Ke Aloha Aina, Volume VII, Number 24, 15 June 1901 — Page 3

KE ALOHA AINA

 

Nuhou Kuwaho

 

HOEA O MAKINILE I WASINETONA

            Wasinetona, Mei 30.  O ke kaaahi e lawe ana ia Peresidena a me Mrs. Makinile ua hoea mai la i anei mai ka laua huakai aku nei i ke komohana ma ka hora 7:30 o keia kakahiaka, ma ka manawa pololei no hoi i hoike ia mai ai.  Ua lawe koke ia aku o Mrs. Makinile no luna o ko laua kaa a hoihoi ia aku la me ka malie no ka Hale Keokeo.

            He nanaina haikea a me ka maluhiluhi ona e hoike mai ana i ke kulana nawaliwali ana i alo mai nei.  Aole he mau hiohiona hauoli i hoike ia aku e ke kulanakauhale i ka huli hoi ana mai o ka Peresidena a o na kuonu aloha hamau oia ka mea i panai ia aku nona, no ka mea, aia pu ka lahui me ia iloko o kona mau kaumaha no kana wahine.

 

HOPOHOPO IA KE KULANA O MRS. MAKINILE

            Nu Ioka, Mei 30.  He lono kuikawa kai loaa mai nei i ka nupepa Honua mai Wasinetona mai, e olelo ana.  He nawaliwali loa ke kulana o Mrs. Makinile i keia po.  O ka hopena i ike ia mahope o ke kuka ana a na kauka ekolu e lawelawe nei ia Mrs. Makinile, ua hooholo ae lakou he kulana hopohopo loa kona.  Ua hoouna pupuahulu ia aku la na telegarapa i ka ohana o Mrs. Makinile e kauoha awiwi aku ana ia lakou e hoea koke mai i Wasinetona nei.

            O Mrs. Barber o Canton, ka hoahanau o Mrs. Makinile, ua manao ia e hoea mai ana oia i anei ma ka Poaono ae nei.

            Wahi a ka olelo a kekahi o na hoa i hele pu aku nei me ka Peresidena.  Ua hoike ia mai ka Peresidena e na kauka o Kapalakiko, he uuku loa ka manaolana no ka loaa ana o ka palekana i kana wahine, aka, e loaa ana no iaia he maha a hiki i Wasinetona, kahi ona e hoopuni ia ai e kona mau ohana.  Ua loaa mai la na hoike i keia auina la, ua loaa iki ae he maha ia Mrs. Makinile.

 

POINO KOIKOI NA BERITANIA

            Ladana, Mei 31.  O ka hoouka kaua i malama ia ma Valdfontein, ma ke alahao Durban-Johannesburg i hoike ia mai la e Haku Kitchener i keia la, oia kekahi o na kaua hahana loa mai kela hoouka kaua hope i emi hope ai o Kenerala Clement ma Magaliesburg.  O ka pakaua o Valdfontein, he hapanui o na koa malaila he poe Yeomanry, a he 174 kanaka o ua pakaua la i hoopoino ia.  O ka hahani o na aoao a elua ma keia hakaka ana, ua hiki no ia ke ike maopopo ia ma o ka nui o na poe make e waiho ana maluna o ke kahua kaua.

            Ma ka hoike a Kitchener mai Pretoria mai no ka la 30 o Mei penei no ia:

            O ka pualikoa o Kenerala Dixon ma Valdfontein, na lele kaua ia mai ia ma ka la inehinei e na koa o Delarey, a ua malama ia he hakaka hahana.  Ua hoauhee ia aku na Boa me ka waiho ana iho he 35 kino make maluna o ke kahua kaua.  Ke kaumaha nei au i ka hoike aku, o na make a me na hoeha ia ma ko makou aoao ua hiki aku no ia i ka 174.  He eha mau aliikoa i make.

 

            POHA KA MAʻI BUBONIKA MA HONG KONG

            Nu Ioka, Mei 30.  He telegarapa kai loaa mai nei i ka nupepa La mai Hongkong mai e olelo ana:

            O ka maʻi bubonika ke pii mahuahua hou mai nei ia iwaena o na Asia, he kanaha maʻi i ike ia ma kela mahina aku nei, a he umi-kumamalua iwaena o na Europa.  O ke kumu e hoomaka hou mai la ka pahola ikaika ana o ka maʻi mamuli no ia o ka malama pono ole ia o na rula malama ola maanei.

 

HULI HOI O MAKINILE NO KA HIKINA

            Kapalakiko, Mei 25.  E haawi iho ana o Peresidena Makinile i kona aloha hope no Kapalakiko i keia kakahiaka, me ka ukali ana aku a kana wahine a me na hoa o kona Aha Kuhina e haalele iho ai lakou ia nei ma ka lakou huakai huli hoi no ke Kapitala.  O na kauka e lawelawe nei ia Mrs. Makinile ua halawai aku lakou me ia ma ka hora 1 p. m. o ka la inehinei.  Ua hoopuka ia ae ma ka hoolaha e Kakauolelo Cortelyou ua hiki ia Mrs. Makinile ke hoi aku maluna o ke kaaahi, a nolaila, e hoomaka ana ka huakai huli hoi ma keia kakahiaka.

            Ua hoike ia aku ka lohe ia Makai Nui Kiekie Sullivan a me na hui kaaahi, a ua makaukau na mea a pau no ka haalele ana iho o ka Peresidena.

            Ma ke awakea ua hoea aku na Kanikela like ole e noho nei ma keia kulanakauhale e ike i ka Peresidena.  O ka hapanui o lakou ua aahu ia lakou iloko o na aahu piha.  O ko lakou mau pilali gula a me siliva e hee ana ua lilo ia i mea makaikai nui ia e kekahi puulu kanaka nui mai ka paka aku, oiai na Kanikela e komo aku ana iloko o ka hale o ka hale a ka Peresidena e noho ana.

 

            E lawe nui i KE ALOHA AINA i ike mau i na mea hou.

            Aole he nui o na poe i lawe ia no ka halewai no ka hoonaunaele ma ka la 11 iho nei, aka, he nui no nae na poe ona i ike ia mawaho o ke kahua heihei, a o kekahi keia o na la maluhia loa i ike ia ma Honolulu nei.

 

OLELO HOALOHALOHA

            He hoalohaloha a ka aha ekalesia o ka Hoomana Karistiano Naauao o Kaolinookamalamalama ma Pauwela Hamakualoa, Maui, i Mrs. Kahopewai Mia a me na keiki makua ole a @ na moopuna lehulehu i hooneleia i ke kupuna ole.  Oiai, ua oluolu i ke Akua Mana Loa ke kahea aloha ana mai i ka makua i aloha nui ia Robata Mia kapou hana o ka ekalesia i hoike ia ae la maluna.

            He luna ekalesia he lima kokua aloha i na hana e holomua ai ka pono o ka ekalesia, a he makua i hilinai nui ia.  A ma ke ano kulana aupuni o keia noho ana, he aloha aina oiaio a moe pu aku la me ia aloha alii a me aina.  Nolaila, ua kau iho  la maluna o oukou na haawaina ehaeha a mokumokuahua o ka naau no ka makua i hala aku ma ke ala mau loa, nolaila;

            Hooholoia, o makou o ka ekalesia o ka Hoomana Karistiano Naauao o Kaolinookamalamalama o Pauwela, Maui, ma o ko makou komite la, ke komo pu aku nei makou e auamo pu me oukou i na ehaeha luuluu me ka manao aloha oiaio no ka makua i hele aku la e hui me ko kakou Haku aloha, a i moe hoi me ka manaolana no ka hui aku me ke Akua mau loa.  Aloha nui no.

            E hooholo hou ia, ke pule ae nei makou i ke Akua nona ka mana nui a me ka lokomaikai palena ole, Nana e hoomama mai i ko oukou mau naau a pau, no ka mea, he aloha ke Akua.  Hooholoia e hoounaia i kope o keia olelo hoalohaloha i ka Nupepa KE ALOHA AINA.

            O makou iho me ka manao walohia no ko makou hoa paahana no Karisto Iesu.

            J. P. KAPIHE,

            Komite:

            Kaolino, Iune 5, 1901

 

WAHI MOOLELO POKOLE

            He wahi moolelo pokole no makamaka a hoaloha i hala aku la, R. Mia.  O keia kanaka a kauwa oiaio no ka Haku Iesu, he kamaaina a he kupa oia no keia aina i kaulana Pauwela a ka naauao.  He 70 a oi kona mau makahiki a moe aku la; elua ana mau pili aoao, na ka pili aoao mua he elua mau hua e ola nei, he hookahi o laua oia o J. Kaimoku Mia, a na laua mai he 16 mau moopuna e ola nei.

            Ma ka hookahuli aupuni o A. D. 1893, ua ku oia ma ka aoao aloha alii a me aina a moe wale aku la, i mea e maopopo io ai kona aloha aina ua kukulu ae oia i pahu have nani, a makia aku la oia i keia mau huaolelo "Aole e huki ia kekahi hae maluna ou a hiki i ka hoihoi ia ana mai o Liliu ma ka noho mai o Hawaii."  Ua paa ia manao a hiki i kela la, aole i hoi o Liliu i ka noho kalaunu, aole no hoi i huki ia he have maluna o keia pahu have nani o na makua i hoomakaukau ai, a @ ko ka olelo a na Repubalika, "e ku a e kena pahu have a popopo."

            I ka 1897, ua hoala ia ke kukulu ana i ka luakini nani o Kaolino mai Pauwela nei, ua komo pu oia i ke kokua ana i ka moraki dala ia Mrs. Mele Poka ma Honolulu, a na kana hana aloha i hiki ai ke hooholomua ia i ke kukuluia ana o keia ekalesia hou ma Maui nei, aole i pau kona makee i ka pono o ke Akua ana i hoohiki ai, oia hoi ua haawi manawalea aku oia i ke kahua e kukulu ia ai ka hale kahu o keia ekalesia, oia hoi, he 150 kapuai kuea huinaha like.  Kai no o ka pau ia o kana mau hana aloha o ka mea oi @ aku mamua o keia, ua haaei aku oia i kona mau waiwai paa a pau no ka pono o ka @ Akua Kiekie Loa mau hana iloko o keia ekalesia, oia hoi o kona mau aina a pau, ua hoolilo aku oia ma ka inoa o ke kahu o keia ekalesia, no ka imi ana i dala e kukulu ia ai o na halemaʻi ma Pauwela nei, me ke kokua ana i ke kukulu ana i na luakini no Maui nei.  Ua hala oia ma ke ahiahi Poaha, Mei 9, 1901 nei.  Ehia la haipule i koe e like me R Mia ma Hawaii nei.  Paulele i ke Akua.  Aloha nui no.

 

HE HALE AINA HOU NO YEE CHONG

Alanui Moi kokoke i ka Uwapo Haaliliamanu ma kahi o Wo Fat.

            E loaa no malaila ka Poi me ka Iʻa Maka, Pipi a pela aku.  Inu Ti me Kope.  Ai Raiki a me Supa a me na ono a pau a ka Hawaii, no ka auhau he haahaa.  Nolaila, e o @ mau makamaka mai poina i ke kipa mai.  mi-Ime.

 

H. F. WICHMAN

Wikimana

            E loaa no na MAKAANIANI no na maka ma ke kumukuai haahaa ma ma ko makou Hale Hana Gula ma Alanui Papu.

 

ORPHEUM CLOTHING STORE

Ina oe e Makemake e Hookoeia Kekahi o kau Mau Wahi Dala e kipa i Makou nei.

            Ua loaa mai nei ia makou he heluna nui o na Waiwai Aahu a me na Papale na Palule a me na Lei Ai o keia au hou.  Lolewawe 50c, Palei@ 25c.  Eia me makou he nui na Paa Lele Huluhulu Bo@u/  E kipa mai e ike no oukou iho ma ka Orpheum Clothing Store e pili pu ana me ka halekeaka Orpheum, a i ole ma ke Alo Ulaula, 101 Alanui Kalepa e pili kokoke ana i ka Halewai.

 

OLELO HOOLAHA

            Owau o ka mea nona ka inoa malalo iho nei, ke hoike aku nei au i koʻu mau makamaka Hawaii.  Oiai ua haalele mai kaʻu kane Mr. E. A. Williams, i ka lawelawe pu ana me aʻu i na hana pili i na kino make.  Ua makaukau loa au e hooko aku i na kauoha e waiho ia mai ana iaʻu mai koʻu mau hoa oa mai me kekahi mau kanaka akamai i hoea mai la mai Amerika Huipuia.

            Owau no me ka oiaio.

            Mrs. E. A. Williams.