Ke Aloha Aina, Volume VII, Number 25, 22 June 1901 — Page 3
| This text was transcribed by: | Francene H Aarona |
| This work is dedicated to: | For all my grandparents who gave me guidance and taught me much. |
KE ALOHA AINA
KE ALOHA AINA, POAONO, IUNE 22, 1901. 3
HUAKAI MALIHINI I PUNA.
---
Kakauia ma ka Oneki o Olaa a me Hilo Kaamahu.
---
( Mai Ka Elele Hawaii mai )
Ua loaa mai kekahi hoike mahope ae nei mai kekahi makamaka i holo kaaahi i ka Poaono, la 8 i hala, oiai, aohe palapala ae i loaa i ko makou mea kakau.
Waiakea, hora 7:30 kakahiaka, na hoonaue pu ia ka lehulehu mamuli o ke kulai ana o ke kikeleawe, a he imo ana na ka maka kaaalo ana o Olaa ( kaamahu ) iwaena o na kumu puhala o Waiakea, a e kilohi mai ana hoi o Halai me ke kulanakauhale Moiwahine me he moa uakea la. A waena o ka ulu ohia o Panaewa nui mokulehua kupu haoeoe hoolai iki iho la ka nome ana o ka huila no ehiku minute, a o ka lilo aku la no ia no kahi o ka huakai.
Ma keia hele malihini ana o na lala o na Ahahui Paeaina me na olakino maikai, he ohaoha a nohonohea na helehelena o na poe la, a e oni ana na kino me he naita la no ke kahua kaua. A oiai na oe a pau e hoolai ana ua puana ia mai la he mele lahui e ko ka mokupuni o Maui nona na kuahiwi ku kilakila, a ua ike ia aku ka wehe papale like ana o na mea a pau me ke kunou hoomaikai ana o " Maui no ka oi, " a i ka panana owe ana no ku'e i ka mile 8, hora 7:53. ( O Olaa ia e ka makamaka kahi o ka malie me ka awapuhi e noke ai oe i ka uu a pau ka makemake. ) He nani maikai ka aina a he nani ke alanui e waiho ana e ka mile eiwa, oluolu na maka i ka nana i ka uliuli maikai o ke ko. Ma keia wahi i haalele mai ai o Olaa ia makou a na Hilo i lawe a lilo i ke " Kake o Lehua, " o ka manawa ia o ke uwati i ka hora 8:05.
I ke anaina e hoolai ana, ua mele ia mai la ka himeni a ke keiki kupa o Hilo-one i haku ai,---
E lilii lehua i Hopoe,
E popohe mai la i ke pili,
E pili ke aloha me oe,
Me ka ua kilihune o uka.
Minamina wale no kaike ole anai ka popohe mai o ka lehua, a me ke aliiwahine hoolewa o Hopoe i ke kai, aka, e waiho mai ana ka papa pahoehoe a kona inoa ; aole i uu iho le ko ana i ka mile 14, hora 8:25, a malaila i kuupau ia mai ai na mele like ole no ka hoohoihoi ana i ke anaina. Haalele ia laila hora 8:33 a kamoe aku la no ka pahu hopu o ka huakai; hora 9 ponoi kaalo ana na puu one, " Aia i Honolulu kuu pohaku " a me Waawaaikinaaupo, maalo pu iho la me na lehua nenee Nanawale ; kaalo aku la i Puua a me Laoa a e ku kilakila mai ana na Puu o Pele, o ka hora 9:15 ia. A ma ka hora 9:20 ku iho la ua moku holo honua nei ma ke awapae o Kapoho, lele kela a lele keia a maki aku la no ka home o Lupe Laimana, he ma mao o 1 mile a oi.
KA IKE ANA IA WAIWELAWELA.
Ma ka aoao hema o ka puu o Kukii e hoaiai mai ana ka wai o Waiwelawela e hooliplipo ana ma ke kumu o na puu la, kahi a na malihini a me kamaaina i hooma-u iho ai i ka welawela o ka la. He nani maoli no.
KA HOME O LUPE LAIMANA.
He ohua palahalaha maikai a kiekie ae ia maluna o na ululaau, he kahua la i kukulu ia ai kekahi lanai launiu me kekahi papaaina nui no na malihini. Ilaila i nuu iho ai a lawa. Hauoli ka manao.
Ma keia huakai makaikai a na malihini o ka Ahahui Paeaina a ko Hilo poe i hiipoi ai, a na lala me kou mea kakau e hoomaikai ae nei o ka milimili no kekahi a ka lahui, ka Moiwahine Liliuokalani.
" O ke alii wale no ka'u makemake,
O ka luhi o maua me ia nei. "
Maikai ke ola o ke alii a mohaha maikai kona helehelena.
He mau manao paipai pokole i ka wa e ai ana a hookuu ia na hana o ia la ma Puna. Haalele ia Kalehua hora 1:30 auwina la no kahi hoolulu kaaahi, a ma ka hora 3 i haalele iho ai i ka dipo no Waiakea ka ihu. Hora 4:45 hiki hou i Waiakea me ke ola maikai. He ui mai hoi kau ia Puna. Sua kela ia Waiwelawela.
E ka ELELE, ka " Lei Lehua o Hilo, " e hiipoi aku oe i keia maluna ae a huepau aku i na hoomaikai palena ole a kou mea kakau nei, a me na lala o ka Aha Paeaina i ka Ekalesia o Haili me kona kahu a me na makamaka i laulima pu no ka hookipa ana ia makou ma na mea e oluolu ai ko makou kino. Maluna ae o keia mea a pau, na ke Akua e hoopomaikai mai ia oukou na kamaaina aloha, a me na malihini a oukou i hiipoi ai, a Nana no e hoohui hou ia kakou a pau ma keia ao a ma kela ao. HALEKALA. Iune 8, 1901.
---
E alawa ae e na makamaka i ka hoolaha a S. Mailehuna e pu ka aku nei.
Ma ka mokuahi Kina i hala aku la no Kapalakiko i kau aku ai o Humepera no ka holo hoomaha ana i Amerika Huipuia me kana wahine. Ua hoea ae kekahi mau Senatoa a me na Lunamakaainana Home Rula me kekahi poe e ae a haawi aku la i ko lakou aloha nui no Humepera.
NA MALIHINI
---
E Ulumahiehie Nei i ka Nani o Hanakahi.
---
( Mai Ka Elele Hawaii mai. )
Aole he mea hewa no ka Elele ka hoike ana aku imua o ka lahui a imua o na makamaka a pau i hiki mai i Hilo nei, ua hamama ka puuwai o ko Hilo mau kini no na malihini a au e kipa mai ana e luakaha ma kona mau kapakai.
Nolaila, e ka moku o Manookalani, ka aina nona ka oleloia he " hemolele i ka malie, " mai kanalua ka manao a hopohopo ua komo oe iloko o na hipuu aloha a ko Hanakahi mau kamaaina, ke luakaha nei i ke ona o Panaewa.
Ia oe e Oahu a-Lua, ka moku a Keopulupulu i olelo iho ai " ke one ai-alii o Kakuihewa, " eia Hilo la ke pulama aku nei i au mau pua Kamakahala. Nou na upu mau ana a ka Ua Kanilehua iloko o ke aheahe malie---aohe olena ana---eia no na lehua puakea a ou mau maka onaona e lei iho ai, lei pu no i ke aloha. Eia la aole i ana iho Hilo i na pua keu a ka manao, ke hamama nei na ipuka hale aohe hoohewahewa ana.
Auwe ! lele maopu wale mai la no ka hoi ia'u ke aloha Ae, e Leilehua e, heaia aku ka malihini e kipa. He ma---i ! Hoikea kou puuwai hamama, e hookipa a hanai ai, o ke aloha ka hoi ka mea @nei mau ke kipa ana mai a ka malihini.
E Molokai Nui-a Hina, ka aina nona ka oleloia i ka " pule oo, " aohe hoohalahala ana a ka Ua Naulu i ke kula, he ilima kou lei he lei i awili pu ia me ka lehua a me ka maile o Puna; he home a he ipo aloha ke one o Wailoa nou.
O oe hoi e ka aina e hahau ana i ka laau i kana keiki a uwe wale mai no na kini o Koolau, ou keia ilihia, la Kamalalawalu e hiolani ana a ala mai, ua makaukau na kaikamahine kui lehua o Hilo e apo mai ia oe. E kipa kauhale, e hoike i kou inoa kehakeha---Maui no ka oi. Aole e palulu o Hanakahi i kona maka ia oe, eia ka aina noho ia iho ; nou mau na iini ana a ko Hilo kini maka lehua e kumumu iho kela oioina o Haleakala a e olelo iho oe " o Hilo no ka oi, " no ka mea, he kaaahi mai hoi kau a ike ana i ke onaona o ka hala o Puna---he ui mai hoi kau !
Aohe olelo ana nou e ka moku kihi pa-ha o Keawe, eia i kou poli ka iini a me ka hakui a ka puuwai no ka hana i manaoia. O ka hanohano i loaa ia oe i keia la e mau aku no ke o ana a hoea mai ka hanauna hou. A nau nae ke kaena e Hilo i Hanakahi, i kou piko i hoolulu ai na anela---na kahukula Sabati me na elele, na kahunapule me na elele---a o kou puuwai kau e wehe hamama ae a hookomo ae iloko o ka manao lokahi o ke aloha i na makamaka a me na hoaloha.
Nolaila, e Hamakua kihi loa, ua helu pu ia oe iwaena o na pua maka malihini,---he wai-i-kipa ma kauhale, nou keena.
E Kohala-loko, Kohala-waho, e Kohala makani Apaapaa, o oe pu no kekahi, ka ike iho la no oe ia Hilo @e ia iho la no. E kaena iho oe a hui.
Ia oe e " Hole Waimea ia ka ihe a ka makani, " aahu i kou kapa hau a hoike mai ia Hilo : Ua hala ka wa ua o Hilo, aole e ike ana na malihini i ka nani o na aina nei.
A e " Kona kai opua i ka lai, " ka hua i ka umauma haina la. Ia oe i hoouna mai ia i au mau omaka wai opua, ua lilo mua mai la i ke ehu a ke kai. O ko Hilo iini mau ia o ka hookipa i na malihini---i mau tausani. He ui mai hoi kau.
Auhea wale ana hoi oe e Kau, e Kauahaao, aole oe i poinaia, nou nei mele ana. Aole oe e nele ana a hiki i kou hoi ana, a o kou hii pu aku no ia me na hala onaona o Puna. He onaona mai hoi kau !
Maemae wale oe e Puna, he keiki na ke aia : he makahiapo na ka la i Kumukahi, he makolipua no ka la i Haehae. Ae hoi paha, he mea hooleia anei ia, aole loa. Ua ku hoi p-ha ke keena ia Puna ua hana a nui i ka nahele, lei kamaaina lei pu no me ka malihini. He lei mai hoi kau ! Nou o Hilo, he aialii. O ka upu wale no iloko a i hoea aku na malihini hookuu mai oe i ke ala a nui---ke ala no a nui---ikeia hoi paha ka inoa He ola hoi paha ia !
Nolaila, e na makamaka a me na hoaloha, na malihini i kipa mai e ike i ka nani o ke kulanakauhale Moiwahine, ua akea kona mau palena no oukou e luakaha iho ai. Hele e makaikai e like me ka hauoli i loaa ia oe.
E ka lede, ke keonimana a me ka opio kane a wahine, a i huli hoi aku o ka home mai poina ia Hilo---I aloha ko Hilo, Sua kela !
Me na manaolana ulumahiehia ke waiho aku nei ka Elele na na malihini e ike no lakou iho. He keu, aohe ui a koe aku.
---
HALA NA L O HEIHEI NO HILO.
---
Maluna o ka mokuahi Kinau i hala aku ai he umi mau lio heihei no Hilo no ke aumeume ana i ka lanakila o ka la 4 Iulai o malama ia ana ma ke kahua heihei lio o Hoolulu Paka, oia na lio heihei Dixie Land, Watosa, Socialist, Billy McAlosky, General Cronje, Molly Connors, Amarino, Walter P., Violin a me Merril's Faust.
Me keia mau lio heihei ua kau pu aku kekahi mau ona ilo, aole wale no keia o na lio i manao ia no ka hoouna ia ana aku i Hilo, aka, e lawe ia aku ana kekahi puulu lio heihei ma keia holo hou ana aku o ke Kinau. E lilo aku ana ia he la nui no na aina kaulana nei.
---
MALAMA HOU IA HE ANAINA HAIPULE.
---
Ma ka auina la o nehinei ua malama ia ae la he anaina haipule ma kahi hoikeike o na Hawaii ma ka Midway e ka Rev. Dr. S. Fitch. Ua akoakoa mai lakou a pau ma keia anaina. O ka lakou mau mele ana oia kekahi mea nani i ike mau ia ma ko lakou akoakoa ana. He hapa o na hana haipule i lawelawe ia ma ka olelo Hawaii---Mai ka nupepa Buffalo Express mai.