Ke Aloha Aina, Volume VIII, Number 22, 31 May 1902 — Page 6

KE ALOHA AINA

 

POAONO MEI 31, 1902.

 

500 OLA I MAKE I KA PELE MA SANA VINCENT

            Fort de France, Mei 12. Ua lawe mai la ka mokuahi laweleta Solent i kekahi hoike weliweli mai ka mokupuni Sana Vincent mai o Beritania, penei: Ma ka la 8 a me 9 o Mei na pa hu ae la ka pele o ka luapele Soufriere, a hoolue mai la i ka lepo kelekele, lehu, pohaku a me ke ahi maluna o ke taona o Kingston, ke kapitala o ia mokupuni, a ma na wahi e ae o ka aina. O na lono i loaa mai he 500 mau ola i hoomaopopoia ua make ma Sana Vincent a hiki i ka po Poalima, a aia no ka pele ke a ala i keia wa.

            Ma ka hoike a Hamilton de Lourey, he ohua maluna o ka mokuahi Esk, mawaena o ka hora 11 a me 1 o ka po o ka la 8 o Mei, ua ikeia aku la kekahi ao elele i piha me ka mahu e haakokohi iho ana maluna o ka luapele o Sana Vincent, a ia wa e helelei ana na pakaua lehu a e olaolapa ana hoi na malamalama ahi maluna o ka piko o ka mauna. Ua hoouna ia aku he waapa me na eke leta, aka, na huli hoi mai.

            Rosean, Mei 11. Ua pa-hu ae ka pele maluna o ka mokupuni o Sana Vincent, a ke hooomau mau nei kona a ana me ka weliweli. He nui na mahiko i hoopoinoia. Ua ukali ia mai ka luai pele e na hoonaueue oiai. O na leo haluiu o ka pele ua hiki no ia ke lohe ia ma na mokupuni he 200 mile ka mamao mai Sana Vincent aku. He nui na ole i hoena ia a ma kahi o 500 mau kino make e waiho ala i kanu ole ia.

 

NUI NA MOKU E HOLO ALA E KOKUA.

            Nu Ioka, Mei 11. O keia mau mokukaua malalo iho nei ua haawi ia aku la ke kauoha ia lakou no ka holo ana aku i ke kulanakauhale o Sana Pierre no ka haawi ana aku i ka lakou mau kokua ana i na poe a pau i hoopoino ia.

            Mokukaua Amerika Cincinnati mai San Domingo aku, mokukaua Amerika Potomac mai Porto Rico aku, moku a’i kaua Dixie ke liuliu ala no ka holo ana mai ka pa kapili mokukaua o Nu Ioka aku, moku lawekoa Amerika Sedgwisk, ke liuliu ala no ka lawe ana aku i ka lole a me ka ai no na poe pilikia mai Nui Ioka aku.

            Mokukana Beritania Indifatig able mai Trinidad aku.

            Mokukaua Farani Suchet, i keia wa maloko o na wai o Inia Komohana, mokukaua Farani D’Assas mai Brest aku, mokukaua lawehae Farani Tage mai Nu Olina aku.

            Mokukaua Denemaka Valkyrien mai Sana Thomas aku.

 

HOIKE A KA UWATI O KA LUAKINI.

            Barbodoes, Mei 13. I ko’u wa i haalele aku ai ia Sana Pierre ma ka ia inehinei e waiho ana ke kulanakauhale iloko o na puu ahi enaena. He mau tausani o na kino make e waiho mokaki ana ma o a maanei. O ka uwati o ka luakini e kau ana maluna o ka puoa e ku hookahi ana me kona manamana kuhikuhi e hoike ana na pau kona nee ana he 10 minute i hala ae ka hora 7, me he ia o ka manaw maoli ai maluna oia kulanakauhale. He 20 minute o ka haule ana a ke ahi pele me ka ikaika maluna o keia kulanakauhale mamua o kona hoomaha ana, a ma ia wa ua puni holookoa ae ia ke kulanakauhale he ahi wale no, a pela hoi me na moku maloko o ke waw na hoi aku lakou no lalo o ka hohonu he moepuu na ka inaina o ka pele. O kekahi kumu i pau loa ai na oia o keia kulanakauhale i ka make oia no ka manao kuhihewa ana o ka kiaaina mahope iho o keia kiola ia ana o na pohaha pele he 120 kapuai ke kiekie na pau ae la no ka inaina o ka pele, nolaila, ua haawi ae la oia he kauoha uahoa e hoopuni ia ke kulanakauhale hlookoa e na koa me ka ae ole ia o kekahi kanaka e haalele iho i keia kulanakauhale. No ka hookualiilii ana mai i ka manao pioloke o na kanaka ua lawe ae la ke kiaaina a me kekahi poe akeakamai i ko lakou noho ana ma Sana Pierre. Aole loa he hookahi o lakou i pakele mahope iho o ka pa-hu ana o ka pele maluna Mauna Pelee. Aole e emi malalo mai e na tausani poe e hiki ke hoohana ia no ka eli ana a kanu aku i na poe make. O ka pakui hohono o na ea inoino o na kino make na hiki no ia ke honi ia he ekolu mile a oi aku mawaho o ke kulanakauhale.

 

HE OLA I PAKELE MAHUNEHUNE MAI.

            Trinidad, Mei 15. O Albert, he kanaka kuonoono e noho ana he hookahi mile me ka hapa ma ka hikina akau o Mauna Pelee, ua hoea mai la oia me ka ohana ianei ma ka mokuahi Canada mai Martinique mai. Ua hoike mai oia i kekahi moolelo kupaianaha o kona pakele ana mai ka make nana i pulumi pau aku ia Sana Pierre. Wahi ana:

            Ua hoike mua mai o Mauna Pelee i na hoailona o kana luku weliweli, aka, ua nana aku nae makou iaia he luapele hoopoino ole, a aole no hoi makou i manaoio e nui aku ana kana mau hana hookalakupua mawaho ae o ke pohaha a me ka mahu e oili ana mailoko ae ona i kekahi manawa. He mau minute mamua iho o ke kani ana o ka hora 8 o ke kakahiaka ka la 8 o Mei i hoea mai ai keia hopena weliweli. Maloko au o kekahi o ko’u mau kihapai i ka wa a ka honua i halulu ae ai malalo o ko’u mau kapuai wawae, aole he like maoli me ka hoonauene ana a ke oiai, aka, he like me ka nakulu ana o kekahi hakaka nui e malama ia ana malalo o ka honua. Ua hekau koke iho la ka makau maluna o’u, aka, aole nae e hiki ia’u ke hoakaka ae i ko’u piha weliweli maoli i keia wa.

            Oiai no au e ku maile ana me he la e ike ana au ia Mauna Pelee e nakanaka ana a lohe aku la au i kekahi leo weliweli kohu uwe mai ka luapele mai. Ua pouli koke ae la ka la me ka lehu pele. Ua laiku ka ea i keia wa me ka pa wahi oaniani makani ole. Alaila, lohe aku la au he leo halulu me he la, e wawahi, e haehae, a i ole e ulupa ana i na mekini paahana a pau o ka honua. A’u lohe ole ai i kekahi leo weliweli mai kinohi e like me keia. Ua ukali ia mai keia leo kani e kekahi malamalama uwila i anapu mai me ka ikaika a’u i ike ole ai i kona lua. Me he ia na huki ia iho au no lalo o ka honua, ulaa pu ia aku la na kumu laau no lalo me ka hoonakaka pu ia o ka honua. Oiai no au e ku ana me ka maopopo ole ia’u o kahi e holo aku ai, a o ko’u mau maka hoi e kaulona ana no maluna o Mauna Pelee, ua ike aku la au i kekahi punohu ao eleele e pii ana iluna o ka lewa a iho mai la me ka hikiwawae loa maluna o Sana Pierre e hiki ole ai i kekahi mea ke hoao aku e hoopakele i kona ola. Mailuna mai o na ao eleele nei i lohe aku ai au i na leo pohapoha, nakolokolo, me he hoouka kaua nui ala e lawelawe ia ana e na aupuni mana nui o ka honua nei maluna o ka lewa.

            Ua maopopo aku la ia’u ua poino o Sana Pierre, aka, aole nae e hiki ke ike aku i na kulanakauhale ala, oiai, kekahi puu kiekie e alai mai ana mamua o’u. Aole e hiki ia’u ke hoike ae i ka loihi o ko’u ana malaila he mau sekona wale no paha, aka, me he la nee ia’u he mau minute ko’u makaikai ana i keia hiona weliweli a’u i makemake ole ai e ike hou I ka hoi hou ana mai o ko’u mau noonoo ao kanaka ua huli ae au a holo aku la no ko’u home a lawe aku la i ko’u ohana no ka aekai, a kau aku ia maluna o kekahi mokuahi nuku a holo aku la no Fort de France he mau olulu i pakele mahunehune mai i mau ka pele.

 

NUI NA DALA I LOAA MALOKO O KE AWA NEI.

            Eia ma ka puka aniani o ka Halekuai Lako Hao Pakipika he nui wale o na ano dala like ole o ke au kahiko e hoike ia nei mai ke keneta a hoea loa aku i na dala keokeo, a pela hoi he heluna nui o na pihi keleawe like ole i manao ia no na aliimoku no ia. O keia mau waiwai na loaa aku ia iloko o ke awa o Kou nei i ke kao eli awa a lawe hou ia mai ia i ka aina nei mahope o ko waiho ana malalo o ka papaku o ka moana no kekahi mau makahiki loihi. O kekahi o keia mau dala no ka makahiki 1779. O keia mau dala i loaa i ke kao eli awa, ua hoomaopopoia ua lawe ia mai ia e na ulu moku okohola he mau makahiki i hala ae nei, a mamuli o ka nui hewahewa o ke dala ia mau la ua kiola aku lakou i na poe luuluu ma ka aoao o ka moku ma ke ano lealea. O kahi o keia mau dala ua loaa i na poe luu, aka, o kekahi nae ua hoi aku no lalo o ka hohonu. He nui ka makaikai ia o keia mau dala kahiko e hoikeike ia nei ma ka puka aniani o ka halekuai i hoike ia ae la.

 

HE MANAO KALAIAINA AIA ILOKO OLAILA.

            Ma ka halawai a ka aoao Repubalika i malama ia ma ka po Poalima aku nei, ua lawe mai la o W J Kuelo i kekahi kumuhana ano nui e noonoo ia maloko o ua halawai ala, oia hoi, ka haawi ana i hana na na poe e noho hana ole nei. Wahi ana: Aia i keia wa mauka o Kalihi he 300 Hawaii e makemake nei e loaa ka hana, aka aole nae he loaa. O ko Kuelo manao o na wahi a na limahana Asia e hana nei e hoopiha ia aku me na limahana Hawaii. Ua kokua mai o Renton i keia manao, a wahi ana, o kahi na limahana Asia maloko no ia o na mahiko. Mahope o ka noonoo akahele ia ana, ua kohoia he komite no ka hele ana e huli i hana na keia poe e noho hana ole nei.

            Ke mahalo nei makou i keia manao o ka aoao Repubalika ina ua lawelawe lakou me na manao aloha, aole hoi me na noonoo kalaiaina. Aka, ina he manao kalaiaina, alaila, he mau ahele akamai no keia a ka enemi i wahi no ka lahui aloha aina poholo aku ai iloko o ka lakou upena kuu o ka lokoino. E kiai no nae e na Hawaii no oukou iho i ka la koho balota nui e hookoke mai nei.

 

            Nia ke hoao nei kahi mau haole kuonoono o ke kulanakauhale nei e hooholo ia ke kau uwaila mai ke kulanakauhale nei aku a hiki i Kaimu ki ma ke alanui Waialae. He oia ia no ko Kamoiliili mau k@ pa.