Ke Aloha Aina, Volume VIII, Number 15, 12 April 1902 — Page 5
| This text was transcribed by: | Aki Astrid Dinda |
| This work is dedicated to: | to Hapi, Ka'anana, Puakea, Kepa and Maikalani - for me the men of my year 2012, definitely! Mahalo! |
KE ALOHA AINA
POAONO, APERILA 12, 1902 7
HE AWAWA KAI HOHONU.
Ma ka hoike a ka moku lawaia Amerika Albatross aia mawaena o Molokai a me Lanai kekahi awawa hohonu loa i loaa aku ia lakou nona ka hohonu ma kahi o 500 anana mai ka ilikai iho. O ka aoao ma Molokai he kuninihi loa ke ku ana, aka, ma ka aoao ma Lanai he kamoe kona waiho ana.
Ma ka hookuuia ana o na mea paahana no ka nana ana i ke kulana o kona papaku ua ike ia iho la, he lepo poho olalo o kona papaku aole hoi he pohaku.
E hoohala ana keia moku he mau mahina no ka lawaia ana i na i a o ke kai hohonu i loaa maanei a pela hoi me ke ano o ka waiho ana o ka papaku o ka moana ma Hawaii nei. Nui no ka naauao o ka haole i ka imi ana i keia mau mea pohihihi.
---
UA HANAUIA MA HAWAII NEI O KONELA FORBES.
Aia maluna o ka moku lawekoa Sheridan e haalele iho ana ianei no Manila i keia Poaono, e hoomalu ana i ka regimana 29 o Konela Forbes (Polepe). He Hawaii oia ma ka haaau ana, a o kona mau makua oia na Mikanele Polepe i noho ai ma Kona he kanalima makahiki a oi i hala ae nei. Ua hanauia o Konela Polope ma ia wahi, a i ka piha ana o kona mau ma kahiki e ehiku ua haalele iho la oia ia Hawaii nei no Amerika, a mai ia wa mai a hiki iho la i ka hoea ana mai o ka moku lawekoa Sheridan mai Kapalakiko mai akahi no oia a ike hou i ka aina hanau.
He hoahanau ponoi oia no Rev. W. O. Polepe i make, kekahi o na kahunapule i ike nui ia ma Hawaii nei.
Ua hoomaka o Konela Polepe e komo i ka oihana kaua o Amerika Huipuia ma hope koke iho o ke kaua huli amahi o ka Akau a me ka Hema, a ua pii oia mai ke kulana haahaa loa mai a hiki i ka loaa ana o keia kulana kiekie iaia e hoomalu a e ala kai ana i kekahi regimana koa holookoa nona ka huina maluna aku o hookahi tausani kanaka. Ua kipa aku na keiki a kona hoahanau i make e ike iaia makai o ka uwapo.
He buke ka na makua e lawe mai ai i keia mau pae moku no ka hoomalamalama ana i keia Lahui, a o ka ke keiki hoi he pahikaua kana e lawe nei i ka lahui pouli.
---
Ua make ma ka hora 11 o ka po Poalima iho la o Keoki Hapakela kekahi o na kanaka i ike nui ia e ko Honolulu nei poe ma kona home ma Palama, i ke 39 o kona mau makahiki.
---
LA NUI MAWAHO O KAPIOLANI PAKA.
I keia auwina la e malamaia ai na lealea heihei mawaho o ka paka heihei Kapiolani e na hui hooikaika kino like ole o keia kulanakauhale.
O na lealea e malamaia ana mawaho olaila oia na heihei holo, lele pa, kupahu, kiola poke a pela aku. O na moho lanakila e hookauia aku no he lei ilima maluna ona e ke Kama’liiwahine Kawananakoa. O ka hooleiia ana o na moho lanakila i ka lei aole ia i lawelawe nui ia i keia au naauao, aka, i ke au kahiko o Helene ua lawelawe nui ia keia hana hoolei i ka lei i ka wa e papahi ai kela me keia moho i ka lanakila o ke kahua heihei, mokomoko a pela aku.
He 25 keneta ka uku komo i ke kahua heihei, a e hoonoho ia ana na makai kau lio mawaho o ka Paka no ke kipaku ana aku i na poe kuleana ole e makaikai aku i keia mau lealea heihei i ko lakou wa e malamaia ana. O na pomaikai a pau e haawi ia aku ana ia no ka pomaikai o ka waihona o ka Boys Brigade.
---
HOIKEIKE AHI NUI MA KE KIEKIENA PAKIPIKA.
E haawiia ana maluna o ke Kiekiena Pakipika i keia ahiahi e Porofesa Nukumo, kekahi o na Iapana naauao loa he hoikeike ahi nui maluna o ke kiekiena i hoikeia ae la. He nui kana mau kana hookalakupua e hoike mai ana me ke ahi ana i hana ponoi ai i ike mua ole ia ma Hawaii nei. Ua hoolaha mua ia aku no keia hoikeike he mau pule i hala ae nei, aka, mamuli o ka nui o ka ua ioa mau pule ua hoopaneeia.
E hoomaka ana keia hoikeike ahi ma ka hora 7:30, a na na kaa uwila o ua kiekiena la e lawe i na poe makaikai no ke kahua hoikeike. O ka auhau o ka holo ana a hoi mai maluna o na kaa uwila a me ke komo ana i ke kahua hoikeike he 25 keneta wale no. He wahi maikai loa keia no na poe puni mea hou e hoohala ai i keia ahiahi.
---
MOKUAHI ENTERPRISE NO HILO.
Ma ka La Pule nei ua hoea aku la ka mokuahi Enterprise i Hilo mai Kapalakiko mai. O ka mokuahi mua loa keia i hooholo ia aku la no ka lawelawe ana i ka oihana kalepa Hilo. E hoao ia keia mokuahi a ina e ikeia ana ka holopono e hoomau hou ia aku ana kona holoholo ana mawaena o na awa o Hilo a me Kapalakiko. Ua haalele aku ka mokuahi Enterprise ia Kapa-
---
UA HOOLOIHI IA KE KUAI NUI
NO ELUA PULE HOU AKU.
Nuina Waiwai i Loaa Mai.
E hoolilo aku ana makou i na waiwai a pau me ka nana ole i ke poho, penei:
Kalakoa maikai 24 ia $1 00 | Kinamu maikai
Kukakaenalo maikai 20 ia 1 00 | Lole Eleele Puu
Keokeo maikai 20 ia 1 00 | Palekoki Keokeo me Huluhulu
Huluhulu Heu 14 ia 1 00 | Holoku Keokeo me Huluhulu
Alapia Lau Eleele 44 in.lau@ 1 ia 50 | Papale Kane me Kamalii
Alapia Eleele 65 | Papale Kapu
Palule Kalakoa me Keokeo 50 | Papalae Keiki P. K. Keokeo
Uhimoe Keokeo 1 ia 25 | Muumuu
Palemai Luna me Lalo 50 | Lole Keiki me Kaikamahine
Kamaa Wahine 50 | Kakinia Eleele o na ano a pau
Makalena maikai 10 ia 1 00 | Palemai Manoanoa
GOO KIM (KUKIMA)
Helu 1116 Alanui Nuuanu Aoao ma Ewa.
---
NA WAIWAI LIKE OLE HE NUI WALE
Na Lole Kane a me Kamalii, Palule, Lei Ai, Papale, Paleili, a pela aku.
He Kuai Hoopau Nui e Hoomaka ana i keia Poaono, Apr. 2, 1902.
THE WHITE HOUSE.
420 – Alanui Papu – 420
---
lakiko ma ka 30 o Maraki me na ukana like ole. Ua hoolako ia keia moku me na keena hoahu lako mea ai huihui, ma kukui uwila a pela aku. A ua hiki hoi ke lawe he 28 ohua kapena a me 16 ohua oneki. He 322 8 kona loihi, 35.8 kapuai laula a me 26 6 kapuai hohonu.
O ka loaa ana aku la ia Hilo he laina mokuahi nona ponoi he hoike maopopo ana mai nei no ia i kona kulana holomua, a ke koho nei makou iloko o na makahiki pokole wale no ma keia hope aku e mahuahua aku ana na mokuahi e kipa aku ana ma Hilo. E pau ana ka holo ana mai o ko laila poe ohua Kaleponi ianei. Nolaila, e na kupa o ka aina ua kaulana e lalau i ka oo a mahi i ka aina, no ka mea, ua loaa he moku nana e lawe i ka oukou mau mea ulu no na makeke o Amerika me ka poino ole. He la nui ka la o ka Enterprise i ku ai i ko Hilo poe, a ua hoohiwahiwaia ae ke kia o na moku e ku iloko o ke awa me na hae.
---
UA HOOKUU AKEAIA NA MOO E KOMO MAI.
He mau pule i hala ae nei ua hoouna aku ke keena dute awa he hoopii i ke Keena Waiwai ma Wasinetona no ka hookapu ia ana o ka hookoomo ia ana mai o na ano moo like ole i Hawaii nei mai Amerika Huipuia mai a i ole mai kekahi mai o kona mau Panalaau. Aka, o ka pane nae i loaa mai la mai ke Keena Waiwai i ke Keena Dute Awa maanei aole he kanawai i hanaia e hookapu ana i ka hookomo ana aku i na moo iloko nei o Hawaii.
---
HALAWAI MAKAAINANA A NA REPUBALIKA.
Ua malama ae na Repubalika he halawai makaainana maloko o ka Ema Kuea no ke apono lokahi ana i ka moho a ua aoao Repubalika ala i puka ae nei. Mamua o ka weheia ana o na hana haiolelo ua malamaia ae he kai kukui e na Repubalika mai ke Kuea Alii no ka Ema Kuea malalo o ke alakai ana a ka bana Aupuni. Mawaena o ekolu a me eha haneri kanaka i komo ae ma keia kai huakai, a oia poe o lakou no na poe e hana nei maluna o na alanui, na kaa lawe pohaku, kaa lawe opala a pela aku.
I ka hoea ana aku o keia huakai i ka Ema Kuea, oia no ka wa i weheia ai o na haiolelo no ka pono oia aoao, a e kipehi ana hoi i ka aoao Demokalaka a me ka Home Rula.
---
Aole i lilo ka lanakila ana ae nei o ka moho holo balota a ka aoao Repubalika ma keia kau koho i mea e kuihe ai ka manao o na Demokalaka, aka, ma keia kau koho nui aku e hoike ai na Demokalaka i ko lakou manaoio hana.
Mamuli o ka paa loa i ka hana a me ka mamao loa o kahi i noho ai o kekahi poe Demokalaka a me Home Rula ua hiki ole aku lakou e hookomo i ko lakou mau balota ma ko lakou mau mahele pakahi.