Ke Aloha Aina, Volume VIII, Number 24, 14 June 1902 — Page 6

KE ALOHA AINA

 

NA HOIKE HOPE O KA MOKU POINO FANNIE KERR.

 

            Ma na mokuahi holo piliaina i hoea mai mai Kauai mai, ma ke kakahiaka La Pula nei i loaa mai ai na hoike makamaka loa o ka pae maalahi ana aku o na olulo a pau o ka moku poino Fannie ma Kauai a me Niihau, a o keia iho ka hoike ano nui a Kapena Gibbons o ka moku poino i loaa mai la maluna o ka mokuahi Malulani.

            Ua haalele aku ka mokupea Fannie Kerr ia Nu Kakela Ausetralia ma ka la 7 o Aperila no Kapalakiko me 3,730 tona nanahu.  E lawe ana i ka nanhu mai ka lua nanhu North Extend mai, he wahi i kaulana no ka nui o na hana hoopoino a ko ia wahi nanahu.  Mawaho ae o Kapena Gibbons a me kana keiki e lawe ana oia he iwakalua-kumamaiwa luaina.  O ka loihi o na la o ka moku ma ka moana mamua o ka a ana o ke ahi, aole he mea i ike.  Aka, ma ka hoike a Kapena Gibbons ua lehulehu no ia, a i ka la 29 o Mei, ua ike ia iho la aole he manaolana no ka palekana o ka moku, oiai, ke ahi e holapu ana ma na wahi a pau.  Ua hookuu ia na waapa o ka moku.  O Kapena Gibbons me kana keiki a me eiwa luina ma kekahi waapa nui, a he eha maluna o kekahi waapa uuku.  O ka malama moku a me umi kumamakahi kanaka maluna okekahi waapa okoa aku, a o ke koena iho eha maluna o kekahi waapa uuku.  Ma ka hora 4 oka auina la o Mei 29, haalele aku la na olulo i ko lakou moku e ulupa ia ana e na alelo ana ole o ke ahi a kamoe mai la ka inu o na waapa no Kauai ka pahu hopu ka aina kokoke iki ia lakou, nona ka mamao he 800 mile.  He ino ka moana ikeia wa, aole no hoi i mamo loa ua piha iho la kekahi waapa uuku o eha kanaka i kekai, nolaila, ua hookau ia aku lakou maluna oka waapa o ke kapena.  I ka po mua no ua kaawale ae la na waapa, a i ke ao ana ae ua nalowale kekahi waapa mai kekahi waapa aku.

            He malie ka moaana ma na la mahope mai.  No ewalu la o ka alo ana o ke kapena me kona mau kanaka maluna o ko lakou waapa ua pae maalahi mai la lakou i Makaweli, Kauai, ma kela Poalima aku nei.  Ua nui ka hopohopo o ke kapena no na ola aku i koie, aka, ma ka Poaono nei ua hoea mai la ka waapa o ka malama moku mawaho ae o Waimea, Kauai.  I ka pae maalahi ana aku o keia waapa iuka o ka aina, ua kau aku la ka hopohopo o na mea a pau maluna o na kanaka eha e kau ana maluna o kahi waapa uuku.  Aole he mea i lohe ia no lakou a hiki i ka wa o ke kahi waapa i hoea mai ai i Waimea, Kauai, mai Niihau me na hoike no ka pae ana aku o kekahi waapa uuku o ka mokupea Fannie Kerr me eha kanaka.

            I ka loaa ana mai o keia hoike hope ma ka Malulani, ua pau ae la na manao uluku o ke kulanakauhale nei no ka hoouna ana aku i kekahi moku e huli i na kanaka poino.  O ka moku lawaia Albatross ka moku e ku makaukau ana no ka holo ana aku e huli i na poe poino aku i koe, a i hakalia wale no hoi kona haalele ana iho no na lono hope mai Kauai mai, a ina aole i pae ae lakou ma Kauai, alaila, o kona wa koke no ia e haalele iho ai i ke awa nei.  Aka, ma keia hoea ana mai la o ka Malulani me na hoike no ka palekana ana o na ola a pau, nolaila, ua hoopio ia iho la ke ahi o kona mahu.

            Na ka Mikahala i lawe mai i keia poe poino no Honolulu nei, mahope o kona kii ana aku i na poe i pae ae ai i Niihau.  O ka Fannie Kerr he moku hao kiaha oia i kapili ia ma Livapulu i ka 1892, malalo o na kuhikuhi ana a Kapena Gibbons kekahi o na mea kuleana iaia.  He 293.9 kapuai kona loihi, 41.2 kapuai laula, a me 24.5 kapuai hohonu, a nona ka lilo he $375,000.

            He nui na makahiki o ko Kapena Gibbons alo ana i ke kai, akahi wale no oia a halawai me na ulia pakalaki o ka moana.  He kapena oia ike nui ia e ko Kapalakiko poe, a he nuhou kaumaha keia ke loaa aku ia lakou.

 

KA MOI OPIO O SEPANIA.

 

            Madarida, Mei 17.  I keia la i poni ia ai o Alphonso XIII i Moi no Sepania.  He mau helehelena kaumaha me na waimaka e haloiloi ana ko ka Moiwahine Kahu Aupuni i kona wa i komo aku ai no loko o ka Hale Ahaolelo i keia auina la me ka moi.  He hookahi hora o ko laua haule hope ana.  O ke kumu o keia mamuli no ia o ka hoao ana o kekahi kanaka pupule e hoopoino i ke ola o ka Moi iaia e noho ana ma ka aoao o kona makuahine malunao ke kaa alii mai ka halealii mai no ka Hale Ahaolelo.

            Ua holo aku ke aluka kanaka a hopu aku la i ke kanaka powa, a ua kokoke oia e weluwelu liilii aka, ua pakele mai nae oia mamuli o ka lilo ana aku iloko o ka lima o na makai.

            Ma ke alahele ua haawi aku ka moi i kona aloha kunou i kona mau makaainana.

            I ka wa o ka moi i komo aku ai iloko oka Ahaolelo ua ku ae ke anaina ea haawi ae ia i na leo huro ekolu me ka hooho pu ana.

            “E ola loihi ka Moi,” a e hoike mai ana hoi ia anaina i ko lakou ohohia no ka moi hou.  Imua o ka Peresidena o ka Hale Ahaolelo i lawe ae ai oia i ka hoohiki oi hana.  Ma ia la no ua haawi mai la oia i kana kuahana e haawi aku ka lahui Sepania i ka lakou mau kakoo ana iaia e like me ka lakou i haawi aku ai i kona makuahine.

            O keia la ka piha ana o na makahiki o ka Moi Alfonso XIII ik a umi-kumamahiku.  I ka wa no a kona makuahine e hapai ana iaia ua make iho la kona makuakane moi.  I ka make ana aku aole i aai aku ke aloha o na makaainana i ka moiwahine kane, make, aka, i kona wa nae i hanau mai ai he keikikane ka hooilina aliikane hookahi wale no ma ka aoao o ka laina Alfonso ua lilo koke ae la oia i mea nui.  He kapu a he ihiihi loa ka hanai ia ana o keia moi, a aole hoi he kanaka kiekie e hoopaa aku i kona kino mawaho ae o kona mau kauwa elua,.  Mai kona wa uuku mai a hiki i kona nui ana aole i loaa he mau hoa paani kamalii iaiia, aka, o kekahi mau kanaka hanohano o ke aloalii iho la no kona mau hoa paani.

            He moi opiopio akamai loa ole i kek au lio, a he makaukau ma ka lawelawe ana i ka oihana kaua aina.  He kulana kapena kona e paa nei no loko oka oihana kaua o kona aupuni.  He mau helehelena makau ole kona, he naauao, a he aloha i kona mau makaainana.  Apela no hoi na makaainana.  A pela no hoi na makaainana i hoopili paa aku ai i ko lakou aloha no ko lakou moi hou.

 

HE ANA HUNA.

 

            Tacoma, mei 30.  Ua loaa aku kekahi ana huna kupaianaha ma na aekai o Prince William Sound oiai kekahi haole nona ka inoa o Leeds e huli ana i na lua minerala me kakhi poe kamaaina ua hoea aku la lakou i ka waha o kekahi ana i aneane e nalowale mai ka ike ana aku a ka maka o ke kanaka.  Ua komo aku o Leeds iloko o keia ana, a ua hoopahaohao loa ia o Leeds i ka ike ana aku e waiho mai ana he umikumamaha mau waa, a maloko pakahi o lakou e waiho ana he mau kono kupapau.  E waiho ana he mau mea hana lima pohaku a he mau papa pohaku ke uhi ana maluna o na waa.  O na nanaina a pau maloko o ke ana e hoike mai ana ua waiho ia keia mau kino make malaila i ke au o ka pohaku e hoohaua nui ia ana.

            O ka loaa ana aku o keia mau kino make ua hookahakaha ia la lahui ilikini e noho ana malaila, no ka mea, he kahiko loa ka noho ana o ko lakou mau kupuna malaila, aka, aole he mea i ike i keia ana malaila, aole i ka mea na lakou keia mau iwi, a aole no hoi he hiki ia lakou ke hana i na mea hana lima mailoko mai o ka pohaku.

            Aole o Leeds i hoonihoni aku i na kino make, aka, ua haawi iho oia i na hoailona ma ka waha o ke ana.  Ua hoala ia ae la he puulu kanaka e alakai ia ana e Kapena Story no ka noii ana aku ia loko o keia ana huna a me na kino make e waiho la maloko o keia ana.

 

KE HOOMAKA HOU MAI NEI KA AIHUE.

 

            Mahope o ka hoohao ana iho o na hana aihue no kekahi mau la ua lawelawe hou ia ae la ia ma ka po La Pule nei he hookahi ma ke alanui Beritania e kokoke ana i alanui Puowaina, a o ka lua ma Aala ae nei.

            O ka aihue i lawelawe ia ma ke alanui Beritania ma kahi no ia o Kauka Augur.  Ua komo ia o loko o kona keena kauka, a ma hope o ke kuekaa ia ana o loko ua lawe ia aku la he elua mau lole kimono, he $40 e waiho ana maloko o kekahi hinai i loaa ole i ke kolohe.  He Iapana ka mea i ike ia mahope o ka hale, aka, aole nae he mea i maopopo i kona wahi i nalowale aku ai.

            O ka elua o na hana aihue ma lalo ae nei o ke alanui Aala.  Ua komo aku ke kolohe iloko o ka rumi o kekahi wahine pake oiai, ka ona hale ma ka rumi kuke kahi i kuke ai.  Aole oia i lohe i kekahi halulu a hiki i kona komo ana aku iloko o ka rumi ike aku ia oia i kona lole e ahu mokaki mai ana, a o kana mau dala he $35 a me kona mau lako gala i hiki aku ka waiwaiio i ke $24.50 ua puehu aku la i ke kolohe.

            He pohihihi ke alahele e paa ai keia mau aihue i ka oihana makai, aka, aole nae ia he mea e hoonele ia ai ka imi ana aku o na makaikiu i ka meheu okeia mau niko pau iole.

 

NAWALIWALI KE KULANA O NA BOA.

 

            Ladana, Mei 12.  O ka hoike hebedoma a Haku Kitchener ua loaa mai la ia i keia la e hai mai ana, he 19 mau Boa i make, 6 i hoaha ia a me 82 i hopupio a me 9 i haawipio mai, a me 600 pu raifela, 157 kaa, 400 lio a me 4300 bipi.

            O Kenerala Ian Hamilton me kona mau kolamu koa ua hoea mai la lakou i ke Alahao Komohana, mahope o ka pulumi pau ia ana o ka apana o Litchtenburg ma Transvaal Komohana.  Ua lawe mai keia mau puali he 367 pio a me na kaa a me na holoholona a pau a na Boa ma ia apana.

            He hoemi ana iho keia i ka ikaika o Kenerala Delarey he 860 kanaka mai kona wa i lawe pio ai ia Kenerala Methuen.