Ke Aloha Aina, Volume VII, Number 35, 31 August 1901 — Page 5
| This text was transcribed by: | Hartwig Hermann |
| This work is dedicated to: | to Kellen Paik and Lihau Hannahs |
KE ALOHA AINA
KE ALOHA AINA, POAONO, AUGATE 31. 1901. 5
NA HANA ANO NUI O KA LA 20 SEPATEMABA.
---
Hora 8:30 a. m., Kai Huakai Nui a na Limahana.
Hora 9 a. m. Ike Alii.
Hora 10 a. m. Ahaaina Nui a na Keiki Pena.
Hora 11 a. m. Haiolelo ma ke Kapitala no na Limahana.
Hora 12 m. Ike Alii Nui ma Wakinekona Hale.
Hora 2 p. m. Na Lealea Heihei mawaho o Kapiolani Paka.
Hora 8 p.m. aha Hulahula Nui ma ka Hale Paikau.
---
E HOLO AKU ANA O KUPA I WASINETONA.
---
E haalele iho ana ma ka mokuahi o ka la 17 o Sepatemaba ae nei o Kakauolelo Kupa no Wasinetona. E lawe pu aku ana oia me ia i na hoike pili aupuni o ke Teritori, i kakau ia eia i kona wa e noho nei he Kiaaina Kuikawa, a e noho ana hoi oia malaila a hiki i ka pau pono ana o kana mau hoike i ka nana akahele ia e ke Kuhina Kalaiaina.
O keia huakai a Kupa aole ia malalo o ke ano pili aupuni, aka, ma ke ano holo hoomaha, a e uku ana oia i kona mau lilo kaahele a pau, a mahope o kona waiho ana aku i kana hoike aupuni e hiki ai oia ke hele hou aku ma kana wahi i makemake ai.
E lawe pu aku ana oia i na hoike a na poo o keia a me keia keena, a me ka nee ana o ka lakou mau hana i ke aupuni o Amerika Huipuia, oia na keena o na Hana Hou, Keena Puuku, Ululaau a me Mahiai, a pela wale aku.
Malia he mau mea huna no kekahi iloko o keia huakai a Kakauolelo Kupa aole he mea i ike aku, aka, na mua aku no nae ia e hoike mai.
---
KA ONA O KA SHAMROCK II NO AMERIKA HUIPUIA.
---
Ladana, Aug. 14. I keia la i haalele iho ai o Sir Thomas Lipton ia nei no Amerika Huipuia, iwaena o na leo huro o ka lehulehu a me na leo kahoahoa no ka pomaikai o kana huakai mai na hoaloha mai. O kona keena maluna o ke kaaahi ua hoopiha ia me na pua, a iwaena o lakou he kii pua kekahi o ka moku heihei Shamrock II, he makana na Miss Morrell.
Maloko o ka huakai a Sir Thomas Lipton o Charles Russell, J. B. Hillard, a me Robert Urey, ma Livapulu e huipu mai ai o George L. Watson ka mea nana i hoolala ka moku heihei.
I ka wa a ke kaaahi e makaukau ana no ka haalele ana iho ua kahea ia aku oia e haiolelo imua o ka lehulehu, ua haawi mai oia i kona mau hoomaikai no na leo ohohia i haawi ia aku nona, a o keia iho kana haiolelo.
Ua hana kakou i na hana a pau i hiki ke hana ia, a aia ka moku iloko o na lima o na kanaka holo moku heihei akamai loa o Beritania Nui nei. A ina kakou e haule ana ua hiki no ia kakou ke hoomaopopo iho ua haule kakou i kekahi poe i oi ae ko lakou naauao i ko kakou.
Ua haalele iho o Sir Lipton iloko o na leo huro o ka lehulehu.
---
KOKOKE O FARANI ME TUREKE E KAUA.
---
Konatinopela, Aug. 21. O Kuhina Farani M. Constans, ua hoike aku la oia i ke kakauololelo ekahi a ke Suletana, o ka noho hoaloha ana mawaena o na aupuni o Farani a me Tureke ua hookaawale ia aku, a na hoike aku ua Kuhina la i kona aupuni ia mea.
O ke kumu i ala mai ai o keia kue ana aku o ke Kuhina Farani maluna no ia o ke kahua, ua hahaki ke Suletana i kana aelike, i hoohiki aku ai ia M. Constans ma kekahi anaina ma ka Halealii Yildiz ma ka Poaha, e pili ana i ke kuai ana i na uwapo a me ka hooponopono ia ana hoi o na koi a na Farani.
Ua ae pu aku ke Kuhina o ko na Aina E i kona apono e hooko i keia aelike, a nolaila, i ka ike ana o M. Constans aole i hooko ia keia hana, ua hoopuka koke ae la oia i kana hoolaha aole e hiki ia Farani ke noho hoaloha hou aku me Tureke.
Parisa; Aug. 22. Ua hoopuka ae la ka nupepa Martin ma keia kakahiaka ua hala aku la ka mokukaua holomama o ka papa elua Cassard no na wai o Tureke ma ka la inehinei, a eia he mahele o na mokukaua ua makaukau no ka ukali ana aku iaia.
---
HOLOPONO KA HOLO ANA O NA KAA UWILA.
---
Ma ka hora 3 ka auina la Poaha nei ua hoao ia ae la ka hooholo ana i na kaa uwila ma na alanui i hoomoe ia iho noi kona alahao ma ke alanui Hotele, Moi a me Liliha, a me waho o Punahou a o ka hopena o keia mau hoao ana ua ike ia ka holopono o ka holo ana o na kaa, ka nee mua ana, ea emi hope, ke ku ana a pela aku, a ua lilo lakou i mea maikai nui ia e ka lehulehu o keia kulanakauhale nei.
Ma ka hora 2 o keia auina la Poaono, e hoomaka ai ka holo o na kaa uwila ma na alanui a pau a kona mau alahao i hoomoe ia ai. E hokaawale ia ana he hookahi kaa no ka puali puhioe aupuni, no na lala o keia hui, na luna aupuni a me na poe i kono ia.
---
LAWE HOU O DOLE I KE KULANA KIAAINA.
---
Mahope a ka hoomaha ana iho nei o Kiaaina Dole no eha mahina ma o ka nawaliwali o kona ola kino, a i haawi ia aku hoi ia Kakauolelo Kupa ke kulana hookele aupuni ma ke ano he Kiaaina Kuikawa no ke Teritori o Hawaii. Ma ka Poalima nei Augate 30, ua lawe hou ae la oia i kona kulana Kiaaina me ka hoomau hou aku hoi i ka lawelawe ana i na hana pili aupuni o kona keena.
---
HE LUNA AUPUNI PILIPINE.
---
Ua hoea mai la ma ka mokuahi Sonoma o ka Poakolu nei, mai Kapalakiko mai o Sixto Lopez, ka luna aupuni o Aguinaldo i hooikaika mai nei no ka loaa ana ia lakou o ka noho kuokoa ana ma Europa a me Amerika Huipuia.
Ua noho iki iho la oia no kekahi mau la ma keia kulanakauhale no ka hakilo ana i ke kulana lawelawe aupuni maanei, a huli hoi loa aku no Manila malalo o ke kauoha a Aguinaldo no ka hoi ana aku e kuka pu me ia a me ka lahui Pilipine i ka lakou hana kupono e lawelawe ai no ka hoohui ana aku me Amerika.
O ka Lopez kahua hana i hoolala ai oia no kana i manao ai e hooko aku, oia no ka ae ana aku ia Amerika e hoomalu mai maluna o na paemoku Pilipine, aka, aole loa nae e hoohui aina aku me ia. Wahia Lopez, o ko'u mau hoakanaka ua loaa ia lakou he kuleana e noho kuokoa ai a na kupono hoi e loaa ia lakou ia pono. No ka mea, o ka naauao o na Pilipine he kiekie ae ia mamua o ka hapanui o na aupuni o Europa. He 70 pa keneta o ko'u lahui i hiki ke heluhelu a me ke kakau kue ia Italia he 58 pa keneta. O ko makou makemake e hoomalu mai o Amerika a e loaa ia makou he aupuni Kuoka, a o ka Hoohuiaina e kue mau aku no makou a hiki i ka hopena. Onipaa io no ke aloha aina o na Pilipine no ko lakou aina.
---
Nui ka wela o keia mau la e nee nei.
He $25,000 ka pili i hana ia aku la e C. Oliver Iselin me C. Arthur o Ladana, oia hoi, na ke Corstitution ka lanakila o ka heihei mawaena ona a me ka Shamrock II.
Ma ka pau ana ae la o na hemahema o na kaa uwila ua hoomaopopo loa ia e pau ana kekahi mau ohua e hoopomaikai mau nei i ka hui kaa hapaumi i ka lilo i keia hui kaa hou.
---
Nuhou Kuloko.
---
E lawe nui i KE ALOHA AINA i ike mau i na mea hou o keia mau la e nee nei.
He huakai makaikai kai holo aku ma ka moku manu o Nihoa ma ka La Pule iho nei ma ka mokuahi Mikahala.
Ua lawe ae ia o Hope Loio Kuhina Cathcart i ke kulana loio kuhina i ka wa i kaawale aku la o E. P. Dole.
Ua hoi mai nei o Sam. Paka i ke kaulanakauhale nei, a ke noho nei ma ka home o Allan Herbert no kekahi mau pule.
E paa ana na keena aupuni a pau ma ka Poakahi ae nei, Sept. 2, La Kulaia o na Limahana, malalo o ke kuahaua a Peresidena Makinile.
He kuai hoemi nui loa ka Iwakami e malama ana i keia Poaono, ma kona helekuai. Ua kono akea ia ka lehulehu e naue nui ae malaila.
Aia maloko o ke Keena o Penikalaka e loaa no o Robert Puuki, he kanaka makaukau loa ma ka oihana Ana Aina, e nana ae i kana hoolaha e puka aku nei.
Ua unuhi ae la o Mrs. Lena Kumalae i kana hoopii oki mare i kana kane Jonah Kumalae, a e hoomau hou hoi laua i ka noho kane a wahine ana.
Ua loaa mai la he mau hoike no ka haalele ana mai la i keia ola ana o J. Kaialoa. He kupa a he kamaaina oia no Anahola, Kauai, a he luna pepa no KE ALOHA AINA.
Ua loaa mai nei ia makou he hoike no ka haalele ana mai la o Keomaka i keia ola ana, he kupa no ka I'a Hamauleo, ma kona home ma Kaluamano ma ka Poalua nei.
Ua loaa mai nei na lono maluna o ka Meade no ka hoea ana aku la o Emaluka i Kapalakiko, aia oia ke noho la ma ka Hotele Occidental no kekahi mau la pokole, a hoomau loa aku i kona alahele no ka Hikina no ke kipa ana aku e ike i kona home o na la opio ma Cincinnati.
---
ROBERT PUUKI
HE ANA AINA MAKAUKAU.
---
E loaa na oia ma ke Keena o J. K. Penikalaka, (Kapamawaho), Rumi Helu 13; Hale Oihana o Makuna. Kihi o Alanui Kalepa me Alakea.
Aug. 27 - 3m.
---
Waapa Loaa.
---
Ua loaa ia'u kekahi Waapa Kiki, mai ke kai mai ka pae ana mai, ma ko'u wahi noho ma Nahoko, Kalulu, Mokupuni o Lanai nei. Ke malama ia nei e a'u, o ka manawa e ike ai o ka mea nona keia waapa i keia hoolaha, e kii koke mai oia, a e hoihoi pu mai i ko'u mau lilo no ka hoolaha ana a me ka malama ana: A i kii ole mai oia a hala na la he 15 lilo ia'u keia waapa.
KEONI NAKIHEI.
Nahoko, Lanai Aug. 20, 1901.