Ke Aloha Aina, Volume VII, Number 23, 8 June 1901 — Page 7

KE ALOHA AINA POAONA, IUNE 8, 1901                     7

 

HE KAAO KAILI PUUWAI

:NO KA:

UI MINEWA

:A ME NA:

Kaikunane Eiwa

 

I Hooliloia i mau Manu Nene Ahiu a i ole na keiki i Hoehaehaia

 

Kakauia no KE ALOHA AINA.

 

  Alaila, me na maka i piha me ke pihoihoi, haka pono aku la ko laua onohi ike no kahi a ke lepo e kukaea mai ana. A no na minute pokole wale no mahope iho ua lohe aku la laua i na leo halulu ma kahi a ka lepo e puehu mai ana.

  Me na puka pepeiao e haliu pono ana i kahi a ka leo halulu e poha mai ana i hookau pono aku ai ka moi Miro i kona pahu lohe, a iloko o na sekona pokole wale no, aia hoi, ua li’o koke ae la kona mau maka a kokolo ae la na nanaina haikea maluna o kona helehelena a me ka leo malie puana ae la ole.

  Ke hoomaopopo nei au ma ka halulu e nee moakaka mai nei, aole, aole, kela he leo halulu no na kikiao makani, aka, he halulu kapuai wawae kela no na kanaka, a me he mea la, o na enemi no paha kela e hookolo mai nei mahope o kaua e kuu Anita aloha.

  Ae, e kuu Miro wahi a ke aliiwahine i pane mai ai me ka leo kaumaha, he oiaio kau e hoike mai la, aole kela mau ula lepo e hoopouli la i ka lewa mai na kikiao makani ae, aka, mai na kapuai wawae aku no ia o kekahi heluna kanaka nui. Ina o na enemi io keia e nee mai nei e poino ana kaua, no ka mea, ua kokoke loa lakou mahope o ko kaua mau meheu.

  Nolaila, e kuu Miro aloha, no ka wa hope loa heaha ka kaua e hana aku ai, oiai, ka poino ua kokoke i ke alo. E ae aku anei kaua na na poe malihini e lawe ae i ko kaua mau ola makamae? Aole, aole loa.

  Me keia mau huaolelo i lalau ae ai ua Anita nei i ka aahu hunahuna ana e kahiko ana, a me ka piha inaina uhaehae liilii ae la oia, a puana hou ae la me ka leo nui moakaka, elike me ka @@io ana o kou mau haku he enemi no’u pela au e hoowahawaha aku nei ia oe no ka wa mau loa.

  A i ka ike ana mai o ka moi Miro i ke kaawale ana aku o ka aahu o ko laua mau enemi mai kana aliiwahine aku, oia no kona wa i w@ e ae ai i ka aahu ana e komo aoa a hoolei aku la i ka honua, a me ka lima i piha me ka luuluu lalau iho la oia i kana pahikaua a paa ae la me ka makaukau no ke kue ana aku i ko laua mau enemi ina he mau manao ino ko lakou no laua, a me ka leo malie pane iho la oia i keia mau huaolelo ku i ka wai @@.

  E kuu Anita aloha, alia e hoopiha i kou puuwai me na manao kaumaha no ko kaua poino, no ka mea, ua olino hou mai la iloko o’u he mau manaolana hauoli, oia hoi keia, e kali malie aku kaua no ka hoea ana mai o na enemi me ko lakou mau alakai opio. A imua o lakou e kukuli ai au no ka hoopakele ia mai o kou ola, a ke ole ka hoi lakou e ae mai i ka’u mau @oi ikaika ana aku ia lakou no ko kaua mau ola e hoohuli ae no au i ka pahikaua a o e paa nei a lumai aku iloko o kou puuwai, a mahope koke iho no oia manawa e hoohuli pono ae ai au kuu pahikaua ma kahi o kou puuwai e pana kapalili nei a pahu pololei aku me ka hopo ole. No ka mea, elike me ka’u i hoohiki paa ai ma kou wahi e hele ai malaila pu no au e make ai. Oia nou a nou hookahi wale no ke aloha o kuu houpo e nape malie nei.

  Me keia mau huaolelo hope i puili ae ai kana Anita aloha i kona a i a haawi, ae la i na muki aloha ana me na waimaka hoi o ke ehaeha e hiolo makawalu mai ana mai kona mau lihilihi mai, a lohe ia aku ia kona leo i ka puana ana ae.

  He oiaio, ua ike no au he aloha oiaio kou ia’u, aka, mamuli nae o na manao haakei e lalawe ana iloko o ko’u puuwai ua hoolohe ole aku au i kau mau a’o ana. Nolaila, ke mihi aku nei au me ka manaolana e huikala io mai ana oe ia’u, a o kau mau kauoha oia no ka’u e hoolohe aku. Ae, e make pu no kaua e pono ai i ike like ai no hoi kana i na ehaeha o ka noho ana o kela ao, ina e hoole mai ana na alii opio a’u i hoomaewaena ai.

  Me keia mau huaolelo mihi i puka ae la mai ka lehelehe ae o ke alii wahine ua apo iho la ua Miro nei i ka ai o kana aloha a haawi hou iho la i keia mau huaolelo i piha me ka luuluu. Ke haawi aku nei au i na huikala piha ana ia oe me ke noi pu ae hoi i na lani e huikala pu mai ia oe. E hoopoina aku ia mau hana au i lawelawe ai, a e manaoio aku i na lani aia iaia hookahi wale no ko kaua mau manaolana no ka palekana iloko o keia mau minute o ka pilikia.

  A me keia mau huaolelo i hamau hou iho ai ua mau alii nei a haule hou aku la ko laua mau onohi ike no kahi a ka lepo e nee mai ana. A he oiaio, ka laua i haupu mua ai aole keia lepo na na kikiao makani e lawe nei no luna o ka lewa, aka, ma na kapuai wawae mai no ia o kekahi ouulu kanaka.

  No ka mea, ia wa no i ike moakaka ia aku ai na kino kanaka e nee mai ana nae ka puahi nui me ka lakou mau mea kaua e hulali ana i ka wa a na kukuna olinolino o ka la e haule pono aku ai iluna o lakou. O na poe o m@@ o ka huakai oia ka @a@@ e ike aku nei aka, o ko lakou nui ua hiki ole ia ke ike ia aku, no ka mea, ua hao mai la ka uloa o ka lepo, a nalowa’e aku ia na mea a pau.

  He mau minute pokole wale no i kaahope, aia hoi ua pualikoa nei he hapaha mile ko lakou kaawale mai mai na alii aku, a i ko lakou ike maopopo ana mai i na oiwi o ka lakou mau mea e huli nei ua @ula ae la ka lewa me ko lakou mau leo hau oli no ka loaa koke ana o ka lakou mau pio.

    A no kekahi mau minute pokole hou aku i kaahope ae, aia ua puulu koa nei no lakou ka heluna maluna aku o ke tausani e ku ana ma ke alo o ka moi a me kana alii wahine.

  A ma ia wa i hele aku ai kekahi o na opio a me ka leo kuoo pane aku la oia i kona makuakane alii me ka olu waipahe. Malalo o ke kauoha a ka hapanui o’u mau noa hanau i hooouna ia mai ai au e huli aku ia oe a me ke pio i mahuka mai mai kona wahi i hoopaa pio ia ai, no ka hoihoi hou ana aku ia olua imua o lakou.

  Oiai, ua kau he hewa koikoi ma luna ou no ka hoomahuka ana mai i keia pio mai kona wahi e kali ana no na hora hope o keia ola ana. Nolaila, ina ua makaukau olua no ka haalele ana iho i keia wa, e kauoha ae no au i na koa e hoopuni ae ia olua a lawe aku imua o’u mau hoa hanau e kali malie me ka piha inaina no kau mau hana kolohe e kuu papa aloha.

   E kuu keiki a hooilina alii opio hoi o keia mau paemoku, e hoohuli ae i kou mau kapuai a hoi aku imua o kou mau hoa hanau a hoike aku ia lakou. Aole, aole loa ka moi Mira i lawelawe i kekahi hana kolohe, aka ua hana oia e like me kana i ike ai he pono no ke aloha e lalawe ana ia loko o kona houpo no kana wahine. A ina ua kau ka lakou mau ahewa koikoi no ka’u karaima i lawelawe ai ua makaukau loa au e hoi aku no ka opu o ka honua no ka’u hana aloha i lawelawe aku ai no kuu Anita aloha nei.

 

LOAA AKU UA MAKE.

 

  Ma ke kakahiaka Poakahi nei, ua loaa aku Ia ke kino make o kekahi pake nona ka inoa o Ah fa e waiho ana maloko o kekahi lokowai mawaho o Ainahou, Waikiki. Aole he maopopo o kona kumu i halawai ai me keia ulia poino, aka, ua manao ia mamuli no ia o kona nalawai ana me kekahi ma’i kauhola i kona wa e lawaia ana. O kona ike hope ia ana, ma ke ahiahi La Pule no ia.

Na Charlie Kalua i luu ke kino make o Ah Fa a loaa aku e waiho ana ma kahi he ehiku kapuai wai ka nohonu. Ua malamaia he aha koronero, a ua hooholo ka aha ua make oia ma o ke piholo ana iloko o ka wai, ma ka la 2 o Iune.

 

PUHI OLA HOU IA IA PAELE.

 

  Barlow, Fla. Mei 29. O Fred Rochelle, he paeie nona na makahiki he 35, i pue a pepehi a make ia Mrs. Rena Taggart, he wahine haole i kamaaina nui i ko keia kulanakauhale, ua puhi ia oia i ke ahi i keia ahiahi iwaena o kekahi anaina makaikai nui. Ua puhi ia keia paele ma kona wahi no i lawelawe ai i kana hana karsima he 100 kapuai mai ke alanui nui aku o keia kulanakauhale. O keia kekahi pepehi kanaka makau ole i lawelawe ia ma Folorida nei. Ma ka hora 10 o ke kakahiaka o nehinei ua hele aku o Mrs. Taggart i ka lawaia ma ke kahawai Placo Creek maluna o kekahi waapa. He ahuwale @@a keia wahi i ke alanui nui. Mamua o ke kani ana o ke awakea, ua haalele aku la oia i kona wahi waapa mahope o ka hoopaa ana aku i ka uwapo. A i kona wa e hoi ana no kona home i puliki ia ai oia e keia paele, a i kona hoao ana e hoopakele ae iaia mai keia paele i oki ia aku ai kona pu ai me ka pahi.

 

HALAWAI KA SHAMROCK ME KA ULIA POINO.

 

  Southampton, Mei 22. Oiai ka Moi Edewada VII, Sir Thomas Lipton a me kekahi poe e ae e holo ana maluna o ka moku heihei Shamrock II ma Solent, ua @a mai la kekahi kikiao makani ikaika a lawe aku la i na rikini a me na pea o ka moku iloko o ke kai. Ua laki aole he poino i ikeia iwaena o kana mau ohua hanohano. Ua poino pu ka Shamrock i ma keia kikiao makani hookahi no. E holo ana keia mau moku no ke kahua heihei no ka hoao hou ana i ko laua mama holo.  Mamuli o keia ulia poino i ke Shamrock II, ua manaoia e hoopanee ia aku ana ka heihei no hookahi mahina hou aku.

 

APANA MEA ONO MARE O KA MOIWAHINE VITORIA.

 

  Ua kuai k@dala ia mai nei he apana o ka mea ono mare o ka Moiwahine Vitoria i hoouna ia aku i kona makuahine, ka Duke Wahine o Kent i kona wa i mare ai i ka hooilina alii Albert, e waiho ana no keia apana mesono iloko no o kona pahu a me ka wahi leta i hoouna ia aku ai, no ke kumukuai o $55, ma L@dana. He maikai no ke nana@@ o ka mea ono, aka, ua hala nae ka wa kupono no ka hiki ana ke ai iho.

  O keia malalo iho na hookohu a Luna Nui o na Hana Hou Kimo Boe i hoopuka ae la penei:

Anaru Baraunu, Luna Wai Nui; Anaru Fuller, Luna Kiai Awa; John R. Macauley, J. C. Lorenzen, M. N. Sanders, a me E. F. Cameron i mau pailata no ke awa o Honolulu nei.