Ke Aloha Aina, Volume VII, Number 47, 23 November 1901 — Page 5

KE ALOHA AINA POAONO , NOVEMABA 23, ??

 

__________________________

 

 

 

?he hiki ke lawelawe i ka oi-hana.

            E kala aku paha makou ia oe na wai auanei oe e kala mai, a o ka makou a'o ia oe mai puni hou oe ke lulu ia a mai hai hou mai oe i kahi mea oiaio ole ke ninau hou ia aku oe e makou e ka poe kakau nupepa, oiai, o ko makou kuleana ia o ka huli o ka imi o ka ninau i na mea hou like ole o na ano a pau no ka nupepa.

            Gude bai, Williman Kalaehao

 

__________________________

 

KA FEA A ME KA LUAU E MALAMA IA ANA MA KE KAHUA PAIKAU O HAIMOEIPO.

 

__________________________

 

            E hoomanao e ka lehulehu he aha fea nui o na mea hana lima like ole ke kuai ia ana ma keia Poaono ae Nov. 30; a he mau pa kaukau ona mea ai Hawaii ono loa kekahi e malama pu ia ana ma ia la, malalo o na hoopono-pono ana a Miss Lucy K. Pea-body a me Mrs. Mary K. Still-man (e nui ana ka ono). O na loaa apau o keia fea no kela ha-lekula Katolika no ia e kukulu ia nei ma ke alanui Papu. No laila, ke kono akea ia nei ka le-hulehu e hele ilaila, a e haawi i ka oukou mau kokua ana no keia hana maikai i pili i ka pono o ka hoonaauao ia ana o na keiki a kakou.

            Ua makemake pu ia na poe haumana kahiko i hoonaauao mua ia ma ia kula e haawi mai i ka lakou kokua ana no keia fea a me na poe no a pau. E naue ae i ike kumaka i na mea nani a i ai hoi i na mea ono a pau a keia mau le-de maiau i lawa ma ka hookele ana i na ono like ole a ka Hawaii e hoouna ia ae ana a piha na pa kaukau ma ia la. Ke lana nei ko makou manao no ka holopono o keia fea.

 

__________________________

 

KUE IA NA HANA HOOKAMA KEIKI.

__________________________

 

            Ua haawi ia ae la, he kauoha maloko o ka Aha Kaapuni ma ke kakahiaka Poakahi nei e pili ana i na hana hookama keiki e lawe-lawe ia nei e kekahi poe Hawaii e hoopau loa ia aku ia. O keia kauoha na hana ia e Lunakana-wai Humepera mahope iho o ke kue ia ana o ke noi a Thomas Duncan me kana wahine, Keau, i ka ae ia ana aku e hookama i ka laua keiki nona kainoa o Thomas, a nona na makahiki he 10 ia Patrick Cockett. Ua hoolohe mai ka aha i ka palapala noi a ka makuakane a me ka makuahine a me ke keiki, a pela hoi me ka Mr. Cockett. Mahope iho o ka pau ana i ka hoolohe ua pane mai ka aha ua hiki no i ka makuakue ke malama i ke keiki, oiai, ke loaa nei no iaia he $5 o ka la, a he kanaka naauao hoi, a he naauao no hoi keia keiki, aole loa he kumu kupono nona e haalele ai i kona mau makua.

            He mea hikilele no'u wahi a ka Lunakanawai, ka ae ana aku e haawi i ke aloha o ka olua keiki ia hai. Ua hoea mai ka manawa e hoopau ia ai keia hana maloko o keia lahui kanaka, a e hoolohe hoi kakou i na kanawai o ke Akua me ko ke Teritori.

            He hana kupono ole na na ma-kua ka hookaawale ana aku i ke aloha o ke keiki ma keia ano. O ka berita ia ana o ke kane a me ka wahine aole loa ia i oi ae ma-mua o ka hoopaa ia ana o ka ma-kua a me ke keiki, a he hana ma-ikai ole na ka makuakane a me ka makuahine ka makemake ana e hooko i keia mea.

            Nolaila, ke hoole nei au i keia palapala noi, a ke kamailio nei au, o na palapala noi a pau o ke-ia ano like e waiho ia mai ana ma keia mua aku e hoole loa ia no.

            __________________________

 

POINO HOU HE MAU AMERIKA

__________________________

 

            ?, Samar, Nov. 7. O Lutanela Ekahi Robert Crawford a me hookahi kakiana a me elima kanaka ua piholo a make iloko o ka muliwai Babyon, ma Samar, oiai, lakou e hoao ana e hele no kekahi aoao o ua muliwai la.

            Ke ala mai nei na Pilipine ma ka mokupuni o Leyte, a ma ka mokupuni o Leyte, a ma ka la ine-hinei ua lele kaua aku lakou ma ke taona o Mattion. Ua oki ia e na Piline ka uwea telegarapa ma ?, a oiai kekahi puali koa Amerika e hooponopono ana i keia wahi poino ua lele kue mai na Pili-pine, aka, ua hauheeia aku no nae lakou.

            Wasinetoa, Nov 9. Ua telega-rapa mai la o Ria Adimarala Rod-gers mai Manila mai i ke Keena Kaua Moana, penei:

            Ua make he elua mau koa no la-ua na inoa Geo. Lynch a me E.A. Klonana ma kekahi kaua ma kahi kokoke ma Bass?, Samar, me na Pilipine ma ka la 7 nei.

__________________________

 

UA HALA AKU LA NO WASI-NETONA.

__________________________

 

            Ma ka mokuahi Miowera i ha-la aku la no Vanekona i kau aku ai o Edgar Caypless, a mailaila aku oia e hele ai no Seattle. Ua olelo ae kekahi poe o keia holo ana aku la a Caypless no ka hele ana aku no ia i Wasinetona e noi ai oia ke hookohu ia mai ma ke kulana Lunakanawai Ekolu no ka Aha Kaapuni.

            O keia na mea i koho wale ia aka, malie paha o ke kumu nui no ia o keia huakai a Caypless.

__________________________

 

            Eia na kaa uwila ke holo nei ma ke alanui Moi mawaena o ke alanui Liliha a me ke Kula Kamehameha.

__________________________

 

Mai ka aoao I mai.

 

__________________________

 

me ka manao e ki aku, aka, ua ala mai la ko'u alakai he kana-ka Hawaii me ka lalau ana mai i ka pu a noi mai la aole e ki aku. Wahi ana, aole oia i ike i ka moo, ma kona hilinai nae i ka olelo a kona makuakane he 80 ae nei makahiki i hala he moo keia. O ka inoa o keia moo o Kihanui-lulumoku, a i ke au kahiko ua kiola ia aku na keiki iloko o ke kai na keia moo i ko lakou wa e makemake ai i ko lakou hoaloha. Ma o ka noi ana a kuu alakai ua ku aku la au i ka'u pu i ka lewa a na la mea i hoopaa i na moo Akua nei, aka, ua hoomau mai no nae oia i ka mele ana me ka hoi hou ole aku ihope.

            O kekahi o kana mau leo he maikai, aka, aole he loaa ia'u o ka olelo. O ko'u manao e hime-ni ana oia ma ka olelo Hawaii, he olelo hoi i loaa pono ole ia'u, Me ke kali hou ole aku ua haa-lele iho la maua i keia wahi.

__________________________

 

HOOWELIWELI IA O KANSAS

__________________________

 

            Leavensworth, Kansas, Nov. 7. He 26 paahao i pakele mai ka hale paahao hou o Amerika maanei i keia auina la. Me elua pu pana-pana i haawi malu ia aku ia lakou ua hopu aku la lakou i na koa kiai ekolu me ke kaili ana ae i ka lakou mau pu raifela, ua malama aku la-kou he hakaka uhaiaholo me keka-hi mau kiai e ae, ua wawahi pu aku lakou i ka ipuka o waho o ka panaaleo a holo aku la no ko lakou wahi e pakele ai.

            Ua lawe pu aku lakou ia Luna Nui Frank Hinds me lakou ma ke ano e paa iaia a e hoohana aku hoi iaia ma ke ano e lawe no lakou i kona ola ina lakou e ike ana i ke kupilikii o ko lakou mau ola. Ua hope aku lakou i na lio a pau e loaa aku ana ma ke alanui, me ka paa ana i na kanaka a lawe ae la i ko mau aahu me ke dala, alaila, hookauliilii ae la lakou a mahuka aku la ma na apana aina apuupuu ma ka hikina hema aku nei.

            He kanaha kiai mai ka hale paa-hao mai me kekahi heluna koa kau lio e uhai la ia lakou, a o na kualo-no a pau e hoopuhi ana i keia ku-lanakauhale, ua ala mai lakou no ka malama ana i ko lakou mau ola a e kokua i ka hopu pio ia ana o na paahao.

            __________________________

 

            O ka moku lawekoa Grant ke ho-ea mai ana i keia la mai Kapalakiko mai.

            Ua holo ia mai nei e ka mokupea Santiago kekahi huakai holo loa mai Kapalakiko mai a hiki i Honolulu nei iloko o 11 la. He 3 la mamua o kona hiki ana mai i anei na halawai oia me kekahi ino nui ma ka moana, nana i hoopoino i kekahi o kona mau pea.

__________________________

 

            Ua lono ae nei i ka halekuai o B.? Eblers & Co., he heluna nui o na Koloka Wahine me Kaikamahine iloko o na waihooluu like ole, a e kuai ia aku ana mai ke 75 keneta a ? aku o ke koloka hookahi; e hele ae e na lede makemake koloka a wae nou iho.

            Maluna o ka mokuahi Siera i haalele iho i keia awa ma ka po Poalua nei no Kapalakiko i kaa aku ai ka Elele Wilikoki ma ko-na alahele no Wasinetona. Ua haule iho la kana aliiwahine ma-hope nei no ka hoomau ana aku i ka hookele ana i kana nupepa.

            Ua malama ia ae ka heihei mo-ku liilii ma ke kakahiaka Poaono no ka hanohano o ka la hanau o ka Moi Kalakaua i make, e na Keikialii Kawananakoa a me Ka-lanianaole. He nui na moku liilii i komo ma keia heihei a ua lilo no ka lanakila i ka moku Lady L a ke Keikialii Kalanianaole, Makana elua ia Lawealilo. Ma ia po iho na malama ia he aha-aina nui ma ka home o na alii opio ma Pualeilaui, ka panina hope o na hana hoomanao no ia Lani a ka lahui i hala aku i ka po.

 

__________________________

 

HOOLAHA HOOKAPU

__________________________

           

            KE papa a hookapu loa ia aku nei na mea a pau, aole e hookuu wale i ko lakou mau holo-holona o kela a me keia ano maluna o ka aina o Makanihalulu e waiho ala ma Kalapana, Puna, Hawaii. Aole hoi e kii wale ia na hua ai a me na mea ulu a pau oluna o ua ai-na la. Aole hoi e wawahi wale ia ka pa pohaku e hoopuni ana i ua aina holookoa la. Ke hoike pu ia aku nei no hoi ma keia, ua hookohu ia aku o E.N.P. Kaaua i Luna a me T.H. Kaaihili i Hope nona, a na laua e malama i ka maluhia o ua ai-na la. O ka mea a mau mea paha e kue ana i keia e hoopii ia no ma ke kanawai.

            O WAU IHO NO, EMMA AIMA NAWAHI.

Kahu o na keiki oo ole, Albert a me Alexander Nawahi.

Honolulu, Oct. 22, 1901.

 

__________________________

 

HE MAU RUMI HOOLIMALIMA.

__________________________

Aia ma ke Alanui Puowaina maluna aku o ka Halepule Moramona, e pili ana me kahi o Robert Boyd. Elima Dala no ka mahina elua rumi nui.

            E ninau ia Kauka Alvarez. 1240 Alanui Emma kokoke i Alanui Beretania.  oct 3--ti

__________________________

KEAKA LEALEA LOA

NO NA MEA A PAU

Po Poaono, Nov. 23, 1901

ERNEST HOGAN

 

Me Kona Puali Keaka Paele Lealea loa ma na Hana Hoomakeaka Like Ole e wehe ana maloko o ka

ORPHEUM

Ewalu Paele Hoomakeaka Akamai Na Kane Leo Maikai i ka Himeni Na Lede Puukani ma ka Himeni, Na Opio, a pela aku iloko o ka lealea

__________________________

 

UKU KOMO . . . . 50c, 75 c me 1$

__________________________

ERNEST HOGAN

KA PUNAHELE A HONOLULU.