Ke Aloha Aina, Volume VII, Number 26, 29 June 1901 — Page 7

KE ALOHA AINA, POAONO, IUNE 29,1901.     7

 

MOOLELO HOONI PUUWAI

:NO:

Kuu Aloha i na Pua, Kuu Ipo o na Launahele!

Ka Makaikiu Kupaianaha!

 

MOKUNA XII.

KA LEDE O KA UHIMAKA MANOANOA

- KE KANAKA MONEKA O KE KENETUHIA.

            Wahi a Silevia imua o kona hoaloha makaikiu, ua hoike mai na kauwa aia ka Haku opio o Danekota Kakela ma Stanefila kahi i hoomaha a i hoohala ai i kahi mau la a me he la, e hala ana paha he mau la lehulehu ia laua malaila mamua o ko laua huli hoi ana mai no ke kakela.

            Alaila, wahi a Beleinehama, elike me ka nui o na la a Ailika Lema a i ole Haku Danekota e hoohala ai ma Stanefila Hale, pela no hoi ka nui a me ka loihi o na la a kaua e hoomaha ai, a oiai, kaua e noho ana iloko o keia mau la o ka hoomaha, e pono ia'u e haalele iho ia oe i keia mau la a holo aku no Sekotia no ka huli a me ka noii pono ana i ka oiaio o ko olua mare ia ana a me ka ole.    

            Ua lilo keia mau olelo a ka makaikiu, i mea maikai no i ko Silevia manao, nolaila, ma ke kaaahi e haalele ana ia Ladana ia ahiahi, ua kau aku la ka makaikiu no Sekotia ka pahu hopu malalo o na lawe kiani ana a ka ihu palalu o ka lio hao, a i ke ahiahi no hoi o ka lua o ka la mahope iho o ko ka makaikiu haalele ana, aia oia ua L@@a hou mai la no Ladana, a waiho i kana hoike me keia mau olelo:

            Ma ka lokomaikai o na lani, he wahine oe e Silevia i hoohui ia me ka oiaio loa o ka mare hiki ole ke hookaawale ia e Ailika Lema, ua niele au a niele hou, ka ninau hoi no ka ninau, a he hookahi no haina i loaa nai ia'u mai na lehelehe mai o ke kahuna nana olua i mare e hooia ana i ko olua mare pono ia ana, a i mea no'u e paulele ai a hilinai ua haawi mai la oia ia'u i ka buke i hoopaa ia ai o na poe a pau ana i hoohui ai iloko o ka mare, a he oiaio, iloko o ka'u huli ana me ke akahele, ua loaa iho la ia'u ka inoa o Ailika Lema a me Silevia Lidona iloko e kau ana a i hoohui ia hoi iloko o ka materemonio maemae o ka mare imua o ke Akua a me ke kanaka.

            Nolaila, aohe hopohopo ana ma ko kaua aoao, ina e kue mai ana ua kanaka kolohe nei o ke apuka ia oe. O kela wahine ana i mare elua iho la, he wahine ia e hiki ole ai i ka mana o ke kanawai ke paa a aua iho. E kipaku ia aku ana oia iloko o ka hilahila nui, a e auamo hoi oia i na ehaeha o kona hoowahawaha ia elike me oe i kou mau la o ka hilahila a me ka ehaeha e auamo ana.

            Ua @ana a haawi mai o Silevia i na hoolohe ana me ke akahele no na olelo a kona hoaloha makaikiu a ua moni aku hoi oia i ua mau olelo ala a hoopaa iloko o ka waihona noonoo poina ole o kona naau, a i ka hora a me ka minute a ka Haku Danekota i moeuhane mua ole ai e kipa malihini ia aku ana kona kakela e kekahi mau mea kino pahaohao, aia hoi, ua hoea aku la imua o kona alo a me kana wahine ka lede o ka uhimaka manoanoa.

            O na kahiko a me na aahu o ua lede ala o ka uhimaka manoanoa ma kona la mua loa i kipa aku ai ma ke Kakela Danekota, oia no keia, a na kona ka@da (pepa inoa) i hoike aku imua o ka Haku opip o ke Kakela o Miss Lidona keia lede hookalakupua me kona mau helehelena i huna ia e ka mana o kela uhimaka manoanoa.

            Elike me ka hanohano o ke kulana o ka Haku Danekota a me kana lede, pela no hoi ka ulumahiehie o na hookipa ana ia o ka kaua Silevia aloha, kela wahine kupanaha hoi a ka uhimaka manoanoa, a o na olelo mua o ka hoolauna i panai ia mawaena o ke kamaaina a me ka malihini, ua kaa e aku la ia ma ko ka Haku Danekota aoao ma ka pane ana mai me keia mau ninau.

            E kuu lede maikai, aia anei he pilikia i loaa ia oe a Haku Danekota e haawi aku ai i kana mau kokua ana? Ua hamama ko'u waihona kokua, a o ko'u ekeeke, ua hiki ia ke haawi ia me ka manawalea.

            O ka pane ma ko Silevia aoao, ua hoole aku oia i na kokua a me na mohai aloha mai ka Haku, a kanaka mai hoi nana oia i hoowahawaha ua nana aku oia i ua kanaka ala maloko aku o kona uhimaka, manoanoa, a aia iloko o kona mau hoomanao ana ua ala hou mai la na ilina make i kanu ia ai kela mau la i hala kahiko, a o ka huaolelo i hawanawana ae i ka naau o ua Silevia nei.

            O Ailika Lema no keia Haku Danekota, ke kanaka hoi au e Silevia i lu, a hoonani aku ai me ka hoonani hou ana o kou aloha, a kanaenae ae oe e kela olelo poina ole o ka haaheo. Kuu aloha i ka wehi o na pua, kuu ipo i na launahele.

            Ae, e Silevia, eia oe ke hui a ke halawai nei he alo a he alo me ua aloha lokoino nei au. Ke nana mai la oia maluna ou me na make hoomaka'o o ka hoohewahewa, a o oe hoi ke nana aku la oe iaia mailuna a lalo he hookahi no anoi a ke aloha aka, he elua nae papale. I ka wa me oe e Silevia ua aloha ala a olua, o Ailika Lema oia, aka, i ka wa me ka ulua hou, aia hoi, ua ike ia ae la oia o Haku Aulika Danekota, kupaianaha a kupaianaha na hana a ke Akua, ka hoohanau ia ana mai o ke kanaka o ka wahine me kona mau la i piha me na popilikia.

            Nolaila, mamulia o keia hoole ana o Silevia i na kokua manawalea ana a Haku Danekota, ua ninau hou mai la ua Haku ala. E kuu lede maikai, heaha ka'u e hana aku ai nou? ua hemo ko'u ipuka, a ua hemo hoi ko'u waihona, a ina o ka ipuka o ke aupuni o ka lani kau i makemake ai i mea e hoomaha ia ai kou mau luuluu elike me ka'u e ike aku nei maluna ou, alaila, o kela ka mea paakiki loa a kekahi kino kanaka e hoao ai e ko kona iini, ke ole oia e moe e iloko o ka make, a na kona uhane maemae e hooko ua iina ala.

            Aole loa kekahi oia mau mea iloko o ko'u noonoo ana. O kela ao a me keia ao, ua like no laua a elua, aohe maha ana no'u, no ka mea, ua ike au i ka oiaio o na mea i olelo ia. O ke kanaka i hanau ia mai e ka wahine he hapa kona mau la a ua piha me na popilikia. Elike me kou hele kohana ana mai mai ka opu mai o kou makuahine, pela no auanei au e hoi kohana hou aku ai iloko olaila. Nolaila, o kau mau kokua ana e kuu Haku, ke haawi aku nei au i ka'u mau mahalo ana, aka, o ko'u lalau ana iho a lawe mai i ua mau makana ala, ke hoole mai nei ko'u lunaikehala, aole loa, wahi a Silevia.

            Ia Silevia i haawi aku ai i kana pane, aia ka Haku Danekota ua ala pono mai la iluna o kona noho a me na helehelena pihoihoi haka pololei mai la oia maluna o ka lede malihini, me he mea ala, ua hoanoe a hookupilikii ia aku kona manao e kekahi mea, a o ua mea ala, heaha la ia.

            Ae, e ka mea heluhelu, ua pihoihoi na helehelena o ka Haku opio Danekota, a o kona mau noonoo hoi ua anoe koke ae la ia, no ka mea, o kela leo ana i lohe aku la e kamailio aku ana me kela mau huaolelo moakaka, he leo ia i kamaaina mua iaia, a i pinepine hoi kona lohe ana, a oia ka ua Haku opio nei i iho ai, ua kamaaina au i kela leo, a ua kupa hoi i ka oiwi kino o ka mea nona kela leo, a e na lani, o kuu Silevia no anei keia? O kela Silevia maemae no anei keia a'u i haalele a hoopoina aku ai iloko o Sekotia, Ina o kuu Silevia keia, alaila, heaha kana hana i hoea mai ai ma Danekota Kakela nei? Eia anei oia malalo o na hookonokono ana a kela hoohui mare apuka? Alaila, e makaala au no'u iho a hoike aku me ka oiaio aole oia he wahine mare na'u. Elike me ko'u hoole ana ia ma Barae, pela no anei au iloko o Ladana nei:

            O keia na olelo a me na noonoo i ala ae iloko o Haku Danekota, a iaia i anehe hou mai ai e kamailio, aia hoi, ua komo aku la ke kauwa a hoike imua o ka Haku opio, aia he makua moneka ma ke keena heluhelu a waiho buke i makemake e kamailio pu me ia, me kali ole iho i m@@ sekona kou aku. Ku ae la ua Haku Danekota nei a haalele mai la i ke keena hookipa, me ka huli ana ae maluna o kana wahine, ke kaupa wahine Kelausia, a kamailio aku la e haawi aku oia i kana mau hoolaulea ana no ka laua malihini, oiai, oia e kaawale aku ana mai ko laua alo aku, a oia ka ke kauna wahine i haawi mai ai i na kunou hoomahie ana maluna o kana kane, alaila, huli mai la kamailio ia Silevia.

            E@oole, aia ua mau lede nei o ka iwi aoao hookahi ua lilo ae la i mau hoaloha oiaio, a na ka moolelo walohia a me na huaolelo ku i ke aloha @ Silevia i hoike aku ai imua o ke kauna wahine i kaili ae i kona puuwai holookoa e lilo oia i hoaloha oiaio no keia wahine i haalele a hoowahawaha ia ma keia ao.

            Me ka moeuhane a haupu mua ole o keia kauna wahine o ka Haku Danekota ana e hoomoamoa, a e mailani nei me na haawina maemae a pau o ke aloha, o ua kanaka hookahi aia no ia a keia wahine o ka uhimaka manoanoa i haulehia pu ai iloko o ka mawae hookahi.

            E kuu hoaloha, wahi a ke kauna wahine, o na kanaka a pau elike me ia ke ano e pono lakou e kau ia me kekahi hoopai koikoi loa, a ina owau kekahi o na lunakanawai o ko Enelani nei mai aha hookolokolo, alaila o na hihia a pau o keia ano e hoea mai ana imua o'u, e kau koke no wau i kekahi hoopau koikoi loa me ka nana ole i kona kulana hanohano a i ole, haahaa paha.

            A pehea hoi, ina o kau kane kekahi kanaka e lawelawe a e hooko ana i ke ino a me ka lapuwale haahaa loa o kela nana, aa no anei oe e kuu kauna wahine e hooko i ua hoopai ala? wahi a Silevia.

            Me kuu puuwai a pau e hooko no au i ka oiaio o ka'u mau olelo, aole loa au e noho hou me ua kanaka ala i hookahi sekona mahope iho o ka hooiaio ia ana o kona hewa, haalele au iaia, haalele i kona mau mea a pau, a mawaho ae oia, e kiola no wau i kona aloha ilalo o ka lepo no ka wa mau loa a hiki i ka hopena, wahi a ke kauna wahine.

            Alaila, ike iho la o Silevia i ke kupaa hoopilimeaai ole o keia kauna wahine opio, a pehea ana la oia i na oia e lohe ana o keia Haku Danekota kana Ailika Lema e huli nei. No ka hanohano o ke koko Pelekane a me ka ihiihi o ka lalani alii no ka hale o ka Haku Waisa, alaila, he wahine hiki ole ke kauna wahine opio o Danekota Kakela ke fulu ia me na manao kolohe o ke apuka.

            Nolaila, mihi iho la ua Silevia nei i kona hewa o kona hoike ana i ka moolelo e pili ana iaia a me kana kane, a ina poha e ike a lohe ke kauna wahine a hoaloha hoi ona o ke kane no a laua ua kanaka ala, alaila, heaha ana la ka hana e hoea mai ana me kona hopena. Aka, iaia

(E nana ma ka Aoao 8.)