Ke Aloha Aina, Volume VII, Number 34, 24 August 1901 — KIPU MA EWA. [ARTICLE]

KIPU MA EWA.

Ma ka auina la Poalua nei ua lawe ia mai la no ka hoopaa ana ma ka halewai o W. Davis a me Maka Robikana he mau keiki opio no laua na makahiki ma kahi o ka 18. Ua hopu ia laua e Hope Makai Nui Fernanddez o Ewa no ke ki ana i kekahi pake nona ka inoa o Aki me ka pu panapana ma ke alanui mawaena o Hoaeae a me Waipahu. O Aki he halekuai kona ma Waipahu, a ma kana hoike e holo ana laua ma Wong Sar, ka ona o ka halekuai Waipahu mai Honouliuli mai no Waipahu ma ke ahiahi Poakahi, a ia laua ma ke alanui e hoi nei ia wa i halawai aku ai laua me elua keiki a kauoha mai la ia laua e ku. Mamuli o ko laua manao ana he mau powa keia ua kuupau aku laua i ka holo o ko laua lio. Ua hoike mai o Wong Sar ma keia wahi ua hoomaka mai la keia mau keiki e ki ia maua me na pu panapana, a hookahi poka i ku aku mahope o ke kua o Aki. Ua hoihoi aku au ia Aki no kona home a hoouna aku la i ke kauka. Ua hoike ia aku ka lohe ia Hope Makai Nui Fernandez a ua hoomaka koke aku la oia e huli i ka meheu o na limakoko. Ua loaa aku ka pu panapana a Robikana a ua ike ia he eha poka i ki ia, a ua hoke mai oia ua ki aku oia ia mau poka i kekahi mau ilio elua. No Davis aole i loaa kana pu, a ua manao ia ua kiola oia i kana pu panapana. Ua hookuu ia mai o Robikana e ka Makai Nui Kiekie, a o Davis eia no oia ke paa nei. Ua olelo ae o Davis aole oia i ike i keia ki pu, no ka mea, ua ona oia, a o Robikana ua hoole loa no hoi oia aole laua i halawai me kekahi pake ma ke alanui. O Maka Robikana oia no ke keiki a Maka Robikana o keia kulanakauhale, a o Davis oia no ke keiki a Joseph Davis, ka luna nui o ka aina hanai holoholona o Maka Robikana ma Hoaeae. Ma kahi hanai holoholona ma Hoaeae kahi i noho ai o keia mau keiki, a ma ka Poakahi nei ua pii aku laua i ka mauna i ke ki kao. Ua nui ka inu ana o Davis i ka waiona ia la holookoa a ma ka hora 9 i hoomaka mai ai laua e hoi no ka home. Ua hoike ia mai aia o Aki iloko o ke kulana nawaliwali e waiho la mai ka palapu i loaa iaia mai ka poka. A ina e make ana keia pake, he mea maopopo e loaa ana i keia mau keiki kekahi hoopai koikoi loa.