Ke Aloha Aina, Volume VII, Number 40, 5 October 1901 — Page 3

KE ALOHA AINA

 

KE ALOHA AINA, POAONO, OKATOBA 5, 1901        

 

HUI KEAKA O NA OPIO.

 

            O ka hui keaka o na opio i kipa mai la i keia kulanakauhale mai Auseteralia mai, a e paani nei maloko o ka Hale Mele Hou i keia mau po, oia ka hui keaka mua loa i hiki mai i Hawaii nei he mau keiki liilii wale no na poe keaka o loko oia hui e hoomaka ana na makahiki mai ka ehiku a hiki i ka umikumamaha.  O ka nui o na keiki o loko o keia hui keaka he 38, a mawaena o lakou he 33 kaikamahine a me 5 keikikane.  O kekahi mau wahi keaka a na keikikane ua lawe ia ae ia e na kaikamahine i kahiko ia iloko o na aahu kane.

            O ke kumu o ke emi loa o na keikikane, wahi a ka hoike a na poe e hoomalu nei ia lakou, mamuli no ia o ka ike ia ua hiki ke hoomalu ia he eono kaikamahine i ke keikikane hookahi, a he oi ae hoi ka hoohaunaele o ke keiki kane hookai i na kaikamahine he eono.  O keia mau keiki a pau ua lawe ia mai lakou a pau mai kekahi apana mai o ke kulana kauhale o Melbourne.  A aole hoi he wahi hou ae i loaa na keiki noonoo maikai e like la me ko keia wahi.

            Ua hoao ia no na keiki o ke kulanakauhale o Sidane, aka, aole nae i loaa ia lakou ka naauao aapo ma keia hana elike la me na keiki oloko o ke kulanakauhale o Melbourne.

            He hapa@@i o na keiki o loko a keia hui keaka aole he mau makua kuonoono ko lakou, aka, he poe keiki na na makua ilihune i hiki ole ke malama ia lakou aka, ua loaa nae na kokua ana i na makua mai na keiki aku, a ke hoouna liilii ia nei ka lakou mau loaa no na makua e noho mai la iloko o ka hune.

            Malalo o na kanawai o ke aupuni o Auseteralia aole he hiki i na keiki liilii ke haalele i na a’o ana i na haawina hoonaauao, nolaila, ua hooholoia e hele pu me keia mau keiki ma na wahi a pau a lokou e kaahele ai he kumu mai ke keena hoonaauao mai o Melbourne, a o kana apana hana wale no ia o ke a’o ana i na keiki keaka he hookahi hora o ka la, mawaena o ka hora 2 a me ka hora 3 o ka auina la.  Aole he haawina palapala aina a lakou e a’o nei no ka mea, eia ko lakou mau kapuai ke kaapuni nei i ka poepoe honua, a ua oi loa aku hoi ia mamua o ka poe i hele a lehia i ka palapala aina, aka, aole nae lakou i ike he wahi lihi aina hou aku mai kona wahi i hanau ia ai.

            O ke a’o ana i na keiki i na kulana keaka pakahi a lakou e lawe lawe ai no ka paani ana aku imua o ka lehulehu he hana paakiki no.  O ka nui o na kumu e a’o ai ia lakou e lilo ana no ia i mea e l@@ pio@ ia ai ka manao o na keiki a e poina ana ka lakou mau haawina e lawe ai, o ka mea pono wale no oia ka haawi ana na ke kumu hookahi e a’o ia lakou.

            O ke kumu nana e a’o nei i na opio i ke keaka he keiki wale no oia o 17 makahiki, aka, no umi makahiki nae a oi kona hele pu ana me na hui keaka nui ua loaa iaia ka makaukau piha no ke a’o ana aku i keia mau keiki liilii, a oia mau a’o ana a ua keiki la ua ik@@@ ka @oeau, a ua oi loa aku hoi @@@ @@ i o ka paani ana a keia hui keaka o na ukulii i kekahi mau hui keaka i piha me na kanaka makua i kipa mai i anei.

            Ma ka ike a na poe makaikai a pau i hoea aku i keia mau po a keia hui keaka o na opio e paani mai nei, he ui maoli no e manao ole ia aku ai lakou he mau keiki liilii, aka, na ko lakou mau oiwi nae e hoike mai ana he mau kamaiki lakou.  O na himeni ana he nani, o na hooipoipo he ku i ka mikomiko, a nolaila, mai hoohaule e na makamaka Hawaii i ke kipa ana ae e ike ia lakou.

 

KUPILIKII KE KULANA O NA KUMUKULA.

 

            Ma ka hoea ana mai la a ka mokuahi Dorika mai Kina a me Iapana mai, ua lawe mai la oia he mau hoike no na kumukula he 600 i kipa mai ai i anei a hala loa aku la no Manila maluna o ka moku lawekoa Thomas no ke a’o ana i na keiki o na paemoku Pilipine.  Iloko o ko lakou mau puuwai aole lakou i manaolana mua he nui na pilikia e halawai ana me lakou ma ko lakou noho ana aku i ua paemoku la, a o na manao hauoli no ko lakou liko ana he mau kumukula no keia paemoku oia na mea e lalawe ana iloko o ko lakou mau puuwai.

            Aka, i ko lakou hoea ana aku a ike pono i ke kulana ma Pilipine ua huli hope mai la ko lakou manao no ka home, a komo mai la hoi na manao mihi iloko o lakou no keia au ana i ke kai loa a ma kahi o ka manaolana no ka hauoki ua papahi ia mai la e na manao o ke kaumaha a me ka ehaeha.

            I ka hoea ana aku o ka Thomas i Manila, ua malama ia he halawai mawaena o na kumukula a me Kahu Kula Nui, Kauka F. W. Atkinson no kekahi mau manawa lehulehu.  Maloko oia mau halawai ua hoike aku o Atkinson, aole ka aina iloko o ka maluhia, a he manawa wale no no ke kana e poha ae ai ma kekahi mau wahi a ua hooialo ia keia mau olelo a Atkinson, no ka mea, iloko o keia wa a na kumukula e halawai mau nei ua poha ae la he kaua mawaena o na Amerika a me na Pilipine ma kahi he mau mile wale no mai Manila aku, a na make he elua koa Amerika a me elua kahunapule.  Ua hoouna ia aku he pualikoa no ka hoopio ana i keia haunaele a he 17 Pilipine i mak@.

            O kekahi o na mea a Atkinson i hoike hou aku ai, o ke kuleana o ke kuai ana i na lako ma ke keena hoolako kaua Amerika, aole ia i loaa i na kumukula.  Na keia mea i hoopiha loa i na kumukula me ka inaina me ka hana ana i palapala hoopii ia Peresidena Makinile.  O na pilikia a na kumukula i ike ai ma ia hopo iho e hookau liilii ia aku ana lakou iwaena o na kulanakauhale i loaa ole ka maluhia, a o na haumana paha a lakou e a’o ana i keia la o ko lakou mau enemi no ia nana e kipu a i ole e hou mai ana i ka pahi ma ka la apopo.  Ma kekahi mau wahi aole he mau hale hoolimalima, a ihea ana la lakou a noho ai, e oi aku ana ko lakou mau hoolilo mamua o ko lakou mau uku mahina.

            Me keia mau popilikia ua ae ole aku la kekahi poe kumukula e noho ma Manila, a ua haalele aku la lakou ia laila maluna no o ka moku lawekoe.  Thomas no Amerika Huipuia.

 

UA HALA HOU AKU LA NO HAWAII.

 

            Maluna o ka mokuahi Kinau o ka Poalua i kau aku ai o Komisina Aina E.S. Boe no Waimanu, Hamakua, no kekahi huakai pili, oihana i ke awawa o Waimanu.  O kana hana malaila oia no ka noii ana i ke kumu i hoea mai ai o kela ahi nana i hooneoneo aku he 500 eka i ka mahina aku nei o Iulai, a ua manaoia ua lawelawe ia e ka manao kolohe o ke kanaka.  A ina e loaa ana ka mea nana keia mau hana hoopoino i ka aina he mea maopopo loa e loaa ana iaia he uku hoopai no ka hewa ana i lawelawe ai.

            Malaila pu e hoolohe ana oia i na hoopii i waiho ia mai no L. Akaka, ka mea e hoolimalima nei i na aina aupuni ma ke awawa o Waimanu, no ka lawe wa’e ana i kekahi mau aina i komo ole maloko o kana hoolimalima ana.

            E nana ana o Komisina Boe i kona wa malaila i kahi kupono e hoolilo aku ai i mau home hookunoono no na poe nele aina ma keia mua aku.  E hala ana ia Boe he mau pule ma keia huakai a hu@ hoi mai.

            Ua like ka Poaono nei, me he La Pule la, ka paa o na halekuai a me ka mehameha o na alanui i na kanaka.

 

HUI HAWAIIAN REALTY A ME MATURITY KAUPALENAIA.

 

HUINA KUMU, $50,000

590 Mahele, $10 Pakahi Uku Pihaia

 

            Na Lunanui::--L. K. Ke@ewel@--

Peresidena, W. J. @@@@@@--@@@@

Peresidena K, Ahlo –Puuku, P. H.

Burnette—Kakauelele.

 

            Ke haawi aku nei ka Hawaiian Realty a me Maturity Kaapalenaia i ka lehulehu i kekahi hana maikai loa no ka malama ana a hoouluulu ana hoi i na wahi kenikeni i kela a me keia mahina.  E kukulu ao makou i hale nou a hoopuka@ i $200 ma kou inoa, a haawi aku makou ia oukou i 75 mahina e uku mai ai i keia mau dala me ka loaa pu aku o kekahi mau palapala no lakou ka waiwai pakahi he $50, ua like ia me 109 mahina e uku ia ai o ka pepa hookahi, ala ila, kaa deia mau dala.  He elua wale no au dala e uku ai i kela a me keia mahina a i ka pau ana @75 mahina ua ukuia e oe he $150, oiai no nae, he $200 i loaa aku ia oe.

            He 45 apana aina i kupono no ke kukulu hale a makou i keia manawa.

            No na mea aku i koe e hele ae i ko makou keena.

 

HUI HAWAIIAN REALTY A ME

MATURITY KAUPALENAIA.

Maluna ae o Kakela a me Kuke.

            Alanui Moi.

            Aia kekahi keena o makou ma Hilo.  O M. E. Silva ko makou Agena

 

KAA BAIKIKALA LOAA.

 

            Ua loaa ma ke alanui Beritania he Kaa Baikikala, a o ka mea nona keia kaa e kii mai i ke keena o Ke Aloha Aina nei, me kona uku pu mai i @@ hoolaha a me ka mea nana i malama.

 

NOA W. ALULI

 

HE LOIO A HE KOKUA MA KE KANAWAI.

 

            Ua makaukau oia e lawelawe i na hihia o kela a me keia ano imua o na Aha a pau o ke Teritori.

            E loaa no oia ma ka Rumi Helu 32 ma ka Hale Pohaku o Kimo Ona iliona (Campbell Block) ma ke Ala nui Papu me Kalepa.

            aug 22—3m

 

ROBERT PUUKI

 

HE ANA AINA MAKAUKAU.

 

            E loaa na oia ma ke Keena o J. K. Penikalaka.  (Kapamawaho), Rumi Helu 13; Hale Oihana o Makuna.  Kihi o Alanui Kalepa me Alakea.

            aug 27—3m.

 

G. P. KAUIMAKAOLE

 

            He Loio ma ke Kanawai, a e loaa no wau i ka Uakea o Hana ma Makaalae.  he oluolu ma ke kuka ana.

            Makaalae, Hamoa, Maui.

           

A.     A.  N. SNFORD.

KAUKA MAKA

Rumi 206 me 207 Boston Building

            Alanui Papu, mawaena o Hotele & Moi Honolulu.

 

OLELO HOOLAHA.

 

            Ua loaa ia’u kekahi lio wahine ulaula i kuni ia i ka hao YLX ma ka uha none, lae kea nui ekolu wawae keokeo.  Ina o ka mea nona keia lio e kii koke mai iloko o na la he 15 me ka uku pu mai i na lilo a pau me ka luhi o ko’u malama ana, a i kii ole ia mai a hala na la he 15 e lilo loa no ia’u keia lio.

            KEOI INAIA.

            Maunalua, Sept 11, 1901.  2w