Ke Aloha Aina, Volume VIII, Number 19, 10 May 1902 — Page 7
| This text was transcribed by: | Ashley Green |
| This work is dedicated to: | To the best dad ever! John Brent Green |
KE ALOHA AINA
KE ALOHA AINA, POAONO, MEI 10, 1902. 7
MOOLELO HOONI PUUWAI
NO KE
KAKELA LANAFODA
KA
Ipuka o ke Kuewa me ka Aea.
KA
Pua Lilia Ahiu o Sanadela.
Nolaila, i ka hala ana aku o ia la a lakou i malama a makee ai a nalowale iloko o ka hoopoinaia, aia hoi, ua loaa mai la i ua Kuewa ala o Lanafoda he leta mai kona makuahine aloha mai, e kahea mai ana i ua hooilina nei o Lanafoda e huli hoi aku no ke Kakela, no ka mea, o ka la kulaia haaheo e hoomanaoia ai ka piha ana o kona mau makahiki i ka 27 ua kokoke loa mai ia, a oia leta kahea a ka makua i keiki oia kana i waiho aku ai i kana noi imua o ka Moi a me ka Alihikaua nui o na pualikoa, a ua loaa mai no hoi na aponoia ana mai nona a pau ua la kamahao la me na kulaia, a o ka hooponopono a me na kiai ana i ka maluhia o ke aupuni, ua waihoia aku ia malalo o Kamaki Winiwoka, ka Ela o Kapoka a me Ruke ka Akibihopa o Kanaberi.
Aole wale hoi i ke Kuewa o Lanadfeda kela leta mua o ke kahea, aka, ua loaa like mai ia kono i ka Moi a me kona kaikaina ke Duke, o Loka, a me ka lehulehu o ke poe hanohano a koikoi i kono ia, a i ka wa a ko ke aloalii a me ka lehulehu o ka poe i kono ia i haalele iho ai ia Ladana no Lanafoda, ua waiho i'o ia aku ka malama ana i ka maluhia o ka pono e ke aupuni malalo o ka Ela o Kapoka a me ka Akibihopa o Kanaberi, na kanaka koa hoi i loaa ia laua ka hanohano o ka papahi ana i kela mau inoa hanohano loa ma kela kahuakaua a ko laua mau koa wiwo ole i alakai ai no ka loaa i na koa aupuni ka lanakila hiwahiwa, i olino ia e ka uwahi paoda.
He pule okoa ko ke Kuewa o Lanafoda me kaua lede o ka hoohaia ana ma ke alo o ko laua mau makue, aia hoi hoea mai la ua la nei, a i ka la mamua iho o ka hoea ana mai, o ua la nui ala i haakohi ia mai ai ka hooilina o Lanafoda, aia ke Kakela ua lehulehu me na nani he manuunuu wale, i milo hoohiwahiwaia e na kauwa o Lanafoda a me ko ke Kakela Ulaula, malalo o na alakai a kuhikuhi ana a ka Pua Lilia Ahiu. I ka nana a makaikai ana aku maluna o ua mau nani ala, ua hewa ole ke olelo ae, na hihiu ahiu na hoohiwahiwaia ana o ke Kakela Lanafoda i ike ole na kona lua iloko o ia mau la kumamao o Ladana Kahiko!
O na pua ahiu o Sanadela a me na launahele e ulu ahiu ana ma kona mau kuemaka pali oawa, ua unu a ua halihali ia mai a hooulu a hoohihi ia ma Lanafoda, a he kohu home kakela i ka waokele maoli no ua kakela Lanafoda nei, a o na rose ahiu a me na lilia hihiu e ulu ana ma na oawa nani o ke Sarona elua o ke ao, aia ia ke kau kehakeha mai la ma kela a me keia ipuka komo o ke kakela me na huapalapala moakaka o ka hookipa a me ka hoomaikai i ka mea nona ka la.
I keia mau nani e ike a e mahalo ia nei, aia ka manawa o ka la ke nee awiwi aku la ma kona alahele komo hana, a o na malihini hanohano i kono ia eia lakou ke hoomaka aku hoi e komo iloko o ka makaha, no ka mea, ua wehe hamama mai na ipuka o ke Kakela Lanafoda no ke aleana aku ia lakou a pau e komo malalo o kona mau eheu.
O na malihini kiekie a hanohano mua loa a na ipuka o ke kakela i wehe ae ai i kona mau ipuka oia no ka moi, Duke o Ioka a me ko laua mau ukali pilikino. Ua apo a hookipa ia aku laua e Haku Semafila ka elele hookipa, a imua o ke alo o ka ohana Lanafoda ka makua a me na keiki i hoolauna ia aku ai lakou me na huaolelo ohaoha mai na kamaaina mai.
Alaila, mahope o ko na moi komo ana aku, ua haomaka ke komo ana o ka lehulehu aku i koe o ka poe i kono ia, a mamua ae o ka malamalama a me ka olino ana o na paia o Lanafoda me ke ahi aaa o na kukui aia lakou a pau ua akoakoa aku me he poe keiki ala malalo o ka makuahine kinana.
He mau mea ai mama me na kiaha waina maemae loa o Olesetera he wahi i kaulana i ka maikai o ka waina, in a he mau makahiki ka loihi, na 10 dia opiopio palupalu, a me na 10 pelehu momona e holo ahiu ana maluna o na aina holoholona o Lanafoda a me Semafila oia na mea i panee ia aku imua o kela anaina e na kauwa lawelawe o na hale kakela a elua i hoohui ia ae la la i hookahi ma keia po, a mahope o kela paina mama ana, a me na hoo hehelo ana io a i anei, ala ka leo o na mea kani ke kahea a ke hoolale mai la i ke anaina no ko lakou hoea ae iluna o ke kahua a wehe i ka hanohano o ka aha hulahula me keia mau hookaau olelo ana-
Niniu au me ka'u aloha,
Poniuniu malie i ke kikowaena,
E akalawe oe e kuu fair,
Na kiina aulii a ka mikioi,
Mikioi oe mikioi a u a lawe
Ke saluta lima aloha lehelehe.
O ka Haku Kuewa o Lansfoda a me kana Lede Liilia Ahiu o laua na paa hula mua loa i loaa ka hanohano o ka wehe ana i kela mau mapuna olelo- E niniu au me ka'u aloha- alaila, ua ukali aku na paa hulahula e ae e pokakaa ana i ka akau, a hooniniu ma ka hema, a he nani me ka hiehie na kiina wawae a kela a me keia keonimana a pela no hoi me na lede, a o ko lakou mau kahiko, ua hoike mai no ia i ka hihiu a me ka hanohano o ko lakou mau kulana pakahi. O ka moi a kona kulana kapu, o ke Duke o Ioka iloko o kona hanohano, na poe i kono ia iloko o ko lakou mau kulana iho, a o ke Kuewa o Lanafoda a me kana lede iloko o ko laua laua kulana oihana. Alaila, he aha hulahula wale no keia na na poe paa oihana aupuni malalo o ka moi a me ka poe hanohano iho no hoi o ka aina.
Ua hoomaha ae ka hula mua no ka haawi ana i manawa no na poe hookani pila e hooluolu iki ai i ka ikiiki wela o ko lakou mau helehelena, ma ka pakiaha ana no ke ola o ka mea nona ka la a lakou e hauoli nei, alaila, ua hoomau hou ia aku ka hula ana, a he ano hooheno a hooipoipo no ke ano o ke au kahiko.
He eha manawa o ka hula ana, a he eha no hoi manawa o ka hoomaha ana, a i ka lima o ka manawa i ka hoomaka ana, a o ka panina hope no hoi ia o na hula, aia ka manawa o ua po ala ua hiki aku la i ka hora 12 o ke aumoe, a ma ka hora 1 ponoi o ka wanaao i hookuu ia ai kela hulahula a hoi kela a me keia kane mea wahine no ko lakou keena i hookaawaleia, a pela no hoi na kane wahine ole no ko lakou mau keena malalo o na hookipa a me na kuhikuhi ana a na wahine kauwa lawelawe o ke kakela.
HOOLAHA HOOKO MORAKI
HOOLAHA KUAI A ME HOOPAA A KA MEA MORAKI.
Ke hoolahaia aku nei ma keia no ka hooko ana aku i ka mana o ka hoolilo ana i kekahi moraki i hana ia e J.K. Kahookano ia J Alfred Magoon, ma ka la 2 o Sepatemaba, 1897, a i hoopaa ia ma ke ke Keena Kope, Oahu, buke 171, ma na aoao 228-9, ke hoolaha ia aku nei ma keia, ua manao ka mea paa moraki e paa i ua moraki la i oleloia no ka hahaki ia o ka aelike, oia, ka uku ole ia o ke kumupaa a me ka ukupanee i ka wa uku, a o ua moraki la i olelo ia e hoolilo ia aku no ia ma ke kuai kudala ia ana ma ke keena kudala o Will E. Fisher, ma Honolulu, ma ka Poakolu, Mei 14, 1902, ma ka hora 12 o ke awakea o ka la i oleloia. O na waiwai i hoakaka ia maloko o ua moraki ala oia no ke a i hoakakaia malalo iho nei.
No na mea i koe e pili ana ia J.A. Magoon, e ninau ae T. I. Dillon a i ole ia J. Lightfoot, na loio. Magoon Hale, kihi o na alanui Alakea me Kalepa, Honolulu.
J. ALFRED MAGOON,
Mea Paa Moraki.
Hanaia ma Honolulu, Aperila 22, 1902.
Akahi. Oia kela aina nona ka ili aina o 2 1-2 eka, e waiho ala ma Makapale, Kohala Akau, Hawaii, he mahele o ka aina i hoakaka ia ma ka Palapala Sila Nui Helu 3371, Kuleana Helu 9781 no Keliinoi, a i hoakaka ma kekahi palapala kuai mahele i hanaia ia D. W. A. Kahookano a me J. K. Kahookano ma ka la 10 o Sepatemaba, 1883, a i hoopaa ia ma ke Keena Kope, Oahu, buke 87, ma na aoao 410-1-2.
Elua. O kela mau mahele a pau o ka aina i hoakaka ia ma ka Palapala Sila Nui Helu 3371 i oleloia, Kuleana Helu 9781, penei:
(a) O kela aina kula a pau e waiho ala mawaena o ka aina o Kalai, Kealoha a me Komomua.
(b) O kela aina kula a pau e waiho ana ma ka aoao Hikina o ka aina o Kealoha a me Komomua, a ma ka aoao makai o ke Alanui Aupuni, e pili pu ana me ka aina o Kalai.
(c) O kela aina a pau e waiho ana ma ka aoao Pali o ke awawa o Makapala, ma ka aoao hoi makai o ke Alanui Aupuni.
O keia mau aina i hoakaka ma na mahele a, b a me c, he aina ia i hoakakaia ma ka palapala kuai mai a Maraea aku ia J.K. Kahookano i oleloia ma ka la 22 o Augate, 1889, a i hoopaa ia ma ke keena i oleloia buke 130 ma ka aoao 254.
Palapala Hooia Hoahu
Elike me ia i Hoopukaia e ka
HUI HAWAIIAN REALITY ME MATURITY KAUPALENAIA
Hoahu Maraki 30, 1901
Huina Waiwai $50,000
5,000 MAHELE; $10.00 PAKAHI;
UKU PAU IA
Heaha na Kumu?
1. Aole makou e koi aku ana ia oe e uhaai i kau dala.
2. E haawi ana makou i kekahi alahele palekana e hiki ai ke hoopuka puka a loaa ke dala mamuli o ka hoohui i na huina liilii i kela a me keia mahina, a mamuli o ia mea, e koe ana he huina dala mai ka hooliloia ma kekahi ano e ae, a e loaa ole ana ia oe kekahi wahi pomaikai mai loko mai ola mea.
3. O ka nui o na makahiki a me ka oihana a hana a ka mea hoahu, aole loa ia he kumu hoanoe a hoololi, no ka mea, ua hiki i na kane, na wahine a me na keiki ke lilo i poe hoahu.
Hooia Hoahu
4. Na makou e kukulu i mau home no oukou a e hoopuka no ho makou i Huina Hoahu Hoopukapuka e hookaa ia iloko o 75 mahina, me eha (4) Palapala (Coupons) Hooia o $50 pakahi i hoopilipuia, oka averika no ka puunaue iloko 19 mahina, a e ohi ana makou $150, a e loaa ana ia oe $200. O kou puka $33.33 no kela a me keia dala pakahi i hoahu ia e loaa ana ia oe he 33-1-3 keneta puka.
5. No ka mea aole oihana hoopukapuka i ikeia i oi aku ka pomaikai mamua o keia. E kakau mai i na hoa kaka piha. E hauoli mau ana ka Hu e hoike a e hoakaka piha aku i na mea a pau a me na lawelawe ana ke makemake ia, ke kakau ia mai ma ka leta a ke ninau kino ia mai.
HUI HAWAIIAN REALTY A ME MATURITY KAUPALENAIA.
McIntyre Hale kihi o na Alanui Papu a me Moi. Rumi 3 a me 4. Pahu Leta 262.
Hale Hana
Pahu Kupapau Hou
Aia ma ka "Hale Elks" a ku nei ma ke kihi o alanui Berinia me Mila.
He mau waiwai maikai loa. He maikai ka lawelawe ana. He emi ke kumukuai. E kipa mai e na Hawaii e ike no oukou iho.
J. J. TOWNSEND
Luna Nui.
Telepona Blue 571. jan 31
Allen me Robinson
He mau mea kuai
Papa, Na Lako Kukulu Hale, Pena ame Aila a pela pu no hoi me ka Nanahu.
Keena Hana ma Alanui Moiwahine.