ko laua alahele, a iloko hoi o na minute alahele, a iloko hoi o na minute pokole wale no, aia hoi, ua hoea aku la ua moi nei no ka rumi paahao, kahi a kana aliiwahine e noho pio ana.

  A mamua o ke alo o na kiai i ku iho ai oia a me ka leo nui kuoo elike hoi me ke kulana alakai ana o aahu ana, na pane aku la oia imua o lakou me ka maalea nui.

  Malalo o ke kauoha hope i loaa mai ia'u mai ko kakou mau haku opio mai, ke kauoha ia aku nei oukou e hoopau i ko oukou ku kiai ana, a e hoi aku e hooluolu i ko oukou mau lihilihi me ka waiho ana mai i ka kakou pio malalo o ko maua malu a hiki i ka oili ana mai o ka la ma ke kakahiaka la apopo.

  Nolaila, ma ia leo kauoha i haaia mai ia'u, ke noi aku nei au ia oukou e haawi mai i ke ki o ka rumi paahao mamuo o ko oukou haalele ana ino i keia wahi. A e hoike pu mai hoi oukou heana na kauoha paa i haawi ia ia oukou i kulike ai ka kakou kiai ana me ka paewaewa ole, a lilo hoi kakou i mea inaina ia mai e ko kakou mau haku opio.

  Aole i kue mai na kiai, aka, o ko lakou makemake ia o ka hoi aku e hooluolu i ko lakou mau lihilihi a me ka hoohakalia ole iho pane mai la ke alii o ua mau kiai la.

  Elike me ke kauoha a ko kakou mau haku opio, e hookuu ana ia makou mai ka noho kiai ana maluna o ka kakou pio, ke hooko nei makou. Eia ka huihui ki o ka rumi paahao kahi o ka kakou pio e paa nei. A o ke kiai paa i haawi ia mai ia makou, oia no ke kue loa ana aku i na mea a pau e hoao ana e komo aku iloko o ka rumi paahau A maluna ae o ua mea a pau oia no ka moi aoo o keia kakeia e hunakele loa ia kahi i hoopaa ia ai kana aliiwahine mai iaia aku, no ka mea, ua hopohopo ko kakou mau haku opio o lawe oia i kona ola, ma o kona aloha pupule i kana aliiwahine puuwai uahoa, a i ole, hooomahuka paha iaia mailoko aku nei o ka hale paahao. Nolaila, oia hookahi ka olua e kiai paa loa ai, a mai ae i kana mau pelo ana a pau o poino auanei ko olua m@a ola.

  Ua pono loa kou hoike ana mai la i na kauoha paa a ko kakou mau haku opia, a he manaolana ko maua e hoohoka aku ana mo maua iaia ina oia e hoea mai ana i ko mana wa e noho kiai nei.

  Me keia mau huaolelo hope i lalau aku ai ua moi nei i ka huihui ki o ka rumi paahao a hookomo iho la iloko o kona poli. A ma keia wa pu hoi i haawi ae ai ko lakou mau aloha hope a nalo aku la ua mau kiai nei iloko o ka pouli me na manao hauoli no ka loaa koke ana ia lakou o ka hoomaha:

  A i ka wa i nalo aku ai o ua mau kiai nei, oia no ka wa i haule iho ai na kuli o na moi nei iluna o ka papahele, a me na waimaka o ka hauoli no kona halawai hou aku me kana mea i aloha ai e kiheahea ana maluna o kona mau papalina, haawi ai la oia he mau leo pule pokole i piha me ka walohia.

  A i ka hooki ana ae ua ku ae la oia iluna a me ka leo malie haawi aku la oia i keia kauoha koikoi i kona kiai.

  Ano, ua hoea mai la kaua i ka puka kahi o ka'u mea aloha e auamo nei i na koikoi o kona hoolohe ole ana mai i ka'u mau leo uwalo iaia i kinohi, nolaila, e ku kiai oe ma keia ipuka, a mai ae hoi i kekahi kanaka e komo mai, a o ke  kanaka e hoolohe oie ana i kau kauoha e onou aku i ka maka o kau pahikana iloko o kona puuwai, a no na mea aku i koe au o hooko ai e kali malie iho a hiki i ko'u oili hou ana mai mailoko mai o kela rumi paahao. ua maopopo aku la anei ia oe?

  Ae, ae e kuu kaku, ua maopopo ia'u ka'u hana e lawelawe aku ai, a oia wale no ka'u e hooko aku ai me ke paewaewa ole, a o ke kanaka e kue mai ana ia'u e apahu aku no au i kona kino iloko o na apana elua me ka make o ka'u pahikaua oilua nei.

  A iloko oia manawa i huila ae ai ka pahikaua a ua koa kiai nei i ka lewa e hoike aku ana ua makaukau oia no ke omo ana aku i ke koko o kona enemi.

  Mahope o ka haawi ana aku o ua moi Miro nei i kana kauoha paa i ke koa kiai, ua huli ae la oia a hele aku la no ka puka o ka rumi paahao. A me ka huihui ki ma kekahi lima a me ka ipukukui helepo hoi ma kekahi ao o ua hoea aku la oia imua o ke pani hao paa o ua keena paahao nei.

  Aole oia i hoohakaha wale iho ma ia wahi, aka, ua hookomo aku la oia i ke ki iloko o ka laka, a he nina ana, aia hoi, ua hemo ae la ua pani puka manoanoa nei. Me ka malamalama o ke kukui helepo ana e paa ana, ua hoahuwale aku la ia i na paia puanuanu o ua rumi paa hao nei.

  A he mea e ka menemene o ka puuwai o ua moi nei i kona ike ana aku maluna o na papahele o ua keena la, e moe ana kana aliiwahine me na lima a mena wawae i kupee ia me na kaula hao nunui. A ua piha oloko o ua keena nei me na ea polopolona e hiki pono ole ai i ke kanaka ke hanu maikai.

  He mea oiaio, na keia mau hiohiona walohia ana e ike nei i paila ikaika ae i ke aloha o ka wahine iloko o kona umauma a me ka mama nui i loaa iaia komo aku la ia a kukuli iho la ma ka aoao o kana Anita a me na lima palupalu a me na waimaka hoi e hiolo mai ana mai kona mau lihilihi mai, ua lalau iho la oia i ke poo o kana aloha a hapai ae la iluna, oiai oia e pauhia ana i ka hiamoe, a mahope o ka muki ana iho o ua moi aoo nei i ka papalina nohea o kana Anita, ua lohe ia aku la kona leo ehaeha i ka hooho ana ae.

  E na lani, pela anei ka hopena e loaa ana ia maua he ehaeha a he mainoino. E kuu Anita e ala ae eia au ua hiki mai nei no ka auamo pu ana i na ehaeha E kuu Anita e ala ae, a e mahuka aku kaua no na kuahiwi kahi hoi a'u i manaolana ai iluna o na piko mauna e loaa ai ia kaua ka maha. E ala, e ala, aohe wa no ka hiamoe ana aku, no ka mea, ua ao kaua.

  A me na lima o ka ehaeha lalau iho la oia i ke poo o kana aloha a hooluliluli malie ae la. A na na waimaka e hoohiolo mai ana mai kou mau lihilihi mai i hoopulu iho i ka papalina o Anita a puoho koke ae la oia mailoko ae o kona hiamoe kulipoipo, a i kona ike ana ae i keia kanaka iloko o ka aahu ana i ememi iho loa ai me ka manao ole o kana Miro no keia, ua pane ae la oia me ke okaiakala.

  Owai keia kanaka e hoohalua nei a heaha kou kuleana o ka hoala ana ae nei i ko'u hiamoe. E hookaawale aku ano, no ka mea, aole o'u makemake e ike aku i kekahi o ko'u mau enemi.        Aole i pau.

 

WAAPA  LOAA.

 

  Ua loaa ia'u he Waapa Kao makai iho o ka Uwapo hoomalu. mawaena o ka hora 8 a me 9 o ke kakahiaka Poaono nei, a o ka mea nona keia waapa e kii koke mai iloko o nola he 15, me ka uku pu mai i ka luhi o ko'u malama ana, ma ko'u wahi noho ma kahi kokoke i ka Uwapo Hoomalu. A ina aole e kii ia mai e lilo no ia'u keia waapa.

  Owau iho no,

                    KAUKANE, (w).

  Honolulu, Mei 14, 1901.

 

KEAKA  O KA  ORPHEUM.

 

  O ke keaka i panee ia mai e ka Hui Keaka Elleford ma ka po Poaha nei maloko o ka hale keaka Ofioma he nani a he maemae ia, e hoike ana ike au e nohoalii ana o ka Moi Niro, maluna o ka Emepaea o Roma, ke au hoi a hoopilikia ia ana o na Karirtiano e ka moi a me na kanaka Roma. He nani na kahiko o na poe keaka, e hoike ana i ka aahu oia wa a me na hana hoopilikia i hookau ia aku maluna o na Karistiano, ko lakou hoopaahao ia ana, ko lakou kiola ia ana iloko o ka lua o na holoholona hihiu, a pela aku, malaio o na manao omokoko o ka-Emepera Wahine a me Niro.

  E hoikeike pu ana hoi ia i na kii nani a me ke puhi ia ana o ke kulanakauhale o Roma i ke ahi. He keaka keia i piha me ke aloha a me ka waiohia. E paani hou ia ana keia keaka i keia po ma ka halekeaka Orpheum.

 

  Eia no ka halekuai o L. B. Kerr ke hoomau nei i ke kuai hoopakika i keia pule.

  Ma ke Zealandia e loaa mai ai na hoike a ka Elele Bekele no kana huakai hoopii aku nei ia Dole imua o Makinile.

 

KI  HALEKEAKA  ORPHEUM

 

E wehe hou ia ana ma keia

POAONO,  MEI  18.

. . . .ME KA . . . .

Puali Keaka Elleford Co.

. . . . A ME . . . .

Miss Jessie Norton

      Iloko o ka lakou mau paani lealea nana i hookaulana ia lakou a pu ni o Amerika Huipuia. O ka la kou paani mua oia ke

QUO  VADIS,

Na Uku Kome Mau: 25c, 50c

75c.  Auina la Poaono 15c me 25c

Ua weheia ke Keena Kuai Kikiki i

keia wa.

540--TELEPONA--540

may 13.

 

HOOLAHA HOOKAPU  AINA.

 

   OWAU o Naholowaa (k), ke papa a ke hookapu loa aku nei au, aole e hele wale kekahi kanaka maluna o kuu aina e waiho la ma Waimanalo, Koolaupoko, Oahu i kapa ia o Kamahiili, me ke kuleana ole, a aole pu hoi e lawe i na waiwai maluna o ka aina. O ka mea e hoolohe ole ana a hana i kekahi mau hana e hoopii ia no ma ke kanawai no ke komohewa. Ke hookohu aku nei au ia Kaleikini (k) i hope no'u ma ke kanawai.

     Owau iho no me ka oiaio,

                         NAHOLOWAA,

  Honolulu, Apr. 23, 1901.

 

OLELO  HOOLAHA.

 

  Ke hoike ia aku nei ka lohe i napoe a pau e noho ana mai Hawaii a Kauai, he mau laau Kou, Milo, Kamani, a pela aku, ka lakou e makemake ana e hana i umeke, a i na poe hoi he mau umeke kahiko a nahaha ka lakou, e lawe mai ma ko'u Keena Hana, ma Leleo, Honolulu, a ua hiki ia'u ke hoomaemae aku ia lakou me ka eleu. No ka auhau he Emi Loa, a mai hopohopo.

     Owau no me ka oiaio.

                       JOHN MALKEY,

  Leleo, Honolulu, Apr, 26, 1901.