Ke Aloha Aina, Volume VIII, Number 30, 26 July 1902 — Page 6
This text was transcribed by: | Sabine Schmidt |
This work is dedicated to: | to my other lovely cat, Nitti, my sunshine, who is still confused and looking for her companion. |
KE ALOHA AINA
POAONO, IULAI 26, 1902.
HE POINI NUI NO AMERIKA HUIPUIA
He Hookahe Kokjo Weliweli a Hiki Mai
Ka Hihio Kupaianaha a me ka Wanana i Hoikeia Nona.
E hiki mai ana he poino weli weli ma Amerika Huipuia, e lu ku ia ana na tausani ola me ka mainoino, a pioo ana na lahui kanaka mai kahi pea a kahi pea o ka aina, o keia ka wanana hoopuka ia ae e Kauka A.Ecker o Duluth, Minesota, mahope o ka loaa ana o kekahi hihio pahaohao hou iaia.
O ka hihia mua i hoike ia iaia ua hoea mai no ia he mau mahina mamua iho o ka powa ia ana o Makinile. Ua hoopihoihoi loa ia ke kauka me keia haawina ka mahao i loaa iaia, nolaila, ua hooholo iho la oia e hoike aku ia Peresidena Rusevala no kekahi poino nui e kau mai nei ma o ka lele kaua ia mai paha e kekahi mau aupuni mana nui eha a i ole elima o Europa, a o keia na manao o loko o ka leta ana i kakau aku ai i ka Peresidena:
Ma ka la 27 o ka mahina eha o keia makahiki 1902 ua ike iho la au ma ka hihio i kekahi kapakai o ka Atelanika a i ole o ka Pakipika paha, aole au i maopopo. Oiai au e ku ana maluna o kekahi uwapo a e uaua aua hoi i ke kai, ua ike aku la au he eha mau i'a nui. Ua holo mai la lakou me ka malie me ka pii pu mai me ke kai, a o keia mau i'a he nanaina like loa ko lakou me na mokukaua liili.
Ma ko’u nana ana ae a puni, ua ike iho la au ua hiki ia’u ke iho no lalo o ke kai ma ko’u aoao hema. Iho aku la au no lalo o ka aekai a i ko’u wa i hoea aku ai ilalo ua ike aku la au i ke kai i ka emi hope ana aku. A ia wa i ike aku ai au he mau auwai koko e kahe pu ana me ka wai. Ua hoomau aku au i ka hele ana imua, a ika iho la ua puni ke kahua a'u e hele nei me na i'a make. O keia mau i'a no na wai like ole mai iloko o na waihooluu lehulehu mai ke nui a ka liilii. E like me ka nui o ko'u hele ana aku imua pela ka manoanoa o ke ahu mokaki ana o na i'a make.
Alaila, huli ae la au a hoi hou aku la ihope me ka pii hou ana aku no luna o ka uwapo. A i ko'u hiki ana aku iluna ua uhi hou mai la ke kai a hoi hou ae la e like me kona wa kinohi. I ko‘u nana ana aku ilalo o ka hohonu o ka wai, aia hoi, ua ika iho la au i kekahi o na mau i’a ala a i ole moku me kona ihu ua poino me na puka nunui hoi ma kona aoao.
Mahope koke iho o ia wa ua ike aku la au i kekahi ulu moku nui a ka launa ole, aka, o ko lakou mau iwi kaele wale no nae ke waiho ana.
E wehwehe aku au i keia hihio kupanaha a'u i ike ai, penei:
O na hoike oiaio e hoea mai ana no ia ma keia mua koke iho. O kela mau i'a nunui eha a i ole elima o na mana nui no ia o Europa. E hoohui ana lakou no ka hoao ana e ulupa ia Amerika.
O ka i'a nui me kona poo i hoopoinoia a me na puka nunui ma kona aoao e hoike mai ana ia e loaa ana ia kakou ka lanakila o ka la iloko o ka puikaika nae. A oiai ua kaili ia aku ka nani mai na iwi kaele aku o ko kakou mau moku, ke hoomaopop nei au e hoea mai ana ka hopena o ko kakou malama ana i na mokukaua liilii mahope aku o keia hoohana ana. O ka emi hope ana o ke kai e hoike mai ana ia e noho hoomalu aku ana kakou i ke kai.
O na i’a make i ike ia ma ka aekai a malalo o ka papaku o kaai keia mooana, na auwai koko e kahe ana me ka wai e hoike mai ana ia'u he nui ke koke e hookahe ia ana a me na ola pu e make ana.
Alaila, ike hope ae la au i na moku ma kahi mamao loa, a ike pu aku la hoi au i kekahi daimonio eleele e holo mai ana no kekahi o ko kakou mau awa, e luai ana i ka uwahi a me na mea make o ka luku weliweli mai ka ihu a na aoao. Mahope o ka pau ana ae o ka pouli uwahi aole he mea i ike hou ia maloko o ke awa, aka, o na kia wale no o na moku i piholo. He hoike ana mai keia ua hiki wale no ke komo ia he lehulehu wale o ko kakou mau awa kumoku i keia wa.
E Mr.Peresidena, e kala mai i keia malihini. Aole oe i makaukau no ka halawai ana me keia mau keonimana o na aina e i keia wa ano a i ole i kau hana me ka pupuahulu a me ka holopono loa.
Me ke aloha, Kauka E. Ecker.
Ma ka hoike mua a Kauka A. Ecker no ke hihio mua ana i ike ai, ua olelo ae oia: Oiai, o Makinile e liuliu ana no kona kau elua o ka holo Peresidena ua ulu ae la he mau launa kamaiIio ana ma kekahi papaaina ahiahi ma ko'u home. O kekahi o na keonimana maluna o ua papaaina aia, ua hoike ae no kona hoolauna ia ana me Baraina a me konalulu lima ana me ia i ka la mamua iho. Ua hoike ae oia he lima nui, palupalu a maikai ole kona.
Aia wa au i ike aku ai i ka lima o Peresidena Makinile i ka moe ana mai kekahi aoao mai o ke pakauakau me he la e i mai ana e lulu lima aku. Ua hoike pu ia mai ia'u aole oia e noho ana a hiki i ka pau ana o kona manawa. Ua olelo ae ko'u mau hoaloha no keaha la au i hoike ole aku ai ia Makinile? Ua hoike aku au ia lakou aole oia e maliu mai i ka'u mau olelo e like me Linekona i hoike ia aku ai o kona ae ana aku i kona kau elua e powa ia ana oia. Ua pane mai oia "he nui kana mau hana i koe a e hooko aku ana oia."
I ka wa i ninau ia aku ai no ka hoakaka ana mai i na hoailona ana i manao ai, ua pane mai oia aole oia i makemake e hoi hope aku e wehewehe mai ai.
Ua olelo ae o Kauka Ecker o ka mana o ka wanana ana ua ikaika loa ia me ia i keia wa. He mau mahina i hala kahiko ae o kona wanana ana no ka make o Makinile, a ua poina hoi kekahi poe, aka, i ka wa nae i loaa mai ai na lono mai Buffalo mai no ke kipu ia ana o ka Peresidena, ua hoomanao ae la lakou no ka wanana a Kauka Ecker.
[Ina he oiaio ka wanana a keia haole, alaila, o Hawaii nei kekahi e ike ana i na hiona weliweli o keia kaua, oiai, oia e noho ana he Panalaau no Amerika Huipuia. L. H ]
HOEA O HAKU KITCHENER I LADANA.
Ladana, Iulai 12. Aole he koa wiwo ole i pakela oi aku kona hoohanohano ia ana e like ala me Haku Kitchener i keia la. Ua apo mai oia i na leo ohohia me na haiolelo hauoli i kalokalo ia aku nona e na makaainana a me na alii me na kunou a ne na minoaka ana. Ma na wa a pau ana e panai aku ai i na huaolelo pokole e ike ia aku ana na helehelena pihoihoi maluna ona.
O kona ohaoha no ke Keikialii o Wale a me ka Haku Robata a hiki loa aku i na makaainana he hookahi no ano. He aahu kaki koua e komo ana i nele me na kinohinohi a i kona wa i lele mai ai mai kona kaaahi mai, ua oi ae kona kiekie maluna o na kanaka o kahi hoolulu, a o Haku Robata hoi i kona wa i holo mai ai e lulu lima me kona hoaloha o ka oihana kaua aole loa i hiki kona kiekie i ka poohiwi o ke koa kaulana mai Aferika mai. Ma na aoao a pau o Haku Kitchener e hoopuni ia ana e na aliikoa iloko o na kahiko nani me na medala hoohanohano e anapa ana ma ko lakou mau umauma.
Ua holo pololei aku o Haku Kitchener me na koa malalo o na alakai ana a Haku Robata no ka halealii St James, a mahope o ka paina awakea ana malaila ma ke Keikialii o Wale a me kekahi mau alii kiekie e ae, ua kipa aku la o Haku Kitchener e ike i ka Moi Edewada ma ka Haleallii Bakinehama.
Ua haawi mai ka Moi i kana mau hoomaikai palena ole no Kitchener me ka papahi ana mai i kekahi kea hoohanohano hou no ke koa koulana o Aferika.
AHEWA IA IA MEIA NO KA LAWE KIPE.
Minneapolis, Min., Iulai 9. Ua haawi mai ka aha kiure niele i kna olelo hooholo e ahewa ana ia A A Ames, ka meia o keia kulanakauhale, Fred Ames, luna nui o ka oihana makai a me Jos. Cohen no ka lawe i ke kipe. O ke kumu hoopii ua hookahua ia ia maluna o ka ohi ia ana o kekahi mau dala mai na wahine haumia mai, na Cohen i lawelawe i keia mau hana no ka pono o ka meia a me ka luna makai.
I ka wa i lawe ia mai ai o ka hihia o Meia Ames e hoolohe ia iloko ka aha hookolokolo i keia auina la, he elua kumu hoopii i waiho ia aku nona, oia ka loaa ana iaia he $15 mai kekahi ona hale mai e malama ana i na hale haumia, na ku aku ka loio o ka mea i hoopii ia a noi aku la i ka aha e hoolohe koke ia keia hihia ano ole.
Ua pane mai o lunakanawai Harrison ua like wale no na kanaka a pau i ka aha, a e kali no kela a me keia kanaka no kona kahea e like me na poe e ae.
Ua waiho ia kona hihia no ka hoolohe ia ana ma ka la 14 o Iulai, me ka hookau ia aku o kekahi bona o $5000 maluna ona.
Aole o luna makai Ames a i ole o Cohen i hoolohe ia, oiai, ke kanaka hope aole oia maloko o ke kulanakauhale nei. O ka hihia o Kapena John Fichette o ka oihana makai ua hoomaikai i keia la. Ua hoopii ia oia no ka lawe ana he $200 mai a makai Long aku no kona hookomo ia iloko o ka oihana makai.
UA HALA AKU LA KA ELELE WILIKOKI NO KAUAI.
Ma ka mokuahi Malulani i haalele iho la ia nei i ka Poalua nei i kau aku ai ka Elele Wilikoki a me kana kakauolelo opio D Kalauokalani a me ke Senatoa Kalauokalani a me Lunamakaainana J A Akina no Kauai, no ka hele haiolelo ana no ka pono o ka aoao Home @Rula. E hele kaapuni ana lakou ia mokupuni mamua o ka huli hoi ana mai i ke kapitala nei.