Ke Aloha Aina, Volume VII, Number 42, 19 October 1901 — Page 6

KE ALOHA AINA, POAONO, OKATOBA 19, 1901.

 

KA LUAKINI KAUMAKAPILI HOU.

            Oiai, ua ae mai la ke Komisina Poho Ahi e uku i na dala he $50,000 a ka papa kahu waiwai o ka ekalesia o Kaumakapili i waiho aku ai no ia luakini i hoopoino ia iho nei e ka pauahi nui o ka 1900. Ua hooholo ia e kukulu hou ia aku ia luakini i ka wa e loaa mai ai o keia puu dala i hoike ia ae la maluna.

            O ke kahua o keia luakini hou e ku ai aole ia ma kahi mua i pau iho nei i ke ahi, aka, mauka ae nei ia o Kapalama, ma ke kihi o na alanui Pupule a me Moi, a mauka pono iho o ke kula hoopololei o Keoneula.

            He apana nui keia o 72,00 kapuai, a ua pakolu kona mahuahua i ke kahua mua a ia luakini i ku iho nei, a i kuapo ia me na kahu waiwai o Bihopa, oiai, ke kahua mua e lilo aku ana no ke kukulu ia ana i mau hale oihana a me ka hooloihi ia ana o ke alanui Kamika mai ke alanui Beritania aku a hiki i ke alanui Kukui.

            Maluna o keia kahua hou e kukulu pu ia ana ka hale noho o ke kahu me kahi mau hale e ae i pili no ka pono. O ka luakini kaumakapili mua ua kukuluia ia i ka 1833 a hoolaa ia i ka 1838 malalo o ka hooikaika ana a Lowela Kamika. O ka luakini i ulupa ia iho la o ke ahi a e ku olohelohe nei kona mau paia i hoomanawanui ia e na alii, a o ka oi loa no paha iwaena o lakou oia ka Moi Kalakaua a me kona kaikuahine ka Moiwahine Liliuokalani, a malalo o ko ka Moi Kalakaua makemake i kukulu ia ai he elua puoa o Kaumakapili e hoohalike ana me na lala o ke kanaka he elua ona mau pepeiao, elua maka, elua lima a me elua wawae.

            Aka, i ka wa nae i lilo ae nei o ka mana o ka haole ua hoomaunauna ia aku la keia luhi o na la i hala aku la. Ua olelo ia ae aohe luakini kilakila a me ka nani o kona kulana e like me Kaumakapili i hamu ia iho la e ke ahi e hiki ke pani hou aku ma kona hakahaka ma keia mua aku.

 

 

KE OHI NEI I MAU LUINA HAWAII.

            Eia ka laina mokuahi Amerika-Hawaii nona na mokuahi nunui ekolu e holo nei mawaena o Nu Ioka, Kapalakiko a me Hawaii nei e kapaia nei o Ameriaka, Oregona a me kaleponi, ke manao nei e ohi aku i mau Hawaii wale no na luina o keia mau mokuahi. O ke kumu ua ike ia he poe manao io hana, he eleu, aohe molowa, a aole na Hawaii he poe hooulu i na haunaele.

            I ka wa a ka mokuahi Kaleponi i hoea mua mai ai i keia awa na lawe pu aku oia iwaena o kina mau luina he elima mau keiki Hawaii, a ma ka hoike a kona kapena aole he manawa a lakou i hoouluhua aku ai iaia a i ole hooulu ae i na hana hoohaunaele maluna o ka moku, ua like no ko lakou hana me na ili keokeo, a aole hoi o lakou makau i ke anu.

            Na keia mau hana maikai a keia mau Hawaii i hookuli mai i na manao o keia hui e lilo na luina o ko lakou mau moku i mau Hawaii wale no a pela na kulana paoahi. O ka uku mahina o na luina he $25. He alahele maalahi keia no na poe Hawaii e hoolilo nei i na ale hanupanupa o ka moana i mau home no lakou, mamua o ka holo hana ana maluna o na moku kalepa ka moku i oleloia he moku puanuanu o ka ili. He nui na keiki Hawaii e ohi ia nei no kona huli hoi ana aku no Nu Ioka.

 

 

NUI NA HALE INU MA HONOLULU NEI.

            O ka nui o na hale inu rama ma Honolulu nei i keia wa ua hiki aku no ia i ke 42, a ua hoea mai keia heluna mahuahua i ka wa i kukulu ia ae nei o ka hale hana bia ma keia kulanakauhale. Mai kona ku ana a hiki i keia wa ua hoopuka ia e ke aupuni he 21 mau laikini bia, a o na bia wale no i hana ia ma Honolulu nei ka lakou e kuai ai, a na helu pu ia aku hoi lakou he mau hale kuai rama.

            O na laikini bia i hoopuka ia a me na kahua i ae ia aku no lakou e ke aupuni, penei no ia:

            Harry Klemme, Kakaako; Charles Wessels, 604 Alanui Moiwahine; J. F. Figueredo, Alanui Moiwahine kokoke i Alanui Hema; P. F. Ryan, Alanui Moi, mauka o kahi hoolulu kaaahi; Eugeme P. Sullivan, iwilei, hale hana sopa; Halaiaro Migamoto, Alanui Kukui, Ewa o Nuuanu; Henry C. Vida, Iwilei; John H. Thompson, Alanui Moiwahine me Puowai@a; D. S. Camarino, Alanui Alakea; Harry Dobson, Alanui Hema; Albert Ludloff, Alanui Liliha me Kula; George I Cavanaugh, Alanui Puowaina me Halekauwila; D. H. Davis, alanui Moi, Palama; W. M. Cunningham, Alanui Alakea; W. C. Firenell, Alanui Moiwahine; J. J. Sullivan, Alanui Moiwahine a me Mililani; W. R. Lewis, Alanui moi ma kahi hoolulu kaa hapaumi; W. W. Caryle, Alanui Papu, mawaena o ka Beritania a me Kukui; a he hookahi ma ke kihi o Alanui Kinau a me Puowaina.

            O na halekuai waiona maoli ke uku nei lakou i ka laikini he $1,000 i ka makahiki, a o keia mau halekuai bia liilii he $250, a o na halekuai kukaa ke uku nei lakou he $500. A ke hoohui ia na loaa a pau o ke aupuni mai keia mau hale inu rama no ka laikini ma kahi no ia he $40,000 no ka makahiki.

 

 

KA OLELO HOIKE A JAMES H. K. KAIWI

Ia Mrs. E. A. Nawahi;

                                    Aloha oe:-

            E oluolu e hoolaha ae i ka olelo hoike a James H. K. Kaiwi ma ka Nupepa: KE ALOHA AINA. He olelo hoike ano nui keia i hoohemahema ia e ka Lio: a oiai, aole i pau ka oni ana no kela hana. Ke nonoi nei au i kou oluolu, e hoolaha ae i keia olelo hoike.

            Me ka haahaa,

                        Edward kekoa.

            Hilo Oct. 11, 1901.

 

            Ma ka la 19 o Nov. M. H. 1899, ua ku au ma Honolulu, mai Kauai nei aku. Ua hele au i ka pule ma ka luakini o Kaumakapili.

            I ka hookuu ana o ka pule, puka iwaho, a ma ke alapii o ka halepule, ua loaa mai la wai i kuu kaikuahine Mrs. Ane Holokahiki. Ua lulu lima pu maua, a iho mai la a ma ke alanui aupuni mawaho o ka puka pa o ka halepule.

            Ua koi wau iaia, e kau mana ma ke kaa, hoole mai kela ia'u me ka olelo mai, he makemake oia e hoi wawae no maua a hiki i ka hale i loihi ka maua kamailio ana, nolaila, ua hoi wawae no maua.

            Olelo mai oia ia'u i Molokai aku nei au, a o ko'u hoi ana mai nei no ia la, no ka hoopau ana i kela apana hana a kakou me Barenaba, au i holo ae ai i Waialua; a ua pono mai nei hoi na mea a pau. A pela pu me kahi apana aina o Hilo a kunane me na keiki a kakou e noho mai la. O ko'u makemake, o kahi apana aina o Hilo no kahi kaikunane o kakou, ke kanaka nana e noho hoomanawanui mai la me na keiki.

            Ua ninau aku au, heaha kau hana i makemake ai e hana aku ia kunane? Ua pane mai kela, makemake au e hana aku i pala pala kuai, e hoolilo ana i kahi apana aina o Hilo nona, me ia mau keiki a kakou.

            Ua pane hou aku au, maikai loa kela manao ou e hana peia; o kou alohe ana ia aku no o Hilo, na pumehana kauhale; e hana koke aku oe i kela manao maikai ou.

            Ua ninau hou aku au iaia, ina paha ua hana oia he palapala kuai palapala kauoha paha: Ua ninau hou aku au iaia, ina paha na hana oia he palapala kuai a palapala kauoha paha: Ua pane mai oia ia'u, aole a'u palapala kuai, a kauoha i hana ai. Oia hoi kau mea e makemake ae la, e hana aku au i palapala kuai no kunane me na keiki.

            Ma ka uwapo o Peleila, olelo hou mai kela ia'u, e kunane, e kaomi ikaika mai oe i ko lima i kuu kua. Ua hana wau me ka ikaika ma ia wahi, a hoao houau iaia e kau mana ma ke kaa pio; hoole mau no kela, a mau no ko mana pii wawae ana.

            A mawaho o ka hale o Mr. Hart, ua olelo mai la kela ia'u e hooikaika wau a komo maua i ka hale o Paahao; oiai wahi ana, ke ikaika loa iho la ka eha iaia, me ka olelo mai, he wahi eha mau no keia ia ia'u. Nolaila, ua komo pu maua iloko o kahi o Ipuhao, a hoomoe iaia.

            Hoi wau a hiki i ka hale, hoike au ia ka'u wahine, e kii ia Kahananui a me na keiki, ua ma'i loa ia o kuahine Ane, aia i ka hale o Ipuhao i moe ai. A pau no hoi ko'u ike hou ana iaia ia la, a ma ia po, lohe ae la au, ua make ia oia. Mrs. Ane Holokahiki.

            O keia mau olelo a pau maluna ae he oiaio loa. A ke hoohiki nei wau imua o ke Akua Mana Loa.

            JAMES H. K. KAIWI.

Subscribed and sworn to before me this 29 day of January A. D. 1901.

            N. Fernandez,

                        Notary Public,

                                    First Judicial,

                                                Circuit Territory of Hawaii.

 

 

MAULE MALOKO O KA LUAKINI KATOLIKA.

            O na hoikeike a Makua Boarman e pili ana i ka luahi o Gehena i haiolelo mai ai imua o ke anaina kanaka i akoakoa aku maloko o ka luakini Katolika ma ka po Poalua nei, ua komo loa aku ka ikaika o kana olelo iloko o ka puuwai o kekahi wahine, e hoike ana i ka weliweli o ka luahi o Gehena, kahi i oleloia aole he wahi e maha ai no na poe hewa, aka, e uwe ana lakou i ka po a me ke ao. O ka hopena i ike ia ua maule keia wahine i ka wa a Makua Boarman e haiolelo ana, a o ke anaina ua hoopioo ia.

            O ke kahua o ka haiolelo a Boarman maluna no ia o ka ninau he luahi a i ole aole paha he luahi no, a ua hoike mai oia i na kumu ana hilinai ai, a o ka panina o kana haiolelo na kono mai oia i ke anaina e hahai aku mahope o Karisto ma ona la e loaa ai ke ola.

 

            Ua piha a hu mawaho ka halekeaka lio i na poe makaikai ma ka lakou wehe keaka mua ma ka po Poakahi nei.