Ke Aloha Aina, Volume VII, Number 22, 1 June 1901 — Page 4
This text was transcribed by: | Likolani Tackett |
This work is dedicated to: | Awaiaulu |
KE ALOHA AINA
Hookomoia no ka maikai o ka Lehulehu, a he Nupepa na ka Lahui Hawaii.
EDWARD L. LIKE
Lunahooponopono.
HOGAN E. KALUNA
Luna Hoopuka
ALEX. NAWAHI.
Luna Hoohana.
EMMA A. NAWAHI
P@ku o KE ALOHA AINA.
PUKA PULE.
E hoopuka ia ana ma na kakahiaka
Poaono a pau.
No ka Makahiki $2.00
No ka Eono Mahina 1.00
No ke Kope Hookahi .50
KEENA HANA.
Ma alanui Moi, Leleo, Helu 37 0,
Kokoke ma ke H ale Hoolulu kaaahi.
Pahu Leta 513
HONOLULU IUNE. 1, 1901
E HOOPAU IA O HUMEPERA.
He palapala noi kai lawe hele ia ae imua o na loio o ke kulanakauhale nei ma ka Poalua nei no ke kakauinoa ana. O ka manao o keia palapala e noi aku ana ia Peresidena Makinile o Amerika Huipuia e hoopau mai ia Lunakanawai Kaapuni Ekahi Homepera mai kona kulana lunakanawai e paa nei. O ke kumu nui o keia kue o na loio ia Humepera mamuli no ia o na hana kaulike ole a ka lunakanawai ma ka aha kiure kiekie, ke hihia hoike wahahee o Smith a me na hihia hoowahawaha aha. Ma kahi he 30 mau loio i kakauinoa aku malalo o keia palapala.
O CAYPLESS KA LUNAKANAWAI EKOLU A NA REPUBALIKA
Ma ka halawai ana iho nei a na Repubalika, ua hooholo iho @a lakou e koho aku ia Edgar Caypless, ke Kakauolelo o ke Senate i keia wa, i Lunakanawai Ekolu no ka Aha Kaapuni Ekahi.
O keia ke kulana i koe e waiho hakahaka nei, a oiai, he kanaka kakoo no oia i ka Repubalika he ike kanawai, a he manao kuokoa, he manaoio ko lakou ua kupono loa keia wahi e haawi ia aku iaia. O Caypless he hoaloha pu oia no na Kuokoa Home Rula a ua lohe mai makou ua hala mua aku ka lakou noi ia Makinile no ka lawe ana o keia haole ia kulana. Nolaila, ma o ka nui o na kakoo o Caypless ua mano ia e loaa ana no keia kulana iaia.
HOOPANEE HOU KA HALE O LALO.
Ma ke awakea Poalua nei i hoopanee hou ai ka Hale o na Lunamakainana no ekolu la no ka hookuu ana i na hoa e hoomaha a ma ka lakou mau hana komite, a ma ka hora 10 o keia kakahiaka Poaono, e noho hou ai ua Hale la. Ma keia la i hoea aku ai no la hana o ka H ale o na Lunamakaainana i ka 16, aka, o ka mea kupaianaha no i ike ia aole he mau haawina i hooholo ia, a eia no ke apa noi mai nei a o ka pau aku no koe o keia kau me ka hana ole i hooholo ia. Aka, malia nae paha aia a kokoke loa e hookuu keia Kau Ahaolelo Kuikawa, alaila, hoonee pupuahulu na hana imua.
HOEA O PERESIDENA MAKINILE I KAPALAKIKO
Kapalakiko, Mei 12. O ka o@a koke ana o Mrs, Makinile i ka ma’i ua hoololi ae ia i ka papa kuhikuhi o ka huakai a Peresidena Makinile. Ua hoea mai laua i anei i keia auina la he mau hora lehulehu mamua ae o ko laua wa i upu ia ai.
Na ke kulana nawaliwali o Mrs. Makinile i kono aku i ka Peresidena e haalele koke aku i ka Hotele Del Monte a lawe awiwi mai la i kana wahine no ka home o Henry T. Scott ma keia kulanakauhale, kahi e loaa ai he hoomaha ana iaia no kekahi mau la pokole a e loaa ai he kauka akamai no ka lapaau ana aku iaia. Ua haalele aku he kaaahi kuikawa me elua kaa ohua ia Del Monte ma ka hora 12:30 o keia awakea no Kapalakiko me ka Peresidena a me Mrs. Makinile, Miss Barber, kaikamahine a ka Peresidena, Kakauolelo Cortelyou me ka wahine, Kauka Rixey a me H. T. Scott a me ka wahine. Mamuli o ka makemake ole o ka Peresidena e halawai me kekahi puulu kanaka nui ma kahi hoolulu kaaahi ma Third a me Townsend, nolaila, ua haalele aku la lakou i ke kaaahi ma ke alanui Valencia, he kahua hoolulu ma ka aoao hema loa o ke kulanakuhale.
Kapalakiko, Mei 14. Ma ka hora 3:56 o keia auina la i hoea mai ai ke kaaahi o ka Peresidena i kahi hoolulu ma na alanui Third a me Townsend, a ua hoike mua ia ae kona hoea ana mai i kahi hoolulu e ka halepa’i o ka nupepa Kahea. Ma o kekahi ahi kao hoopahu i hoolele ia i ka lewa. A i ka wa i ike ia ai o keia ahi kao he hoailona no ka hoea ana mai la o Peresidena Makinile i Kapalakiko ua lohe ia aku la na leo hauoli o na kanaka ma na wahi a pau o ke kulanakauhale. Ma ia wa pu hoi ua hoopalakuli ia ae ke kulanakauhale me na leo kani o na oeoe like ole o na moku lawe ohua, na hale hana a me kaaahi, a he mau minute hoi keia no ka hauoli o na mea a pau.
A oiai no nae he 18 hora o ka Peresidena ma keia kulanakauhale, aole oia i lilo he malihini pili aupuni na keia kulanakauhale a hiki i keia auina la. Ua kau hou mai ka Peresidena maluna o ke kaaahi Peresidena ma ke alanui Valencia no, he mau mile hoi ka mamao mawaho, a hooko hou mai la i kana huakai i hoolala mua ai no loko ponoi o ka puuwai o Kapalakiko nei.
NAWALIWALI KE KULANA O MRS. MAKINILE
Kapalakiko, Mei 17. Ma ka hora 2 o keia kakahiaka ua hoike ia mai la mai ka hale noho mai o Scott, kahi a ka wahine aloha a ka Peresidena e waiho ma’i ia, aia kona kulana iloko o ka hopohopo loa, a ua hiki ole i na kauka ke hoopuka mai i na hoike no kona palekana.
I ka wa e hoi hou mai ai o kona mau noonoo maikai e ike ae ana oia i kana kane. Ina e hoopakele hou ia ana ke ola o Mrs. Makinile e haalele pupuahulu iho ana oia me kana kane no Wasinetona. O na hoolala i hana ia no ka hoohauoli ana aku i ka huakai a ka Peresidena ua hookaawale aku ka Peresidena ia mau lealea mai iaia aku i keia wa.
Kapalakiko, Mei 18. Ua loaa mai la na hoike mai ka home mai o ka Peresidena, aia he mau manaolana no ka loaa ana he palekana ia Mrs. Makinile. He eha mau kauka e kiai la iaia. Ke kaumaha nei ke kuanakauhale o Kapalakiko no keia haawina ehaeha i loohia i ka Peresidena.
Nuhou Kuwaho.
HOOPOINO IA E KEKAHI POHAKU NUI
Roma, Mei 15. O ka hapanui o na hale o kahi kauhale o Acerenza, e kokoke ana i Potenza, ua hooneoneo ia e kekahi pohaku nui i haule mai mai kona wahi e kau ana. Ua hoounaia aku na koa no kahi o ka ulia poino, a he 15 mau kino make i loaa aku.
MAUNA I KE OLA NO KA HOALOHA.
Inidanapolis, Mei 12. Oiai o William Phelps o Richmond, Key a me James Staplebury o keia kulanakauhale e hoomaemae ana ia loko o kekahi ipuhao ma ka hale hana Cerealine, a mamuli hoi o ka manao kuhihewa o kekahi limahana ua paa pono ka puka mahu i ke pani ia ua hookuu ae la oia i ka mahu.
Ua hemo aku la ke poi a komo mai la ka mahu iloko o kahi a keia mau kanaka e hana nei. A o ke alahele wale no no laua e pakele ai ma kekahi alapii e moe ana no luna o ka ipuhao. Ua lele like aku laua no ke alapii. O Phelps kai hoea mua aku i ke alapii, pii aku la oia he hookahi anuu a ku iho la me ka lele hou ana mai ilalo a kahea mai la i kona hoi. O oe e Jim ke pii mua aku, oiai, ua mare ia oe.
Ua lele aku la o Staplehbury no ke alapii a puka aku la iluna me kahi wela nuku i loaa iaia. Ua ukali koke aku o Phelps, a ua lilo aku nae kona ola mahope o keia hana wiwo ole ana. Ua mo’a like laua i ka mahu i ka wa a Phelps i haawi aku ai i kona wahi no Staplebury, a i ko Phelps wa e ukali kokoke aku ana mahope o kona hoaloha maluna o ke alapii e hemohemo mai ana kona io mai kona kino mai. He elua hora o kona waiho ana iloko o ka ehaeha a lele loa ae la kona aho.
“He kuelana ko Jim e hele ai mamua,” wahi ana i hooho malie hou ae ai. “Ua mare oia.” Ma kahi o Staplebury o Phelps i noho ai, a he mau paele like laua.
EIA KE AU MAI NEI I KE KAI.
VANEKOUA, B. C., Mei 20. O Kapena Voss o Vitoria a me Norma@ Luxon, he kanaka kakau nupepa, e haalele iho ana laua ia nei ma ke kakahiaka o ka la apopo ma kekahi huakai au moana. E alo aku ana laua i ka moana Pakipika maluna o kekahi waa. Ina laua e hoea aku ana i Auseteralia i ka la Karisimaka, alaila, ua hooko ia ka laua mau upu ana.
O Voss oia kekahi o na kapena kahiko. A ua olelo ae oia o kona waa Ilikini 38 kapuai loihi ina e akahele kona hookele ia ana ua like no kona maalahi me ka mokukuna o 300 tona. O keia kekahi o na waa Ilikini nani loa. E lawe ana oia he ekolu mau kia me na pea i like me ko na moku. Aia ma waena kona he keena moe, a mamua a mahope o ka moku kahi a ka laua mau mea ai i hoahu ai, na lako paikii a me na pu ki manu. E kipa aku ana laua ma Honolulu a me New Guinea a me kakahi mau paemoku e ae. E noho ana laua ma Sidane a me MelBourne no kekahi mau pule a malaila e holo aku ai laua no ke kaikuono Delagoa, ma Aferika Hema, a ma keia wahi e hoohala hou ai laua he mau la a holo loa aku no Enelani no ka hoikeike ana kau i ko laua wahi waa ukulii nana i alo na ale hanupanupa o na kai like ole, a mahope o ko laua kaahele ana no elua makahiki e huli hoi loa mai ai laua no ka home.
E HOOLOHE I KEIA
Ke kauoha ia aku nei na Luna a me na poe ma ka owili pakahi he aie ko lakou i ka Nupepa Ke Aloha Aina e hookaa koke mai.
MA KE KAUOHA.
E hoea hou mai ana ke puali keaka paele malalo o ka noho alakai ana a Heu. Wise i anei ma kela mau puke pokole iho pela ua hoike i loaa mai nei ma ke Zealandia.